Zer 2
2
Zudaa a bɔlɔgoonbaãdɛnaabaa
1Dɛnaa Lawa boo da ma nɛ, á pɛ: 2Wo pɛ Zeruzalɛmu ni:
Dɛnaa Lawa a boo á ke:
Ma yiri tá n tenmaa waáraa kɛ nɛ.
N nə́ n goã doa-n ma-a.
N goã ma narɛ san wɔ baa nɛ.
N goã koe ma lɛ diə gole ne,
bǎã mɛn bɛ́ màn kɔn ná a boe
a-n wa.
3Izirayeli, n nə n goã ma dinsɔɔ̃
wɔ lɛa.
N nə n goã ma din wɔ baa nɛ,
ka kaa-piɛ da nɛ bibinaa bɛ́ lɔn.
Min mɛnɛn gɔn bɛ́ re miɛ n ganaa,
zɛ̀rɛ n die bɛn kuĩ,
koe bɔ ǹ ganaa.
Dɛnaa Lawa a da ǹ boo ne.
4Kasɛn kɛn Zakɔba tɔrɔn lɛa,
ka kasɛn, Izirayeli a tanlɛn tumaa,
ka n too kɔ Dɛnaa Lawa a boo li!
5Dɛnaa Lawa bɛ́ màn mɛn pii, á ke:
Ka digolon tá sã goon yii ǹ ma
zɛ̀rɛ baa nɛ?
Ǹ nə́ n wɔlɔ lui ma ganaa,
ǹ nə́ koe dìn lɛ,
ǹ mɛnɛn bɛ́ ǹ ba màn kɔn lɛa wa,
ǹ dininmaan dɔn nə́ màn
kooron baa.
6Ǹ nɔ̀n da kɛnɛn wa:
Dɛnaa Lawa á maa,
asɛ mɛn nə wɔ waa Ezipti gána nɛ,
á wɔ nyɛɛnaa ǹ bɔ diə gole ne,
don lɛa, piɛ̃-n ka nyankɔrɔ nɛ,
gána gere lɛa, a n tì,
min ná a boe a-n wa,
min ná a ba a-n dɔn wa.
7Má ka kaa gána sonbore ne,
máa ka là yɛ a da nɛ ganaa,
ka a gɔ́ɔ̃gɔ́ɔ̃ ǹ mànan dɔn nɛ.
Sɛnɛ, kaa daa li,
ká a gɔgɔrɛ kɔ.
A na á goã ma din wɔ lɛa,
sɛnɛ ka baa màn bɔbɔnɛɛ lɛa.
8Lawa a wúlu-bɔlen nə nɔ̀n da
kɛnɛn wa:
«Dɛnaa Lawa á maa?»
Min mɛnɛn bɛ́ Lawa a dí-pɛn doɛ̃,
bɛn ba ma doɛ̃ wa.
Kiãn nə́ n gòãn dii ma ganaa.
Lawa a boo gii-dalin man boo diɛ
ka *Baali tɔ nɛ.
Maǹ koe dìn lɛ,
ǹ mɛnɛn bɛ́ ǹ ba boe sii kɔn la wa.
9Bɛ lɛ nɛ,
ma á re zɛ̀rɛ diɛ ka la doo.
Man zɛ̀rɛ diɛ kaa nɔ̀ɔnɔn dɔn
dinin la.
Ma din Dɛnaa Lawa a da ǹ boo ne.
10Ka wo bǎã sɔsɔɔ kɛ nɛ Grɛki,
ka ga a ganaa,
ka wo Kebaaraa Larabun kɛn li,
ka nɔ̀n da.
Ka á re yii,
mà sii kɛ miã bin nə n zɛnaa wa.
11Tɔrɔ kɔn bin ná a dìn lon kɔ?
A da yaa, ǹ bie Lawa taãn lɛa wa.
Sɛnɛ, maa zaman lɛ ná a
gugurubaa lɛ lon kɔ
ka màn kooron ne.
12Lon mànan lɛn,
kɛ doamaa nɛ a ka yiri lɔlɔkɔn,
a ka gɔ̀nɔn bìn da,
a bɔbɔnɛɛbaa ka gù dɛ.
Masɛ Dɛnaa Lawa a da ǹ boo ne.
13Maa zaman lɛ na á sã wɔlɔ paa wɔ:
Ǹ nə́ n la bɔ ma ganaa,
masɛ mu yala nyantoto ke, nyin koe.
Ǹ nə́ nyankɔrɔn fɔ̃,
sɛnɛ, nyankɔrɔn lɛn gɔ́ɔ̃ yuimaa nɛ,
ǹ ba mu kuĩ wa.
Lawa toa walan nə sii bɔbɔnɛɛ lɛa
14Izirayeli n bɛ̀rɛ lɛa ya?
A na á yɛ bɛ̀rɛbaa taman yii?
Sɛnɛ wàa na á baa ǹ tá kokoe?
15Yàran man lɛ biɛ a ganaa,
maǹ wɔɔsaa we a ganaa,
ǹ ná a gána ziziɛ̃ lenlen,
ǹ nə́ tɛ da a kiwin ganaa.
Màn kɔn ba giã nɛ a-n doo wa.
16Haalɛ Mɛmifisi minin
laanka Tapenɛsi minin ná a mìi kɔɔ̃.
17Bɛ bie n din sii lɛa wa, Izirayeli?
Masɛ Dɛnaa Lawa nə
n nyɛɛnaan boe,
sɛnɛ, n nə́ n la bɔ ma-a.
18Sisia kəni, n wo Ezipti là n ka
wàa nɛ,
N wo Niili tà mi?
Ma nə́ n woo Asiirii là n wàa nɛ,
Ma nə́ n woo Efrati tà mi?
19N sii baraa mɛn zɛnaa,
bɛ die a dɔlɔ baa n ganaa.
N bɔlɔgoonbaãdɛnaabaa ke,
bɛ die a kũ n din mìi ni.
Ka bɛ nɛ, n tá re yii, n na a giala ma,
mà la bɔ Dɛnaa Lawa ganaa
á bɔbɔnɛɛ,
a n kɔɔsɛ taãn-taãnɛ,
ka masɛ Dɛnaa Lawa guguru kɔ
baã bɛ́ lɔn.
Masɛ Dɛnaa Lawa Pàãyiidɛnaa a
da ǹ boo ne.
Izirayeli n ka lɔ bɔlɔgoonbaãdɛnaa bɛ́ lɔn
20Dɛnaa Lawa pɛ:
Izirayeli, haalɛ bibi n nə́ n wìi li
ǹ zǔu kɛ yiɛ,
n nə́ n gɔn ganaa ǹ biɛn kɛn nana.
Ń goã ń pɛ:
«Ma ba li ma bɛ̀rɛbaa doo wa.»
Sɛnɛ, kele tumaa mìi ni,
da luu tì tumaa giulun,
n nə́ n goã wɛɛ tán ka lɔ kɔrɔ bɛ́ lɔn.
21Sɛnɛ, man má goã má n zumu,
ka *rezɛ̃ da sonbore bɛ́ lɔn,
ka da mɛn bɛ́, da tɔrɔ sonbore lɛa.
A na á saa lɔn, n nə́ n bɔyaa,
ń don gɔ́ɔ̃ da baa, n nɛ n bɔnɛɛ?
22Haalɛ ta n nə́ n zoo ka sɔmaa nɛ,
ta n nə́ n zoo ka sɔmaa gigiã nɛ,
n sii baraa kɛ n ma yɔrɔ kɛnɛn,
ka *gɔ̀ bɛ́ lɔn.
Dɛnaa Lawa a da ǹ boo ne.
23N nə n siɛ lɔn n tá pii
mà n nə n din gɔgɔrɛ kɔ wa,
mà n Baalin guguru kɔ wa.
Ga n giã ǹ gɔn ganaa nyankɔrɔ
basa kɛ nɛ.
Lɛ kɔ n sãn ganaa.
N nə n kɔnbɔ nyɔɔmaa dan ten ne,
baa sii paǹ yii li.
24N nə n kɔnbɔ ka don dundun
dan nɛ,
a lɛ mui ka bǎã kòso ne,
a dii biikoo li, gìĩ siɛ piɛ̃ li.
A dii waáraa, màn kɔn ba kurii wa.
Dundunun mɛnɛn bɛ́ giɛ li,
ǹ ba ǹ dinin nɔmɛɛ wa.
Bɛ̀ á dii lɔn gɔrɔ, maǹ woe yiɛ.
25Izirayeli, yiri bɔ.
N bɛ baa sii n dìn mɛnɛn kio ke,
n tá re nɔmɛɛ, n bɔlɔ gɔ́ɔ̃ laa.
Sɛnɛ, ń pɛ: «Sàabaa ba la wa,
dì kɔsɔn man kɔɔ̃n ma ganaa.
Man zoɛ̃ li ma wo ǹ kio.»
26Sɛnɛ, kasɛn Izirayeli minin,
kaa zaman nɛ,
kaa kiin laanka kaa
gána nyɛɛnaandɛnan nɛ,
kaa Lawa a wúlu-bɔlen laanka
kaa Lawa a dia dí-a wolen ne,
sìi n die n koe ka lɛ,
ka wurumu wɔ bɛ́ lɔn, bɛ̀ ǹ nə́ tɔwaa.
27Nyín mɛn bɛ́ gɔn lɛa,
ka ǹ pii bɛ nɛ:
«Maa díi ni n ni!»
Nyín mɛn bɛ́ kɔlɔ lɛa,
ka n pii bɛ nɛ:
«N din ni n ma da kanaa!»
Màn mɛn tá-a ka n yɔrɔ dia masɛ la,
ka nə n dɔ̀ɔ̃ we ma nɛ.
Sɛnɛ, bɛ̀ koe ka yɛ lɔn gɔrɔ,
ka ǹ pii ma-n kɛnɛn:
«Yoo, n wɔ kirisibaa!»
28Ka dìn mɛnɛn zɛnaa ka dinin
wɔ lɛa,
bɛn tá maa?
Bɛ̀ koe ka yɛ, bɛ̀ ǹ tá boe la,
ǹ da ka kirisibaa!
Kaa kiwin bɛ́ mɔnaa-n lɔn,
kaa dìn dɔn man mɔnaa-n miɛ̃!
29Wàa na á baa kəni ka á kiri we
ma ganaa?
Ka dinin tumaa nə n gòãn dii
ma ganaa.
Dɛnaa Lawa a da ǹ boo ne
30Ma kaa nɛnyaanan dɛ,
sɛnɛ a là goon yɛ wa.
Ka golee maa doroon li wa.
Ka yàra basaã-kɔle bɛ́ lɔn,
ka kaa Lawa a dia dí-a wolen yii dɛ.
31Kasɛn pelo minin lɛn,
ka yiri bɔ Dɛnaa Lawa a boon li.
Man má n baa ka diə gole
bɛ́ lɔn Izirayeli gɔn?
Hinlaa ka gána mɛn bɛ́
wɔlɔ tì li duduu?
Maa zaman,
wàa na á baa ka n pii:
«Bǎã mɛn bɛ́ kɔɔ̃n wɔ-a,
wɔ ǹ woe walan.
Wɔa wusii wɔ da n li doo wa.»
32Nɛniɛ yiri á boe a nyaǹ
mànan ganaa?
Lɔ tii yiri á boe a gɔ̀ mànan ganaa?
Ka yiri bɔ ka ma nɛ,
a biikoo a kànaa wa.
33Ǹ bɛ́ san boe lɔn,
n tá bɛ yɔrɔ doɛ̃.
N tá boe la dɔn dinin n nə
n miãn daraa baraa zɛnaa ganaa!
34Doobaan laanka yii tì-an
mà nə n mɔnaan ganaa,
a da yaa dɔn n bie n woo ǹ tɔwaa
n kiɛnlɛ yiɛ wa.
35A laan bɛ yii ni,
n nə n pii: «Zɛ̀rɛ ba ma-a wa.
Dɛnaa Lawa a foo yoo kɛ á re
n boe ma kio.»
Sɛnɛ, n bɛ́ pii mà nsɛ sii kɔn
zɛnaa baraa wa,
man die kiri we n ganaa.
36A n siɛ lɔn n tá ziin lon koe
n mìi gialaa?
Sɛnɛ, Ezipti dɔ n die n foo ziziɛ̃
ka Asiirii bɛ́ lɔn lɛlɛ.
37N tá re soe bɛa gána kɛ lɛ dɔ nɛ
n gɔnɔn nə́ n mìi ni, sìi ni n ganaa.
Sonbore, n foo bɛ́ doa-n min
mɛnɛn ganaa,
Dɛnaa Lawa á re bɛn lui.
N ba re là goon yii ǹ ganaa wa.
Currently Selected:
Zer 2: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
