Zer 25
25
Zeremii a boo mìi dadaran
1 #
Kiin2 24.1; KZS2 36.5-7; Dan 1.1-2 Zoziasi a nɛgiĩ Zoakimu a kiibaa lɛ̀ siibaa ǹ wɔ li Zudaa gána mìi la, Dɛnaa Lawa boo da Zeremii ni Zudaa zaman tumaa a paǹ li, bɛ̀ *Baabiloniin kii Nebukadenezɔɔrɔ a kiibaa lɛ̀ bibinaa nɛ. 2Lawa a boo gii-dali Zeremii pɛ Zeruzalɛmu minin manɛ ka Zudaa min gialakunun kɛn nɛ: 3– A kũ Amɔn a nɛgiĩ Zoziasi a kiibaa lɛ̀ fulusɔɔbaa ǹ wɔ ganaa Zudaa gána mìi la a da pelo yaa, man má goã timii la ma á Dɛnaa Lawa a boo diɛ ka nɛ. A lɛ̀ fuəwensɔɔ n ka kɛ nɛ ma á boo diɛ ka nɛ, sɛnɛ, ka n too kɔ ma lon wa. 4Gunyin gigiã, Dɛnaa Lawa ná a dí-nyalin, Lawa a boo gii-dalin dia ka la, sɛnɛ, ka n too kɔ ǹ lon wa. 5Maǹ nə́ pɛ ka nɛ: «Didie doamaa nɛ a na a giã ǹ gɔn baraa laanka a sii baraan kaa. Ka bɛ nɛ, ka á re boe la ka giã gána kɛ nɛ má kɔ ka laanka ka digolon la, duduu, yǎa duduu. 6Ka nyan kɔ dìn lɛ ka ǹ guguru kɔ, ka n musin doa tán-a ǹ yɔrɔ-a wa. Ka nyan ma foo yoo ka dì nyín zɛnaa-n wa. Bɛa yɔrɔ lɛ la, ma a re baraa kɔn zɛnɛɛ ka-n wa. 7Sɛnɛ, ka n too kɔ ma lon wa. Dɛnaa Lawa a da ǹ boo ne. Ka ǹ ká sii làfu zɛnaa, ká ma foo yoo ka kaa dì nyín zɛnaan kɛn nɛ, kɛn lɛn koe boe ka ganaa.»
8Á bǐɛ̃ kɔ! Dɛnaa Lawa Pàãyiidɛnaa n kɛ pii: «Ka bɛ ka n too kɔ maa da ǹ boon li wa, 9man die gɔsɛ a lɛ̀gɔn la tɔrɔn kɛn tumaa bíi, ma maa dí-nyali Baabiloniin kii Nebukadenezɔɔrɔ bíi. Ma ǹ die yui gána kɛ gialaa, a zaman nɛ, ka ǹ miãkɛnɛn nɛ. Man die ǹ tumaa ziziɛ̃. Man die gána kɛ biɛ bǎã bɔbɔnɛɛ lɛa, kɛbɔlɔ lɛa biikoo yii li. Minin tá re foo ziziɛ̃ ǹ lɛ-dɛ we a ganaa. Masɛ Dɛnaa Lawa a da ǹ boo ne. 10#Zer 7.34; 16.9; SNS 18.22-23 Ma á re zɔ́n bìn-diɛn sàabiɛ, foo kɔɔ̃n lɛ-dɛn nɛ, ka kɔn-wɔle tenən loen ne. Wii lɔ ǹ gii wuu a re boe doo wa, bolonən ba re fúlu kiɛ doo wa. 11#KZS2 36.21; Zer 29.10; Dan 9.2 Gána lɛ din kuturu á re kɛbɔlɔ biɛ, bǎã bɔbɔnɛɛ lɛa. Tɔrɔn kɛn tumaa n die goɛ̃ Baabiloniin kii a pàã giulun yǎa lɛ̀ pɔsɔbaa.»
12Dɛnaa Lawa a da ǹ boo á ke: «Bɛ̀ bɛa lɛ̀ pɔsɔbaa lɛ lɛ pã, man die yui Baabiloniin kii gialaa, ǹ gɛ̀-dɛ kɛa lɛa. Man die yui *Baabilonii minin gána gialaa, ma baa diə gole lɛa yǎa duduu. 13Ma koen mɛnɛn tumaa boo da, kɛn kiɛ̃ nɛ sɛ́wɔ kɛ nɛ, man die bɛn diɛ gána lɛ mìi ni. Ma din a boo gii ni Lawa a boo gii-dali Zeremii pɛ tɔrɔn tumaa wɔ lɛa. 14Baabilonii minin sɛn tá re goɛ̃ gána pàãdɛnan giulun, ka kii dadaran nɛ. Ǹ sii mɛn tumaa zɛnaa, ka ǹ sii baraan nɛ, ǹ tá re bɛ tumaa sarɛɛ.»
Dɛnaa Lawa a foo-yoo
15Dɛnaa Lawa, Izirayeli a Lawa boo mɛn da ma nɛ, á ke: «Paan kɛ si ma gɔn, piɛ̃-n ka maa foo-yoo ne. Ma bɛ n diɛ tɔrɔn mɛnɛn tumaa li, n kɔ ǹ la ǹ mi. 16Ǹ tá re mii, ǹ bɔ ǹ mɛnaa. Ma bɛ́ re basaã mɛn koe ǹ bii, bɛ̀ ǹ yii bɛ yɛ, gàãn tá re yui ǹ li.» 17Má tɔn paan lɛ si Dɛnaa Lawa gɔn. A ma dia tɔrɔn mɛnɛn tumaa li, má kɔ ǹ la, ǹ nə́ mi. 18A na á n giala kɔ Zeruzalɛmu ganaa, ka Zudaa kiwi kɔsɔn nɛ, ǹ kiin laanka ǹ nyɛɛnaandɛnan nɛ. Bɛa kiwin lɛn nə́ kɛbɔlɔn baa, bǎã bɔbɔnɛɛn lɛa. Kɛ doamaa nɛ a ǹ kaa nyɛ́ɛbaa ǹ lɛ-dɛ gole ganaa, a sii a kɔnboe baa lɛ ǹ baraa bíi a paǹ li. Bɛ lɛ n ke n zɛnɛɛ pelo. 19Bɛ kio, á dɔ tɔrɔ kɔsɔn kɛn dɔn ganaa: Eziptin kii *Faarahɔn laanka a sɔraasin nyɛɛnaandɛnan nɛ, a gána nyɛɛnaandɛnan nɛ ka a zaman tumaa nɛ, 20kɔnlɛ ka tɔrɔn kɛn tumaa nɛ giã-n Ezipti gána nɛ. Usu gána a kii ni, Filisiti minin kiin ni: Asikalɔn wɔ nɛ, Gaazaa wɔ nɛ, Ekrɔn wɔ nɛ, ka Asidɔdi min lɛkun mɛn goã. 21Edɔmu minin ni, Moabu minin ni ka Amɔn tɔrɔn nɛ. 22Tiiri minin kiin tumaa nɛ, Sidɔn wɔ nɛ, gánan kɛn tumaa Yìsi mu gole kio, ka bɛn wɔn nɛ. 23Dedan minin ni, Temaa wɔn nɛ, Buuzu wɔn nɛ ka tɔrɔn kɛn nɛ n karazɔɔ ka koɛ̃. 24Larabu gána kiin tumaa nɛ, ka tɔrɔn kɛn nɛ giã-n diə gole ne. 25Zimri kiin tumaa nɛ, Elamu laanka Mɛdi gána minin kiin ni. 26Gɔsɛ a lɛ̀gɔn la kiin tumaa, ǹ mɛnɛn wɔlɔ bɛ́ sɔsɔɔ hinlaa ǹ wɔlɔ n kunu. Kanaa a tɔrɔn tumaa doamaa nɛ ǹ kɛa paan gɔ́ɔ̃gɔ́ɔ̃ ǹ mu kɛ mi. Sekakin#25.26 Sekaki lɛ n Baabilonii gána a sii a kɔnboe lɛa. kii sɛ doamaa nɛ a mi ǹ tumaa kio.
27Dɛnaa Lawa mà ma pɛ ǹ nɛ: «Dɛnaa Lawa Pàãyiidɛnaa Izirayeli a Lawa a da ǹ boo á ke: Ka mi, a ka yii kũ, ka pisəə! Ma bɛ́ re sii mɛn tumaa zɛnɛɛ ka bii, bɛ̀ ká bɛ yɛ, ka á re mɛnɛɛ ka goã tán goon lɛa.» 28Á pɛ doo: – Kɔntan, min tɛnɛn tá re n piɛ̃ mà ǹ ba re paan lɛ a mu sii n gɔn ǹ mi wa. N die n pɛ ǹ nɛ kɛnɛn: «Yǎa ka mii, Dɛnaa Lawa Pàãyiidɛnaa a da ǹ boo ne.» 29Á ke, man dɔlɔ boe kiwi kɛ ganaa má bɔ má koa maa wɔ lɛa. Man die kasɛn toɛ walan dɔlɔ baã? Haayii! Ka a re goɛ̃ dɔlɔ baã wa. Man yui zia-n ka ganaa, masɛ Dɛnaa Lawa Pàãyiidɛnaa a da ǹ boo ne. 30Dɛnaa Lawa pɛ ma-n doo:
Maa boo kɛ da ǹ nɛ, n pɛ kɛnɛn:
Dɛnaa Lawa nə n toɛ lon wɔɔsaa we.
A kion mɛn bɔ á koa a wɔ lɛa,
a nə n toɛ walan n lɛn siɛ lon.
A din a bǎã ke,
a n paraa we bɛ li.
A n paraa we gána lɛ a min tumaa li,
ka rezɛ̃ tɔrɛɛ wolen bɛ́ n lɛ dii lɔn.
31A bɛ́ bìn diɛ mɛn we,
bɛ n doe kanaa lɛdan ganaa.
Dɛnaa Lawa n kiri we tɔrɔn ganaa.
A n minbuiin nɛ tumaa bíi we
kiri wɔ ǹ bǎã nɛ.
Min baraan kɛn,
bɛn man die gɔya sa gɛ̀ we.
Dɛnaa Lawa a da ǹ boo ne.
32Dɛnaa Lawa Pàãyiidɛnaa a da ǹ boo á ke:
«Koe gole nə n koe gánan lɛ,
la piɛ̃ gole n boe tán lɛ dan ganaa die.»
33Bɛa pinaa lɛ nɛ, Dɛnaa Lawa taman yii, geren tá re goɛ̃ kanaa paǹ tumaa nɛ, a kũ a paǹ goon kɛ ganaa a wo a paǹ goon kɛ dɔ yaa. Bɛ̀ bɛ nə́ n zɛnaa, min kɔn ba re wuu pii a geren la wa, min kɔn ba re a geren goɛ, a ǹ bĩ wa. Maǹ die n biɛ ka yisi bɛ́ lɔn.
34Kasɛn kɛn
maa zaman-lɛduə̃lin lɛa,
ka n lɛ dɛ, ka n duduwə.
Ka n birikəə̃ tán,
kasɛn mɛnɛn bɛ́ maa tɔɔn lɛduĩ.
Hiĩ ka dɔn gɛ̀ wɔ na á dɔ.
Ka n die mɛnɛɛ, ka yɔyɔrɛ
ka tasa giɔ̀mɔ kaka bɛ́ lɔn.
35Mìi duru ǹ bǎã ba maa
zaman-lɛduə̃lin kɛn la wa.
Baa si á woo ǹ bǎã ba
tɔɔn-lɛduə̃lin kɛn la wa.
36Máa ǹ lɛ-dɛ miɛ,
máa ǹ ginii miɛ.
A giala, Dɛnaa Lawa nə́ ǹ tɔɔn
buu sɔ̃ ǹ bǎã ziziɛ̃.
37Dɛnaa Lawa a foo-yoo gole
kɛ taman yii,
bǎã sonboren kɛn tumaa nyɛɛ kiĩni.
38Lawa n soe n boe a bǎã nɛ
ka yàra bɛ́ soe n boe daã-n lɔn.
Zia baraa kɛ taman yii
ka Dɛnaa Lawa a foo-yoo gole kɛ nɛ,
gána lɛ diə gole baa.
Currently Selected:
Zer 25: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
