Zer 8
8
1Bɛa waáraa, minin tá re Zudaa kiin wen wɛɛ yala-n, ǹ gána nyɛɛnaandɛnan wɔn nɛ, ǹ Lawa a wúlu-bɔlen wɔn nɛ, ǹ Lawa a boo gii-dalin wɔn nɛ, ka Zeruzalɛmu minin wɔn nɛ. Dɛnaa Lawa a da ǹ boo ne. 2Ǹ tá re bɛa wen lɛn nyɔmiɛ tán bǎã tumaa nɛ, wasa li, mui yɔrɔ-a ka leere damata kɛn nɛ, ǹ nə́ ǹ narɛ, ǹ nə́ dí nya ǹ nɛ, ǹ nə́ kɔ ǹ lɛ, ǹ nə́ n gɔn nɔɔ ǹ la, ǹ nə́ ǹ guguru kɔ. Bɛ lɛ nɛ, min kɔn ba re ǹ wen goɛ a ǹ kaa yala-n doo wa. Sɛnɛ maǹ die mànan bù biɛ tán la. 3Ma bɛ́ tɔrɔ baraa kɛa yiikoonaan mɛnɛn pɛsɛ̃ bǎã woo bǎã nɛ, gɛ̀ á re soɛ koe ǹ ganaa yiikoonaabaa nɛ. Dɛnaa Lawa Pàãyiidɛnaa a da ǹ boo ne.
Zeruzalɛmu minin mìi n laa nɛ
4Dɛnaa Lawa a boo á ke:
Bɛ̀ min mɛnaa, a n yui.
Bɛ̀ min sã zii ganaa,
a n wusii ka a kio ne.
5Wàa na á baa Zeruzalɛmu zaman
nə n lɛ goa zii kɛ ganaa,
ǹ nə́ tɔn woe nyɛɛnɛ n piɛ̃ ka
masɛ nɛ?
Maǹ doa-n màn kooron ganaa,
manə n piɛ̃ ǹ ba wusii die ma li wa.
6Má n too kɔ ǹ lon taãn-taãnɛ.
Ǹ bɛ́ boo mɛn diɛ mìi ba la wa.
Ǹ kɔn ba wusii a sii bɔnɛɛn kio wa.
Ǹ kɔn ba nɔ̀n diɛ a din la ka
a zɛnaa ǹ sii-n wa.
Ǹ tumaa n baa sii ka sùin bɛ́
lɔn ziabaa ǹ bǎã nɛ.
7Gɔgɔrɔ mɛn din bɛ́ lon,
a woo biikoo ke, á bɛ doɛ̃.
Leere bàan nɛ ka yongoo ne,
bɛn tumaa ta ǹ wusoo a daa
biikoo doɛ̃.
Sɛnɛ, ma landan mɛnɛn koa,
maa zaman lɛ sɛ a bɛn doɛ̃ wa.
Sii-dɔ̃lin sii-doɛ̃ là ba ǹ ganaa wa
8A n siɛ lɔn ka á pii:
«Wɔ n sii-dɔ̃len lɛa,
Dɛnaa Lawa a dí-pɛ lɛ n wɔ
dinin gɔn.»
Sonbore, sɛ́wɔ-kiɛ̃lin lɛn
man soɛ-bɔlen lɛa,
maǹ dí-pɛ ǹ boon lɛn kɔkɔrɔ koe.
9Bɛa sii-dɔ̃len lɛn manə n piɛ̃
ka Dɛnaa Lawa a boon ne.
Ǹ sii-doɛ̃ lɛ a là n ka wàa-n kəni?
Sìi nə́ n kɔ ǹ lɛ,
nyɛ́ɛ nə ǹ ganaa,
kan nə́ ǹ kũ.
Minin mà sii kɔn banban
10 #
Zer 6.12-15
Dɛnaa Lawa pɛ:
Á bǐɛ̃ kɔ,
Man die ǹ lɔn koe min kɔsɔn la,
ma ǹ wurun kɔ ǹ kũ wolen la.
A giala,
a kũ ǹ boɛɛndɛnaa ganaa
a wo ǹ goledɛnaa yaa,
ǹ tumaa n giɛ là li.
A kũ Lawa a boo gii-dalin ganaa
a wo Lawa a wúlu-bɔlen yaa,
ǹ tumaa n kɔkɔrɔ.
11 #
Eze 13.10
Koe mɛn bɛ́ maa zaman yii,
ǹ ba bɛ biɛ ǹ parsii lɛa wa.
Maǹ pii «sii banban, sii banban»,
A da yaa sii tan.
12Ǹ sii bɔbɔnɛɛn mɛnɛn zɛnaa,
bɛ á sìi diɛ ǹ ganaa?
Kɛnɛn dinin wa.
A ǹ mìi da kuməə ganaa wa.
Bɛ lɛ nɛ, ǹ tá re mɛnɛɛ kun
ka mɛnaa wolen ne.
Bɛ̀ ma yoo ǹ gialaa,
ǹ tá re woe n dinin yiɛ tán.
Dɛnaa Lawa a da ǹ boo ne.
Foo doa ǹ bǎã banban doo wa
Dɛnaa Lawa
13Ka boo taãn nɛ,
man die ǹ sàabiɛ lenlen.
Dɛnaa Lawa a da ǹ boo ne,
rezɛ̃ ba re goɛ̃ *rezɛ̃ da la wa,
gɔ́rɔ ba re goɛ̃ gɔ́rɔ da la wa.
Ǹ luu á re laɛ.
Man die ǹ we kiɛ̃ wolen gɔn.
Zaman
14Waa na á baa wɔ á tán kànaa?
Ka wɔ n lɛ sɔkɔn wɔa kiwi tamaa
wole sonboren kɛn nɛ,
wɔ n yii da gɛ̀ la,
a giala, wɔa Lawa,
Dɛnaa Lawa n zoɛ̃ li a wɔ dɛ.
A n wɔ kiɛ sèwò mii ganaa.
A giala wɔ n wɔ́ sii baraa zɛnaa nɛ.
15Wɔ nə n yii diɛ là nyantoro la,
sɛnɛ, sii sonbore kɔn ba n zɛnɛɛ wa.
Wɔ nə n yii diɛ busu á nya la,
sɛnɛ, nyɛ́ɛ n die.
16Zɔ́ɔ nə́ n toa Dan á die.
Ǹ sùin lɛ baa wuu n boe.
Tán tumaa n bìn diɛ
ǹ lɛ baa nyɛɛnɛ.
Ǹ nə́ ke yii die,
maǹ die gána lɛ ziziɛ̃,
kɔnlɛ ka a gɔ́ɔ̃gɔ́ɔ̃ ǹ màn tumaa nɛ,
ka kiwi lɛ laanka a minin ni.
Dɛnaa Lawa
17Man die miɛ̃ baraan diɛ ka la.
Màn kɔn ba re boe la a ǹ kurəə
sɔn doe ganaa wa.
Maǹ die sɔn doe ka-a.
Dɛnaa Lawa a da ǹ boo ne.
Zeremii
18Màn kɔn ba boe la a maa foo
busii kɛ nya wa.
Ma foo n ka a yu!
19Ka n too kɔ,
Maa zaman lɛ nə n toɛ
wɔlɔ sɔsɔɔ nɛ, gú diɛ,
Maǹ pii:
«Dɛnaa Lawa ba *Siɔn doo wa?
Kii ba kiwi lɛ n doo wa?»
Dɛnaa Lawa
Maǹ nə́ ma foo yoo ka ǹ dìn kɛn nɛ,
ka lawa kɔsɔn kɛn nɛ.
Wàa na á baa kəni?
Zeremii
20Kaa-piɛ nya,
tɛ̀fuu waáraa kiɛ̃,
á ke wɔ tɔn kirisibaa wa.
21Koe n ma mìi ni,
maa zaman lɛ a koe taman yii.
Ma foo ziziɛ̃,
ma yiri nə́ n lɔlɔkɔn.
22Da banban Galaati a n la
paparɛɛ nyɛɛ wa?
Dɔɔtɔrɔ ba walan doo wa?
Wàa na á baa maa zaman lɛ a
baayɛrɛ a nyɛɛ wa?
23Bɛ̀ ma mìi n mu yala lɛa
hinlaa bɛ̀ ma yii mu na a nyɛɛ wa,
bɛ̀ man wuu pii penleen laanka
tèlò ne
maa zaman lɛ a geren lɛa.
Currently Selected:
Zer 8: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
