Zer 9
9
Sonbore banban
1ccÁh! Man zoɛ̃ li ma goã diə gole ne,
zii tɔ-wɔlen bɛ́ nɛn bɛ̀ ǹ golee
bǎã mɛn nɛ.
Ma á re maa zaman toɛ walan,
ma wo sɔsɔɔ man bɔ ǹ li.
Minin giala da kanaa wolen manɛ,
Naarɛbaalin manɛ!
2Ǹ lɛwɔn nə baraa ka kiɛ bɛ́ lɔn.
Ǹ nə́ gána lɛ a mìinaan baa
soɛ taman yii
peperebaa a lɛa bie wa.
Taãn nɛ, gɛ̀ dɛ woo gɛ̀ dɛ,
ǹ dí n ka bɛ lɛ nɛ.
A giala, ǹ ba ma doɛ̃ wa.
Dɛnaa Lawa a da ǹ boo ne.
3Didie nə n parabaa n giaára nɛ.
Min kɔn doamaa bie a n foo doa
ǹ dɔɔ̃n ganaa wa.
Sàabaa ba la wa, á re ka siɛ̃.
Haalɛ ń giaára dinmaa n die soɛ
diɛ n la.
4Didie nə ǹ miã siɛ̃,
Min kɔn ba sonbore pii wa.
Ǹ tumaa lɛ muĩ soɛ nɛ.
Ǹ nya ǹ dí n ka sii baraa nɛ.
5Kakaarɛbaa woo kakaarɛbaa.
Soɛ woo soɛ.
Maǹ nə n piɛ̃ ǹ ba ma doɛ̃ wa.
Dɛnaa Lawa a da ǹ boo ne.
6Bɛ lɛ nɛ, Dɛnaa Lawa Pàãyiidɛnaa
á kɛ pii:
«Man die ǹ *yoreen koe ka tɛ nɛ.
Man die giɛ ǹ giala-a.
Man die maa zaman lɛ kuĩ lɔn doo?
7Minin kɛn lɛwɔn nə ka kiɛ bɛ́ lɔn
gɛ̀ dii.
Maǹ soɛ boe,
maǹ boo paparɛ diɛ ǹ giaáran manɛ,
Sɛnɛ, ǹ foo ne,
maǹ kan koe ǹ ne.»
8Ma kɔnbɔ ma yoo minin kɛn
gialaa wa?
Ma doamaa bie ma maa gɛ̀ dòo
bɔ tɔrɔ kɛ miã ganaa wa?
Dɛnaa Lawa a da ǹ boo ne.
Gɛ̀ loe, Zeruzalɛmu laanka Zudaa la
Dɛnaa Lawa
9Kelen mìi ni,
man wuu pii, má n gini.
Man gɛ̀ loe loe gána lɛ a tɔɔn lɛduə̃
ǹ bǎã nɛ.
A giala, tɛ ná a tumaa kũ.
Min kɔn ba boe walan wa.
Tɔɔn bìn diɛ á boe walan doo wa.
Ǹ tumaa sasawaa,
bàanan nɛ ka tɔɔ gialakunun
tumaa nɛ,
ǹ goon din banban.
10Man die Zeruzalɛmu biɛ
kɛbɔlɔ gole lɛa,
tolokan susu ǹ bǎã lɛa.
Man die Zudaa kiwin bɔyɛɛ,
ma ǹ baa kɛbɔlɔ lɛa,
min ná a giã a-n doɛ̃ wa.
11Sii-dɔ̃li tan
a n boe la a siin kɛn giala ma?
Bɛ̀ Dɛnaa Lawa boo da ǹ dɛnaa nɛ,
gána lɛ ziziɛ̃ mìi mɛn ganaa,
tɛ kũ ka yɔrɔ mɛn nɛ
min ná a kiɛ̃ a-n doɛ̃ dinin wa,
a bɛ giala pɛ.
12Dɛnaa Lawa pɛ doo: «A giala, maa dí-pɛn kɛn má kɔ ǹ la, ǹ nə́ n la bɔ bɛn ganaa. Ǹ nə n too kɔ ma lon wa, ǹ kɔ ma lɛ wa. 13Maǹ nə́ n mìi laa. Ǹ díin man nə́ Baalin nyaa ǹ nɛ. Maǹ nə́ kɔ bɛa dìn lɛn lɛ. 14Á bǐɛ̃ kɔ, masɛ Dɛnaa Lawa Pàãyiidɛnaa, Izirayeli a Lawa bɛ́ boo mɛn diɛ, á ke: Líɛ mɛn bɛ́ kɔɔsɛ, man die bɛ biɛ ǹ màn-bii lɛa, ma ǹ da sèwò mii ganaa. 15Tɔrɔn mɛnɛn bɛ ǹ dininmaan laanka ǹ díin nə ǹ dɔ̃ wa, man die ǹ pɛsɛ̃ bɛn bii. Ma á re zia yiɛ ǹ ganaa, ma ǹ yii dɛ lenlen.» 16Dɛnaa Lawa Pàãyiidɛnaa a da ǹ boo á ke:
Ka n yiri kɔ li, ka lɔ wuu-pɛlen bíi.
Ǹ mɛnɛn bɛ́ a yɔrɔ doɛ̃ parsiini,
ka bɛn bíi.
Zaman
17Ǹ foo busu ǹ loe lɔ wɔ la fufuu!
Wɔ yii mu pã, a kaa suuu.
Zeremii
18Hiĩ, foo busu ǹ loe n boe *Siɔn.
«Ebe, wɔ́ ziziɛ̃, sìi nə́ n kɔ wɔ lɛ.
Wɔ doamaa nɛ wɔ soo wɔ n bɔ
wɔa gána nɛ,
a giala, wɔa kionən nə́ kaa.»
19Lɔn lɛn, ka n too kɔ
Dɛnaa Lawa a boon kɛn li.
A bɛ́ boo mɛn diɛ, ka n too da li.
Ka kaa nɛlɔn daraa gɛ̀ loe kɛ ganaa.
Didie na a miãkɛn daraa a ganaa.
20«Gɛ̀ n we ka wɔa fenɛtərə ne,
a n we wɔa kion sonboren kɛn nɛ,
a n nɛnyaanan dii ziin la,
a nɛ tenən dɛ bǎã dadaran nɛ.»
Dɛnaa Lawa
21Nsɛ Zeremii, boo da:
Dɛnaa Lawa a da ǹ boo á ke:
«Geren man tán ka tɔɔn bù bɛ́
lɔn wuru-n.
Ǹ kɔnboe n ka wii mɛn bɛ́ ǹ nə́ kuru
ǹ nə́ n la bɔ a ganaa kio
min kɔn ná a goɛ wa.»
Sii-doɛ̃ taãn
22Dɛnaa Lawa bɛ́ boo mɛn diɛ, á ke:
Sii-dɔ̃li doamaa bie a n din kalaa wa.
Min kaka doamaa bie a na
a din a kakabaa kalaa wa.
Pàãmaa doamaa bie a na
a din a pàãmabaa kalaa wa.
23 #
Kor1 1.31; Kor2 10.17 Min mɛn bɛ́ zoɛ̃ li a n din kalaa,
a n din kalaa kɛa lɛa:
A yiri tan, a n masɛ doɛ̃.
A giala, masɛ Dɛnaa Lawa a dí n
ka makara-doɛ̃ nɛ,
sonborebaa nɛ, ka peperebaa nɛ
tán la.
Bɛ lɛ n kɔɔ̃n ma ganaa.
Dɛnaa Lawa a da ǹ boo ne.
24Lɛawaa á re doe, Dɛnaa Lawa a da ǹ boo ne, min mɛnɛn tumaa bɛ́ ǹ nə́ n kuru, ma á re yui bɛn gialaa. 25Sonbore, Ezipti minin ni, Zudaa minin ni, Edɔmu minin ni, Amɔn tɔrɔn nɛ, Moabu minin ni, ka diə gole minin kɛn nɛ n karazɔɔ ka koɛ̃, bɛn kuriimaa bie wa. Izirayeli minin lɛn dininmaa kuriimaa bie masɛ Dɛnaa Lawa yii li wa.
Currently Selected:
Zer 9: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
