Zer 10
10
Dɛnaa Lawa á re dìn papaɛ̃
1Izirayeli minin lɛn,
ka n too kɔ Dɛnaa Lawa a boo kɛ li.
2A da ǹ boo á ke:
«Ka nyan nə n saa tɔrɔ kɔsɔn li wa.
Ka nyan nyɛ́ɛ baa sii-nyaan kɛn
man boe lon wa.
Maǹ nyɛ́ɛ diɛ tɔrɔn kɔsɔn ganaa.
3Sonbore, tɔrɔ kɔsɔn landan
kɛn man sii kooron lɛa.
Maǹ gɔn kuri daã nɛ,
gɔn-sɛlɛli dì nyín sɛlɛ la.
4Maǹ a nyaǹ koe sana hinlaa
wɔrɔ nɛ.
Maǹ dere ka kiɛn nɛ,
màn mɛn bɛ́ toɛ a golee lon.
5Bɛa dìn lɛn man ka nyɛ́ɛ da
ǹ mànan bɛ́ lɔn, gì wuru-n.
Ǹ ba boo diɛ doɛ̃ wa,
maǹ nə ǹ guĩ,
a giala, ǹ ba boe tɔ we la wa.
Ka nyan nyɛ́ɛ baa ǹ nɛ wa.
Ǹ ba boe baraa zɛnaa la wa,
ǹ ba boe bǐɛ̃ dɔ din la ǹ zɛnaa wa.»
6Min kɔn ba ka n bɛ lɔn ma
Dɛnaa Lawa.
N tá gole,
n pàã n tɔ golebaa koe n la.
7 #
SNS 15.4
N doamaa-n ka gugurubaa nɛ
tán tumaa a Dɛnaa.
Bɛ lɛ nə n wɔ gii lɛa.
Sii-dɔ̃lin tumaa bii tán la,
ǹ gánan tumaa bii,
min kɔn ba ka n bɛ lɔn wa.
8Bɛa minin lɛn tumaa n baãnaan lɛa,
yiriwɛɛnaan lɛa,
Ǹ dìn lɛn ba boe la ǹ ta ǹ darɛɛ
sii kɔn ganaa wa.
Maǹ gɔn lɛa.
9Gɔn-sɛlɛli nə́ ǹ sɛlɛ,
Zan-kaali nə́ ǹ nyaǹ kɔ ka
Tarsisi wɔrɔ nɛ,
hinlaa ka Ufaazi sana nɛ.
Bɛ kio, ǹ tɔn mɔnaa wɔ ǹ ganaa,
mɔnaa wùsu tã hinlaa
a koreeboree lɛa.
Bɛ tumaa n gɔn dí-nyalin màn
zɛnaa lɛa.
10Sɛnɛ, Dɛnaa Lawa n Lawa taãn lɛa.
Lawa Yiikoonaa nɛ.
A n kii lɛa yǎa duduu.
Bɛ̀ a foo yoo, tán nə bìn diɛ.
Tɔrɔn ba boe sii kɔn la ǹ zɛnaa
a foo-yoo gɔ́ɔ̃-n wa.
11Ka doamaa bɛ ka boo mɛn da ǹ nɛ, á ke: lawan mɛnɛn bɛ́ ǹ lon zɛnaa wa, ǹ tán zɛnaa wa, bɛn tá re n lui ǹ nə n bɔ tán la, ǹ papaã ǹ nə n bɔ kanaa.
12Dɛnaa Lawa tán zɛnaa ka a pàã nɛ,
á kanaa koa ka sii-doɛ̃ nɛ,
á lon lɛ bɔ ka yiridɛnaabaa nɛ.
13Bɛ̀ á gini,
mu pìãn manə n soekɔn lon.
A n labaran soekɔn tán lɛ dan ganaa.
A n la diɛ tɛ pɛ ganaa màn mɛn bɛ́ toɛ la kaa.
A n piɛ̃ boe a duru ǹ bǎãn nɛ
a soo ne.
14Bɛ lɛ nɛ,
minin tá bii-a baãnaan lɛa,
ǹ ba sii kɔn giala miɛ wa.
Sìi n zan-kaalin kɛn tumaa ganaa,
ǹ dìn kɛn taman yii.
Bɛa nyínin lɛn man yiri siɛ̃:
Yiikoonaabaa goon din ba ǹ nɛ wa.
15Ǹ ba màn kɔn lɛa wa.
Maǹ yaa dinsɔɔ̃ diɛ.
Ǹ dɔlɔ pinaa,
ǹ tumaa á re papaɛ̃.
16Sɛnɛ, kanaa tumaa a zɛnaali ke,
Zakɔba wɔ gii lɛa,
bɛ ba ka ǹ bɛ́ lɔn wa.
A wɔ n ka Izirayeli tɔrɔn nɛ.
A tɔ n "Dɛnaa Lawa Pàãyiidɛnaa".
Koe diri
Zeremii
17Zeruzalɛmu, ǹ yoo nsɛ mɛn gialaa,
n mànan goa.
18Taãn nɛ,
Dɛnaa Lawa a da ǹ boo á ke:
«Kanna kəni,
man die gána lɛ a minin zuĩ sɔsɔɔ
ma ganaa.
Man die dɔlɔ boe ǹ ganaa,
ǹ ba re n boe a-n wa.
Zeruzalɛmu
19Ebe, wàa koe n ka kɛ nɛ ma ganaa!
Maa baayɛrɛ a nyɛɛ wa.
Man má goã pii
máa maa fuu lɛ lɛ á basiɛ̃ nɛ,
máa ma á boe la ma si ma ganaa.
20Sɛnɛ, maa mɔnaa kion lɛ ziziɛ̃.
A biɛn tumaa nana.
Maa nɛnyaanan nə woo ǹ nə́ ma
toa walan.
Min kɔn banban a maa kion lɛ
dɔ wa,
a maa giã ǹ bǎã kɛ zɛnaa wa.»
Zeremii
21Zaman-lɛduə̃lin nə́
baãnaabaa zɛnaa.
Ǹ ga Dɛnaa Lawa li wa.
Bɛ lɛ nɛ, ǹ sii kɔn yɔrɔ yɛ wa.
Ǹ bɛ minin mɛnɛn mìi la,
ǹ tumaa pɛsɛ̃.
22Ka n too kɔ màn wuu kɛ-a die.
Sii lɔlɔkɔn gole ne boe gɔsɛ a
lɛ̀gɔn la.
A n die Zudaa kiwin biɛ kɛbɔlɔ lɛa,
tolokan susu ǹ bǎã lɛa.
Zeremii n Lawa nyankoe a zaman a lɛa
23Dɛnaa Lawa, máa doɛ̃,
máa minbuiin nɛ nyin ba a din gɔn,
a boo la a sii yɔrɔ bɔ a din ni wa.
24Doroo kɔ ma la Dɛnaa Lawa,
sɛnɛ, a kɔnpɛ ka ma nɛ.
N foo nyan yoo wa,
bɛ bie wa, n tá re ma yɔyɔrɛ.
25Tɔrɔn mɛnɛn bɛ ǹ ba n doɛ̃ wa,
ka min mɛnɛn bɛ́ ǹ ba n tɔ bíi wa,
n foo n siĩni a yoo bɛn li.
A giala, ǹ nə́ n zaman lɛ kokoo,
Zakɔba
ǹ nə́ n ziziɛ̃ lenlen.
Ǹ nə́ ǹ gána lɛ ziziɛ̃.
Currently Selected:
Zer 10: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
