Suu 8
8
Sii-doɛ̃ n lɛ dia we
1 #
Suu 1.20-21
Sii-doɛ̃ n lɛ dia we,
yiridɛnaabaa nə n lɛn siɛ lɔn.
Ka a miɛ̃ wa?
2Kelen mɛnɛn mìi la
bɛ́ yii zii gialaa,
ziin bɔ kɔn-a bǎãn nɛ,
yiriwoorobaa n golee-n walan.
3A nə n lɛ dii kunu
kiɛnlɛn ganaa,
kiwi lɛ a wɔ ǹ bǎãn nɛ,
ka kiɛ̃ ǹ bǎãn nɛ.
4«Kasɛn minbuiin nɛn,
man ka dinin bíi we.
Man boo diɛ ka dinin tumaa nɛ.
5Kasɛn mɛnɛn doɛ̃ bɛ́ a tɛ wa,
ka n daraa sii giala ma ganaa.
Kasɛn mɛnɛn bɛ́ yiriwɛɛnaan lɛa,
ka ga sii-doɛ̃ li.
6Ka n too kɔ sɔnbɔraanɛ,
man die boo wenaa diɛ ka nɛ,
man die diɛ ka a fubaa nɛ.
7Taãn nɛ, man sonbore pii.
A giala,
soɛ boon tumaa tìĩ n boe-n ma nɛ.
8Ma bɛ́ boo mɛn tumaa diɛ,
maǹ ka te.
Ma a minin sã ǹ boon diɛ wa,
ma a soɛ boe wa.
9Min mɛn yiri bɛ́ á tan,
bɛ n giɛ maa boon kɛn ganaa
boo peperen lɛa.
Min mɛn bɛ́ sii-dɔ̃li lɛa,
bɛ nə ǹ kuĩ ka a parsiini.
10Ka maa daraan kɛn narɛ
a la wɔrɔ nɛ,
ka doɛ̃ tamaa a la sana nɛ.
11Taãn nɛ, masɛ sii-doɛ̃,
barka tá ma nɛ á la
nyaǹ mànan manɛ,
ma giɔ̀mɔ á kaka á la
foo sii màn tumaa nɛ.»
Sii-doɛ̃ nə n din nyɛɛ
12Masɛ sii-doɛ̃,
ma ba n niɛ̃
taasiɛ sonbore ganaa wa.
Man taasiɛ we ma tɔn sii zɛnaa.
13Sii baraa tìĩ a bɔ ma nyin ni,
n nyɛɛbaa Dɛnaa Lawa yii-n lɛa.
Din koa nɛ, bɔlɔ baraa nɛ,
sii bɔbɔnɛɛ laanka soɛ nɛ,
bɛn tìĩ n boe-n ma nɛ.
14Doroo laanka gɔn waa n
masɛ wɔ lɛa.
Ma din ni sii-doɛ̃ lɛa,
pàã n ma din lon.
15Ma din barka nɛ,
kiin man kiibaa zɛnɛɛ,
kiri-kurulin man kiri pepere we.
16Ma din barka nɛ,
kiãn laanka min golen
man nyɛɛnaan boe,
kɔnlɛ ka min mɛn tumaa bɛ́ kiri kuri.
17Min mɛnɛn bɛ́ ma narɛɛ,
ma dɔ n bɛn narɛ.
Min mɛnɛn bɛ́ giɛ ma li,
ǹ ba foɛ̃ ma li wa.
18Ma din ni naforo koe,
ka gugurubaa nɛ.
Gɔn màn mɛn bɛ́ beleboe,
ma din nə bɛ dɔ koe.
19Là tá maa bǐɛ̃ ganaa
á la sana yoreen ne.
Maa man-gɔ dɔ á soɛ
wɔrɔ gɛlɛ taãn-taãn kɛ nɛ.
20Man tɔ we peperebaa zii la.
Zii mɛn bɛ́ ǹ nə́ dí-pɛn tamaɛ la,
maa wɔ n ka bɛ nɛ.
21Min mɛnɛn bɛ́ ma narɛ,
man bǐɛ̃ biɛ bɛn la,
ma ǹ kion pã ka gɔn màn
giɔ̀mɔ kakaan nɛ.
22 #
SNS 3.14
Dɛnaa Lawa
na á ma zɛnaa bibinaa nɛ
á tɔ́n màn gialakun
kɔsɔn kɛn zɛnaa.
23A na á ma din zɛnaa lɛlɛ lɛlɛ,
màn tumaa a giala kɔ waáraa,
bɛ̀ tán tɔn nə n zɛnaa wa.
24Ma bɛ́ yii,
bɛ̀ yisi mu banban wa,
bɛ̀ mu yala banban wa.
25Kelen laan bɛ̀ ǹ nə n zɛnɛɛ,
tentenen laan bɛ̀ man yii,
bɛ̀ masɛ yɛ.
26Bɛa biikoo lɛ li,
bɛ̀ Dɛnaa Lawa tɔn
tán laanka wurun zɛnaa wa,
bɛ̀ a tɔn tán-a gusuũ
nàn bibinaa zɛnaa wa.
27A bɛ́ lon zɛnɛɛ ǹ mɛn waáraa,
bɛ̀ ma tan.
A bɛ́ yìsi mu lɛ dan boe
ǹ mɛn waáraa,
bɛ̀ ma tan.
28A bɛ́ labaran koɛ lon
ǹ mɛn waáraa,
bɛ̀ ma tan.
A bɛ́ pàã koe tán a mu yalan la
ǹ mɛn waáraa,
bɛ̀ ma tan.
29A bɛ́ lɛ dan koɛ
yìsi mu la ǹ mɛn waáraa,
a bɛ́ n gɔn wɛɛ yìsi mu ni mà a baran bɛ la bɔ wa,
a bɛ́ tán goã daɛ ǹ mɛn waáraa,
bɛ̀ ma tan.
30Man má goã a li,
má n dí nyɛɛ kun ni.
Man má goã kɔɔ̃n
a ganaa baraabaraa,
ma nə n nyɛnyɛɛ
biikoo tumaa li a yɔrɔ-a.
31Ma nə n nyɛnyɛɛ a din a
kanaa kɛ dɔ gɔ́ɔ̃ nɛ.
A n kɔɔ̃n ma ganaa
ma goã minbuiinin bii.
Min mɛn bɛ́ n too koe sii-doɛ̃ lon, gɛ̀rɛsiɛdɛnaa nɛ
32Kanna kəni maa nɛnyaanan lɛn,
ka n too kɔ ma lon.
Ma bɛ́ boo mɛn diɛ,
min mɛnɛn bɛ́ n too koe bɛ li,
bɛn foo á re kɔɔ̃n koe.
33Ka n too kɔ
maa gɔn waa ǹ boon li,
ń giɛ ka á sii-dɔ̃lin biɛ.
Ka nyan nə n piã ǹ nɛ wa.
34Min mɛnɛn bɛ́ n too koe ma lon,
bɛn wɔ á re bǐɛ̃ koe.
Maǹ lɛ̀ wɛɛ maa kiɛnlɛ-a baraa nɛ.
Maǹ maa kion a
wɔ ǹ kiɛnlɛ lɛduĩ.
35Taãn nɛ, bɛ̀ min mɛn ma yɛ,
a na á yiikoonaabaa yɛ.
A sii n kɔɔ̃n koe
Dɛnaa Lawa ganaa.
36Sɛnɛ, bɛ̀ min mɛn ma dɔ̃ wa,
a n busu lɛa ǹ Dɛnaa ganaa.
Ma tìĩ bɛ́ boe-n
min mɛnɛn tumaa nɛ,
bɛn man gɛ̀ narɛ.
Currently Selected:
Suu 8: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
