Zer 3
3
Lɔ kɔrɔ too kaka-a
1Dɛnaa Lawa pɛ:
«Bɛ̀ giĩ ná a lɔ loo,
lɔ lɛ soo li,
yǎa giĩ kɔsɔ saa lɔ lɛa,
ǹ zuũ zizi lɛ á boe la a wusoo
a saa lɔ lɛa?
Haayii, a giala, *gɔ̀ n die gána lɛ
kuĩ bɛ lɛ taman yii.
Sɛnɛ nsɛ Izirayeli,
ń kɔrɔbaa zɛnaa ka giĩ gigiã nɛ.
Ma n giɛ li n wusoo n da masɛ li?»
Dɛnaa Lawa a da ǹ boo ne.
2N yii saa lon,
n nə n yɔrɔ dia tentenen kɛn la n ga.
Tenten goon din tá yii ǹ bii
mà n nə n naarɛbaa zɛnaa la wa?
Ka diə gole a mu gòo-kɔlin bɛ́ lɔn,
N nə́ n goã giã-n tán zii lɛkoro-a,
n yii diɛ n sanan la.
Ń gána lɛ gɔgɔrɛ kɔ ka n kɔrɔbaa
kɛ nɛ,
ka n giã ǹ gɔn baraa nɛ.
3Bɛ lɛ nɛ, la kaa wa,
la nyɔɔbaa kaa wa.
Sɛnɛ n nə n too kaka kɔ,
n kɔrɔbaa zɛnaa n woo ne.
N nə́ n piã ka n sã nɛ.
4Kanna kəni,
ma nə n lɛ dii masɛ ganaa n nə́ pii:
«Maa díi, maa tenmaa waáraa
a giaára!»
5Man nɔ̀n diɛ n din la:
«A foo n tɔn yoo-n ma li duduu?
A ba re a foo-yoo kɛ kurii
masɛ ganaa wa?»
N da ǹ boo n ka bɛ nɛ,
sɛnɛ, n nə n tɔn woe nyɛɛnɛ sii
baraa zɛnɛɛ.
Lɛ dia gɔ́ɔ̃ binyəə paǹ li
6 #
Kiin2 22.1–23.30; KZS2 34.1–35.27 Kii Zoziasi a biikoo li, Dɛnaa Lawa pɛ ma nɛ: «Izirayeli bɔyaa wole lɛ sii mɛn zɛnaa, ń yɛ? Á woo kele mìi tumaa la, dan giulun, ǹ mɛn tumaa luu bɛ́ tì, á kɔrɔbaa zɛnaa walan. 7Man taasɛ máa bɛ tumaa kio, máa á re wusii a da ma li. Sɛnɛ, haayii, a wusoo á daa wa. Ǹ miãnɛn Zudaa bɔlɔgoonbaãdɛnaa lɛ yɛ taãnɛ. 8Má Izirayeli bɔyaa wole lɛ loo. A giala, á naarɛbaa zɛnaa. Má kɔn-wɔ toɛ̃ ǹ sɛ́wɔ kɔ la. Sɛnɛ, má yɛ máa ǹ miãnɛn Zudaa bɔlɔgoonbaãdɛnaa lɛ sɛ nyɛ́ɛ baa wa. A dɔ wusoo á woo naarɛbaa zɛnaa.
9A na á naarɛbaa lɛ zɛnaa kun ka dìn mɛnɛn bɛ́ kɔlɔ hinlaa gɔn lɛa. A naarɛbaa baraa lɛ taman yii, á gána lɛ gɔgɔrɛ kɔ. 10Ka bɛ din tumaa nɛ, ǹ miãnɛn Zudaa bɔlɔgoonbaãdɛnaa kɛ wusoo á n bɔyaa á daa masɛ li ka a foo tumaa-n wa. A parsii bie wa.» Dɛnaa Lawa a da ǹ boo ne.
11Dɛnaa Lawa pɛ doo: Izirayeli bɔyaa wole lɛ zɛ̀rɛ á kiɛɛrɛ á la Zudaa bɔlɔgoonbaãdɛnaa kɛ nɛ. 12Wo n lɛ dɛ ka boon kɛn nɛ gɔsɛ a lɛ̀gɔn la:
«Wusoo n daa Izirayeli bɔyaa wole!
Dɛnaa Lawa a da ǹ boo ne.
Ma a re n yɔrɔ baraa diɛ n la doo wa.
A giala, maa makara-doɛ̃ á gole.
Ma foo á re goɛ̃ yoo ne n li
duduu wa.
Ma din Dɛnaa Lawa a da ǹ boo ne.
13Sɛnɛ, n zɛ̀rɛ si.
N nə́ n gòãn dii masɛ ganaa,
Dɛnaa Lawa, n Lawa ganaa,
ń baa si paǹ tumaa li,
dìn kio, da tìtìn giulun,
n nə n too kɔ ma lon wa.»
Dɛnaa Lawa a da ǹ boo ne.
Zudaa laanka Izirayeli minin tá re wusii ǹ da ǹ gána nɛ
14«Ka wusoo ka daa nɛnyaan
bɔyaa wolen!
Dɛnaa Lawa a da ǹ boo ne.
Kaa Dɛnaa n ka masɛ nɛ.
Ma á re ka kuĩ gogoon kiwi kɛ nɛ,
papaa tɔrɔn kɛn bii,
ma da ka nɛ *Siɔn kiwi.
15Lɛduə̃lin mɛnɛn bɛ́ ma dùũ lɛa,
ma á re bɛn koe ka la.
Ǹ tá re ka nyɛɛnaan boe
ka yiridɛnaabaa laanka sii-doɛ̃ nɛ.»
16Bɛa biikoo li kəni,
ka á re nɛnyaanan yii gigiã,
Dɛnaa Lawa a da ǹ boo ne.
Ka á re mɔnɛɛ gána lɛ nɛ.
Min kɔn ba re Dɛnaa Lawa a
*lɛ kɔ kɔn la ǹ goo kɛ boo diɛ wa,
min kɔn ba re n yiri koɛ li wa.
Yiri a re gisĩ a-n doo wa,
min kɔn ba re a tanbaã doɛ̃ wa,
min kɔn dɔ á re a kɔnboe zɛnɛɛ wa.
17Bɛa waáraa kəni,
maǹ die Zeruzalɛmu bíi,
«Dɛnaa Lawa a kii dankan.»
Tɔrɔn tumaa n die n soekɔn
ka Dɛnaa Lawa tɔ nɛ Zeruzalɛmu.
Ǹ ba re koe ǹ foo kakabaa kɛ
laanka ǹ taasiɛ baraan kɛn lɛ wa.
18Bɛ lɛ nɛ, Zudaa minin lɛn,
ka á re n kiɛ kun ka Izirayeli
minin ni.
Ka á re boe gɔsɛ a lɛ̀gɔn la gána
kɛ nɛ kun,
ka wo gána kɛ nɛ ma kɔ
ka digolon la,
máa ǹ baa ǹ wɔ lɛa.
Izirayeli bɔyaa wole á re wusii a da Dɛnaa Lawa li
Dɛnaa Lawa
19Man má goã pii:
Man zoɛ̃ li ma n baa maa
nɛnyaanan kɛn goon lɛa.
Man zoɛ̃ li ma gána sonbore kɔ n la,
a n liɛ nɛ kanaa a bǎã sonbore
tumaa nɛ.
Man má goã pii máa n tá re
ma bíi: "Maa díi",
n nə n ba n dɔ̀ɔ̃ we ma-n doo wa.
20Sɛnɛ, ka lɔ bɔlɔgoonbaãdɛnaa bɛ́ lɔn,
ká bɔlɔgoonbaãdɛnan baa ma ganaa
Izirayeli minin lɛn.
Masɛ Dɛnaa Lawa a da ǹ boo ne.
21Lɛ-dɛ n boe kele mìi ni,
Izirayeli minin manɛ.
Maǹ wuu pii ǹ nə́ gú diɛ.
A giala, maǹ nə́ zii baraa saa,
ǹ yiri bɔ ka Dɛnaa Lawa, ǹ Lawa nɛ.
22Ka wusoo ka da ma li,
nɛnyaan bɔyaa wolen lɛn,
ma á re kaa bɔlɔgoonbaãdɛnaabaa
kɛ nyɛɛ ka ganaa!
Zaman
Wɔ á ke, wɔ ǹ die n din li,
a giala, Dɛnaa Lawa,
n din ni wɔa Lawa lɛa.
23Sonbore, màn mɛn tumaa bɛ
boe kelen mìi ni, soɛ nɛ,
zùũzùũ mɛn tumaa bɛ́ boe
tentenen la,
bɛn tumaa n minin siɛ̃.
Sonbore, Dɛnaa Lawa,
wɔa Lawa n Izirayeli kirisibiɛ.
24A kũ wɔa tenmaa waáraa ganaa,
wɔa dín nɔmaa a là na á yɛ sìi da
ǹ dìn#3.24 Sìi da ǹ dìn: Dì Baali tɔ kɔsɔ nɛ. ganaa.
N nə́ ǹ sèren si, ǹ bòen ne, ǹ diin ni,
ǹ nɛgiĩn laanka ǹ nɛlɔn nɛ.
25Ka waa tán sìi li.
Wɔa yii gugurubaa papaã.
A giala, wɔ laanka wɔ digolon
man wɔ sii baraa zɛnaa,
Dɛnaa Lawa wɔa Lawa ganaa,
a kũ wɔa tenmaa waáraa ganaa
a da pelo yaa.
Wɔ n too kɔ Dɛnaa Lawa wɔa Lawa
a da ǹ boon li wa.
Currently Selected:
Zer 3: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
