Suu 7

Lɔ naarɛɛbaali n kan lɛa

1Maa nɛ, n yiri koa maa boon kɛn li, n maa doroon kɛn tamaa parsiini. 2Bɛ̀ n tá li n yii goã koo, maa dí-pɛn kɛn tamaa, ka maa daraan kɛn nɛ ka gɔn màn giɔ̀mɔ kaka bɛ́ lɔn. 3N gɔn paraa ǹ ganaa, n nə ǹ tamaa n foo ne. 4Ga sii-doɛ̃ ganaa ka n miãnɛn bɛ́ lɔn, n ga yiridɛnaabaa ganaa n giaára lɛa. 5Ǹ tá n kanbiɛ lɔ kɔrɔ ganaa, lɔ mɛn bɛ́ n ba doɛ̃ wa, a lɛ gɔ́ɔ̃ ǹ boo n paparɛ.

Lɔ kɔrɔ a minin kũ ǹ boo

6Ǹ kɔn pinaa, man golee ne maa kion a fenɛtərə lɛa, má n yii kɔ a mɔnaa koo ne. 7Ma nɛ tenən yɛ, goon nə ǹ bii yiriwɛɛnaa lɛa. 8Á kiɛ̃ á pii zii saa kunu lɔ kɔrɔ goon a kion ganaa, á woo kion lɛ-a sɔnsɔn. 9Wasamiɛ̃n nɛ, wɔlɔ tì li, wɔlɔ nyín giɛ̃-a. 10Lɔ lɛ daa n da lɛ. A wɔ ǹ mɔnaan man ka lɔ kɔrɔ wɔn bɛ́ lɔn, minin sã wole lɛa. 11Bɛa lɔ lɛ yii n kaka, sìi goon din ba-a wa. A boe la á giɛ̃ kion wa. 12A n we dɔndɔɔnən nɛ, zaman bǎãn nɛ, n yii diɛ minin la biikoo tumaa li. 13Á tɔntɔraa lɛ kũ, á n sɔɔ a nɛ, á pɛ nɛ ka foo tãbaa nɛ: 14«Ma bɛ́ má n lɛ kɔ Lawa la ka wúlu mànan mɛnɛn nɛ, má bɛn bɔ pelo. Bɛa siĩ tá ma li kion. 15Bɛ lɛ nɛ, má soo ma á n diɛ n lɛ. Man giɛ n li, á ke má n yɛ. 16Má maa waa ǹ piì yɔrɔ bɔ, má Ezipti mɔnaa sonboren naa la. 17Má *miíri nyɔɔ gìĩ kɔɔ̃n pɛsɛ̃ la. 18Daa wɔ n tan, wɔ n dinin foo kɔɔ̃n kɔ, yǎa biɛ̃ baayɛlɛ. Wɔ á re foo kɔɔ̃baa yii kun. 19Ma zuũ a piɛ wa. Á woo zii sɔsɔɔ nɛ. 20Á woo ka wɔrɔ gigiã nɛ, a ba n bɔyɛɛ a daa bɛ̀ mui a lɛ̀ waa kanaa waáraa bie wa.» 21Á bɛa yiri sã ǹ boon lɛn da á nɛginin lɛ gù dɛ nɛ, á kũ á kiɛ̃ nɛ ka bɛa boo paparan lɛn nɛ. 22Á bɔ á mɛ lɔ lɛ kio kəni ka dii bɛ́ woe a dɛ ǹ bǎã-n lɔn. Ka kòso nɛ bɛ́ lɔn, giĩ yiriwɛɛnaa lɛ n woe a dɔlɔ bɔ ǹ bǎã ganaa, 23yǎa bɛ̀ gɔn dɔ a ganaa ǹ mɛn waáraa, a n gɛ̀ bɔlɔ pii. A n ka bàan nə́ ke n nanaɛ̃ lɔn woe n doe zɔ̀ɔ nɛ, a ná a ba doɛ̃ mà nyin nya ǹ bǎã-n wa.

24Kanna kəni, maa nɛ, ma bɛ́ boon mɛnɛn pii n ni, n too kɔ ma lon, 25n nyan toa lɔ kɛ miã nə n foo si wa. N nyan nə n saa li wa. 26A giala, a basaã kɔ min mɛnɛn manɛ, ǹ tá gigiã. A gɔn dɔ min kakan dinin ganaa. 27Bɛ̀ n woo a li, ma nə́ n woo gɛ̀ li, ma nə́ n woo geren piɛ.

Currently Selected:

Suu 7: SBPE2011

Highlight

Copy

Compare