Suu 5

Gɔn waa manɛ lɔ kɔrɔ a paǹ li

1Maa nɛ, ń yiri kɔ sii-doɛ̃ boon kɛn li ma á n darɛɛ ǹ ganaa, n nə n too kɔ maa doroon kɛn li ma á ǹ koe n la. 2Ń tá re yiridɛnaa biɛ, ka bɛ dɔ nɛ, n da ǹ boon tá re yiridɛnan wɔ biɛ. 3A giala, min kɔsɔ a lɔ lɛ gɔ́ɔ̃ ǹ boo maǹ paparɛ ka zoo nyɔɔ bɛ́ lɔn, susuu á la nyɔɔ nɛ. 4Sɛnɛ, a nə n gɔn nyɔmiɛ̃ kɔɔsɛ ka sèwò bɛ́ lɔn. A n baraa ka gɔya sa lɛ bɔle bɛ́ lɔn. 5Bɛa lɔ kɛ miã a giã ǹ gɔn nə gɛ̀ koe min la. A gòã goɛ̃ n woe yala ganaa. 6A ba yiikoonaabaa ǹ zii siɛ wa. A siɛ̃ zii ganaa a ná a ba doɛ̃ wa. 7Kanna kəni maa nɛ, n too kɔ ma lon. N nyan nə n piã ka maa doroon kɛn nɛ wa. 8N wɔlɔ lui bɛa lɔ kɛ miã ganaa, n nyan toa n nə n mɔrɔ a kiɛnlɛ ganaa wa. 9Bɛ bie wa, n tɔn kiɛ̃ n nə n din kɔ min kɔsɔ la, n nə n din nyin wɔ makara doɛ̃ baã wole gɔn. 10Bɛ bie wa, n tá re dí nyɛɛ tiin manɛ, n gɔn màn nə min kɔsɔ wɔ baa. 11N tɔn kiɛ̃ n ginii wɔ n lɛ nyɔmiɛ̃ biikoo li, bɛ̀ n pàã bɛ á nya. 12Bɛa waáraa kəni, n tá re pii: «A na á saa lɔn má daraan tii, man piã ka doroon ne? 13Wàa na á baa man too kɔ maa mìinaan boo li wa, man too da maa daraalin lon wa? 14Á ke! Kanna kəni, koe n boe ma ganaa maa zaman bii, maa minin bii!»

Ń tenmaa waáraa lɔ narɛ

15N lɔ n ka mu piã bɛ́ lɔn, n dinsɔɔ̃ bɛa mu kɛ lɛ mi. 16N nyan toa bɛa mu lɛ baa si a soo kanaa hinlaa a wo pii-n wa. 17Toa a goã n dinsɔɔ̃ wɔ lɛa, n nyan gii kɔn ka tiin ni wa. 18Toa n foo kɔɔ̃n kɔ kun ka n tenmaa waáraa lɔ kɛ nɛ. 19A siĩnbaa n ka yuùn wɔ bɛ́ lɔn. Toa a kɔn-narɛɛ goã n foo ne, a n foo kɔɔ̃n kɔ biikoo yii li. 20Maa nɛ, wàa na á baa n nə́ min kɔsɔ a lɔ narɛ, n nə n gɔn talɛɛ lɔ kɔsɔ tìã bii? 21Dɛnaa Lawa yii-n minbuiin nɛ tumaa a zɛnaa ǹ siin ganaa, a tá ǹ ziin tumaa doɛ̃. 22Min baraa n mɛnɛɛ a din a kan nɛ. A din a sii baraa lɛ nə n pɛnɛ a ganaa ka kan bɛ́ lɔn. 23Min mɛn bɛ́ a boe a din la wa, a n giɛ̃. A gàãn gole lɛ n diɛ papaã ganaa.

Currently Selected:

Suu 5: SBPE2011

Highlight

Copy

Compare