Zer 50
50
Baabilonii a mɛnaa ka Izirayeli a din yɛ
1 #
Iza 13.1–14.23; 47.1-15 Dɛnaa Lawa boo mɛn da Lawa a boo gii-dali Zeremii ni *Baabilonii kiwi a paǹ li ka Baabilonii gána nɛ:
Baabilonii
2Ka boo kɛ pɛ tɔrɔn tumaa nɛ,
ka a boo da ka sii a kɔnboen ne,
ka a boo da,
ka nyan màn kɔn duru wa.
Ka pɛ: Ǹ nə́ Baabilonii kũ!
A dìn kɛn wɔ n ka sìi ni,
a dì kooron kɛn wɔ n ka foo
ziziɛ̃ gole ne.
Sìi nə́ n kɔ Bɛɛli lɛ,
Marduku foo ziziɛ̃ duduu.
3Tɔrɔ goon nə boe gɔsɛ a lɛ̀gɔn li
die Baabilonii gialaa.
A n die Baabilonii gána biɛ
kɛbɔlɔ lɛa.
Min goo din ba re goɛ̃ a-n wa.
Minbuiinin ni, tɔɔn nɛ,
ǹ tumaa n die baa sii,
ǹ tumaa á re papaɛ̃.
Izirayeli
4Dɛnaa Lawa a da ǹ boo á ke:
Bɛa biikoo li, bɛa pinaa kəni
Izirayeli minin laanka Zudaa
minin tá re die kun.
Ǹ tá re tɔ we, ǹ wuu pɛ,
ǹ tá re giɛ masɛ Dɛnaa Lawa,
ǹ Lawa li.
5Zii mɛn bɛ́ woe *Siɔn,
ǹ tá re nɔ̀n diɛ bɛ li,
ǹ nə n yɔrɔ bɔyaa ǹ dia kiwi lɛ la.
Ǹ tá re die,
ǹ lɛ kɔ kɔn la wɔ ka masɛ nɛ,
yǎa duduu,
ǹ yiri ná a boe-n duduu dɔn wa.
6Maa zaman lɛ a minin man nə́ goã
ka sère papaã wolen bɛ́ lɔn.
Ǹ lɛduə̃lin man nə́ goã ǹ yiri siɛ̃.
Maǹ nə n toɛ walan bɛ̀ ǹ wo
kelen la,
ǹ dinin gɔn wìi a lɛa.
Ǹ nə́ woo kelen la
ka tentenen ne,
ǹ yiri bɔ ǹ zìãn ganaa.
7Bɛ̀ min woo min kaa ǹ lɛ,
a n basaã koe ǹ bii.
Ǹ zɔ́ɔn man nə́ goã pii:
Wɔ sii kɔn la ǹ la baraa wa!
Ǹ dinin maǹ nə́ wɔ Dɛnaa Lawa lon,
ke, ǹ kiri pepere-wɔle lɛa,
ǹ digolon nə goã n foo doɛ ǹ mɛn
lɛ ganaa.
Baabilonii
8 #
SNS 18.4
Ka baa si ka n bɔ Baabilonii,
ka soo ka n bɔ Baabilonii minin
gána kɛ nɛ!
Ka n baa ka butumu bɛ́ lɔn
tɔɔ kuru mìi la.
9Taãn nɛ, man die bìn diɛ
gána dadara gigiã ganaa,
ma ǹ dia ǹ wo Baabilonii kũ.
Bɛa tɔrɔn lɛn man die boe gɔsɛ
a lɛ̀gɔn la.
Maǹ nə n tele kɔn li,
ǹ yoo gána lɛ gialaa,
ǹ kũ.
Ǹ kiɛn lɛn man ka zia-baali zanbia
a kiɛn bɛ́ lɔn,
a ba n bɔyɛɛ ka a gɔn kooro-n wa.
10Ǹ tá re Baabilonii gána kokoe.
Ǹ tá re a gɔn mànan goɛ ka ǹ bɛ́
li lɔn.
Dɛnaa Lawa a da ǹ boo ne.
11Ka n nyɛnyɛɛ ka bɛ̀ baa ka foo
kɔɔ̃n nɛ,
kasɛn mɛnɛn nə maa kíɛ̃ lɛ ziziɛ̃.
Ka paparɛ ka dii nɛ ten bɛ́ lɔn,
buu sɔ̃ ǹ bǎã nɛ.
Ka lɛ baa ka sùin wɔ bɛ́ lɔn!
12Sìi nə n kɔ kaa náa #50.12 Bɛ n Baabilonii a kiwi gole kɛ a sii a konboe lɛa. lɛ,
min mɛn ka yɛ á ka da kanaa,
a gugurubaa nya.
Sisia, kaa gána lɛ n gána tumaa
a giala nyɔmɔɔ lɛa.
Diə gole ne, tán gere ne.
13Dɛnaa Lawa a foo-yoo gole
kɛ taman yii,
kaa gána lɛ n goɛ̃ minbuiin nɛ baã.
Kɛbɔlɔ nɛ.
Min mɛn tumaa bɛ́ kiɛ̃
kunu Baabilonii li,
ǹ tumaa yiri a die n lɔlɛkɔn.
Ǹ tá re n lɛ dii basaã kɛ
tumaa taman yii.
14Kasɛn, sa-zũlin lɛn,
ka Baabilonii lɛnpɛnɛ,
ka yoo a gialaa!
Ka pã!
Ka nyan ga kaa kiɛn ganaa wa!
A giala, á wɔ Dɛnaa Lawa lon.
15Ka ziabaa ǹ lɛ dɛ wɔ a ganaa!
Á n gɔnɔn goa lon,
á re n din we wɔ gɔn.
A sanabolon man kiɛ,
a kungɔnɔn kɛn a kiwin tamaɛ,
bɛn man kiɛ.
Dɛnaa Lawa a gɛ̀ dòo boe ne.
Ka kaa gɛ̀ dòo bɔ Baabilonii ganaa.
A sii mɛn zɛnaa ǹ miãn manɛ,
ka bɛ lɛ zɛnaa a dɔ nɛ.
16Min mɛn tumaa bɛ́ màn diɛ,
ka min mɛn tumaa bɛ́ màn kuri
kaa piɛ waáraa, ka ǹ tumaa dɛ.
Didie baa si zia baraa kɛ nyɛɛnɛ,
a wo piɛ, a wo a gána nɛ.
Izirayeli
17Izirayeli na á goã ka
sère papaã wole bɛ́ lɔn,
yàran ná a kio.
Min mɛn sɔ̃ bibinaa nɛ,
Asiiriin kii ni.
Bɛ kio,
Baabiloniin kii
Nebukadenezɔɔrɔ daa,
á kũ a ná a wen yiyiɛ.
18Bɛ lɛ nɛ, Dɛnaa Lawa Pàãyiidɛnaa Izirayeli a Lawa á kɛ pii: «Man die yui Baabiloniin kii gialaa, ka a gána nɛ, ka ma bɛ́ má yoo Asiirii gána a kii
gialaa lɔn.»
19Man die wusii ma wo ka
Izirayeli ni
a lɛduə̃ ǹ bǎã nɛ.
Karmɛli kele la,
Basan a wuru bǎãn nɛ,
Efrayimu a kele yiin ni,
ka Galaati gána nɛ,
á re màn-bii yii a bii, a kã.
20Bɛa biikoo li, bɛa pinaa kəni,
ǹ tá re giɛ Izirayeli a sãn li,
sɛnɛ ǹ ba re màn kɔn yii wa.
Ǹ tá re giɛ Zudaa a sãn li,
sɛnɛ ǹ ba re màn kɔn yii wa.
A giala, min mɛnɛn yii bɛ́ re goɛ̃ koo,
ma á re bɛn sãn toɛ ǹ nɛ.
Dɛnaa Lawa a da ǹ boo ne.
Baabilonii
21Yoo ka zia nɛ
Meratayimu gána kɛ ganaa.
Yoo a gialaa,
n yoo Pekɔti minin gialaa.
Ǹ dɛ, n nə ǹ bɔ̀n baa lenlen.
Ma pɛ lɔn,
a zɛnaa a kɔnpɛ ka bɛ lɛ nɛ.
Dɛnaa Lawa a da ǹ boo ne.
22Gána lɛ gɔ́ɔ̃ nɛ,
zia wuu n boe.
Wàa koe babaraa n ka bɛ nɛ!
23Baabilonii na á goã yele lɛa,
kanaa tumaa yɔyɔrɛ.
Á ke, á yɔyɔrɛ, á pɔpɔsɛ.
Bɛ na á saa lɔn kəni?
A na á saa lɔn,
Baabilonii kɛbɔlɔ baa tɔrɔn bii?
24Baabilonii, má kan kɔ n nɛ,
á n kũ n bɔ a siére-a wa.
N giala mɛ kanaa, ǹ nə́ n kũ.
A giala, man nə́ n gòãn dii
masɛ Dɛnaa Lawa ganaa.
25Dɛnaa Lawa n soe ka a
ziabaa ǹ mànan nɛ,
a n die a foo-yoo nyɛɛ.
Baabilonii gána nɛ,
dí n Dɛnaa Lawa Pàãyiidɛnaa gɔn.
26Ka bɔ paǹ yii li ka daa,
ka a dɔǹɔn lɛ bũ,
ka a naforon sɔkɔn,
ka tɛ da ǹ ganaa!
Ka nyan màn kɔn toa walan wa!
27Ka a sɔraasi sonboren tumaa dɛ,
ka wo ǹ ne ǹ bɔlɔ kuru ǹ bǎã nɛ!
Ǹ wɔ n ka bɔ̀n nɛ,
a giala ǹ dɔlɔ bɔ biikoo na á dɔ.
Izirayeli
28Ka n too kɔ!
Min mɛnɛn bɛ́ baa sii soe Baabilonii,
ka min mɛnɛn yii bɛ́ tɔn koo,
bɛn man pii Siɔn nɛ:
Dɛnaa Lawa,
wɔa Lawa ná a gɛ̀ dòo bɔ.
A ná a kion sonbore kɛa gɛ̀ dòo bɔ.
Baabilonii
29 #
SNS 18.6
Ka sa-zũlin tumaa sɔkɔn,
ka ǹ kaa Baabilonii kiwi ganaa.
Ka a lɛnpɛnɛ a paǹ tumaa li!
Ka nyan toa min kɔn la wa!
Ka a saraa kɔ la a kɔnpɛ ka a
zɛnaa ǹ siin ni.
A siin mɛnɛn zɛnaa ǹ miãn manɛ,
ka zɛnaa a dɔ-n miɛ̃.
A giala, á n din koa Dɛnaa Lawa,
Izirayeli a Lawa sonbore kɛ ganaa.
30Bɛ lɛ nɛ, bɛa pinaa lɛ nɛ,
a nɛ tenən tá re mɛnɛɛ bǎã
dadaran nɛ,
a sɔraasin tumaa gã.
Dɛnaa Lawa a da ǹ boo ne.
31Taãn nɛ, Din koa wole Baabilonii,
ma lɛ nə n li.
Dɛnaa Lawa Pàãyiidɛnaa
a da ǹ boo ne.
Kanna kəni,
maa yoo n gialaa ǹ lɛawaa n ka
kɛ nɛ.
32Din koa wole nə n gòã niɛ
a mɛnaa.
Min kɔn ba yii a saa a da lon wa.
Man tɛ diɛ a kiwin gana.
Màn mɛn tumaa bɛ́ ǹ lɛnpɛnɛ,
man tɛ diɛ a tumaa ganaa.
33Dɛnaa Lawa Pàãyiidɛnaa n kɛ pii:
Maǹ nə́ Izirayeli laanka Zudaa
minin yɔyɔrɛ
ka kakaarɛbaa nɛ.
Ǹ goa wolen manə n gɔn
parɛɛ ǹ ganaa,
maǹ nə n piɛ̃ mà ǹ ba n gɔn boe
ǹ ganaa wa.
34Sɛnɛ pàã tá ǹ si sii la wole lon.
A tɔ n "Dɛnaa Lawa Pàãyiidɛnaa".
A n die ǹ zia gii diɛ ka pàã nɛ.
Màn mɛn bɛ́ toɛ,
a nyɛ́ɛ da Baabilonii ganaa,
a yii-nyɛɛ kɔ tán tumaa la.
Dɛnaa Lawa n die Baabilonii ziziɛ̃
35Dɛnaa Lawa a da ǹ boo á ke:
Ka zia baa Baabilonii minin ganaa,
Baabilonii a zaman nɛ,
a kiãn nɛ ka a sii-dɔ̃len ne!
36Ka zia baa a wɔ-kũlin ganaa,
kɛn baãnaan lɛa.
Ka zia baa a sɔraasin ganaa,
ka ǹ foo ziziɛ̃!
37Ka zia baa a sùin laanka a ziabaa
ǹ wotoron ganaa,
ka tiin kɛn nɛ zia biɛ a lɛa.
Ǹ die ǹ nə n baa ka lɔ
pàãwɛɛnaan bɛ́ lɔn!
Ka zia baa a naforon ganaa,
ka ǹ tumaa kokoo!
38Ka zia baa a tà mun ganaa,
ǹ gɔ́ɔ̃ laa kakaka.
A giala, dìn gána nɛ.
Maǹ nə n dinin gole koe
bɛa dì nyín bɔbɔnɛɛn kɛn lɛn
taman yii.
39 #
SNS 18.2
Bɛ lɛ nɛ,
don nɔ̀ɔnɔn laanka kuruun
tá re giɛ̃ Baabilonii kiwi-n kun.
Á re bɛndan dɔn bǎã biɛ.
Min kɔn ba re giɛ̃ a-n duduu doo wa,
a n die goɛ̃ kɛbɔlɔ lɛa miɛ̃ duduu.
40 #
SGK 19.24-25
Dɛnaa Lawa a da ǹ boo á ke:
Basaã mɛn Sodɔmu laanka
Gomɔɔrɔ yɛ,
ka ǹ lɛkoro-a kiwin ni,
a din lɛ miã n die a dɔ yii.
Min goon din ba re goɛ̃
a kiwin ni wa,
minbuiin nɛ goon ba re goɛ̃ ǹ nɛ wa.
41Á ke, Tɔrɔ goon nə boe gɔsɛ
a lɛ̀gɔn li die.
Zaman gole nə n toɛ kanaa lɛ
dan ganaa die.
42Sa laanka ziabaa ǹ màn lɛ
pɛpɛnɛn man a sɔraasin gɔn.
Maǹ baraa,
ǹ ba makara doɛ̃ wa.
Ǹ bìn diɛ wuu n boe ka yìsi mu
gole a ginii bɛ́ lɔn.
Maǹ sùin la,
telee-n kɔn li sɔnbɔraa nɛ,
ǹ nə́ die zia biɛ n ganaa
Baabilonii kiwi.
43Baabiloniin kii bɛ́ á bɛa kibərə
lɛ ma,
a foo ziziɛ̃, nyɛ́ɛ kũ.
A nɔmaamaa nɛ ka lɔ bɛ́ lɔn a nɛ
yɛ biikoo li.
44Dɛnaa Lawa pɛ:
Man die goɛ̃ ka yàra bɛ́ lɔn,
á soo da yii ni Zurdɛ̃ tà lɛ-a,
woe tɔɔn buu sɔ̃ ǹ bǎã nɛ.
Man die min tumaa goɛ
bǎã goon ne ma wo ǹ ne.
Bɛ kio,
ma á re giĩ goon boe
ma koa Baabilonii gána mìi la.
Die n ka ma bɛ́ lɔn?
Die n boe la a maa sii zɛnaa a nɔ̀n
da ma la?
Kiã mɛn nə boe la a n gòãn dii
ma ganaa?
45Dɛnaa Lawa sii mɛn yɔrɔ bɔ
Baabilonii gána wɔ lɛa,
a sii mɛn yɔrɔ bɔ Baabilonii minin wɔ paǹ li,
ka n too kɔ bɛ li kəni.
Sàabaa ba la wa,
maǹ die ǹ giɛrɛɛ tán ka pàã nɛ,
kɔnlɛ ka ǹ nɛnyaanan tumaa nɛ,
ka tɔɔn wɔ bɛ́ lɔn.
Sàabaa ba la wa
ǹ dinin taman yii,
ǹ tá re ǹ zìãn wurii.
46Ǹ mɛn waáraa bɛ̀ ǹ tá pii:
«Ǹ nə́ Baabilonii kũ!»,
tán nə bìn diɛ,
lɛ dɛ gole n boe
gána tumaa nɛ.
Currently Selected:
Zer 50: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
