Suu 6

Mìi wɔ min a giɔ̀mɔ saa boo

1Maa nɛ, n nə́ n mìi wɔ min a giɔ̀mɔ saa boo-n ya? 2Ń boo da hinlaa ń lɛ kɔ wɔ bɛa paǹ li ya? 3Bɛ̀ á miɛ̃, ń bɛ́ re ń sii giɔ̀mɔ dɛnaa la lɔn, bɛ á ke: Wo goã-kũ da a ganaa, n nə n laa a ganaa, n na a nyankɔ. 4N nyan giã bii-a kooro ń nə n ba sii kɔn zɛnɛɛ wa. N nyan nyuù naa n yii-a bɛ̀ a yɔrɔ ná a n bɔ wa. 5N din si ka yuùn wɔ bɛ́ lɔn, ka sia bɛ́ lɔn, n din sii, a kũ ǹ biɛ nɛ.

Yoo-baali doroo

6Yoo-baali! Ga bonboon ganaa. Ga a giã ǹ gɔn ganaa, ń tá re sii-dɔ̃li biɛ. 7Mìinaa ba bonboon lɛ la wa, a lɛduə̃li banban, a goledɛnaa banban. 8Sɛnɛ, a n màn-bii soekɔn biikoo sonbore li. Kaa-piɛ waáraa, a n màn nàn goɛ koɛ. 9Nsɛ yoo-baali, ma n die goɛ̃ waa-n tán yǎa biĩ kəni? Ń yii n die kiɛ biĩ? 10#Suu 24.33-34 Nyuù boɛɛn wɔ, ń narɛɛ boɛɛn wɔ, ń waa tán boɛɛnɛ, n nə gɔnɔn kaa n kolo-n. 11Bɛa waáraa kəni, doobaabaa n die kirii n la ka wurumu bɛ́ lɔn, nɔmaa wɔ n lɛ ka mɛnaa minin la wole bɛ́ lɔn.

Sii mɛn bɛ́ soɛ-bɔle yii

12Min mɛn bɛ́ tɔ woe ka soɛ nɛ a lɛ-n, min kooro ne, sii baraa zɛnaa li ni. 13A nə n yii boe minin li, a nə n gòã toe tán, á n gòon yiɛ ǹ li. 14A gɔ́ɔ̃ n tì, a n taasiɛ baraa we biikoo yii li. A n zia yiɛ. 15Bɛ lɛ nɛ, sàabaa ba la wa, a mɛnaa n bǎã goon lɛa, a yɔyɔrɛɛ a re boe dí wa.

Màn mɛn tìĩ bɛ́ boe-n Lawa nɛ

16-19Sii sɔrɔ na a tan ǹ tìĩ n boe ne Dɛnaa Lawa nɛ,

a ná a ba ǹ sii a ganaa duduu wa.

Yii tá lon wole ne,

soɛ-bɔle ne,

yii tì-a dɛ wole ne,

tán dù-bosoli ni,

min mɛn goã bɛ́ siɛ

sii baraa zɛnaa li,

siére baraa-pɛli ni.

Sɛnɛ, a sɔbaabaa ǹ wɔ tan:

Min mɛn bɛ́ dɔɔ̃ngiĩ

hinlaa dɔɔ̃lɔn kiɛ kɔn,

bɛa dɛnaa tìĩ n boe ne

Dɛnaa Lawa nɛ.

Din kũ naarɛbaa ganaa

20Maa nɛ, kɔ n di a doroo n boon lɛ. N nyan nə n piã ka n dan a daraan kɛn nɛ wa. 21Ǹ tamaa n foo ne biikoo yii li, n nə n paraa ǹ ganaa. 22Bɛ̀ ń tá tɔ we, ǹ tá re n nyɛɛnaan boe, bɛ̀ n waa tán, ǹ tá re n tamɛɛ. Bɛ̀ n yii kaa, ǹ tá re n doe n lɛ. 23Doroo n ka bolon bɛ́ lɔn, daraa n wɔlɔ fúlu lɛa. Gɔn waa manɛ n min yii buĩ. A n yiikoonaabaa ǹ zii lɛa. 24Lɔ mɛn a giã ǹ gɔn bɛ́ baraa, á re n kanbiɛ bɛ ganaa, ka lɔ mɛn bɛ́ n nə n ba doɛ̃ wa, a boo n minin siɛ̃. 25N baran n saa bɛ miã lɔ kɛ lɛ a siĩnbaa li wa, n nyan nə saa a yii bɔ mali li wa. 26A giala, wɔrɔ boɛɛn tá lɔ kɔrɔ-baali yii kiɛ̃. Sɛnɛ, giã kũ ka lɔ mɛn bɛ́ zuũ li, bɛ n nyin nyɛɛ. 27Bɛ̀ n tɛ nàn kaa n zéwo ne, tɛ n yui n mɔnaa ganaa. 28Bɛ̀ n tɔ tɛ nàn la, tɛ nə n goã kuĩ. 29Min mɛn bɛ́ baa sii ǹ miã kɔsɔ a lɔ kio, a din yii goon ne. Bɛ̀ n mɛn nə n gɔn da a ganaa, ń tá re a mìi gɔ́ɔ̃ ǹ sii yii. 30Bɛ̀ min màn-bii koã á bii, ǹ ba pɔpɔsɛ bɛa lɛa wa. 31Bɛ̀ ǹ nə́ kũ, a doamaa nɛ a na a la man sɔbaa saraa. Maǹ a gɔn màn tumaa sii la. 32Sɛnɛ giĩ mɛn bɛ́ naarɛbaa zɛnɛɛ kun ka lɔ mɛn bɛ́ zuũ li, yiriwɛɛnaa nɛ. A na a din a yiikoonaabaa ziziɛ̃. 33A n die mandɛ yii, a yii á gugurubaa á re nyɛɛ, sìi kũ. 34Sonbore, lɔ lɛ zuũ foo á re yui foo busii taman yii. Bɛ̀ a tá a gɛ̀ dòo boe, a re makara doɛ̃ wa. 35A re wɔrɔ sii goã kũ ǹ màn lɛa wa. Ta ǹ ná a lon pã ka bǐɛ̃baa ǹ màn nɛ, a yiri ba n bɔyɛɛ wa.

Currently Selected:

Suu 6: SBPE2011

Highlight

Copy

Compare