Zer 48
48
Lawa a boo Moabu minin wɔ paǹ li
1 #
Iza 15.1–16.14; 25.10-12; Eze 25.8-11; Amɔ 2.1-3; Sof 2.8-11 Moabu minin paǹ li: – Dɛnaa Lawa Pàãyiidɛnaa, Izirayeli a Lawa n kɛ pii:
Wàa koe n ka kɛ nɛ Neboo kiwi ganaa:
ǹ nə́ ziziɛ̃!
Wàa sìi n ka kɛ nɛ Kiritayimu
kiwi ganaa:
ǹ nə́ yɔyɔrɛ!
Kiwi ke tamaa-n sɔnbɔraa nɛ,
sìi laanka nyɛ́ɛ gole nə́ n kɔ lɛ!
2Màn mɛn bɛ́ Moabu diɛ din koa ganaa,
bɛ́ papaã.
Minin man koe yɔrɔ boe
Ɛsibɔn ganaa, ǹ nə́ pii:
«Ka daa wɔ kiwi kɛ yu,
wɔ bɔ tɔrɔn bii!»
Nsɛ dɔ Madmɛn,
ǹ tá re n diɛ lɛ tã ganaa,
ǹ tá re n bɔ̀n biɛ ka zia nɛ.
3Lɛ-dɛ n boe Oronayimu kiwi.
«Màn tumaa ziziɛ̃!
Wàa koe baraa n ka kɛ nɛ!»
4Ǹ nə́ Moabu gána yu,
a nɛnyaanan manə n lɛ dii kɔsɛ kɔsɛ.
5Minin man dii Luhiti tenten la
ka wuu ni.
Oronayimu a tenten a gisĩ ǹ bǎã
kɛ nɛ,
foo ziziɛ̃ ǹ lɛ dɛ n boe
basaã kɛ taman yii:
6Ka papaã ka n bɔ kànaa,
ka nyin a lɛa.
Ka n baa ka Aroɛɛrɛ bɛ́ lɔn
diə gole ne!
7Moabu,
ma nə́ ń goã n foo doɛ n sii
zɛnaan laanka n naforon ganaa.
Sɛnɛ, ǹ tá re n dɔ kuĩ, ǹ wo n ne.
N dì Kemɔɔsi kɛ á re woe gùli kɔ
ǹ bǎã nɛ
kun ka n wúlu-bɔlen laanka
n kiãn tumaa nɛ.
8Basaã-kɔle lɛ n die boe
kiwi gogoonmaa nɛ,
a yiri a re boe a goon din ganaa wa.
Nyankɔrɔ basan tá re papaɛ̃,
wurun kɛn dɔn nə ziziɛ̃,
ka Dɛnaa Lawa goã á pɛ lɔn.
9Ka nyàa kan kɔ Moabu gána la,
a giala, a n li a piɛ̃!
A kiwin man die goɛ̃ ka diə gole
bɛ́ lɔn,
min kɔn ná a giɛ̃ ǹ nɛ wa.
10Min mɛnɛn bɛ́ ǹ ba
Dɛnaa Lawa a dí nyɛɛ
ka ǹ foo tumaa-n wa,
lɛn baraa bíi bɛa dɛnan kũ!
Min mɛnɛn bɛ́ ǹ ba li
ǹ gɛ̀ dɛ ka ǹ gɔya sa n wa,
lɛn baraa bíi bɛn kũ!
11A kũ Moabu a tenmaa
waáraa ganaa,
á goã yii-nyɛɛ la.
A bin wo gùli kɔ ǹ bǎã-n wa.
A na á goã a tan kiĩni
ka duvɛ̃ bɛ́ dɔrɛɛ a bù la lɔn.
Ǹ bin da màn tɔrɔ kɔsɔ-n wa.
Bɛ lɛ nɛ, a kɔɔ̃nbaa kɛ laanka
a gìĩ kɔɔ̃n kɛ goã a nɛ.
12Dɛnaa Lawa pɛ: – Bɛ lɛ nɛ, biikoo á die, man die minin diɛ, ǹ da saa n da màn kɔsɔ nɛ. A bɛ́ doon mɛnɛn nɛ, ǹ tá re binyii ǹ bɔ walan, ǹ bɛa doon lɛn yuyu. Dɛnaa Lawa a da ǹ boo ne. 13Ka bɛ-n kəni, Moabu á re sìi koe dì Kemɔɔsi ganaa ka Izirayeli zaman bɛ́ á sìi kɔ Betɛli ganaa lɔn, a n foo doa ǹ mɛn lɛ la.
14Moabu minin,
a n siɛ lɔn ka á pii:
«Wɔ ǹ sɔraasi foo taãn-an lɛa,
zia-baali taãn-taãnan lɛa?»
15Moabu ziziɛ̃,
Maǹ we a kiwin kuĩ.
Maǹ woe ka a nɛ tenən lɛn nɛ
bɔlɔ kuru ǹ bǎã nɛ.
Kii ke a tɔ n Dɛnaa Lawa
Pàãyiidɛnaa,
bɛa da ǹ boo á ke:
16Kànaa ka boɛɛnɛ,
ǹ tá re Moabu ziziɛ̃.
Koe á re n koe lɛ fufuu.
17Ka gɛ̀ fòo da nɛ,
kasɛn tɔrɔn kɛn ǹ miãkɛnɛn lɛa.
Ka mɛnɛn bɛ́ a tɔ golebaa doɛ̃,
ka pɛ:
«Bɛa kiwi pàãdɛnaa ke ǹ miã ná
a banban,
bɛ́ sàabaa.
Bɛ na á saa lɔn kəni?»
18Dibɔn a zaman,
gisĩ n nə n tɔ golebaa kɛ toa walan.
Giã tán bǎã gere ne.
A giala, Moabu a basaã-kɔle kɛ n
die n gialaa,
màn mɛn bɛ́ toɛ n kungɔnɔn
kɛn tamaa nɛ a bɛn ziziɛ̃.
19Aroɛɛrɛ zaman,
wo zii gialaa, n kuu kɔ.
Nɔ̀n da baa-silin kɛn la,
ka mìi fɔ̃ wolen kɛn nɛ
mà wàa na á baa?
20Ǹ tá re n lɛ sii kɛnɛn:
«Moabu yɔyɔrɛ!
Sìi nə́ n kɔ lɛ!»
Ka n lɛ dɛ, ka gú da!
Ka n lɛ dɛ Arnɔn tà lɛ-a ka pɛ:
«Moabu ziziɛ̃!»
21Dɛnaa Lawa n dɔlɔ boe wurun gána kɛ ganaa, ka Holɔn kiwi ni, Yaasi ni, ka Mefaati ni, 22Dibɔn nɛ, Neboo ne, Bɛti-Diblatayimu ni, 23Kiritayimu ni, Bɛti-Gamuli ni, Bɛti-Mehɔn nɛ, 24Keriyɔti ni ka Bosraa nɛ. A Moabu gána a kiwi kɔn lɛ boe wa, ta a bǎã n kunu hinlaa ta a n lui ni.
25«Moabu pàã nya,
a nyàa yiɛ.»
Dɛnaa Lawa a da ǹ boo ne.
26Moabu na á taasɛ, mà asɛ a golebaa la Dɛnaa Lawa nɛ. Ka duvɛ̃ kɔ la a mi, yǎa a pisii. Bɛa biikoo li kəni, min tumaa á re yaa we a ganaa. 27Moabu, nsɛ bie n goã yaa we Izirayeli ganaa wa? A da yaa, Izirayeli ba wurumu lɛa wa. Sɛnɛ, a n siɛ lɔn bɛ̀ n tá a boo diɛ, n nə́ yaa we a ganaa bɛ̀ n tá n mìi papasɛ?
28Moabu minin, ka soo
ka n bɔ kaa kiwin ni,
ka wo giã kele yalan nɛ.
Ka n dinin baa ka don zɛrɛkatoan
bɛ́ lɔn,
a kii n kele yalan nɛ,
nyankɔrɔ zuzulu mìi la.
29Wɔ́ Moabu a din gole kɔ boo ma.
A din gole kɔ la yii ni,
a din narɛ kɛ nɛ,
a foo doa a din ganaa nɛ,
a yaa wɔ minin ganaa nɛ,
ka a din koa nɛ!
30Masɛ Dɛnaa Lawa a da ǹ boo á ke:
Ma tá a taasiɛn doɛ̃.
Sɛnɛ, a bɛ́ boo mɛn diɛ,
nɛ ba a-n wa,
là ba a zɛnaa ǹ siin ganaa wa.
31Bɛ lɛ nɛ,
ma á gɛ̀ loe loe Moabu gána la,
ma á gú diɛ a zaman tumaa a lɛa.
Man gini Kiiri-Erɛsi minin taman yii.
32Sibumaa a zaman,
man wuu pii n la,
á la Zazɛɛrɛ minin wɔ nɛ.
Ma nə́ n kɔn bɔ ka *rezɛ̃ da nɛ.
N nə́ n gùrùn nyɔmaa
ń yìsi mu la bɔ nɛ,
yǎa ń Zazɛɛrɛ yìsi mu la bɔ nɛ.
Sɛnɛ, basaã-kɔle lɛ daa kɔ n rezɛ̃ lɛ,
n kaa-piɛ mànan kɛn.
33Foo kɔɔ̃n laanka nyɛnyɛɛ mɛn goã
Moabu a wurun laanka Moabu
gána tumaa nɛ,
bɛ papaã.
Duvɛ̃ kaa ǹ màn nɛ, duvɛ̃ banban.
Min banban á n rezɛ̃ tɔrɛ bɛ̀
a n loe loe wa,
ǹ loe foofoon kɛn lɛ kuru.
34Ɛsibɔn minin man gú diɛ. Ma nə n toɛ Elaalee ka Yaasi n nə ǹ lɛ ma, Sowara nɛ, Oronayimu ni, ka Eglati-Selesia nɛ. Nimurimu a mu bǎã kɛ din diə gole baa. 35Dɛnaa Lawa a da ǹ boo á ke: «Moabu minin mɛnɛn tumaa bɛ́ woe ǹ wúlu mànan koe ǹ nə́ da yon gìĩ kɔɔ̃n koe ǹ dìn la kelen la, ma á re bɛn tumaa dii. 36Bɛ lɛ nɛ ma á gini Moabu la, maa ginii n ka pìi bɛ́ lɔn, man gini Kiiri-Erɛsi la, maa ginii n ka pìi bɛ́ lɔn: Ǹ naforo mɛn yii sɔkɔn, a yii bɔ̀n baa. 37Giĩn nə́ n mìi kɔɔ̃, ka ǹ lɛtoro ka nɛ. Ǹ nə́ n gɔ̀nɔn tɔtoɛ̃, ǹ nə́ gɛ̀ koa ǹ mɔnaan wɔ. 38Moabu a banbaran tumaa la, a bǎã dadaran tumaa nɛ, gɛ̀ koa ǹ loe dinsɔɔ̃ lɛ n boe. Má Moabu yu ka donkolon mɛn nə́ ke là ba a ganaa wa. Dɛnaa Lawa a da ǹ boo ne. 39Wàa! Moabu yɔyɔrɛ! Ka gini! Moabu nə́ n dɔ̀ɔ̃ wɔ! Sìi nə́ n kɔ lɛ. Ǹ miãkɛnɛn man diɛ yaa lɛa. Nyɛ́ɛ nə ǹ ganaa.»
40Dɛnaa Lawa n kɛ pii: «Zɔ́ɔ n ka zèwo bɛ́ lɔn, piɛ̃, á n nyàan lɛ bɔ
Moabu kiwi lalan.»
41Ǹ nə́ Keriyɔti kiwi kũ,
Bǎãn mɛnɛn bɛ́ tamaa nɛ,
ǹ nə́ bɛn si la.
Nyɛ́ɛ n Moabu a zia-baali foo-taãn-an ganaa ka lɔ bɛ́ lɔn a nɛ yɛ biikoo li.
42Moabu minin nə́ ziziɛ̃,
ǹ ba zaman lɛa doo wa.
Maǹ nə́ taasɛ mà ǹsɛn tá gole ǹ nə́
la Dɛnaa Lawa nɛ.
43Nyɛ́ɛ nɛ,
nyankɔrɔ zuzulu ni ka kanan nɛ,
bɛn tumaa n kasɛn wɔ lɛa
Moabu minin lɛn.
Dɛnaa Lawa a da ǹ boo ne.
44Min mɛn bɛ́ baa sii nyɛ́ɛ taman yii,
bɛa dɛnaa n die mɛnɛɛ
nyankɔrɔ zuzulu ni.
Bɛ̀ á boo la á soo, kan kũ.
Taãn nɛ,
ma bɛ́ re yui Moabu gialaa lɛ̀ mɛn-a,
man die kɛa sii kɛ lɛ tumaa diɛ
a mìi ni.
Masɛ Dɛnaa Lawa a da ǹ boo ne.
45Min mɛnɛn bɛ́ baa sii,
pàã ba bɛn lon wa.
Ǹ nə́ golee Ɛsibɔn.
Sɛnɛ, tɛ kũ kiwi lɛ nɛ,
kii Sihɔn a kion.
Tɔrɔn mɛnɛn bɛ́ ǹ ba giɛ̃ kiĩn wa,
tɛ lɛ bɛn gána kũ,
a saa a gèlè ganaa, yǎa gána lɛ bii.
46Wàa koe n ka kɛ nɛ
n ganaa Moabu!
Dì Kemɔɔsi minin, á ke ka papaã!
Ǹ nə́ n nɛgiĩn laanka n nɛlɔn kũ
kòso nɛn lɛa.
47«Sɛnɛ, ǹ kɔn pinaa,
ma á re Moabu a lɛlɛ ǹ giã ǹ gɔn
koe la.»
Dɛnaa Lawa a da ǹ boo ne.
Moabu a kiri wɔmaa nə n lɛ
doɛ kànaa.
Currently Selected:
Zer 48: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
