Suu 28
28
1Min baraa n baa la,
a da yaa min kɔn dɔ ba
a kio lui wa.
Min pepere n ka yàra nɛ bɛ́ lɔn
a foo n doa nɛ.
2Bɛ̀ gána á gòãn dii la,
a kiin man mɔnaa nɛ.
Sɛnɛ, bɛ̀ a nyɛɛnaandɛnaa
goon sii dɔ̃,
yiridɛnaa lɛa,
a kiibaa gòã n we tán.
3Pàã zɛnaali mɛn bɛ́
mɛnɛɛ doobaan la,
a n ka kaa-piɛ waáraa
la bɛ́ lɔn màn tumaa ziziɛ̃.
4Min mɛnɛn bɛ́ ǹ ba koe
dí-pɛn lɛ wa,
maǹ min baraan laakalɛ.
Sɛnɛ, min mɛnɛn bɛ́ koe dí-pɛn lɛ,
bɛn manə n gòãn dii ǹ ganaa.
5Min baraa ba boo kɔn
giala miɛ dí-pɛn gɔ́ɔ̃-n wa.
Sɛnɛ, min mɛnɛn bɛ́ giɛ
Dɛnaa Lawa li,
bɛn ta a tumaa giala miɛ.
6Doobaa mɛn a giã ǹ gɔn
bɛ́ pepere,
á soɛ pàãma mɛn bɛ́ koe
zii kɔkɔrɔ lɛ nɛ.
7Nɛnyaan mɛn bɛ́ koe
dí-pɛn lɛ, yiridɛnaa nɛ.
Sɛnɛ, n mɛn bɛ́ koe
sii baraa zɛnaa wolen lɛ,
a n sìi diɛ ǹ di ganaa.
8Min mɛn bɛ́ wɔrɔ giɔ̀mɔ diɛ
minin ganaa ka là gole-n la,
ta á pàãma baa,
a gɔn màn lɛ n die min kɔsɔ wɔ biɛ,
min mɛn bɛ́ doobaa makara doɛ̃.
9Min mɛn bɛ́ n too tiɛ̃
màn mɛn bɛ́ toɛ a nyan dí-pɛn ma wa,
a Lawa nyankɔ dɔ din nə
sii bɔbɔnɛɛ lɛa.
10Min mɛn bɛ́ min peperen siɛ̃
ǹ kiɛ sii baraa nɛ,
a nyankɔrɔ mɛn fɔ̃,
a din nə die n doe a nɛ.
Sɛnɛ, min sonboren tá re
là nyantoro yii.
11Pàãma n taasɛ mà asɛ n
sii-dɔ̃li lɛa.
A da yaa doobaa mɛn
bɛ́ yiridɛnaa lɛa,
bɛ á doɛ̃ taãn nɛ a bɛ màn
mɛn lɛa sonbore.
12Min mɛnɛn bɛ́ sii bǐɛ̃ zɛnɛɛ,
bɛ̀ ǹ nə́ gɔ̀lɔ̀baa yɛ,
a n zɔ́n gole lɛa.
Sɛnɛ, min mɛnɛn bɛ́
sii baraa zɛnɛɛ,
bɛ̀ bɛn nə́ pàã saa,
min tumaa nə n duri.
13Min mɛn bɛ́ a siɛ̃n duri,
a sii a bǐɛ̃ koe wa.
Min mɛn bɛ́ a siɛ̃n doɛ̃,
a nə́ ǹ toɛ walan,
maǹ makara boe bɛ ganaa.
14Min mɛn bɛ́ yiri boe a din li,
bɛ wɔ na á bǐɛ̃ kɔ.
Sɛnɛ, laa sii-a wole wɔ n ka koe ne.
15Nyɛɛnaadɛnaa baraa mɛn bɛ́
boe doobaa zaman yii ni,
bɛ n goon ka yàra mɛn bɛ́ wɔɔsiɛ̃,
ka gòon màn gole mɛn bɛ́ parɛ.
16Nyɛɛnaandɛnaa yiriwɛɛnaa
a dí n ka minin koã nɛ.
Sɛnɛ, bɛ̀ min mɛn nə́ n piã
ka mɛnaa minin la nɛ,
á re nyin sasa yii.
17Gɛ̀-dɛle á re baa sii
yǎa a yala ganaa.
Min nyan kurəə wa.
18Min mɛn a giã ǹ gɔn bɛ́ pepere,
á re yiikoonaabaa yii.
Sɛnɛ, min mɛn a giã ǹ gɔn bɛ́
yɔrɔ paa la,
a nyin nə die goɛ̃ a goon ne.
19Min mɛn bɛ́ a wuru kɔsɛ,
màn-bii a re nyaabiɛ a ganaa wa.
Sɛnɛ, màn mɛn bɛ́ là ba
a ganaa wa,
min mɛn bɛ́ n parɛɛ bɛ-a,
á re goɛ̃ doobaa lɛa duduu.
20Barka n die n diɛ
bɔlɔgoondɛnaa ganaa.
Sɛnɛ, min mɛn bɛ́ n nanaɛ̃
mà asɛ pàãma baa,
ǹ ta re dɔlɔ diɛ a mìi ni
ǹ kɔn pinaa.
21Bɔnbii-a wɔ a siĩn wa.
Sɛnɛ, bǐɛ̃ boɛɛn tá boe la
a min bɔyaa a bɔ a peperebaa la.
22Min mɛn bɛ́ baa sii naforo kio,
a ba doɛ̃ mà doobaabaa á re yii wa.
23Sɛ̀-pɛma-a á soɛ laakalaa nɛ.
24Min mɛn bɛ́ ǹ di laanka
ǹ dan koɛ̃,
a n pii mà: «Sii baraa bie wa,»
a soɛ denzuu n wa.
25Min mɛn foo bɛ́ wuu pii,
a n zia yiɛ.
Sɛnɛ, min mɛn bɛ́ n foo doɛ
Dɛnaa Lawa ganaa,
á re pàãma biɛ.
26Min mɛn foo bɛ́ doa nɛ
a din ganaa,
yiriwɛɛnaa nɛ.
Sɛnɛ min mɛn bɛ́
sii-dɔ̃lin giã we,
á re kirisibiɛ baraa ganaa.
27Min mɛn bɛ́ doobaan goe,
màn kɔn ba nyaabiɛ a ganaa wa.
Sɛnɛ, min mɛn bɛ́ n yii tiɛ̃ ǹ ganaa,
lɛn baraa bíi na a kio.
28Bɛ̀ min baraan nə́ pàã saa,
min tumaa nə n duri.
Bɛ̀ ǹ nə́ gã, bǐɛ̃-zɛnaali n mɔnɛɛ.
Currently Selected:
Suu 28: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
