Zer 23
23
Zaman nyɛɛnaandɛnaa baraan
1«Wàa koe n ka kɛ nɛ! Nyɛɛnaandɛnan mɛnɛn bɛ́ maa zaman lɛ nyɛɛnaan boe, maǹ nə ǹ sasawɛɛ ǹ nə́ ǹ pɛsɛ̃ paǹ yii li!» Dɛnaa Lawa a da ǹ boo ne. 2Bɛ lɛ nɛ, Dɛnaa Lawa, Izirayeli a Lawa n boo kɛ diɛ ǹ paǹ li: – Ka maa tɔɔn toa ǹ nə́ woo paǹ yii li, ka maa sèren loo, ka ga ǹ walan wa. Á bǐɛ̃ kɔ! Ka sii baraa mɛn tumaa zɛnaa, ma á re yui ka gialaa bɛn taman yii. Masɛ Dɛnaa Lawa a da ǹ boo ne.
3Bɛ kio, má maa zaman gialakun kɛ loo má ǹ pɛsɛ̃ gánan mɛnɛn nɛ, ma dinmaa á re ǹ soekɔn ma bɔ ǹ nɛ walan, ma da ǹ nɛ ǹ lɛduə̃ ǹ bǎã nɛ. Ǹ tá re buluboe walan, ǹ mɔnaa. 4Ma á re lɛduə̃li sonboren koɛ ǹ mìi la. Nyɛ́ɛ a re maa sèren lɛn kuĩ doo wa, ǹ nyin ba re soe doo wa, ǹ kɔn dɔ ba re nyaabiɛ duduu wa. Dɛnaa Lawa a da ǹ boo ne.
Zaman nyɛɛnaan-bɔle sonboren
5 #
Zer 33.14-16
Á ke, lɛawaan tá re doe,
Dɛnaa Lawa a da ǹ boo ne,
Davida tɔrɔ taãn tá re yii,
a kiibaa zɛnaa,
ka yiridɛnaabaa nɛ.
Á re peperebaa laanka
sonborebaa zɛnɛɛ gána lɛ nɛ.
6Bɛa waáraa kəni,
Zudaa gána á re goɛ̃ a din gɔn wìi
á lɛa,
Izirayeli zaman goã yii-nyɛɛ la.
Ǹ bɛ́ re tɔ mɛn koe a ganaa, á ke:
«Dɛnaa Lawa n wɔ kirisibaali lɛa.»
7Hiĩ, ǹ kɔn pinaa, Dɛnaa Lawa a da ǹ boo ne, min kɔn ba re pii doo: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn nə Izirayeli nɛn waa á ǹ bɔ Ezipti gána nɛ!» 8Sɛnɛ, ǹ tá re pii: «Ma nə n liɛ ka Dɛnaa Lawa Yiikoonaa tɔ nɛ, asɛ mɛn nə Izirayeli nɛn waa gɔsɛ a lɛ̀gɔn la gánan nɛ á soo ǹ ne gánan kɛn tumaa nɛ á ǹ pɛsɛ̃ ǹ nɛ, a n die ǹ soekɔn ǹ gána nɛ!»
Boo mɛn nə n da Lawa a boo gii-dali soɛ-bɔlen paǹ li
9Lawa a boo gii-dalin paǹ li.
Ma foo ziziɛ̃,
ma gɔ̀nɔn yii n bìn diɛ.
Man ka yɔ mi a la yii-n wole bɛ́ lɔn
ka min mɛn bɛ́ duvɛ̃ ná a yii ganaa.
Dɛnaa Lawa a lɛa nɛ,
ka a boon kɛn nɛ,
á ǹ pɛ ma nɛ.
10Gána lɛ piɛ̃maa-n ka
naarɛbaalin ni.
Lɛn baraa taman yii,
gána lɛ n gɛ̀ koa gɔ́ɔ̃ nɛ.
Gána lɛ a bɔmɔ bǎãn tumaa laa.
Maǹ baa sii sii baraa ganaa.
Sii mɛn bɛ́ a siĩ-n wa,
ǹ foo n tã ka bɛa zɛnaa nɛ.
11Lawa a boo gii-dalin laanka
Lawa a wúlu-bɔlen
man lɛ pii ǹ màn sii.
Ǹ sii baraan mɛnɛn zɛnaa,
bɛ lɛ á tɔn yii maa kion kɛ nɛ.
Dɛnaa Lawa a da ǹ boo ne.
12Bɛ lɛ nɛ,
ǹ zii á re wɔrɔnzɔrɔn biɛ ǹ ganaa.
Tèlò-n, ǹ tá re n tɔtoe kɔn nɛ,
ǹ bɔ ǹ kaa.
Taãn nɛ,
bɛ̀ ma yoo ǹ gialaa lɛ̀ mɛn-a,
man die koe diɛ ǹ mìi ni.
Dɛnaa Lawa a da ǹ boo ne.
13Samarii a Lawa a boo gii-dalin li,
má siin yɛ ǹ mɛnɛn bɛ́ ǹ ba foo
sii wa.
Maǹ boo diɛ ka *Baali tɔ nɛ
ǹ nə́ maa zaman Izirayeli siɛ̃ nɛ.
14 #
SGK 18.20; Eze 16.49 Zeruzalɛmu a Lawa a boo
gii-dalin dɔn li,
ma yii n sii bɔbɔnɛɛn ganaa:
Maǹ naarɛbiɛ, maǹ soɛ boe.
Ǹ giala n kun ka min baraan nɛ,
Bɛa yɔrɔ lɛ la,
min kɔn ba n nyɛnɛɛ sii baraa-n wa.
Masɛ yii li,
maǹ nə́ kɔnbɔ ka Sodɔmu minin ni.
Zeruzalɛmu minin man nə́ kɔnbɔ
ka Gomɔɔrɔ minin ni.
15Bɛ lɛ nɛ,
Dɛnaa Lawa Pàãyiidɛnaa á kɛ pii
Lawa a boo gii-dalin paǹ li:
Man die liɛ kɔɔsɛ koe ǹ la ǹ sɔ̃,
ma sèwò kɔ ǹ la ǹ mi.
A giala Zeruzalɛmu a Lawa a
boo gii-dalin lɛn
man ka mu yala gɔ̀dɛnaa bɛ́ lɔn,
n daɛ gána lɛ tumaa la.
Dɛnaa Lawa
16Dɛnaa Lawa Pàãyiidɛnaa pɛ:
Ka nyan nə n too kɔ Lawa a
boo gii-dalin kɛn lon wa.
Maǹ ka yiri siɛ̃.
Ǹ bɛ́ boo mɛn diɛ,
ǹ dinin taasiɛn manɛ.
Masɛ a boon bie wa.
17Min mɛnɛn bɛ́ masɛ diɛ yaa lɛa,
maǹ pii kɛnɛn:
Dɛnaa Lawa pɛ:
«Kaa wɔ á re bǐɛ̃ koe!»
Min mɛnɛn bɛ́ koe ǹ dinin
taasiɛ baraan lɛ,
maǹ pii bɛn manɛ:
«Baraa a re ka yii wa!»
18Man pii: Die na á goã kun ma
nɛ maa sii yɔrɔ bɔ waáraa?
Die na á maa boon yɛ,
die na á ǹ ma?
Die na á n yiri kɔ ǹ li,
die na á ǹ giala ma?
Zeremii
19Piɛ̃ gole yoo,
Dɛnaa Lawa a foo-yoo ne.
A n kurunkurun lɛa,
min baraan mìi la.
20Dɛnaa Lawa sii mɛn yɔrɔ bɔ
á koa a yɔrɔ-a,
yǎa bɛ lɛ piɛ̃, a foo-yoo baraa kɛ
tɔn golee.
Bɛ kio, ka á re a giala miɛ.
Dɛnaa Lawa
21Bɛa Lawa a boo gii-dalin lɛn,
ma ǹ dia wa,
sɛnɛ maǹ baa sii.
Ma boo da ǹ nɛ wa,
sɛnɛ maǹ Lawa a boo gii diɛ.
22Bɛ̀ maǹ maa sii yɔrɔ bɔn
kɛn siére-a,
bɛ̀ ǹ ná a boo da maa zaman nɛ.
Ǹ giã ǹ gɔn baraa laanka
ǹ sii baraan kɛn,
bɛ̀ ǹ nə́ bɛn toa walan.
Dɛnaa Lawa n kanaa paǹ din tumaa nɛ
23Wɔlɔ kunu dinsɔsɔɔ̃ a Lawa n
ka ma nɛ?
Ma bie wɔlɔ sɔsɔɔ sɛ wɔ lɛa wa?
Dɛnaa Lawa a da ǹ boo ne.
24Ta min na á n duru dɔndɔɔn nɛ,
ma yii na a ganaa.
Dɛnaa Lawa a da ǹ boo ne.
Man bǎã tumaa nɛ, lon laanka tán.
Dɛnaa Lawa a da ǹ boo ne.
Soɛ boon
25Lawa a boo gii-dalin bɛ́ soɛ boon mɛnɛn diɛ ka ma tɔ nɛ, ma á miɛ. Maǹ pii: «Má n narɛ, má n narɛ!» 26Bɛa Lawa a boo gii-dalin lɛn man soɛ boon diɛ, ǹ nə́ ǹ dinin taasiɛn pii. Bɛ n die beleboe yǎa biĩ kəni? 27Maǹ zoɛ̃ li mà maa zaman lɛ yiri bɔ ka ma tɔ nɛ, ǹ narɛɛn kɛn lɛa ǹ tá kalɛɛ kɔn nɛ, ka ǹ digolon yiri bɔ ka ma tɔ-n lɔn ǹ nə́ kɔ Baali lɛ. 28Lawa a boo gii-dali mɛn bɛ zoɛ̃ li a na a narɛɛn kalaa, a ǹ kalaa. Sɛnɛ, maa boo gii bɛ́ ǹ mɛn li, a da ka peperebaa nɛ.
«Màn fofolo laanka màn nàn
sonbore á goon?»
Dɛnaa Lawa a da ǹ boo ne.
29«Maa boo kɛ bie ka tɛ bɛ́ lɔn wa?
A bie ka yele bɛ́ lɔn gɛ̀fu yui wa?»
Dɛnaa Lawa a da ǹ boo ne
30Lawa a boo gii-dalin kɛn maa da ǹ boon koɛ̃ kɔn lɛ-n, man die yui ǹ gialaa. Dɛnaa Lawa a da ǹ boo ne. 31Hiĩ, bɛa Lawa a boo gii-dalin lɛn, soɛ boe ka masɛ tɔ nɛ, ma á re yui ǹ gialaa, ǹsɛn mɛnɛn bɛ́ pii: «Dɛnaa Lawa a da ǹ boo ne.» 32Ma á re yui ǹ gialaa. Ǹ narɛɛn man soɛn lɛa. Bɛ̀ ǹ tá ǹ kalɛɛ maa zaman yɔrɔ-a, boo kooron dininsɔɔ̃nɔn manɛ. Ma ǹ dia wa, ma zii kɔ ǹ la wa. Ǹ là goon din ba maa zaman ganaa wa. Dɛnaa Lawa a da ǹ boo ne.
Dɛnaa Lawa a boo n guĩ lɛa minin ganaa
33Kɔntan, zaman lɛ a minin tá re nɔ̀n diɛ n la, Lawa a boo gii-dali lɛa hinlaa Lawa a wúlu-bɔle lɛa, ǹ pɛ: – Dɛnaa Lawa a guĩ n ka wàa nɛ? Ń die n nə ǹ lɛ si kɛnɛn: «Ka dinin lɛn man a guĩ lɛa, ma á re n mìi boe ka li.» Dɛnaa Lawa a da ǹ boo ne. 34Kɔntan, zaman lɛ a min, Lawa a boo gii-dali lɛa hinlaa Lawa a wúlu-bɔle lɛa, bɛ á re pii mà Dɛnaa Lawa guĩ da asɛ mìi ni. Á bǐɛ̃ kɔ, man die yui a gialaa, ka a kion minin ni. 35Ka bɛ́ re nɔ̀n diɛ kɔn la ka boo mɛn nɛ ka dinin bii ni, bɛ á ke: «Dɛnaa Lawa n wɔ lɛ sii mà lɔn? A n pii mà wàa?» 36Ka doamaa bie ka pɛ doo mà Dɛnaa Lawa na á guĩ da min mìi-n wa. Dɛnaa Lawa a boo n guĩ lɛa? Haayii. Sɛnɛ, bɛ̀ ka bɛa boon kɛn tɔrɔn da, ka ǹ Lawa Yiikoonaa, Lawa Pàãyiidɛnaa, wɔa Lawa a boo kɔkɔrɔ koe. 37Ka doamaa bɛ́ nɛ ka sii mɛn a nɔ̀n da Lawa a boo gii-dali la á ke: «Dɛnaa Lawa na á n lɛ si mà lɔn? A na á wàa boo pɛ n nɛ?» 38Sɛnɛ, bɛ̀ kaa tɔn pii mà Dɛnaa Lawa guĩ da kasɛn mìi ni a da yaa má ka kurəə bɛa pɛ ganaa, bɛa yɔrɔ lɛ la, masɛ Dɛnaa Lawa bɛ́ màn mɛn pii, á ke: 39«Man die ka diɛ ma dɔ̀ɔ̃ nɛ ka guĩ bɛ́ lɔn, ma wo ka zũ, kɔnlɛ ka kiwi kɛ dɔ nɛ, ma kɔ ka la ka ka digolon ne. 40Man die sìi diɛ ka ganaa yǎa duduu, ka a re yii gugurubaa yii doo wa. Min kɔn yiri á re boe ka bɛ-n wa.»
Currently Selected:
Zer 23: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
