Zer 5
5
Lawa n boo diɛ kɔnlɛ ka a boo gii-dali ni Zeruzalɛmu a paǹ li
Dɛnaa Lawa
1Ka wo bǎã tumaa nɛ,
Zeruzalɛmu a ziin la,
ka ga sɔnbɔraa nɛ, ka nɔ̀n da,
Ka ga a bǎã dadaran nɛ,
Bɛ̀ ka min goon yɛ,
pepere, bɔlɔgoondɛnaa lɛa,
ma á re makara boe
Zeruzalɛmu ganaa kəni.
Zeremii
2Bɛ̀ ǹ tá liɛ we, maǹ pii:
«Ma nə n liɛ ka
Dɛnaa Lawa Yiikoonaa tɔ nɛ.»
Sɛnɛ, ǹ liɛ tumaa n soɛ lɛa.
3Dɛnaa Lawa,
n bie giɛ sonbore taãn li wa?
Ń nə́ ǹ dɛ,
sɛnɛ a wɔ ǹ ganaa wa.
Ń bɔ̀n da ǹ ganaa,
sɛnɛ, ǹ nə́ n piã ka n doroon ne.
Ǹ nə́ n mìi laa ka kɔlɔ bɛ́ lɔn,
ǹ nə́ n piã mà ǹ ba die n li wa.
4Man taasɛ:
«Min mɛnɛn bɛ́ ǹ ba n taasɛ
sɔsɔɔ wa,
bɛn zɛnaa ǹ sii n kɛ nɛ.
Maǹ sii zɛnɛɛ ǹ nə́ ǹ ba n taasɛ wa.
Taãn nɛ!
Ǹ ba ǹ Dɛnaa Lawa dùũ doɛ̃ wa,
ǹ ba a dí-pɛn dɔn doɛ̃ wa.
5Man die woe nyɛɛnaandɛnan li,
ma á re boo diɛ ǹ nɛ,
ta a baalan,
bɛn tá Dɛnaa Lawa dùũ doɛ̃
ka ǹ Lawa a dí-pɛn nɛ.»
Sɛnɛ, haayii! Ǹ tumaa kun,
ǹ nə́ ǹ zǔun yiyiɛ,
ǹ nə́ ǹ biɛn nana.
6Bɛ lɛ nɛ,
daã gòã li ǹ yàra á re ǹ kuĩ,
don ginin nə ǹ sɔ̃.
Goe tá re n yii diɛ ǹ la kunu
ǹ kiwin ganaa,
a minin kũ ǹ soo waáraa.
Sonbore, ǹ sii baraan nə́ mɔnaa
á la yii ni,
ǹ bɔlɔgoonbaãdɛnaabaa kɛ a n
nimii doɛ̃ wa.
Dɛnaa Lawa
7Man makara boe n ganaa lɔn kəni Zeruzalɛmu?
N nɛnyaanan nə́ n la bɔ ma ganaa.
Mànan mɛnɛn bɛ́ ǹ ba Lawa lɛa wa,
maǹ liɛ we ka bɛn tɔ nɛ.
Ǹ bɛ́ màn mɛn tumaa li,
má a tumaa kɔ ǹ la.
Sɛnɛ, ǹ nə́ naarɛbaa zɛnaa,
ǹ nə́ kɔn nyɛnyɛnaa ǹ nə́
woo kɔrɔbaa ǹ kion.
8Ǹ bɛ́ màn mɛn lɛa,
sùi kasiɛ̃ wolen manɛ,
lɔ sii nə́ ǹ ganaa.
Didie tumaa n baa sii ǹ miãkɛn a
lɔ kio.
9Dɛnaa Lawa a da ǹ boo á ke:
Ma kɔnbɔ ma yoo minin kɛn
gialaa wa?
Ma doamaa bie ma maa gɛ̀ dòo
bɔ tɔrɔ kɛ miã ganaa wa?
10Ka dii kungɔn la ka *rezɛ̃ da
kɛ ziziɛ̃.
Sɛnɛ, ka nyan ziziɛ̃ lenlen wa.
Ka a gùrùn kukuru,
ǹ bie masɛ wɔn lɛa wa.
11Zudaa minin nə́ ma yiri sã,
Izirayeli minin nə ma
yiri sã taãn-taãnɛ.
Dɛnaa Lawa a da ǹ boo ne.
Bɔlɔgoonbaãdɛnaabaa a saraa
12Zudaa minin nə́ soɛ bɔ
Dɛnaa Lawa wɔ paǹ li.
Ǹ nə́ pɛ mà a banban.
Koe á re boe wɔ ganaa wa,
wɔ a re zia yii wa,
bòo á re wɔ kuĩ wa!
13Lawa a boo gii-dalin lɛn man
piɛ̃ kooro lɛa.
Lawa boo kɔn da ǹ nɛ wa.
Ǹ bɛ́ koen mɛnɛn pii,
maǹ die kuĩ ǹ dinin mìi ni.
14Bɛ lɛ nɛ,
Dɛnaa Lawa Pàãyiidɛnaa bɛ́ boo
mɛn diɛ, á ke:
«Ǹ bɛ́ boo diɛ ka kɛa yɔrɔ kɛ nɛ,
ma bɛ́ boon mɛnɛn we
n lɛ-n Zeremii,
bɛ n die goɛ̃ ka tɛ bɛ́ lɔn.
Tɔrɔ kɛ n die goɛ̃ ka gɔn bɛ́ lɔn,
tɛ n kuĩ.»
15Á ke, Izirayeli minin,
tɔrɔ mɛn bɛ́ boe sɔsɔɔ,
man die bɛ diɛ ka ganaa.
Dɛnaa Lawa a da ǹ boo ne.
Tɔrɔ nɛ pàã ná a lon,
Tɔrɔ zizi ni, tɔrɔ lɛa,
ka a ǹ bɔlɔ miɛ̃ wa,
ka a ǹ boo a woo ǹ bǎã yii wa.
16Ǹ kiɛn man gɛ̀ pɛsɛ̃,
ǹ sɔraasin miã banban.
17Maǹ màn tumaa ziziɛ̃:
kaa kaa-piɛ mànan nɛ,
kaa màn-biin ni,
kaa nɛgiĩn laanka kaa nɛlɔn nɛ,
kaa tɔɔ bisinin laanka kaa tɔɔ
dadaran nɛ,
kaa rezɛ̃ dan laanka kaa gɔ́rɔ dan nɛ.
Zia á re kaa kiwi tamaa wolen yui,
ka goã taasɛ mà ka á re yii-nyɛɛ yii
ǹ mɛnɛn lɛn nɛ.
18Sɛnɛ, bɛa biikoo lɛ li,
ma a re ka bɔ̀n biɛ lenlen wa.
Dɛnaa Lawa a da ǹ boo ne.
19Bɛ̀ minin tá nɔ̀n diɛ mà wàa na á baa Dɛnaa Lawa, wɔa Lawa kɛ tumaa zɛnaa wɔ nɛ, nsɛ Zeremii, n tá re ǹ lɛ sii n pɛ ǹ nɛ kɛnɛn: «Ka ǹ ka n la bɔ a ganaa, ka dí nya lawa kɔsɔn manɛ kaa gána nɛ. Ka bɛa yɔrɔ lɛ nɛ, ka ǹ die dí nyɛɛ tiin manɛ gána nɛ a ná a bie kaa gána lɛa wa.»
Lawa nə n gɔn wɛɛ a zaman nɛ
20Ka boo kɛ pɛ
Zakɔba a kion minin manɛ,
ka toa a kaa Zudaa minin too ne.
21 #
Iza 6.9-10; Eze 12.2; Mar 8.18 Ka n too kɔ kəni,
tɔrɔ yiriwɛɛnaan kɛn, baãnaan lɛa.
Ka yiin tan sɛnɛ ǹ ba wɔlɔ yii wa,
ka toon tan sɛnɛ ǹ ba boo miɛ wa.
22 #
Zɔb 38.8-11
Ka a ma guguru koe wa?
Ka a nyɛ́ɛ biɛ ma-n wa?
Dɛnaa Lawa a da ǹ boo ne.
Ma din ni má nyɔɔsɔ̃ kaa tán
yìsi mu gole lɛdan lɛa yǎa duduu,
sɛnɛ a ba a la boe ǹ kɔn pinaa wa.
A mu á boe la a yoo,
sɛnɛ pàã n nyaabiɛ a ganaa.
Á boe la a gini,
sɛnɛ a ba re a la boe wa.
23Sɛnɛ, kasɛn man tɔrɔ too kaka,
gòãn dii wolen lɛa.
Ka n dɔ̀ɔ̃ wɔ ma nɛ, ka woo.
24Ka a pii dɔn dinin:
«Ka daa wɔ nyɛ́ɛ baa Dɛnaa Lawa,
wɔa Lawa yii-n wa,
asɛ mɛn bɛ́ la mu koe wɔ la
a biikoo li,
a bibinaa laanka a nyɔɔbaa.
Lɛ̀ woo lɛ̀, a n lɛawaan boe
koɛ wɔ nɛ kaa-piɛ wɔ lɛa.»
25Kaa sãn nə́ bɛ tumaa lɔlɔkɔn.
Kaa sii baraan nə́ toa ka fɔ̃ bɛa
bǐɛ̃n lɛn li.
26A giala, min baraan tá maa
zaman lɛ bii.
Ka dɔ-dɔli bɛ́ lɔn, manə n duri,
ń yii diɛ.
Maǹ nə́ kan kɔ ǹ tá minbuiinin
kuĩ ni.
27Bàanan kion bɛ́ piɛ̃ lɔn ka
bàanan nɛ,
ǹ dɔn kionən piɛ̃maa-n ka mànan nɛ,
mɛnaa ma la ǹ mànan lɛa.
Bɛ lɛ nɛ, ǹ nə́ yii gugurubaa yɛ,
ǹ nə́ pàãman baa.
28Ǹ nə́ kã, ǹ wìi wɔ.
Maǹ sii baraa zɛnɛɛ yǎa ǹ kiɛ̃
a dan la.
Sɛnɛ ǹ sii tumaa n bǐɛ̃ koe.
A da yaa ǹ ba nɛ toen a zia gii
diɛ wa,
ǹ ba kiri pepere we doobaan lɛa wa.
29Dɛnaa Lawa a da ǹ boo á ke:
Ma kɔnbɔ ma yoo minin kɛn
gialaa wa?
Ma doamaa bie ma maa gɛ̀ dòo
bɔ tɔrɔ kɛ miã ganaa wa?
30Sii bɔbɔnɛɛn ka foo yoo siin
manə n zɛnɛɛ gána kɛ nɛ:
31Lawa a boo gii-dalin man soɛ
boon didiɛ,
Lawa a wúlu-bɔlen manə n gɔn
kuĩ ǹ pàã ganaa.
Maa zaman dɔ ǹ lɛ koe bɛ lɛ ganaa!
Sɛnɛ bɛ kio, ka ǹ die wàa zɛnɛɛ?
Currently Selected:
Zer 5: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
