Zer 15
15
Dɛnaa Lawa
1 #
BBN 32.11-14; MNS 14.13-19; Sam1 7.5-9 Dɛnaa Lawa pɛ ma nɛ: – Ta Muizu laanka Samayeli din nə́ n gii wɔ boo kɛ nɛ masɛ li, ma a re n yɔrɔ diɛ zaman lɛ la wa. Ǹ loo n nə ǹ bɔ ma yɔrɔ-a ǹ wo sɔsɔɔ. 2#SNS 13.10 Bɛ̀ minin nə́ nɔ̀n da n la mà ǹsɛn doamaa nɛ ǹ wo maa, n die nə ǹ lɛ si kɛnɛn: «Dɛnaa Lawa n kɛ pii:
Min mɛnɛn doamaa bɛ nɛ ǹ gã ka
piɛ̃ busu ni,
bɛn man die giɛ̃ ka piɛ̃ busu ni.
Min mɛnɛn doamaa bɛ nɛ ǹ gã zia la,
zia n die bɛn dii.
Min mɛnɛn doamaa bɛ nɛ ǹ gã
bòo ne,
bɛn man die giɛ̃ bòo gɔn.
Min mɛnɛn doamaa bɛ nɛ ǹ
wo bɛ̀rɛbaa ǹ bǎã nɛ,
ǹ tá re bɛn dɔn goɛ ǹ wo ǹ ne.»
3Dɛnaa Lawa a da ǹ boo á ke: «Man die yui ǹ gialaa ka yɔrɔ sii ni: Gɔya sà gɛ̀ nɛ, ginin tá re ǹ giɛrɛɛ ǹ wo ǹ ne sɔsɔɔ, zèwon tá re ǹ mui tolokan nə ǹ sɔ̃ ǹ nə ǹ bɔ tán. 4#Kiin2 21.1-16; KZS2 33.1-9 Bɛa biikoo li, kanaa a tɔrɔn tumaa á re bìn diɛ nyɛ́ɛ gɔn. Zudaan kii Ezekiasi a nɛgiĩ Manaasee sii baraan mɛnɛn zɛnaa Zeruzalɛmu, bɛn lɛn lɛa nɛ.»
5Dɛnaa Lawa pɛ:
Die n die makara boe n ganaa
doo Zeruzalɛmu?
N sii n die busi die ganaa?
Die n die n din nɔmɛɛ a nɔ̀n da n li?
Min kɔn!
6N din nə n ma toa walan,
Dɛnaa Lawa a da ǹ boo ne,
n nə n dɔ̀ɔ̃ wɔ ma nɛ.
Bɛ lɛ nɛ, ma yoo n gialaa,
ma n ziziɛ̃.
Má makara bɔ n ganaa ma nɔmaa.
7Má maa zaman pɛsɛ̃,
gána lɛ paǹ tumaa nɛ,
ka ǹ bɛ́ màn sui lɔn.
Má ǹ ziziɛ̃, má ǹ nɛnyaanan bɔ̀n baa.
Sɛnɛ, ǹ nə ǹ giã ǹ gɔn bɔyaa wa.
8Má ǹ lɔ giɔɔrɔn mɔnaa,
ka yìsi mu gole a nyɔɔsɔ̃ bɛ́ lɔn.
Penleen tã,
má basaã dia sɔraasi ten a náa la.
Bǎã goon ne,
má nyɛ́ɛ laanka gɔ̀nɔn bìn diɛ dia la.
9Lɔ mɛn nɛ sɔbaa yɛ,
nɔmaa n die bɛ yii,
a fɔfoã golee.
Penleen tá re tèlò biɛ a ganaa.
Sìi nə́ n kɔ lɛ.
A yii gugurubaa papaã.
Min mɛnɛn yii goã koo,
ma á re bɛn dii zia la,
ǹ zɔ́ɔn yɔrɔ-a.
Dɛnaa Lawa a da ǹ boo ne.
Dɛnaa Lawa n Zeremii lɛ sii
Zeremii
10Maa wɔ n ka koe ne!
Maa náa, ma n nə́ ma yɛ
koe laanka zia taman yii
gána lɛ tumaa nɛ?
A da yaa,
min kɔn a giɔ̀mɔ ba ma ganaa wa,
ma wɔrɔ dɔn bii min kɔn la wa.
Min tumaa lɛn baraa bíi ma li.
11Sɛnɛ, Dɛnaa Lawa pɛ:
Ma nə n liɛ,
ma á re n kirisibiɛ,
ma yii nyɛɛ kɔ n la.
Ma nə n liɛ,
koe pinaa ka foo ziziɛ̃ gole pinaa nɛ,
ma á re n zɔ́ɔ lɛ diɛ n gòã kuĩ ganaa.
12Fɔlɔ á boe la a gɔsɛ a lɛ̀gɔn la
fɔlɔ laanka a zan kuru?
Dɛnaa Lawa
13Zudaa,
ǹ tá re n naforo laanka
n gɔn màn giɔ̀mɔ kakaan kɛn kokoe.
N ba re màn kɔn yii ǹ dòo wa.
N sii baraa mɛn tumaa zɛnaa
n gána lɛ nɛ, bɛn lɛn lɛa nɛ.
14Gána mɛn bɛ́ n ba doɛ̃ wa,
ma á re n biɛ n zɔ́ɔn bɛ̀rɛ lɛa walan.
Sonbore, maa foo-yoo lɛ n kuĩ tɛ lɛa,
die ka dinin kuĩ.
Zeremii
15Dɛnaa Lawa, n tá sii tumaa doɛ̃.
N yiri koa ma li, n nə n dɔ ma lɛ.
Min mɛnɛn bɛ́ baraa zɛnɛɛ ma nɛ,
maa gɛ̀ dòo bɔ bɛn ganaa.
N nyan toa ma fuu yɛ,
n foo á kũ ǹ li kɛa lɛa wa.
Toa n kɛ dɔ̃:
N din a lɛa nɛ maa sɔn kɛn sii
ma ganaa.
16Bɛ̀ má n boo ma lɔn,
man kuĩ parsiini.
A n ma foo kɔɔ̃n koe,
a ma foo basã.
Taãn nɛ Dɛnaa Lawa Pàãyiidɛnaa,
n din tɔ n ma la.
17Ma bie giã-n tán yaa wɔ
ma-a wolen bii,
ma á sàn koe wa.
Sɛnɛ, ń ma da giã tiãlɛa ganaa
ka pàã nɛ,
a giala, ń ma gɔ́ɔ̃ pã ka foo yoo ne.
18Dan ba maa là paparɛɛ la wa.
Wàa na á baa?
Maa busulɛ á nyɛɛ wa.
A ba n lɛ tiɛ̃ wa. Bɛ giala?
Sonbore, ma n ka mu zii bɛ́ lɔn
ma gɔn,
minin yiri siɛ̃,
mu ná a yii a-n biikoo yii li wa.
Dɛnaa Lawa
19Dɛnaa Lawa boo mɛn da ma nɛ,
á ke:
Bɛ̀ n wusoo n daa ma li,
ma á re wusii ma n saa maa dí ni.
Boon mɛnɛn bɛ́ là ba ǹ ganaa wa,
bɛ̀ n bɛn toa walan,
ń tá boo peperen diɛ,
ma á re wusii ma n baa maa
boo gii-dali lɛa.
Zudaa minin doamaa nɛ ǹ da
nsɛ ganaa,
sɛnɛ nsɛ doamaa bie n wo ǹ li wa.
20Man die n biɛ ka zan kungɔn
bɛ́ lɔn,
min kɔn ná a boe la a nɔɔ a kaa wa.
Ǹ tá re yui n gialaa,
sɛnɛ, ǹ ba re boe n la wa.
Sonbore, ma á re goɛ̃ kunun n ni,
ma á re n kirisibiɛ.
Dɛnaa Lawa a da ǹ boo ne
21Ma á re n gɔsiɛ ma n bɔ
min baraan gɔn,
ma n kanbaa min kakaarɛn
pàã ganaa.
Currently Selected:
Zer 15: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
