Zer 4
4
Dɛnaa Lawa
1Izirayeli, bɛ̀ n wusoo ń daa,
n doamaa nɛ n wusoo n da masɛ li.
N màn nyín bɔbɔnɛɛn kɛn,
bɛn bɔ n nə ǹ bɔ n yɔrɔ-a,
n ba re n bibiĩ n mìi gialaa doo wa.
2Bɛ̀ n tá pepere, bɔlɔgoondɛnaa lɛa,
n gɔ́ɔ̃ n fu,
bɛ̀ n lɛ kɔ wɔ, ń pɛ:
«Ma nə n liɛ ka
Dɛnaa Lawa Yiikoonaa tɔ nɛ»,
bɛa waáraa kəni,
tɔrɔ kɔsɔn kɛn tá re ma nyankoe
mà ma barka da ǹsɛn ganaa.
Ǹ tá re gugurubaa yii masɛ
taman yii.
3 #
Oz 10.12
Á ke, Dɛnaa Lawa n kɛ pii
Zudaa laanka Zeruzalɛmu
minin manɛ:
Ka sɔ́ dii dɛ kaa wɔ lɛa.
Ka nyan màn da nyan bii doo wa!
4Ka n dinin kɔ Dɛnaa Lawa la lenlen,
màn mɛn bɛ́ ka niɛ̃ ka boe
masɛ ganaa ka bɛ bɔ,
ka kaa yiikoonaabaa kɔ masɛ la.
Bɛ bie wa,
kaa sii baraan kɛn taman yii,
man die maa foo-yoo kɛ kiɛ ka la,
ka tɛ bɛ́ lɔn.
Á re màn tumaa kuĩ,
min kɔn ná a boe la a nimi wa.
Lɛ-dɛ n boe Zudaa
5Ka boo kɛ pɛ Zudaa gána nɛ,
ka sawaa Zeruzalɛmu.
Ka sère gɔ̀lɔ̀ bɛn pɛ gána lɛ nɛ,
ka n lɛ dɛ ka lɛn gole ne ka pɛ:
«Ka n sɔsɔkɔn kiwi tamaa wolen ne!»
6Ka sii giala pɛ ǹ màn doa tán *Siɔn,
ka n mìi duru,
ka nyan golee kaa giã ǹ bǎã-n wa.
A giala, masɛ Dɛnaa Lawa n die
ka koe ne
boe gɔsɛ a lɛ̀gɔn la, koe gole ne.
7Yàra soo tewon ne,
min mɛn bɛ́ tɔrɔn ziziɛ̃, á ke die.
A n soe a duru ǹ bǎã nɛ,
die kaa gána lɛ ziziɛ̃.
Kaa kiwin man die kɛbɔlɔn
dadaran biɛ,
min goon din ná a ba goɛ̃ ǹ nɛ wa.
8Ka gɛ̀ koa ǹ mɔnaan wɔ,
ka wuu pɛ, ka gini.
Haayii! Dɛnaa Lawa a foo-yoo baraa
lɛ nə n bɔ wɔ kio wa.
9Bɛa pinaa lɛ nɛ,
kiin laanka nyɛɛnaandɛnan foo
á re ziziɛ̃,
Dɛnaa Lawa a da ǹ boo ne.
Lawa a wúlu-bɔlen yiri á re
n lɔloɛkɔn,
nyɛ́ɛ á re Lawa a boo gii-dalin kuĩ.
10Ma á re pii kəni:
– Áh! Dɛnaa Lawa,
ń zaman lɛ laanka Zeruzalɛmu minin
yiri sã taãn-taãnɛ,
bɛ̀ n bɛ n goã ń pɛ:
«Ka á re yii-nyɛɛ yii.»
Sɛnɛ, gɔya sa n zoɛ̃ li á wɔ nyin boe.
Zɔ́ɔn man boe bǎã yii li die
Dɛnaa Lawa
11Bɛa waáraa kəni,
Dɛnaa Lawa á re pii
Zeruzalɛmu minin manɛ:
Kele mìi ni,
piɛ̃ fuu nə n toɛ diə gole ne,
die maa zaman gialaa.
Piɛ̃ lɔnlɔɔn bie màn suu ǹ wɔ lɛa wa,
màn *yoreen kɔ ǹ wɔ bie wa.
12Sɛnɛ piɛ̃ gole ne, ma lɛ dia la
boe walan.
Kanna kəni, man die kiri we
ǹ ganaa.
Zaman
13Zɔ́ɔn lɛn nə́ ke:
maǹ die ka la a tì bɛ́ lɔn,
Ǹ ziabaa ǹ wotoron yii n fuu ka
piɛ̃ gole bɛ́ lɔn,
ǹ sùin yii n fuu á la giogialatã-a nɛ.
Wàa koe n ka kɛ nɛ! Wɔ́ sàabaa!
Dɛnaa Lawa
14Zeruzalɛmu, bɛ̀ n tá giɛ kirisibaa li,
baraabaa pii n bɔ n foo ne.
N nə n die n taasiɛ baraan kɛn toɛ
n gɔ́ɔ̃ nɛ yǎa biĩ kəni?
15A kũ Dan ganaa,
lɛ dia n boe gɔsɛ a lɛ̀gɔn la.
A n koe giala pii,
boe Efrayimu a kele yii kɛ nɛ.
16Ka a giala pɛ tɔrɔn tumaa nɛ,
ka a boo da Zeruzalɛmu:
Zɔ́ɔn lɛn manə n mɔrɛ,
maǹ boe gána sɔsɔɔ nɛ.
Maǹ ziabaa ǹ lɛ-dɛ we
Zudaa kiwin ganaa.
17Ǹ nə́ Zeruzalɛmu lɛnpɛnɛ,
ka wɔlɔ-lɛduə̃lin bɛ́ wuru lɛduĩ lɔn.
A giala, a na á n gòãn dii
masɛ ganaa.
Dɛnaa Lawa a da ǹ boo ne
18Zeruzalɛmu,
n giã ǹ gɔn laanka n zɛnaa ǹ
siin taman yii ni kɛ á n yii.
N baraabaa lɛ a saraa nɛ.
Hiĩ, n koe lɛ á kɔɔsɛ taãn-taãnɛ.
A na á n kũ n foo ganaa.
Zeremii n busu koe koen kɛn taman yii die
19Áh! Ma nɔ̀! Ma nɔ̀!
Ma nə n duwii là paparɛɛ gɔn!
Ma foo n die puri!
Ma gɔ̀nɔn tumaa n bìn diɛ.
Ma a n lɛ tiɛ̃ doɛ̃ wa.
A giala, ma bɛn wuu ma,
ka ziabaa ǹ lɛ-dɛ nɛ.
20Maǹ bɔ̀n dinsɔɔ̃ boo diɛ,
gána lɛ tumaa ziziɛ̃.
Ǹ nə́ wɔa mɔnaa kionən ziziɛ̃
bǎã goon ne,
wɔa duru ǹ bǎãn nə́ papaã
gunyin goon.
21Ziabaa ǹ zanzan kɛ n die goɛ̃
ma yɔrɔ-a yǎa biĩ,
man die n too koe bɛnɛn kɛn
wuu ganaa miɛ̃ duduu?
22Dɛnaa Lawa pɛ:
Maa zaman lɛ a sii doɛ̃ wa,
a ba ma doɛ̃ wa.
Maǹ nɛnyaanan lɛa,
ǹ ba n taasɛ wa,
ǹ ba sii kɔn giala miɛ wa.
Ǹ tá kɔn doɛ̃ ka sii baraa zɛnaa nɛ,
sɛnɛ, ǹ ba kɔn doɛ̃ ka bǐɛ̃-n wa.
23Man giɛ tán ganaa,
a gɔ́ɔ̃ kooromaa nɛ,
màn kɔ́n banban.
Man giɛ lon ganaa,
wɔlɔ fúlu banban.
24Man giɛ kelen ganaa: maǹ bìn diɛ.
Tenten tumaa n bìn diɛ.
25Man giɛ,
á ke, ma yii a minbuiin nɛ kɔn
ganaa wa,
bàanan tumaa sawaa.
26Man giɛ,
á ke, gána sonbore lɛ diə gole baa.
Ǹ ná a kiwin tumaa ziziɛ̃.
Dɛnaa Lawa a lɛa nɛ,
ka a foo-yoo baraa kɛ nɛ.
27Dɛnaa Lawa bɛ́ boo mɛn diɛ, á ke:
Gána lɛ tumaa á re n bɔyɛɛ
a diə gole baa,
sɛnɛ, ma a re ziziɛ̃ lenlen wa.
28Bɛ lɛ nɛ, tán nə gɛ̀ koɛ,
lon, labara gɔ̀nɔn nə́ tii.
Hiĩ! Ma màn mɛn pɛ,
man bɛ lɛ zɛnɛɛ,
ma a re n lɛ boe,
ma wusoo maa da ǹ boo kio wa.
Zeruzalɛmu n gɛ̀-dɛlin gɔn
29Sùidɛnan laanka sa-zũlin bìn
diɛ nyɛɛnɛ,
kiwin tumaa a minin man baa sii.
Maǹ baa sii kiɛ tewonən ne,
ǹ nə́ dii gɛ̀fun la.
Ǹ nə́ n la bɔ kiwin tumaa ganaa,
min kɔn ba ǹ nə́ wa.
30Sɛnɛ, nsɛ Zeruzalɛmu ke ń ziziɛ̃,
ma n wàa zɛnɛɛ?
Ń mɔnaa sonbore wɔ,
ka nyaǹ mànan nɛ sana lɛa.
Ń kala lɔ n yii li
n nə́ n din siĩn koe ne.
Sɛnɛ, n din zɛnaa kɛa là banban.
N sanan manə n pɔpɔsɛ,
maǹ giɛ n gɛ̀ li.
31Sonbore, ma á lɛ-dɛ miɛ̃,
ka lɔ nɛ-yɛli bɛ́ lɔn,
lɔ ten a lɛ-dɛ lɛa,
a gɔ́ɔ̃ yii bibinaa nɛ yii.
Siɔn kiwi a lɛ-dɛn manɛ.
A n gini, á n gɔnɔn lɛ boe:
«Aba! Man giɛ̃ gɛ̀-dɛlin mandɛ gɔn.»
Currently Selected:
Zer 4: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
