Zer 46
46
1Dɛnaa Lawa boo mɛn da Zeremii ni tɔrɔ kɔsɔn wɔ paǹ li, á ke.
Ǹ nə́ boo Ezipti minin la Karkemisi
2Ezipti a paǹ li: Lɛ dia á ke Ezipti ǹ kii *Faarahɔn Nekoo a sɔraasin wɔ paǹ li. Zoziasi a nɛgiĩ Zoakimu a kiibaa lɛ siibaa ǹ wɔ li Zudaa gána mìi la, bɛ̀ Eziptin kii n Karkemisi kunu Efrati tà ganaa. Bɛa biikoo lɛ li, Baabiloniin kii Nebukadenezɔɔrɔ gɔ̀lɔ̀baa yɛ la.
3Ka goóron yɔrɔ bɔ,
a bɔnboɛɛnɛn nɛ ka a dadaran nɛ!
Ka yoo, ka n ta zia la!
4Ka kɛkɛrɛn da sùin ganaa!
Sùidɛnan, ka n ta!
Ka kaa kòlo fun wɔ,
ka kaa kɔn kio!
Ka kaa san yɔrɔ bɔ,
ka kaa ziabaa ǹ mɔnaan wɔ!
5Ma yii n wàa ganaa ke?
Nyɛ́ɛ nə ǹ ganaa,
maǹ wusii ǹ kio ne!
Ǹ nə́ boo ǹ zia-baali zanbian lɛn la.
Maǹ nə n mìi foɛ̃, nyɛ́ɛ taman yii,
ǹ ba n bɔyɛɛ ǹ kio-n wa.
Nyɛ́ɛ n bǎã tumaa nɛ.
Dɛnaa Lawa a da ǹ boo ne.
6Baa-sili zanbia din ba boe baa
la wa,
zia-baali zanbia a liɛ dinin wa.
Efrati tà lɛ-a, gɔsɛ a lɛ̀gɔn la,
maǹ tatalɛɛ ǹ bɔ ǹ kaa.
7Die a kɔnboe n ka Niili
tà kɛ nɛ,
a mu n dii, a pã a toɛ̃?
8Ezipti gána a kɔnboe n ka Niili tà kɛ nɛ,
a mu n dii, a pã a toɛ̃.
A n pii: «Man die dii,
ma tán si man kɔ lɛ,
ma tán tumaa ziziɛ̃, kiwin tumaa nɛ
ka zaman mɛn tumaa bɛ́ ǹ nɛ.»
9Sùin, ka n ta ǹ gialaa!
Ziabaa ǹ wotoron, ka n mìi fɔ̃!
Zia baali zanbian lɛn,
ka nyɛɛnaan bɔ:
Etiopii minin laanka Liibii minin,
goórodɛnan lɛa,
Ludu minin ni sadɛnan lɛa!
10Sɛnɛ, bɛa lɛawaa lɛ n dɔlɔ lɛawaa lɛa
Dɛnaa Lawa Pàãyiidɛnaa din yii li.
A n die a gɛ̀ dòo boe a zɔ́ɔn ganaa.
Gɔya sa n gɛ̀ dii, yǎa a kã kiɛ̃ ka mà nɛ.
Bɛ n *wúlu màn lɛa
Dɛnaa Lawa Pàãyiidɛnaa wɔ lɛa,
gɔsɛ a lɛ̀gɔn la ǹ gána nɛ,
Efrati tà lɛ-a.
11Ezipti minin,
ka yoo ka wo Galaati gána nɛ,
ka ga nyɔɔ li,
ka lɔ kaa busulɛn ganaa.
Sɛnɛ là ba a ganaa ka dagòã gigiã
si kooro wa.
Kaa busulɛn lɛn ba nyɛɛ wa.
12Tɔrɔn nə́ kaa sìi boo ma.
Bǎã tumaa nɛ, maǹ kaa ginii lɛ miɛ.
A giala zia-baali na á n tɔ ǹ miã nɛ,
ǹ tumaa bɔ ǹ nə́ kaa.
Nebukadenezɔɔrɔ kɔ Ezipti gána lɛ
13 #
Zer 43.10-13
Nebukadenezɔɔrɔ bɛ́ yui Ezipti gána gialaa ǹ mɛn waáraa, Dɛnaa Lawa boo da ka Lawa a boo gii-dali Zeremii-n kɛnɛn:
14Ka boo kɛ da Ezipti gána nɛ,
ka a boo da Migdɔli kiwi,
Mɛmifisi ka Tapanɛsi kiwin ni,
ka pɛ ǹ nɛ:
«Ka yoo! Ka n yɔrɔ bɔ!
Zia ka miãkɛnɛn bɔ̀nbaa!»
15Wàa na á baa ǹ nə́ kaa
zia-baali zanbian kɛn naa?
Ǹ ba boe la ǹ tá n gòãn doɛ wa,
a giala Dɛnaa Lawa na á ǹ bɔ
á ǹ kaa!
16Dɛnaa Lawa n sɔraasi damata diɛ
tatalaa ganaa, ǹ nə́ boe kiɛ kɔn la.
Maǹ pii kɔn nɛ:
Ka wɔ n ta piɛ, wɔ dinin gána nɛ,
wɔ n wɔlɔ lui zia baraa kɛ ganaa.
17Ka tɔ kɛ kɔ Eziptin kii Faarahɔn ganaa:
«Bìn-dali kooro, n sii lɛ ná a piɛ̃ wa!»
18Kii mɛn bɛ́ a tɔ n
Dɛnaa Lawa Pàãyiidɛnaa,
bɛa da ǹ boo á ke:
«A ma toa ma yii n koo,
zɔ́ɔ lɛ á re die.
Sàabaa ba la wa ka Tabɔɔrɔ a kele
kɛ bɛ́ lɔn kelen bii,
ka Karmɛli kele kɛ bɛ́ lɔn
yìsi mu lalan.»
19Ezipti minin, ka kaa dúgun yii.
A giala Mɛmifisi kiwi n die nyɛ́ɛ da
ǹ bǎã biɛ.
A n die ziziɛ̃ lenlen,
min kɔn ná a giɛ̃ a-n wa.
20Ezipti na á goã tɔɔ sonbore lɛa.
Sɛnɛ, nyuun sɔn-dɔle goon na
á bɔ gɔsɛ a lɛ̀gɔn la,
á daa mɛ la.
21Ezipti sɔraasi tiin mɛnɛn pii,
á goã giɛ bɛn walan parsiini
ka tɔɔ mɛn bɛ́ ǹ tá toe.
Sɛnɛ, bɛn dɔn nə́ n dɔ̀ɔ̃ wɔ nɛ,
ǹ tumaa baa si kun.
Ǹ dɔlɔ pinaa á die ǹ gialaa,
koe lɛawaa nɛ.
22Ezipti n lɛ pìi pii ka miɛ̃ bɛ́ lɔn
baa sii,
a giala, maǹ die a gialaa ka pàã nɛ,
ka da-kurulin bɛ́ lɔn, kukun ni ǹ gɔn.
23Maǹ a daã gialaa dii,
daã mɛn bɛ́ min ná a boe la á we
a-n lɛlɛ wa.
A giala, maǹ mɔnaa-n ka bisin bɛ́ lɔn,
min kɔn ná a boe la a ǹ nimi wa.
Dɛnaa Lawa a da ǹ boo ne.
24Sìi nə́ n kɔ Ezipti gána lɛ:
A na á n wɔ tɔrɔ kɛ gɔn,
boe gɔsɛ a lɛ̀gɔn la.
25Dɛnaa Lawa Pàãyiidɛnaa, Izirayeli a Lawa n kɛ pii: «Man die yui Amɔn gialaa, Tabɛsi kiwi minin dì ke, ma yoo Ezipti gána gialaa, a dìn ni, a kiin ni, ma yoo Faarahɔn gialaa, ka min mɛn tumaa bɛ́ ǹ foo n doa-n la. 26Min mɛnɛn bɛ́ giɛ ǹ gɛ̀ li, man die ǹ we bɛn gɔn: Baabiloniin kii Nebukadenezɔɔrɔ nɛ ka a sɔraasin ni. Sɛnɛ bɛ kio, minin tá re wusii ǹ giã Ezipti gána nɛ ka lɛlɛ ǹ bɛ́ lɔn.» Dɛnaa Lawa a da ǹ boo ne.
Lawa á re Izirayeli kirisibiɛ
27 #
Zer 30.10-11
Nsɛ Zakɔba maa dí-nyali,
nyɛ́ɛ nyan nə n kũ wa.
N nyan nyɛ́ɛ baa wa Izirayeli.
Taãn nɛ, man die n kirisibiɛ,
ma n kũ ma n bɔ gána sɔsɔɔn kɛn nɛ.
N nɛnyaanan kɛn gùli kɔ ǹ bǎãn nɛ,
má ǹ waa ma da ǹ nɛ.
Zakɔba, n tá re wusii n daa,
n goã yii-nyɛɛ la, n yiri n bǎã
goon ne,
min kɔn ná a yui n gialaa wa.
28Nsɛ Zakɔba maa dí-nyali,
nyɛ́ɛ nyan nə n kũ wa,
Dɛnaa Lawa a da ǹ boo ne,
a giala ma tá kunun n ni.
Ma ka pɛsɛ̃ tɔrɔn mɛnɛn bii,
ma á re yui bɛn gialaa, ma ǹ bɔ̀n
baa lenlen.
Sɛnɛ nsɛ, ma a re n bɔ̀n biɛ
lenlen wa.
Taãn nɛ, má n doroo ka peperebaa nɛ.
A giala, ma a boe la ma n toa walan
ka yii tì-a bɛ́ lɔn wa!
Currently Selected:
Zer 46: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
