Zer 1
1
1Ilkia a nɛgiĩ Zeremii boo mɛn da, bɛn man kiɛ̃ nɛ sɛ́wɔ kɛ nɛ. Zeremii na á goã Lawa a wúlu-bɔlen kion min lɛa, ǹ nə́ giã nɛ Anaatɔti, Bɛnzamɛn a tanlɛ minin gána nɛ. 2#Kiin2 22.3–23.27; KZS2 34.8–35.19 Amɔn a nɛgiĩ Zoziasi a kiibaa lɛ̀ fulusɔɔbaa ǹ wɔ li Zudaa gána mìi la, Dɛnaa Lawa boo da Zeremii ni. 3#Kiin2 23.36–24.7; 24.18–25.21; KZS2 36.5-8,11-21 Á wusoo á boo da-n doo Zoziasi a nɛgiĩ Zoakimu a kiibaa biikoo li Zudaa mìi la. Á boo da-n miɛ̃ yǎa Zoziasi a nɛgiĩ Sedekiasi a kiibaa lɛ̀ fulugoonbaa ǹ wɔ a mui soorobaa ǹ wɔ giala nyɔmɔɔ waáraa. A din biikoo lɛ nɛ, ǹ nə́ Zeruzalɛmu minin goa ǹ nə́ woo ǹ ne bɛ̀rɛbaa ǹ bǎã nɛ.
Dɛnaa Lawa n Zeremii bíi mà a na asɛ a boo gii-dali baa
4Dɛnaa Lawa boon mɛnɛn pɛ ma nɛ, ǹ nə́ ke: 5«Ma laan bɛ̀ ma n da n dan gɔ́ɔ̃ nɛ,
bɛ̀ ma tá n doɛ̃.
N laan bɛ̀ n yɛ, má n bɔ má n koa,
máa n maa dí nya,
n maa boo gii-dali baa tɔrɔn bii.»
6Má a lɛ si kɛnɛn: «Ebe, Dɛnaa Lawa, ma a boe boo diɛ la wa. Ma yii á kiɛɛrɛ á la yii ni.» 7Sɛnɛ, Dɛnaa Lawa pɛ ma nɛ:
«N nyan pɛ mà n yii á kiɛɛrɛ á la
yii-n wa.»
Ma bɛ́ re n diɛ bǎã mɛn tumaa nɛ,
n tá re woe.
Ma bɛ́ re boo mɛn diɛ n nɛ,
n tá re woe bɛ pii.
8N baran nyɛ́ɛ baa ǹ nɛ wa,
ma á kunun n ni, ma n kirisibaa.
Dɛnaa Lawa a da ǹ boo ne.
9Bɛ kio, Dɛnaa Lawa nə n gɔn saa
á da ma lɛ ganaa, á pɛ:
«Man maa boo we n lɛ-n.»
10A dɔ̃ mà pelo, mà man pàã koe
n la,
tɔrɔn laanka gánan mìi la:
N tá re màn woɛ̃,
n màn dɛ n kaa.
N tá re ziziɛ̃, n wuru.
N tá re doe, n zumu.
Amandie da gɔn ka donkolon ne pipi
11Dɛnaa Lawa boo da ma nɛ, á pɛ: «Zeremii, n yii n wàa ganaa?» Má a lɛ si: «Ma yii n amandie da gùrù ganaa, da mɛn lɛ yii bɛ́ fuu nɛ kɔ li.» 12Dɛnaa Lawa pɛ ma nɛ: «N yɛ parɛ! Bɛ n nyɛɛ mà ma á re maa da ǹ boo kɛ lɛ piɛ̃ fufuu.» 13Ka a paabaa ǹ wɔ nɛ, Dɛnaa Lawa boo da ma nɛ, á pɛ: «Kanna kəni, n yii n wàa ganaa?» Má a lɛ si kɛnɛn: «Ma yii n donkolon ganaa pipi, a lɛ n kanaa nɛ dia-n gɔsɛ a lɛ̀gɔn la.» 14Dɛnaa Lawa tɔn pɛ ma-n kəni:
Sonbore ne,
koe n die n toɛ gɔsɛ a lɛ gɔn la,
a da n kɔ gána lɛa zaman tumaa lɛ.
15Man die lɛ diɛ gɔsɛ a lɛ̀gɔn la
gána tɔrɔn kɛn tumaa la.
Masɛ din Dɛnaa Lawa a da ǹ boo ne.
Ǹ tá re die,
ǹ kiin lɛn gogoomaa á re kii
dankan koɛ tán Zeruzalɛmu a kiɛnlɛ yɔrɔ-a.
Ǹ tá re a kungɔnɔn lɛnpɛnɛ,
ǹ yoo Zudaa kiwin tumaa gialaa.
16Ka bɛa yɔrɔ kɛ nɛ,
ma á re maa dɔlɔ boe gána lɛa
minin tumaa ganaa.
Sonbore, ǹ nə́ sii bɔbɔnɛɛ zɛnaa,
ǹ nə́ n la bɔ ma ganaa,
ǹ nə́ wúlu mànan kɔ lawa kɔsɔn la,
ǹ mànan mɛnɛn zɛnaa ka ǹ dinin
gɔn nɛ,
ǹ nə́ bɛn guguru kɔ.
17Nsɛ Zeremii, n yɔrɔ bɔ kəni.
Yoo! Ma bɛ́ re boo mɛn tumaa diɛ
n nɛ,
n wo ǹ pɛ.
N nyan toa nyɛ́ɛ nə n gɔ̀nɔn bìn da
ǹ yɔrɔ-a wa.
Bɛ bie wa,
masɛ din nə die n gɔ̀nɔn diɛ
bìn diɛ ganaa ǹ yɔrɔ-a.
18Á ke, a saa pelo ganaa,
man pàã koe n la ka kiwi
tamaa wole sonbore bɛ́ lɔn.
N tá re goɛ̃ ka fɔlɔ bìbì bɛ́ lɔn,
ka zan kungɔn bɛ́ lɔn,
gána lɛ tumaa yɔrɔ-a,
Zudaa kiin yɔrɔ-a
gána nyɛɛnaandɛnan nɛ,
ka Lawa a wúlu-bɔlen ne,
kɔnlɛ ka gána lɛ a minin ni.
19Ǹ tá re yui n gialaa,
Sɛnɛ, ǹ ba re boe sii kɔn la ǹ zɛnaa
n nɛ wa,
a giala, ma tá kunun n ni, n kirisibiɛ.
Masɛ din Dɛnaa Lawa a da ǹ boo ne.
Currently Selected:
Zer 1: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
