Zer 26
26
Maǹ Zeremii kuĩ
1 #
Kiin2 23.36–24.6; KZS2 36.5-7 Zudaan kii Zoziasi a nɛgiĩ Zoakimu a kiibaa giala kɔ li, Dɛnaa Lawa boo da Zeremii ni á pɛ nɛ: 2– Masɛ Dɛnaa Lawa bɛ́ boo mɛn diɛ, á ke: «Wo giã Lawa a kion a sumu kɛ nɛ. Min mɛn tumaa bɛ́ boe Zudaa gána a kiwin ni bɛ̀ ǹ da ma guguru kɔ Lawa a kion kɛ nɛ, n boo da bɛn manɛ. Ma bɛ́ re boo mɛn tumaa diɛ n nɛ, n na a yii pɛ ǹ nɛ. N nyan boo nɛ goon din bɔ lɛ wa! 3Kɔntan, ǹ tá re n too koe n lon, ǹ nə n gɔn bɔ ǹ giã ǹ gɔn baraa kɛ nɛ, ka bɛ-n kəni, ma goã máa ma á re dɔlɔ mɛn boe ǹ ganaa, ma á re wusii bɛ kio. 4Ń tá re pii ǹ ni kəni mà Dɛnaa Lawa a da ǹ boon nə́ ke: Ka n too kɔ ma lon, ka kɔ maa dí-pɛn kɛn lɛ má ǹ kɔ ka la. 5Ka n too kɔ maa dí-nyali, Lawa a boo gii-dalin kɛn lon. Má goã má ǹ dia ka la gunyin damata sɛnɛ, ka n too kɔ ǹ lon wa. 6#Zoz 18.1; Loe 78.60; Zer 7.12-14 Bɛ̀ ka n too kɔ wa, man die Lawa a kion kɛ ziziɛ̃ ká ma goã má Siiloo wɔ kɛ ziziɛ̃ lɔn. Man die Zeruzalɛmu biɛ sii a kɔnboe lɛa tán a tɔrɔn tumaa bii, bɛ̀ ǹ tá re liɛ baraa we.»
Maǹ zoɛ̃ maǹ Zeremii dɛ
7Lawa a wúlu-bɔlen ne, Lawa a boo gii-dalin laanka zaman tumaa goã Zeremii lɛ miɛ boo diɛ Lawa a kion lɛ a sumu-n. 8Zeremii bɛ́ á Lawa a boo lɛ da zaman tumaa nɛ á nya, Lawa a wúlu-bɔlen ne, Lawa a boo gii-dalin ni ka zaman lɛ nɛ, ǹ nə́ Zeremii kũ, ǹ nə́ pii ni: «N doamaa-n ka gɛ̀ nɛ! 9A n siɛ lɔn n tá pii ka Dɛnaa Lawa tɔ nɛ mà Lawa a kion kɛ n die n ziziɛ̃ ka Siiloo wɔ kɛ bɛ́ lɔn! Mà Zeruzalɛmu n die bɔ̀n biɛ, ǹ na a zaman goa ǹ bɔ a nɛ.» Min mɛn tumaa goã Lawa a kion lɛ nɛ, ǹ tumaa yoo Zeremii gialaa. 10Zudaa gána nyɛɛnaandɛnan bɛ́ ǹ nə́ bɛa boon lɛn ma, ǹ nə́ n toa kii kion ǹ nə́ woo Lawa a kion. Ǹ nə́ tɔn nə n sɔkɔn Lawa a kion a wɔ ǹ kiɛnlɛ dii kɛ lɛ-a. 11Lawa a wúlu-bɔlen laanka Lawa a boo gii-dalin lɛn nə́ tɔn kɛ pɛ gána nyɛɛnaandɛnan lɛn manɛ ka zaman lɛ tumaa nɛ: «Giĩ kɛ doamaa-n ka gɛ̀ nɛ. A giala, a na á boo da Zeruzalɛmu ganaa. Ka dinin too bɛ́ á ma!»
12Sɛnɛ, Zeremii pɛ gána nyɛɛnaandɛnan lɛn manɛ ka zaman lɛ tumaa-n kɛnɛn: «Ka boo mɛn tumaa ma Lawa a kion kɛ laanka Zeruzalɛmu a paǹ li, Dɛnaa Lawa na á ma da a pɛ ganaa. 13Kanna kəni, ka kaa giã ǹ gɔn laanka kaa zɛnaa ǹ sii bɔyaa, ka n too kɔ Dɛnaa Lawa, kaa Lawa a bíi wɔ li. Ka bɛ-n kəni, á re a taasiɛn bɔyɛɛ, a koe mɛn boo da, á re bɛ lɛ goɛ a bɔ ka la. 14Masɛ kɔn tá ka gɔn. Sii mɛn bɛ́ siĩni a n pepere ka yii li, ka bɛ zɛnaa ma nɛ. 15Sɛnɛ, ka doamaa-n ka sii goon dɔ̃. Bɛ̀ ka ma dɛ ma gã, kasɛn, Zeruzalɛmu laanka a minin, ka dɔ̃ mà zɛ̀rɛbaãdɛnaa a gɛ̀ n kuĩ ka mìi ni. A giala, Dɛnaa Lawa na á ma dia sonbore mà ma da boo kɛ tumaa pɛ ka nɛ.» 16Gána nyɛɛnaandɛnan lɛn laanka zaman lɛ tumaa tɔn kɛ pɛ Lawa a wúlu-bɔlen lɛn manɛ ka Lawa a boo gii-dalin lɛn nɛ: «Giĩ kɛ doamaa bie ka gɛ̀-n wa. Sonbore, a na á boo da wɔ nɛ ka Dɛnaa Lawa, wɔa Lawa tɔ nɛ.» 17Bɛ kio, min golen nyɛɛnaandɛnan tɛnɛn nə́ yoo, ǹ nə́ pɛ zaman lɛ tumaa nɛ: 18#Mis 3.12 Ezekiasi a kiibaa waáraa Zudaa gána mìi la, Lawa a boo gii-dali goon goã a tan Moresɛti min lɛa a tɔ n Misee. Á pɛ Zudaa zaman tumaa-n kɛnɛn: Dɛnaa Lawa Pàãyiidɛnaa n kɛ pii:
«*Siɔn nə die n biɛ ka wuru gɔ́ɔ̃
kooro bɛ́ lɔn,
hiĩ, Zeruzalɛmu n die kɛbɔlɔ biɛ.
Lawa a kion a tenten ke,
bɛ n die nyan tewon biɛ.»
19Kii Ezekiasi laanka Zudaa minin nə Lawa a boo gii-dali Misee dɛ bɛa boon lɛn taman yii? Haayii! Maǹ nə́ nyɛ́ɛ baa Dɛnaa Lawa yii ni, ǹ ná a nyankɔ. Dɛnaa Lawa goã á dɔlɔ mɛn boo da, a ná a taasiɛn bɔyaa, a da ka bɛ nɛ ǹ ganaa doo wa. Sɛnɛ, wɔsɛn, bɛ̀ wɔ dɔlɔ bɔ giĩ kɛ ganaa, wɔ n sii baraa zɛnɛɛ wɔ dinin manɛ.
Kii Zozakimu Lawa a boo gii-dali Uria dɛ
20Bɛa biikoo lɛ li, Lawa a boo gii-dali goon goã Lawa a boo gii diɛ, a tɔ n Uria, Semayia a nɛgiĩ ni, boe Kiriyati-Yarimu. A na á goã Lawa a boo gii diɛ Zeruzalɛmu laanka Zudaa gána ganaa ka Zeremii dɔ bɛ́ zɛnɛɛ lɔn ka te. 21Uria boo mɛn da, kii Zozakimu laanka a sɔraasin goledɛnan tumaa, ka a gána nyɛɛnaandɛnan nə́ bɛ ma. Kii lɛ tɔ́n zɔɔ̃ li, mà a Uria nyin bɔ. Uria bɛ́ á bɛ ma, nyɛ́ɛ kũ, á baa si á woo Ezipti gána nɛ. 22Sɛnɛ, kii Zozakimu minin dia a kio Ezipti gána nɛ: Akibɔɔrɔ a nɛgiĩ Ɛlnaatan nɛ ka minin tɛnɛn nɛ. 23Ǹ nə́ bɔ ka Uria nɛ Ezipti gána nɛ ǹ nə́ daa nɛ, ǹ nə́ woo-n kii lɛ li. Zozakimu nə ǹ da a dɛ ganaa, ǹ ná a gere zũ geren kaa ǹ nyankɔrɔ gole kɛ nɛ. 24Sɛnɛ, Safan a nɛgiĩ Ayikaamu na á goã n koe Zeremii lɛ. A din barka nɛ, zaman lɛ gɔn dɔ Zeremii ganaa ǹ nə́ dɛ wa.
Currently Selected:
Zer 26: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
