Zer 24
24
Gɔ́rɔ nɛ sonbore ka a bɔnɛɛ
1 #
Kiin2 24.12-16; KZS2 36.10 Baabiloniin kii Nebukadenezɔɔrɔ Zudaan kii Zoakimu a nɛgiĩ Yekonia laanka a nyɛɛnaandɛnan goa Zeruzalɛmu á woo ǹ ne *Baabilonii kɔnlɛ ka a fuũn ni, ka a gɔn dí-nyalin ni. Bɛ kio, Dɛnaa Lawa gɔ́rɔ nɛ káka màn paa nyaa ma nɛ koa-n tán Lawa a kion yɔrɔ-a. 2Káka goon a gɔ́rɔ nɛ n siĩn sɔnbɔraanɛ ka gɔ́rɔ nɛ lɛ bibinaa bɛ́ lɔn. Goon kɛ a gɔ́rɔ nɛ ziziɛ̃maa nɛ. Á ziziɛ̃ á la yii ni, min na a boe la a bii dinin wa. 3Dɛnaa Lawa nɔ̀n da ma la kɛnɛn: «Zeremii, n yii n wàa ganaa?» Ma á lɛ si: «Ma yii n gɔ́rɔ nɛ ganaa: ǹ mɛnɛn bɛ́ siĩn sɔnbɔraanɛ, bɛn man kɔɔ̃nɛ, ǹ mɛnɛn bɛ́ ǹ ba siĩn wa, ǹ nə́ ziziɛ̃, min ba boe la a ǹ bii wa.» 4Dɛnaa Lawa tɔn pɛ ma nɛ: 5– Masɛ Dɛnaa Lawa, Izirayeli a Lawa bɛ́ boo mɛn diɛ á ke: «Gɔ́rɔ nɛ sonboren kɛn, ǹ ga ma-a n kɔɔ̃nɛ. A din yii goon ne, Zudaa minin kɛn gùli kɔ ǹ bǎã nɛ, ma wo ǹ mɛnɛn nɛ Baabilonii gána nɛ, man giɛ bɛn ganaa ka yɔrɔ bǐɛ̃ nɛ. 6Hiĩ, man giɛ ǹ ganaa ka yɔrɔ bǐɛ̃ nɛ. Man die wusii ma da ǹ nɛ gána kɛ nɛ. Ma ba re ǹ wurii doo wa, man die ǹ doe. Ma ba re ǹ woɛ̃ doo wa, man die ǹ zumi. 7Ma á re toɛ ǹ dɔ̃ mà ma din ni Dɛnaa Lawa lɛa. Ǹ tá re n bɔyɛɛ ǹ masɛ wɔ baa ka ǹ foo din tumaa nɛ. Ǹ tá re maa zaman biɛ, masɛ dɔ á re ǹ Lawa biɛ.»
8«Á bǐɛ̃ kɔ! Masɛ Dɛnaa Lawa bɛ́ boo mɛn diɛ Zudaan kii Sedekiasi a paǹ li, a gána nyɛɛnaandɛnan nɛ, min mɛnɛn nə goã Zeruzalɛmu ka ǹ mɛnɛn bɛ́ giã-n Ezipti gána nɛ, á ke: Man die ǹ kuĩ we ka gɔ́rɔ nɛ ziziɛ̃ wole kɛ bɛ́ lɔn, min na a boe la á bii wa. 9Ǹ tá re sii a kɔnboe biɛ kanaa a tɔrɔn tumaa li. Bɛ̀ ǹ nə́ ǹ yɛ, ǹ gɔ̀nɔn tá re bìn diɛ. Ma bɛ́ re ǹ lui ma ǹ kaa gánan mɛnɛn nɛ, ǹ tá re sii a kɔnboe biɛ walan, bɛ̀ ǹ tá li ǹ sìi da min ganaa, ǹ min da yaa lɛa, ǹ sɔ kɔ min ganaa hinlaa ǹ lɛn baraa bíi li. 10Man die yui ǹ gialaa ka zia nɛ, ma bòo kaa ǹ ganaa, ka piɛ̃ busu ni yǎa ǹ papaɛ̃ gána kɛ nɛ ma kɔ ǹ la, ka ǹ digolon ne.»
Currently Selected:
Zer 24: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
