Zer 49
49
Lawa a boo Amɔn tɔrɔn wɔ paǹ li
1 #
Eze 21.28-32; 25.1-7; Amɔ 1.13-15; Sof 2.8-11 Amɔn tɔrɔn wɔ paǹ li:
Dɛnaa Lawa n kɛ pii:
«A na á saa lɔn,
Amɔn tɔrɔn kii Gaadi gána si
á baa a wɔ lɛa?
Ǹ zaman nə́ Izirayeli kiwin si
ǹ nə́ n kɔ lɛ.
Bɛ giala mà wàa kəni?
Izirayeli minin nɛnyaanan ma nə
ǹ banban
ǹ nə́ boe la ǹ bɛa kiwin lɛn baa
ǹ kíɛ̃ lɛa wa?»
2«Dɛnaa Lawa a da ǹ boo á ke,
lɛawaan tá re doe,
man die toɛ,
ziabaa ǹ lɛ dɛ bɔ Rabaa,
Amɔn tɔrɔn kiwi gole kɛ nɛ.
Bɛa kiwi gole lɛ á re kɛbɔlɔ biɛ.
Tɛ á re a lɛkoro lɛ-a kiwin kuĩ.
Bǎãn mɛnɛn bɛ́ Izirayeli wɔ lɛa,
á re ǹ sii.»
3Ɛsibɔn minin, ka gɛ̀ koa ǹ loe lɔ,
a giala Ayii kiwi yu!
Rabaa lɛkoro-a kiwin,
ka gú da!
Ka gɛ̀ koa ǹ mɔnaan wɔ,
ka foo ziziɛ̃ ǹ loe lɔ!
Ka bɔ bǎã tumaa nɛ, kɛ ziin li:
Amɔn tɔrɔn kii n woe gùli kɔ
ǹ bǎã nɛ,
kun ka a wúlu-bɔlen laanka
a kiãn tumaa nɛ.
4Rabaa, nɛlɔ piã-wole,
ma nə́ n goã n din koɛ
n nyankɔrɔ basan kɛn taman yii,
ka n kaa-piɛ màn sonboren kɛn nɛ!
Ma nə́ n goã n foo doɛ
n naforon ganaa,
bɛ̀ n tá pii:
«Die doe ne a yoo ma gialaa?»
5Dɛnaa Lawa Pàãyiidɛnaa a da
ǹ boo á ke:
«Man die nyɛ́ɛ kiɛ ǹ ganaa,
a bɔ paǹ tumaa li.
Ǹ tá re ka kiɛ ǹ nyɛɛnɛ ǹ ka loo,
min kɔn ba re yii a baa-silin
lɛn sɔkɔn wa.
6Sɛnɛ bɛ kio,
ma á re Amɔn tɔrɔn
giã ǹ gɔn zizi kɛ koe ǹ la.»
Dɛnaa Lawa a da ǹ boo ne.
Lawa a boo Edɔmu minin wɔ paǹ li
7 #
Iza 34.5-17; 63.1-6; Eze 25.12-14; 35.1-15; Amɔ 1.11,12; Abd 1-14; Mal 1.2-5 Edɔmu minin wɔ paǹ li. Dɛnaa Lawa Pàãyiidɛnaa n kɛ pii:
«Sii-dɔ̃li ba Teman kiwi doo wa?
Yiridɛnan kɛn yiri na á n si ǹ la?
Ǹ sii-doɛ̃ lɛ na á nya?
8Dedan minin lɛn,
ka n dɔ̀ɔ̃ wɔ ka baa si!
Ka n duru kele yalan nɛ!
Ezawu a kion minin lɛn,
man die koe boe ka ganaa.
Biikoo n ke má n die yui ka gialaa.
9Bɛ̀ rezɛ̃ nɛ na wolen nə́ daa ka li,
ǹ ba a nɛ gogoon toɛ walan wa?
Bɛ̀ wurumun nə́ daa tèlò-n,
ǹ bɛ́ re boe màn mɛn la,
ǹ bie woe ka bɛ-n wa?
10Sɛnɛ, ma dinmaa n die
Ezawu a kion minin lɛn lon dudui.
Ma á re toɛ ǹ nə ǹ duru ǹ bǎãn
kɛn wɔlɔ yɛ.
Ǹ ba re boe la ǹ wo walan doo wa.
Ǹ tá re ǹ nɛnyaanan dii,
ǹ dɔɔ̃nɔn nɛ, ka ǹ miãkɛnɛn
tumaa nɛ.
Min kɔn ba re pii ǹ ni:
11Kaa nɛ toenen kɛn, ma á re ǹ toe,
kaa lɔ giɔɔrɔn tá boe la ǹ nə n
foo doa ma ganaa.»
12Dɛnaa Lawa n kɛ pii: «Ka n too kɔ: Min mɛnɛn doamaa bɛ́ ǹ bie ǹ maa foo-yoo ǹ paan lɛ a mu mi wa, n dɔn nə́ mi. Edɔmu, nsɛ n die goɛ̃ dɔlɔ baã? Haayii! Kɛa foo-yoo ǹ paan lɛ, n tá re a mu mii, sàabaa ba la wa. 13Man liɛ kɛ we, ma din Dɛnaa Lawa: Bosraa kiwi kɛ á re kɛbɔlɔ biɛ, a diə gole baa. Ǹ tá re biɛ sii a kɔnboe lɛa lɛn baraa bíi a paǹ li hinlaa bɛ̀ ǹ tá li ǹ sìi da min ganaa. A lɛkoro lɛ-a kiwin kɛn tá re kɛbɔlɔn biɛ, yǎa duduu. Dɛnaa Lawa a da ǹ boo ne.»
14Dɛnaa Lawa boo da ma nɛ,
dia dí-a wole n woe bɛ pii
tɔrɔn tumaa nɛ:
«Ka n sɔkɔn, ka wo Edɔmu gialaa!
Ka yoo, ka a ziabaa!»
15«Taãn nɛ, Edɔmu,
man die n biɛ tɔrɔn tumaa
a kiɛɛrɛ lɛa,
tɔrɔ mɛn bɛ́ min tumaa ná a puusə koe.
16Ma n nyɛ́ɛ da ǹ màn lɛa,
n nə́ n din koɛ n miãn ganaa.
Sɛnɛ, ma nə n din siɛ̃.
N giã ǹ bǎã n ka kele yalan nɛ,
sɛnɛ, n woo giã kele mìi ni.
Ta ma n nə́ n kii dɔ lon sɔsɔɔ á la
zèwo wɔ nɛ,
man die n zuĩ yǎa tán.»
Dɛnaa Lawa a da ǹ boo ne.
17Edɔmu á re kɛbɔlɔ biɛ. Min mɛn tumaa bɛ́ kiɛ̃ kunu a li, ǹ yiri á re n lɔlɔkɔn. Ǹ tá re n lɛ dii basaã kɛ tumaa taman yii. 18#SGK 19.24-25 Dɛnaa Lawa pɛ: «Basaã mɛn Gomɔɔrɔ laanka Sodɔmu ka ǹ lɛkoro lɛ-a kiwin yɛ a din lɛ miã n die ka yii. Min goon din ba re goɛ̃ kaa kiwin ni wa, minbuiin nɛ goon ba re goɛ̃ ǹ nɛ wa.»
19Dɛnaa Lawa pɛ:
Man die goɛ̃ ka yàra bɛ́ lɔn,
á soo da yii ni Zurdɛ̃ tà lɛ-a,
woe tɔɔn buu sɔ̃ ǹ bǎãn ganaa.
Man die min tumaa goɛ bǎã goon
ma wo ǹ ne,
Bɛ kio,
ma á re min goon boe kiã lɛa ma
koa Edɔmu mìi la?
Die n ka ma bɛ́ lɔn?
Die n boe la a maa sii zɛnaa a nɔ̀n
da ma la.
Kiã mɛn nə boe la a n gòãn dii ma ganaa?
20Dɛnaa Lawa sii mɛn yɔrɔ bɔ
Edɔmu wɔ lɛa,
a sii mɛn yɔrɔ bɔ Teman minin
wɔ paǹ li,
ka n too kɔ bɛ li kəni:
Sàabaa ba la wa,
maǹ die ǹ giɛrɛɛ tán ka pàã nɛ,
kɔnlɛ ka ǹ bɔnboɛɛnɛn tumaa nɛ,
ka tɔɔn bɛ́ lɔn.
Sàabaa ba la wa,
ǹ dinin taman yii,
ǹ tá re ǹ zìã wurii.
21Ǹ bɔ á mɛnaa wuu n bìn diɛ
tán ganaa.
Ǹ lɛ dɛ wuu n boe Sawɛɛ tà lɛ-a.
22Zɔ́ɔ n ka zèwo bɛ́ lɔn, piɛ̃, á n nyàan lɛ bɔ Bosraa kiwi lalan. Bɛa pinaa lɛ nɛ, nyɛ́ɛ á re Edɔmu a zia-baali zanbian kɛn kuĩ ka lɔ bɛ́ lɔn a nɛ yɛ biikoo li.
Lawa a boo Damaasi a paǹ li
23 #
Iza 17.1-3; Amɔ 1.3-5; Zak 9.1 Damaasi kiwi a paǹ li:
Amaati kiwi laanka Arpaadi kiwi
kibərə baraa ma.
Sìi nə n kɔ ǹ lɛ.
Ǹ yiri lɔlɔkɔnmaa nɛ,
ka yìsi mu bɛ́ lɔn,
a boe la á golee wa.
24Damaasi minin foo ziziɛ̃maa nɛ,
maǹ nə n yɔrɔ boe die baa sii.
Ǹ gɔ̀nɔn nə bìn diɛ nyɛ́ɛ gɔn.
Nyɛ́ɛ nə ǹ ganaa,
ǹ gɔ̀nɔn nə bìn diɛ,
ka lɔ bɛ́ lɔn a nɛ yɛ biikoo li.
25Ǹ nə́ n la bɔ kiwi gole kɛ ganaa,
kiwi ke ma foo kɔɔ̃n koe!
Bɛ giala mà wàa kəni?
26Dɛnaa Lawa Pàãyiidɛnaa a da ǹ boo á ke: «Bɛ lɛ nɛ, bɛa pinaa lɛ nɛ, nɛ tenən tá re kiɛ bǎã dadaran nɛ, sɔraasin tumaa á re giɛ̃. 27Kungɔn mɛn bɛ́ Damaasi kiwi tamɛɛ, ma á re tɛ diɛ bɛ ganaa. Á re Bɛn-Adaadi a kii kion kuĩ.»
Lawa a boo Larabun wɔ paǹ li
28Kebaara Larabun wɔ paǹ li kɔnlɛ ka Asɔɔrɔ gánan nɛ, kɛn Baabiloniin kii Nebukadenezɔɔrɔ boo ǹ la. Dɛnaa Lawa pɛ:
Ka yoo, ka wo Kedaara gialaa!
Ka diə gole minin kɛn màn
tumaa ziziɛ̃!
29Ka ǹ zìãn laanka ǹ tɔɔn si ǹ la,
ǹ mìi duru ǹ bǎã laanka
ǹ màn tumaa nɛ!
Ka wo ka ǹ nyɔɔmaan nɛ,
ka n lɛ dɛ ǹ ganaa, ka pɛ:
«Nyɛ́ɛ n bǎã tumaa nɛ!»
30Asɔɔrɔ minin lɛn,
ka baa si, ka baa si fufuu.
Ka n duru kele yalan nɛ.
Dɛnaa Lawa a da ǹ boo ne.
A giala, Baabiloniin kii
Nebukadenezɔɔrɔ
nə n yɔrɔ boe,
a n sii yɔrɔ boe die-n ka gialaa.
31Ka yoo, ka wo tɔrɔ kɛn gialaa
ǹ nə́ ǹ ba n taasɛ ka sii kɔn nɛ wa.
Maǹ taasɛ mà ǹsɛn man yii-nyɛɛ
gɔ́ɔ̃ nɛ.
Dɛnaa Lawa a da ǹ boo ne.
Goo ba ǹ kiɛnlɛn lɛ wa
goo nɛ ba ǹ ganaa wa.
Maǹ giã-n tiãlɛa.
32Ǹ zɔ́ɔn tá re ǹ nyɔɔmaan koɛ̃,
ka ǹ tɔɔ kuru damata nɛ,
ka bɔ zia la ǹ màn bɛ́ lɔn.
Min mɛnɛn bɛ́ n karazɔɔ ka koɛ̃,
ma á re bɛn pɛsɛ̃ bǎã tumaa nɛ.
Ma á re toɛ koe bɔ paǹ yii-a a da
ǹ ganaa.
Dɛnaa Lawa a da ǹ boo ne.
33Asɔɔrɔ kiwi á re tolokan susu ǹ
bǎã biɛ,
kɛbɔlɔ lɛa yǎa duduu.
Min goon ba re goɛ̃ kaa kiwin ni wa,
minbuiin nɛ goon din ba re goɛ̃
ǹ nɛ wa.
Lawa a boo Elamu minin wɔ paǹ li
34Dɛnaa Lawa boo da Lawa a boo gii-dali Zeremii ni Elamu minin wɔ paǹ li. Bɛ́ á zoɛ̃ bɛ̀ Sedekiasi a Zudaan kiibaa tɔn belebɔ wa. 35Dɛnaa Lawa Pàãyiidɛnaa boo mɛn da, á ke:
Elamu minin sãn kɛn,
ǹ mɛnɛn lɛn bɛ́ ǹ pàã lɛa,
man die bɛn yiyiɛ.
36Man die piɛ̃ sii diɛ Elamu la,
boe kanaa gùrù sii tumaa ganaa.
Man die Elamu minin lui bǎã
tumaa nɛ,
ǹ gùli-kɔlin tá re yii gána tumaa nɛ.
37Elamu minin gɔ̀nɔn tá re bìn diɛ
ǹ zɔ́ɔn nyɛɛnɛ,
ǹ mɛnɛn bɛ́ giɛ ǹ gɛ̀ li.
Maa foo yoo baraa kɛ gɔ́ɔ̃ nɛ,
man die koe diɛ ǹ la.
Dɛnaa Lawa a da ǹ boo ne.
Ma á re ǹ kio lui ka zia nɛ,
yǎa ma ǹ tumaa dii lenlen.
38Man die Elamun kii laanka
a dí-nyalin dii,
ma dinmaa kii dankan koa bɛa
gána lɛ nɛ.
Dɛnaa Lawa da ǹ boo ne.
39Sɛnɛ, ǹ kɔn pinaa,
ma á re wusii ma Elamu a lɛlɛ
ǹ giã ǹ gɔn kɛ kɔ la.
Dɛnaa Lawa a da ǹ boo ne.
Currently Selected:
Zer 49: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
