Suu 29
29
1Min mɛn bɛ́ a lɛ koe
doroo ganaa wa,
sàabaa ba la wa,
á re ziziɛ̃ bǎã goon ne.
2Bɛ̀ min peperen nə́ pàã saa,
zaman nə n nyɛnyɛɛ.
Sɛnɛ bɛ̀ min baraa pàã saa,
zaman nə gungunun sii.
3Min mɛn bɛ́ sii-doɛ̃ narɛ,
bɛ̀ nə ǹ di foo kɔɔ̃n koe.
Sɛnɛ min mɛn bɛ́ n parɛɛ
lɔ kɔrɔn ganaa,
a na a wɔrɔ tumaa nyɛɛ.
4Kii mɛn bɛ́ koe dí-pɛn lɛ,
a gána a naforon gòã n doɛ.
Sɛnɛ, ǹ mɛn bɛ́ nyin giɔ̀mɔ sii
á la yii ni,
a na a gána yui.
5Min mɛn bɛ́ ǹ miãn bebele,
a n kan koe a din ni.
6Min mɛnɛn bɛ́ sii baraa zɛnɛɛ,
ǹ sãn man kan lɛa ǹ ganaa.
Sɛnɛ, min mɛnɛn bɛ́ sii bǐɛ̃ zɛnɛɛ,
manə n nyɛnyɛɛ ǹ nə́ bɛ̀ biɛ
ka foo kɔɔ̃n nɛ.
7Min pepere nə n yiri koɛ
doobaa li,
bɛa yiri ba min baraa lon wa.
8Boo wɔkɔn wolen man
kiwi lɔlɛkɔn.
Sɛnɛ, sii-dɔ̃lin man kiwi
minin foo wɛɛ.
9Bɛ̀ sii-dɔ̃li á kiri we kɔn
ka baãnaa nɛ,
a foo á boe la a yoo
hinlaa a yaa wɔ,
sɛnɛ a ba n boe a-n wa.
10Min sonboren tìĩ boemaa nɛ
gɛ̀-dɛlin manɛ,
sɛnɛ min peperen man koɛ
kunun ǹ ni.
11Baãnaa na a foo-yoo
tumaa nyɛɛ.
Sɛnɛ, sii-dɔ̃li nə n diɛ a wɔ lɛ,
a da waa ganaa.
12Bɛ̀ kii lɛ kɔ á n too kɔ soɛn li,
a dí-nyali tumaa n min bɔnɛɛ biɛ.
13Doobaa nɛ ka min mɛn
bɛ́ mɛnɛɛ doobaa la,
sii goon nə ǹ doɛ kɔn:
Dɛnaa Lawa yii nànan kɔ
ǹ dinin paanan la.
14Bɛ̀ kii á kiri kuri doobaan la
ka peperebaa nɛ,
a pàã goã n woe tán miɛ̃
yǎa duduu.
15Mandɛ ka sɛ̀-pɛma-a n yiri
koe min la.
Sɛnɛ nɛnyaan mɛn bɛ́ ǹ ba
n gɔn diɛ a ganaa wa,
a n sìi diɛ ǹ dan ganaa.
16Bɛ̀ min baraa á gigiã,
gɛ̀ dɛ n mɔnɛɛ.
Sɛnɛ, ǹ kɔn pinaa,
min peperen tá re bɛa minin
kɛn lɛn mɛnaa yii.
17Dɔlɔ bɔ n nɛ ganaa
sɔnbɔraanɛ,
n tá re goɛ̃ yii-nyɛɛ la.
Ka bɛ nɛ, á re n foo kɔɔ̃n koe.
18Bɛ̀ sii-nyaan banban wa,
zaman nə n gɔn boe a din-a.
Min mɛn bɛ́ koe dí-pɛn lɛ,
bɛ foo á re kɔɔ̃n koe!
19Ǹ bie dí-nyali doree
ka boon wa.
Ta á ma, a koe lɛ wa.
20Bɛ̀ min tá boo diɛ a na a ba
n taasɛɛ wa,
baãnaa á soɛ bɛa dɛnaa nɛ.
21Bɛ̀ n nə́ n bɛ̀rɛ ziziɛ̃ a yoo
tán waáraa,
a n yoo-baali biɛ.
22Foo goledɛnaa n zia yiɛ,
a n sii baraa gigiã zɛnɛɛ.
23Min mɛn bɛ́ n din gole koe,
bɛa dɛnaa á re boɛɛn koe.
Sɛnɛ, min mɛn bɛ́ n din boɛɛn koe
bɛa dɛnaa tɔ á re boe.
24Min mɛn bɛ́ n naɛ kɔn
ka wurumu ni,
a n mɛnɛɛ a din la,
Lawa bíi mɛn bɛ́ a kio á bɛ doɛ̃,
sɛnɛ a ba wurumu lɛ giala
diɛ kanaa wa.
25Nyɛ́ɛ n kan lɛa min kuĩ.
Sɛnɛ, min mɛn bɛ́ n din sii
we Dɛnaa Lawa gɔn,
bɛa dɛnaa tamaamaa nɛ.
26Min gigiã n giɛ
goledɛnaa a laakalaa li.
Sɛnɛ Dɛnaa Lawa n kiri we
didie ganaa.
27Sii kɔkɔrɔ zɛnaalin tìĩ boe maa-n
min peperen nyin ni.
Min peperen tìĩ boe maa-n
min baraan nyin ni.
Currently Selected:
Suu 29: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
