Suu 27
27
1 #
Zaaki 4.13-16
N nyan nə n din kalaa
biɛ̃ ǹ taman yii wa.
A giala,
sii mɛn bɛ́ re n zɛnɛɛ pelo
n ba bɛ doɛ̃ wa.
2Toa min kɔsɔn nə n tɔ bɔ.
Toa tiin nə zɛnaa,
a nyan nə n din baa.
3Kɔlɔ gole á guguru,
nyɔɔsɔ̃ boroo dɔ á guguru.
Sɛnɛ, baãnaa a min foo yoo
á guguru doo á la bɛn manɛ.
4Kakaarɛbaa n nyɛ́ɛ da ǹ sii lɛa.
Foo yoo n ka tà bɛ́ lɔn á pã á pisi.
Die n boe la a gole
foo yoo nyɛɛnɛ.
5Tɔ pɛ ma yii-n tá soɛ
giaáraa baa ka durii-n ni.
6Bɛ̀ n giaára sɛ̀ pɛ n ganaa,
bɛ n nyɛɛ mà a tá n narɛ.
Bɛ̀ n zɔ́ɔ giaárabaa
ǹ sii zɛnaa n nɛ,
a nə n yiri siɛ̃.
7Mankiɛ̃ wole din tá n piɛ̃
ka zoo ne,
bòo bɛ́ min mɛn ganaa,
màn-bii kɔɔsɛ n kɔɔ̃n bɛ lɛ-n.
8Tii mɛn wɔlɔ bɛ́ sɔsɔɔ
a gána ganaa,
a n ka bàan mɛn nə́ ke
a wɔlɔ sɔsɔɔ kɔ a kii ganaa.
9Nyɔɔ laanka màn gìĩ kɔɔ̃n nə
foo kɔɔ̃n koe.
Giaára a sonborebaa á soɛ
n din doroo ǹ boon kɛn manɛ.
10N nyan nə n na n giaáran ganaa
kɔnlɛ ka n di á giaáran nɛ wa.
Bɛ̀ nɔmaa tá n mìi ni,
n nyan wo n dɔɔ̃n li wa.
Miãkɛn sonbore á soɛ
dɔɔ̃n mɛn bɛ́ dɔmɔla nɛ.
11Maa nɛ, toa n goã sii-dɔ̃li lɛa,
ma foo á re kɔɔ̃n koe.
Bɛ̀ min sɔ kɔ ma-a,
ma á re a lɛ si ǹ boo yii.
12Bɛ̀ koe á die,
sii-dɔ̃li nə mìi duri.
Sɛnɛ, baãnaa sɛ n tɔn zii siɛ
yǎa sii yii.
13A mɔnaa si la, a giala a na
á n lɛ koa min a giɔ̀mɔ siere lɛa,
giɔ̀mɔ lɛ koa ǹ màn si,
a giala a na á siére baa tii lɔ wɔ paǹ li.
14Bɛ̀ n gunun da n miãkɛn nɛ
baayɛlɛ yiisoone ka paraa nɛ,
a n goon ka ma n sɔ koe a ganaa.
15Lɔ zia-dali n goon ka tɔlɔ
mɛn bɛ́ mu boe la a kaa pinaa,
a ba n lɛ kuri wa.
16Bɛ̀ ń zoɛ̃ li mà n kurəə,
a n goon ka ma n zoɛ̃ piɛ̃ kurəə li
ma n zoɛ̃ li n nyɔɔ kũ n gɔn.
17Fɔlɔ n fɔlɔ lɛ boe lɔn,
a din yɔrɔ goon la,
minbuiin nɛ nə ǹ miã yiri fuli.
18Bɛ̀ n nə́ n da gɔnɔn kũ,
ń tá re a nɛ bii.
Dí-nyali mɛn bɛ́
a mìilandɛnaa guguru koe,
ǹ tá re a tɔ boe.
19Mu bɛ́ damalen lɛa yɔrɔ-a lɔn,
muinbuiin nɛ dɔ a taasiɛn
man miɛ̃ a yɔrɔ nɛ.
20Geren piɛ laanka
nyankɔrɔ zuzulu a piɛ̃ wa.
A din yii goon nɛ,
muibuiin nɛ dɔ foo sii á nyɛɛ wa.
21Tɛ n sana laanka
wɔrɔ yoreen koe.
Maǹ min a sonborebaa doɛ̃
ǹ miãn da ǹ boo li.
22Ta n baãnaa zũ ka ǹ bɛ́
wii zuĩ lɔn,
a baãnaabaa lɛ n damaɛ
a ki ganaa.
23Ga n sèren lɛn gogoomaa
ganaa sonbore-a nɛ,
n nə n yiri kɔ n sère kuru li,
24a giala, naforo bie duduu
wɔ lɛa wa,
golebaa dɔ bie yɛ a da yaa lɛa wa.
25Ka bɛ n kəni buu kuru,
bɛ̀ buu buruu pã,
wo buu gere goa kele mìi ni.
26Sèren too n nə ǹ ka tã
mɔnaa lɛa n wɔ n ganaa,
butumun too n nə ǹ sã
n wuru dii pii ni.
27Boen too gigiã,
màn mɛn bɛ́ toɛ
n bɔ̀nyaa yɛ mɔnaa nɛ,
á re n toe kɔnlɛ ka n kion
minin laanka n dí-nyalin ni.
Currently Selected:
Suu 27: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
