Zer 7
7
Zeremii n boo diɛ zaman nɛ
1Dɛnaa Lawa boon mɛnɛn da Zeremii ni, ǹ nə́ ke: 2– Giã Lawa a kion kɛa kiɛnlɛ-a, n lɛ dia, n pɛ kɛnɛn: «Ka n too kɔ Dɛnaa Lawa a da ǹ boo li, Zudaa minin lɛn, kasɛn mɛnɛn bɛ́ boe kiɛnlɛ kɛ nɛ bɛ̀ ka da Dɛnaa Lawa guguru kɔ.» 3Dɛnaa Lawa Pàãyiidɛnaa, Izirayeli a Lawa a da ǹ boo á ke: «Ka kaa giã ǹ gɔn laanka kaa zɛnaa ǹ siin bɔyaa. Ka bɛ nɛ, ma á re toɛ ka giã gána kɛ nɛ.» 4Ka ǹ pii: «Lawa a kion nə kànaa, Lawa a kion nə kànaa, Lawa a kion nə kànaa. Ka nyan nə dinin sã ka bɛa soɛ boon kɛn nɛ wa.» 5Sɛnɛ, ka kaa giã ǹ gɔn laanka kaa zɛnaa ǹ siin bɔyaa ka ka foo tumaa nɛ, ka kiri pepere wɔ kɔn nɛ. 6Ka nyan mɛnaa tiin la, nɛ toenən ne ka lɔ giɔɔrɔn nɛ wa. Ka nyan yii tì-a mà kaa wa. Ka nyan kɔ lawa kɔsɔn lɛ wa, ǹ mɛnɛn lɛn bɛ́ koe boe ka-a. 7Ka bɛ nɛ, ka á re giɛ̃ gána kɛ nɛ ma kɔ ka digolon la duduu, duduu wɔ lɛa. 8Sɛnɛ, ka foo n doa-n soɛ boon ganaa, là goon ná a ba ǹ ganaa wa. 9Ka ǹ wurumu biɛ, ka n gɛ̀ dii, ka n naarɛbaa zɛnɛɛ, ka nə n liɛ soɛ la, ka n da yon gìĩ kɔɔ̃n koe *Baali la, ka bɛ kaa lawa tiin mɛnɛn doɛ̃ wa ka n koe bɛn lɛ. 10Bɛ kio, ka n die n dinin nyɛɛ masɛ yɔrɔ-a, kion kɛ nɛ, ma tɔ n la, ka n pii: «Wɔ́ kirisibaa!», ka wusoo doo, ka n sii bɔbɔnɛɛn zɛnɛɛ. 11#Mat 21.13; Mar 11.17; Luk 19.46 Kion ke ma tɔ n la, ka n bɛ biɛ wurumun susu ǹ bǎã lɛa? Ma yii n bɛ lɛ ganaa sɛn! Masɛ Dɛnaa Lawa a da ǹ boo ne. 12#Zoz 18.1; Loe 78.60; Zer 26.6 Bǎã sonbore mɛn goã maa wɔ lɛa Siiloo, ka wo walan. Lɛlɛ, man má goã giã-n walan. Maa zaman Izirayeli minin baraabaa a lɛa ka ga a ganaa ma bɔyaa má baa lɔn. 13Á bǐɛ̃ kɔ! Ka bɛ́ ka bɛa siin kɛn lɛn tumaa zɛnaa, má boo da ka nɛ gunyin damata, ka n too kɔ wa, má ka bíi, ka n nyəə wa. Dɛnaa Lawa a da ǹ boo ne. 14Kanna kəni, kion ke ma din tɔ n la, ka n foo doa a ganaa, bǎã ke má kɔ ka laanka ka digolon la, ma Siiloo baa lɔn, man die a dɔ biɛ miɛ̃. 15Man die kasɛn dɔn zuĩ sɔsɔɔ, ka ma bɛ́ ma ka dɔɔ̃n Efrayimu minin kɛn tumaa zũ lɔn.
Zaman lɛ a bɔlɔ tii
16«Nsɛ Zeremii, n nyan nɔ̀n da ma la ka màn kɔn nɛ zaman kɛ wɔ lɛa wa. N nyan Lawa nyankɔ ǹ lɛa wa. N nyan nə n lɛ dɛ ma ganaa n nə n din nɔmaa wa. Ma a re n too koe n lon wa. 17Ǹ bɛ́ sii mɛn zɛnɛɛ Zudaa kiwin ni ka Zeruzalɛmu a zii mìin ni n yii tá bɛ ganaa? 18#Zer 44.17-19 Nɛnyaanan man gɔn goɛ, díin man tɛ koɛ. Lɔn man wùsu yiɛ ǹ nə́ mɔ̀mɔ diɛ lon a kii lɔ#7.18 Bɛ n dì lɔdɛnaa goon lɛa, a n gɛrɛsiɛ koe lɔn la, á boe la á dì Astartee kɛ baa. kɛ wɔ lɛa. Maǹ duvɛ̃ zumii lawa kɔsɔn ganaa ǹ tá ma foo yui ni.» 19«Maǹ baraa zɛnɛɛ masɛ nɛ? Haayii! Maǹ zɛnɛɛ ǹ dinin manɛ. A doamaa nɛ a sìi da ǹ dinin ganaa.» Dɛnaa Lawa a da ǹ boo ne. 20Bɛ lɛ nɛ, Dɛnaa Lawa pɛ: «Man die maa foo-yoo baraa kiɛ kiwi kɛ la, a minin ni a tɔɔn nɛ, kɔnlɛ ka a dan laanka a tán kɔsiɛ mànan nɛ. Á die n biɛ ka tɛ bɛ́ lɔn a ná a nimi wa.»
21Dɛnaa Lawa Pàãyiidɛnaa, Izirayeli a Lawa a da ǹ boo á ke: – Ka kaa *wúlu màn lɛ piɛ̃ lɛ laanka kaa wúlu màn kɔsɔn kɛn siĩn kaa kun ka dininmaan nə sɔ̃. 22Ma bɛ́ má ka digolon waa Ezipti gána nɛ má soo ǹ ne, ma boo kɔn da ǹ nɛ, má nɔ̀n da ǹ la ka wúlu màn lɛ piɛ̃-n wa, ma nɔ̀n da ǹ la ka wúlu màn kɔsɔ-n wa. 23Man má gɔn waa ǹ boo kɛ dinsɔɔ̃ pɛ ǹ nɛ: «Ka n too kɔ ma lon, ma á re kaa Lawa biɛ, ka dɔn nə maa zaman baa. Ma bɛ́ zii mɛn nyɛɛ ka nɛ, ka kɔ bɛ lɛ ka te, kaa siin tá re bǐɛ̃ koe kəni.» 24Sɛnɛ, ǹ nə n too kɔ wa, ǹ nə n too da wa. Ǹ nə́ golee li mà ǹsɛn man koe ǹ taasiɛ bɔbɔnɛɛn lɛn lɛ, ka ǹ foo a baraabaa kɛ nɛ. Màn mɛn tá a ganaa ǹ nə n yɔrɔ dia ma la, maǹ nə́ n dɔ̀ɔ̃ wɔ ma nɛ. 25A kũ ka digolon soo Eziptin pinaa ganaa a da pelo yaa, baraabaraa, ma maa dí-nyalin, maa boo gii-dalin dia ka la dí lɛa. 26Sɛnɛ, ka n too kɔ ǹ lon wa, ka n too da wa. Ka mìi n laa nɛ, kaa bɔnɛɛbaa la ka digolon wɔ nɛ.
27Nsɛ Zeremii, n die n bɛ tumaa pɛ ǹ nɛ. Sɛnɛ, ǹ ba re n too koe n lon wa. N tá re ǹ bíi, sɛnɛ ǹ ba re n nyii wa. 28Ka bɛ nɛ, n tá re pii ǹ ni kɛnɛn: «Ka ǹ zaman lɛa, zaman mɛn bɛ́ a ba n too koe Dɛnaa Lawa, a Lawa a boon li wa, n piɛ̃ ka a gɔn waa ǹ boon ne. Kasɛn li, bɔlɔgoondɛnaabaa banban, bɛ boo ba n diɛ wa.»
Dɔlɔ bɔ ǹ nyankɔrɔ basa
29Dɛnaa Lawa pɛ:
Zudaa a zaman,
ń mìi ka sɔsɔrɔ kɛ kuru, n zũ,
ǹ mɛn lɛ bɛ́ nyɛɛ mà maǹ nə́ n bɔ
ǹ nə́ n koa ma din wɔ lɛa.
Gɛ̀ loen lɔ
tenten mìi kooro-an kɛn la.
N miãlɛ tumaa ma foo yoo.
Ma ba n li doo wa,
Má n tii.
30«Sii mɛn bɛ́ baraa ma yii li, Zudaa minin man nə bɛ zɛnaa. Kion mɛn bɛ́ ma tɔ n la, ǹ nə́ nyín bɔbɔnɛɛ kaa a nɛ, ǹ nə́ *gɔ̀ da a ganaa. Dɛnaa Lawa a da ǹ boo ne. 31#LWS 18.21; Kiin2 23.10; Zer 32.35 Inɔn a nyankɔrɔ basa kɛ nɛ, ǹ nə́ *wúlu bɔ ǹ bǎã koa walan a tɔ n Tofɛti. Maǹ nə ǹ nɛgiĩn laanka ǹ nɛlɔn tiɛ̃ wúlu màn lɛa walan. A da yaa, ma bɛa zii kɔ min kɔn la wa. Ma bin nə n taasɛ ka bɛ n duduu wa. 32Lɛawaa á re die, bǎã kɛ a re n bíi "Tofɛti" hinlaa "Inɔn a nyankɔrɔ basa" doo wa. Sɛnɛ, "dɔlɔ bɔ ǹ nyankɔrɔ". Maǹ die geren biĩ walan, bǎã á re yii wɔlɔ kɔsɔ-n doo wa. Dɛnaa Lawa a da ǹ boo ne. 33Bɛa geren lɛn tá re zèwon laanka tolokan màn-bii biɛ, min kɔn dɔ a re ǹ lui wa. 34#Zer 16.9; 25.10; SNS 18.23 Zudaa kiwin ni, Zeruzalɛmu a ziin la, ma á re zɔ́n bìndiɛn lɛ kuri, foo kɔɔ̃n lɛ-dɛ nɛ, lɔ tii ǹ zuũ laanka lɔ tii a loe ne. Sonbore, gána lɛ n die kɛbɔlɔ biɛ.»
Currently Selected:
Zer 7: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
