Loe 145
145
Lawa a kiibaa boo
1Davida a Lawa tɔ bɔ ǹ loe n ke.
Maa Lawa, n din nə maa kii lɛa.
Man die n din guguru koe,
man die barka diɛ n din ni miɛ̃ duduu.
2Man die barka diɛ n nɛ lɛawaa tumaa li,
man die n din tɔ boe miɛ̃ duduu.
3Dɛnaa Lawa á gole, wɔ doamaa-n wɔ a guguru kɔ taãn-taãnɛ.
Min ba boe la n na a golebaa kɛ lɛ-doa dɔ̃ wa.
4Biikoo tumaa a minin tá re n nya ǹ dín kɛn boo diɛ ǹ nɛnyaanan manɛ.
Ǹ tá re n boo sii la kɛ laakalɛɛ.
5Ma á die n kaãbaa ǹ siin kɛn boo diɛ,
ka n gugurubaa kɛ nɛ, ka n tɛ-pɛ a siĩnbaa kɛ nɛ.
6Minin tá re n kaãbaa ǹ sii dadaran kɛn boo diɛ,
ma á die n sii dadara zɛnaan kɛn laakalɛɛ.
7Ǹ tá re n yiri koɛ n bǐɛ̃-zɛnaa dadaran kɛn nɛ, ǹ nə ǹ laakalaa.
Ǹ tá re n nyɛnyɛɛ ǹ nə n peperebaa kɛ boo da.
8Dɛnaa Lawa din nə Lawa bǐɛ̃ lɛa, a tá min makara doɛ̃.
A foo a yui fufuu wa, kɔn-narɛɛ ná a foo pã.
9Dɛnaa Lawa n bǐɛ̃ koe min tumaa ganaa,
a na a màn-zɛnaan tumaa narɛ.
10N màn-zɛnaan lɛn tumaa á die n tɔ boe, Dɛnaa Lawa,
n minin tá re barka diɛ n nɛ.
11Ǹ tá re n kiibaa kɛa gugurubaa pii,
ǹ tá re n boo sii la kɛ laakalɛɛ.
12Ǹ tá re n boo sii lan kɛn nyɛɛ minin manɛ,
ǹ tá re n kiibaa kɛa gugurubaa nyɛɛ, ka a siĩnbaa kɛ nɛ.
13N kiibaa lɛ a nyɛɛ wa, a na a tan yǎa duduu.
N pàã lɛ n goɛ̃ yǎa duduu.
Lawa n bɔlɔgoondɛnaa lɛa a da ǹ boo tumaa gɔ́ɔ̃ nɛ,
a zɛnaa ǹ sii tumaa n siĩni.
14Dɛnaa Lawa nə n doe bɔ a mɛnaa wolen tumaa lɛ.
Min mɛnɛn bɛ́ zoɛ̃ maǹ talaa,
a din nə bɛn kuĩ ǹ koɛ lon.
15Min tumaa yii nə n din la, ǹ foo n doa nɛ n din ganaa.
N din nə màn-bii koe ǹ la a biikoo li.
16N din nə n gɔn lɛ buĩ,
n tá màn yiikoonaa tumaa kiɛ̃ ka a dùũ màn-bii ni.
17Dɛnaa Lawa a sii tumaa n pepere,
a zɛnaa ǹ sii tumaa n siĩni.
18Dɛnaa Lawa wɔlɔ á kunu a nyankɔlen tumaa ganaa.
Min mɛnɛn tumaa bɛ́ a nyankoe ka ǹ parsiini,
a wɔlɔ á kunu bɛn ganaa.
19A na a nyɛ́ɛbaama-n wolen foo sii zɛnɛɛ ǹ nɛ.
A nə n too koe ǹ lɛ-dɛ li, a tá ǹ kirisibiɛ.
20Min mɛn tumaa bɛ́ Dɛnaa Lawa narɛ, á re bɛn tamaɛ.
Sɛnɛ, á re min baraan kɛn tumaa bɔ̀n biɛ.
21Ma lɛ á re Dɛnaa Lawa tɔ boe.
Màn tumaa die a barka da Dɛnaa Lawa sonbore kɛ nɛ,
biikoo tumaa li yǎa duduu!
Currently Selected:
Loe 145: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
