Zer 51
51
1Dɛnaa Lawa n kɛ pii:
Sonbore, man die yui ka piɛ̃ gole ne,
*Baabilonii kiwi laanka
a minin ganaa.
2Man die tiin kiɛ ǹ ganaa,
ǹ nə ǹ sawaa ka piɛ̃ bɛ́ buu siɛ lɔn.
Ǹ tá re a gána lɛ ziziɛ̃.
Bɛa koe pinaa kɛ lɛ nɛ,
ǹ tá re a lɛnpɛnɛ paǹ yii li.
3Kiɛ-bɔlen, ka kaa kiɛn zũ
zɔ́ɔn kiɛ-bɔlen ganaa!
Ka nyan toa ǹ nə n dinin koa
ǹ ziabaa ǹ mɔnaan kɛn taman
yii wa!
Ka nyan nə ǹ sɔraasi tenən yii
toa koo wa!
Ka ǹ sɔraasin tumaa dɛ!
4Ǹ geren tá re goɛ̃ tán
Baabilonii gána nɛ,
ǹ busulən tá re goɛ̃ tán
bǎã yii ni, ziin la.
5A giala, gána lɛ piɛ̃maa-n ka
sii baraa nɛ
Izirayeli a Lawa sonbore lɛ yɔrɔ-a.
Sɛnɛ, Dɛnaa Lawa Pàãyiidɛnaa
Izirayeli laanka Zudaa toa walan wa.
6Ka baa si,
ka n wɔlɔ sɔsɔɔ kɔ Baabilonii ganaa!
Didie tumaa ga a din li!
Ka bɛ nɛ, ka a re giɛ̃,
a sii baraan lɛa wa.
A giala,
Dɛnaa Lawa a dɔlɔ bɔ biikoo ne.
A kɔnbɔ ka màn mɛn nɛ,
a n die bɛ lɛ a saraa koe la.
7 #
SNS 17.2-4; 18.3 Baabilonii na á goã ka mu
mi ǹ kaaran bɛ́ lɔn,
sana lɛa Dɛnaa Lawa gɔn.
A n gàãn yui kanaa a tɔrɔn tumaa li.
Kanaa a tɔrɔn man nə́ goã
a duvɛ̃ mii,
yǎa a ǹ yii kuĩ.
8Bǎã goon ne Baabilonii mɛnaa,
á busu da a din ganaa.
Ka gɛ̀ loe lɔ la!
Ka nyɔɔ lɔ a busulɛn ganaa,
kɔntan á re kaka koe!
9 #
SNS 18.5
Wɔ́ dagòã da Baabilonii ganaa,
sɛnɛ a kaka koe wa.
Ka toa walan,
didie tumaa wo a gána nɛ!
Taãn nɛ, dɔlɔ mɛn bɛ́ a mìi ni,
á woo yǎa lon,
á dɔ labaran ganaa.
10Dɛnaa Lawa sonbore kɔ wɔ la.
Ka wɔ n ta *Siɔn,
Dɛnaa Lawa,
wɔa Lawa sii mɛn zɛnaa wɔ nɛ,
wɔ a laakalaa.
11Dɛnaa Lawa n zoɛ̃ li
a Baabilonii ziziɛ̃.
Bɛ lɛ nɛ, á Mɛdi gána a kiin sɔsɔmɔ
á ǹ da a zɛnaa ganaa.
Dɛnaa Lawa n gɛ̀ dòo boe,
a na a kion sonbore lɛ a gɛ̀ dòo boe.
Ka kaa kiɛn lɛ bɔ,
ka kaa goóron goa.
12Ka sii giala pɛ ǹ màn zumu,
ka zumu Baabilonii tamaa
ǹ kungɔn kɛ la!
Ka sɔraasi gigiã koa bǎã
lɛduə̃ ǹ bǎãn nɛ!
Ka bǎã-lɛduə̃lin koa,
ka sɔraasin duru,
ǹ zɔ́ɔn lɛn tɔwaa!
Taãn nɛ,
Dɛnaa Lawa sii yɔrɔ bɔ,
a n die bɛ lɛ zɛnɛɛ Baabilonii
minin manɛ.
13 #
SNS 17.1
Baabilonii, nsɛ ke tà gole lɛ-a,
gɔn màn gigiã nə́ n lon,
n sàabaa ǹ gɔn nə ka kɛ lɛ nɛ.
Ń mɛnaa n miãn la á la yii ni.
14Dɛnaa Lawa Pàãyiidɛnaa na
á n liɛ kɛnɛn:
«A ma toa maa Lawabaa nɛ,
zaman damata á re kiɛ n li,
ka bisin kuru bɛ́ lɔn.
Ǹ tá re gɔ̀lɔ̀baa ǹ lɛ dɛ we n ganaa.»
15Dɛnaa Lawa tán zɛnaa ka a pàã nɛ,
á kanaa koa ka sii-doɛ̃ nɛ,
á lon lɛ bɔ ka yiridɛnaabaa nɛ.
16Bɛ̀ á gini,
mu pìãn manə n soekɔn lon.
A n labaran soekɔn tán lɛ dan ganaa.
A n la diɛ tɛ pɛ ganaa màn mɛn bɛ́ toɛ la kaa.
A n piɛ̃ boe a duru ǹ bǎãn nɛ
a soo ne.
17Bɛ lɛ nɛ, minin tá bii-a baãnaan lɛa,
ǹ ba sii kɔn giala miɛ wa.
Sìi n zan-kaalin kɛn tumaa ganaa,
ǹ dìn kɛn taman yii.
Bɛa nyínin lɛn man yiri siɛ̃:
Yiikoonaabaa goon din ba ǹ nɛ wa.
18Ǹ ba màn kɔn lɛa wa.
Maǹ yaa dinsɔɔ̃ diɛ.
Dɛnaa Lawa bɛ́ re yui ǹ gialaa
ǹ mɛn pinaa,
ǹ tá re papaɛ̃.
19Sɛnɛ, Zakɔba a naforo ke,
bɛ ba ka ǹ bɛ́ lɔn wa.
Asɛ n kanaa tumaa a zɛnaali lɛa.
A wɔ n ka Izirayeli tɔrɔn nɛ.
A tɔ n: "Dɛnaa Lawa Pàãyiidɛnaa".
Baabilonii a nya
20Dɛnaa Lawa pɛ:
Baabilonii,
ma nə́ n goã yele lɛa ma gɔn,
maa zia da ǹ màn lɛa.
N din barka nɛ,
má tɔrɔn yɔyɔrɛ,
má gánan ziziɛ̃.
21N din barka nɛ,
má sùin laanka sùidɛnan yɔyɔrɛ,
ziabaa ǹ wotoron ne ka ǹ da
baa-a wolen ne.
22N din barka nɛ,
ma giĩn laanka lɔn yɔyɔrɛ,
nɛnyaanan laanka min zizin ni,
nɛgiĩn laanka nɛlɔn nɛ.
23N din barka nɛ,
má tɔɔ-lɛduə̃lin laanka ǹ tɔɔn yɔyɔrɛ,
buu-kɔsɔlin laanka ǹ buu kɔsɔ
ǹ tɔɔn nɛ,
gánadɛnan laanka ǹ kiodɛnan nɛ.
24Sɛnɛ, sii mɛn bɛ re ka yii, á ke, Baabilonii gána laanka Baabilonii minin nə sii mɛn tɔrɔ nyaa Siɔn nɛ, ma dɔ n die bɛ lɛ tɔrɔ nyɛɛ ǹ dɔn nɛ. Masɛ Dɛnaa Lawa a da ǹ boo ne.
25Hiĩ, Baabilonii, ma lɛ nə n li,
Dɛnaa Lawa a da ǹ boo ne.
Ziziɛ̃ á paǹ li, ń pàã la kele wɔ nɛ,
ń kanaa tumaa ziziɛ̃.
Man die n gɔn siɛ n li,
ma n da birikəə̃ ganaa gɛ̀fun mìi ni,
ma n baa kele tɛdɛnaa lɛa.
26N li, ǹ ba re kɔlɔ kɔn yii
ǹ baa kɛ gùrù tele ǹ kɔlɔ lɛa,
hinlaa kion giala daa ǹ kɔlɔ lɛa wa.
Taãn nɛ, ń tá re goɛ̃ kɛbɔlɔ lɛa,
yǎa duduu.
Dɛnaa Lawa a da ǹ boo ne.
27Ka màn zumu sii a kɔnboe lɛa
gána lɛ nɛ,
ka bɛn pɛ tɔrɔn tumaa bii!
Ka tɔrɔn sɔkɔn a ganaa,
Araraa minin ni,
Minii minin ni ka Askenaazi
minin ni.
Ka sɔraasin nyɛɛnaandɛnan bɔ
ǹ wo zia baa a ganaa.
Ka sùin dia ǹ wo ziabaa a ganaa,
ká bisin kuru bɛ́ lɔn.
28Ka tɔrɔn sɔkɔn a ganaa,
Mɛdi gána a kiin ni,
a gánadɛnan nɛ, a kiodɛnan nɛ
ka ǹ zaman tumaa nɛ.
29Dɛnaa Lawa a sii yɔrɔ boe ke,
bɛ̀ á bɛ zɛnɛɛ Baabilonii gána nɛ,
tán nə bìn diɛ, a n bìn diɛ nyɛ́ɛ gɔn.
A n Baabilonii gána bɔyɛɛ,
a baa kɛbɔlɔ lɛa,
min ná a ba a-n wa.
30Baabilonii a sɔraasi sonboren
nə́ n piã ka ziabaa nɛ.
Maǹ nə n duri bǎã kakan nɛ.
Ǹ foo tãbaa nya.
Maǹ ka lɔ bɛ́ lɔn.
Kiwi lɛ a kiɛnlɛn buĩmaa nɛ,
tɛ na a kionən kuĩ.
31Baa-sili nə n diɛ ǹ miã baa-sili lɛ,
dia dí-a wole nə n diɛ ǹ miã
dia dí-a wole lɛ
woe pii Baabilonii gána a kii ni,
mà ǹ nə́ a kiwi lɛ kũ paǹ yii li.
32Ǹ nə́ ziin tumaa kũ,
tɛ kiwi tamaa ǹ kungɔnɔn kɛn kũ,
sɔraasin foo ziziɛ̃.
33Dɛnaa Lawa Pàãyiidɛnaa,
Izirayeli a Lawa n kɛ pii:
Baabilonii doobaan lɛ yɔyɔrɛ
ka *belee duwəə ǹ bǎã bɛ́ lɔn.
Kànaa ka boɛɛnɛ,
asɛ a kaa-piɛ dɔ.
Lawa na a zaman a gɛ̀ dòo boe
Zeruzalɛmu a ginii
34Baabiloniin kii Nebukadenezɔɔrɔ
ma ziziɛ̃ lenlen,
á n la bɔ ma ganaa ka tasa gɔ́ɔ̃
kooro bɛ́ lɔn.
Á ma mui ka mu li ǹ màn babaraa kɛ bɛ́ lɔn.
Ma gɔn màn giɔ̀mɔ kakan kɛn,
á n nɔ̀ kã ka bɛn nɛ.
Bɛ kio, á ma loo.
35Siɔn zaman nə pii:
Wɔa koe laanka wɔa nɔmaa
kũ Baabilonii gána mìi ni.
Zeruzalɛmu minin man pii:
Wɔ mà ke á kaa, bɛa dɔlɔ die a kũ
Baabilonii minin mìi ni!
36Bɛ lɛ nɛ Dɛnaa Lawa n kɛ pii:
Ma dinmaa n die n gɛ̀ dòo boe,
ma n zia gii da.
Ma á re Baabilonii gána a tà
mun piɛ̃,
ma a mu pìãn tumaa dama.
37Man die Baabilonii kiwi bɔyɛɛ,
ma baa kɔlɔ da kɔn la lɛa,
Á re tolokan giã ǹ bǎã biɛ.
Nyɛ́ɛ á re minin kuĩ.
Ǹ tá re nyɛ́ɛ da ǹ lɛ biɛ,
min kɔn ba re giɛ̃ kiwi lɛ-n wa.
38Sisia, a zaman tumaa n
ka yàran bɛ́ lɔn lɛ biɛ.
Maǹ lɛ biɛ ka gòon màn bɛ́ lɔn.
39Ǹ la n kakaɛ̃,
sɛnɛ bɛa biikoo li,
ma màn-bii zɛnaa ǹ wɔ lɛa.
Man die mi ǹ màn koe ǹ la
ǹ mi a ǹ yii kũ.
Ǹ tá re nyuù we,
ǹ yii ná a kiɛ doo duduu wa.
Ma din Dɛnaa Lawa a da ǹ boo ne.
40Man woe ǹ ne ǹ bɔlɔ kuru
ǹ bǎã nɛ,
ka sère nɛn bɛ́ lɔn,
sère gɔ̀lɔ̀ nɛ ka butumun ni.
Gɛ̀ loe Baabilonii la
41Sekaki kiwi ke,
a miã ná a banban kanaa wa,
ǹ nə́ bɛ kũ.
Bɛ na á saa lɔn kəni?
Tɔrɔn bii,
Baabilonii n ka kɛbɔlɔ bɛ́ lɔn.
Bɛ na á saa lɔn kəni?
42Yìsi mu na á yoo Baabilonii gialaa,
A gùrù lɛ-a mu ke bɛ̀ á yoo lon,
a n gini,
bɛ́ daa n kɔ lɛ.
43A kiwin nə́ kɛbɔlɔn baa.
Gána lɛ nə́ n baa tán gere lɛa,
min ná a boe la a giã-n doɛ̃ wa,
min ná a boe a-n dɔn wa.
44Dɛnaa Lawa pɛ:
Man yui Bɛɛli gialaa Baabilonii,
màn mɛn bɛ́ a bɔlɔ-n á n mui,
man bɛ baɛ̃ ma soo ne.
Tɔrɔn ba re yiɛ ǹ wo a li doo wa.
Kungɔnɔn mɛnɛn bɛ́
Baabilonii tamaɛ bɛn nə́ kaa.
45Ee, Maa zaman,
soo n nə bɔ kiwi kɛ nɛ!
Didie baa si, a ga a din li,
a n duru maa foo-yoo baraa
kɛ nyɛɛnɛ!
46Ka foo nyan ziziɛ̃ wa! Ka nyan nyɛ́ɛ baa minin boon kɛn manɛ kaa ǹ miɛ gána lɛ gɔ́ɔ̃-n wa. Lɛ̀ goon gɔ́ɔ̃ nɛ, boo nə n diɛ, lɛ̀ kɔsɔ-a doo, maǹ kɔsɔ dɔ diɛ: Kakaarɛbaa n mɔnɛɛ gána lɛ nɛ, pàã-zɛnaali nə ǹ miã lui a bɔ pàã la.
47Bɛ lɛ nɛ, á ke, lɛawaan tá re doe,
ma á re yui Baabilonii a dì
soreen kɛn gialaa.
Sìi á re n koe gána lɛ tumaa lɛ.
Min mɛnɛn nə gã,
bɛn tá re goɛ̃ tán kiwi lɛ bii.
48 #
SNS 18.20
Min mɛnɛn doamaa bɛ́ nɛ ǹ kiwi lɛ ziziɛ̃,
maǹ boe gɔsɛ a lɛ̀gɔn li.
Bɛa waáraa kəni, lon laanka tán
ka ǹ gɔ́ɔ̃gɔ́ɔ̃ ǹ mànan tumaa n
die gɔ̀lɔ̀baa ǹ lɛ dii a ganaa.
Dɛnaa Lawa a da ǹ boo ne.
Zeremii
49 #
SNS 18.24
Kanaa tumaa nɛ,
min gigiã gɛ̀ wɔ Baabilonii taman yii.
A din yɔrɔ goon la,
Baabilonii doamaa nɛ a mɛnaa
Izirayeli minin kɛn lɛa ǹ nə́
gã a taman yii.
50Kasɛn mɛnɛn nə n si gɛ̀ la,
ka woo, ka nyan gole kànaa wa!
A ka toa sɔsɔɔ ka n yiri koa
Dɛnaa Lawa nɛ,
ka n taasɛ Zeruzalɛmu ganaa.
Zaman
51Wɔ bɛ́ wɔ́ sɔ kɔn kɛn ma,
sìi wɔ kũ.
Tiin bɛ́ ǹ nə́ kaa
Dɛnaa Lawa a kion a bǎã sonbore kɛ nɛ,
sìi na á n kɔ wɔ lɛ.
Dɛnaa Lawa
52Bɛ lɛ nɛ, á ke lɛawaan tá re doe,
man die yui Baabilonii a dì
kooron kɛn gialaa.
Gána lɛ paǹ tumaa ganaa,
busulən ginii lɛ á re boe.
Dɛnaa Lawa a da ǹ boo ne.
53Ta Baabilonii din dii lon sɔsɔɔ,
ta á n duru kungɔn sɔsɔrɔn kio,
min mɛnɛn bɛ́ re die a ziziɛ̃ taman yii,
ǹ gɔn tá re doe a ganaa.
Ma dinmaa nə ǹ diɛ.
Dɛnaa Lawa a da ǹ boo ne.
Zeremii
54Gú diɛ lɛ n boe, boe Baabilonii.
Koe gole wuu n boe gána lɛ nɛ.
55Hiĩ, Dɛnaa Lawa n Baabilonii
gána lɛ ziziɛ̃.
Lɛ dɛ dadaran kɛn,
a n bɛn lɛ kuri.
Zɔ́ɔn zia kurun man gini
ka tà mu bɛ́ lɔn.
Ǹ ginii n ka la a ginii bɛ́ lɔn.
56Ziziɛ̃ wole lɛ dɔ á nya.
A n die yui Baabilonii gialaa,
a na a zia-baali zanbian kɛn kũ,
a ǹ san yiyiɛ.
Taãn nɛ, Dɛnaa Lawa n Lawa lɛa,
a n gɛ̀ dòo boe doɛ̃,
a n didie sarɛɛ a n kɔnpii ka
a zɛnaa ǹ siin ni.
57«Baabilonii gána a dí-nyali dadaran kɛn nɛ, a sii-dɔ̃len ne, a gánadɛnan nɛ, bɛn kiodɛnan nɛ, ká a zia-baali zanbian nɛ, ma á re mi ǹ màn koe ǹ la a ǹ yii kũ. Ǹ tá re nyuù we, ǹ yii ná a kiɛ doo duduu wa.» Kii mɛn bɛ́ a tɔ n Dɛnaa Lawa Pàãyiidɛnaa, bɛa da ǹ boo ne.
58Dɛnaa Lawa Pàãyiidɛnaa n kɛ pii:
Kungɔn dadaran mɛnɛn bɛ́ Baabilonii lɛnpɛnɛ,
bɛn tumaa ziziɛ̃.
Tɛ á re kiɛnlɛ sɔsɔrɔn kɛn kuĩ.
Tɔrɔn manə n dinin nɔmɛɛ kooro,
gánan man dí nyɛɛ tɛ nɛ!
Sɛ́wɔ mɛn nə n zũ Efrati tà mu li
59-60Neriya a nɛgiĩ, Maseya a nɔ̀ɔn Seraya na á goã Zudaan kii Sedekiasi a sɔraasin sii yɔrɔ-bɔle lɛa. Sedekiasi a kiibaa lɛ̀ siibaa ǹ wɔ li, Seraya kɔ lɛ á woo Baabilonii. Koe mɛn tumaa doamaa bɛ́ a Baabilonii kiwi yɛ, ka boon mɛnɛn bɛ́ a n li a ǹ da kiwi lɛ ganaa, Zeremii goã á bɛn tumaa kiɛ̃ sɛ́wɔ munii la. 61Zeremii tɔn pɛ Seraya nɛ: – Bɛ̀ n dɔ Baabilonii, n die n sɛ́wɔ kɛ tumaa pɛ. 62A pɛ: «Dɛnaa Lawa, n din nə́ n boo kɛ da: Baabilonii gána á re n bɔ̀n biɛ, min goon din ba re goɛ̃ a-n wa, minbuiin nɛ lɛa, hinlaa tɔɔ lɛa wa. A n die n biɛ kɛbɔlɔ lɛa yǎa duduu.» 63#SNS 18.21 Bɛ̀ n sɛ́wɔ munii lɛ pɛ ń nya, n die n kɔlɔ yii a ganaa, n zũ Efrati tà mu li. 64A pɛ: «Baabilonii n die papaɛ̃ kɛa yɔrɔ kɛ lɛ la. Dɛnaa Lawa bɛ́ re koen mɛnɛn diɛ la, a re yui bɛ kɔn kio doo wa.»
«Zaman lɛ á re papaɛ̃.»
Zeremii a boon manə n lɛ doɛ kànaa.
Currently Selected:
Zer 51: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
