Loe 139
139
Lawa a sii tumaa doɛ̃ loe
1Loe-saalin goledɛnaa loe mɛn lɔ. Davida a loe n ke.
Dɛnaa Lawa, n din nə ń ma gɔ́ɔ̃ gɔsɛ, n maa sii tumaa dɔ̃.
2N tá maa waa tán laanka maa yoo doɛ̃.
N din nə n toɛ sɔsɔɔ n tá maa taasiɛ doɛ̃.
3Ta man kanaa, ta man waa-n tán kion,
n din yii n ma ganaa.
N tá maa nya ǹ dín tumaa doɛ̃.
4Ma laan bɛ̀ ma boo bɔ ma lɛ-n ma da,
bɛ̀ nsɛ din dɔ̃ gɔrɔ, Dɛnaa Lawa.
5N din nə ma kio, n din nə ma nyɛɛnɛ, n tá ma tamaɛ.
N din nə n gɔn koe ma lɛ.
6N din a ma dɔ̃ kɛnɛn ke,
kaãbaa ǹ sii ni, á kiɛ̃ maa sii-doɛ̃ la.
Á la yii ni, ma ba a giala miɛ wa.
7Man die woe maa, ma wɔlɔ tɔn lui n ganaa?
Man die baa sii ma wo maa, n nə́ n ba ma yii wa?
8Bɛ̀ má dii má woo lon, n bɛ́ walan.
Bɛ̀ má gisĩ tán geren piɛ, ń ke!
9Bɛ̀ má yoo má woo haalɛ lɛ̀giala-n,
hinlaa bɛ̀ má woo giã haalɛ lɛ̀nyɛɛnɛ,
10haalɛ walan dɔ nɛ, n din nə ma kuĩ ma gɔn ganaa,
n din nə ma kuĩ ka kaka.
11Bɛ̀ má pɛ máa wɔlɔ tì sɛ nə n kuməə ma lɛ,
ma bɛ́ lɛawaa mɛn gɔ́ɔ̃ nɛ, bɛ nə́ n bɔyaa á tèlò baa,
12haya, wɔlɔ bɛ́ a ba tì koe nsɛ ganaa wa.
Tèlò n foaã nɛ ka lɛawaa nɛ,
wɔlɔ tì n ka tɛ fúlu bɛ́ lɔn n yii li.
13N din nə ń ma gɔ́ɔ̃ zɛnaa,
ń ma gùn wɔwɔ kɔn lɛ ma dan gɔ́ɔ̃ nɛ.
14Dɛnaa Lawa, ma á barka diɛ n nɛ.
N ma zɛnaa ka yɔrɔ mɛn nɛ, kaãbaa ǹ sii ni.
Ma á doɛ̃ taãn-taãnɛ,
n zɛnaa ǹ siin lɛn tá kaãbaa diɛ.
15Ma wen ba durii ni n ganaa wa.
A giala n din nə ń ma zɛnaa bǎã durii ni,
ń ma gùn wɔwɔ kɔn lɛ maa náa gɔ́ɔ̃ nɛ.
16Ma laan bɛ̀ ma yɛ, bɛ̀ n yii tá ma ganaa.
Lɛawaan mɛnɛn nə n kɔ ma la, má n die zɛnɛɛ kanaa,
ń bɛn tumaa kiɛ̃ n sɛ́wɔ kɛ nɛ,
bɛ̀ ǹ tɔn nə n giala kɔ wa.
17E Lawa! N bɛ́ siin mɛnɛn taasɛ, ǹ doɛ̃ á kaka ma ganaa.
Ǹ nə́ mɔnaa ǹ nə́ la yii ni.
18Má goã máa ma nə ǹ nimii,
sɛnɛ, ǹ nə́ mɔnaa ǹ nə́ la nyɔɔsɔ̃ nɛ.
Haalɛ ta má ǹ nimi má nya,
ma ba re n sii giala miɛ ma nya wa.
19Lawa, n die n min baraan kɛn dɛ.
Gɛ̀-dɛlen kɛn loo n nə ǹ bɔ ma ganaa.
20N zɔ́ɔn man minin bebele ka n din tɔ nɛ,
maǹ sii baraa zɛnɛɛ ka n din tɔ nɛ.
21Min mɛnɛn bɛ́ n biɛ zɔ́ɔ, masɛ dɔ n bɛn biɛ zɔ́ɔ.
Min mɛnɛn bɛ́ zia diɛ n ganaa, bɛn tìĩ n boe-n ma dɔ nyin ni.
22Má ǹ baa zɔ́ɔ á kiɛ̃ a bǎã la,
má ǹ baa ma din a zɔ́ɔn lɛa.
23Lawa, ma gɔsɛ, n ma gɔ́ɔ̃ dɔ̃.
N da ma gɔ́ɔ̃ li, n maa taasiɛ dɔ̃.
24N din ga a ganaa bɛ̀ má zii baraa saa.
N din ma da n zii kɛ la yǎa duduu.
Currently Selected:
Loe 139: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
