Zer 14
14
Bǎã gere laanka bòo
1Dɛnaa Lawa boon mɛnɛn da Zeremii ni tán gere a paǹ li, ǹ nə́ ke:
Foo busii
2Zudaa zaman nə gɛ̀ koɛ,
ǹ kiwin pàã nya.
Min tumaa foo n zizɛ̃ nɛ.
Zeruzalɛmu a lɛ-dɛ n dii lon.
3Kiãn manə ǹ dí-nyalin diɛ woe
giɛ mu li.
Ǹ nə́ dɔ tùn lɛ-a,
sɛnɛ, mu banban.
Maǹ nə n bɔyɛɛ ǹ lon kooromaa.
Ǹ foo ziziɛ̃,
ǹ yɔrɔ kɔsɛ,
ǹ nə́ n mìi kuməə.
4Bǎã tumaa nɛ, tán nə́ n dɛ,
a giala, la kaa wa.
Bɛ lɛ nɛ, buu-kɔsɔlin foo ziziɛ̃,
ǹ nə́ n mìi kuməə.
5Yuùn nə nɛ mɛn yɛ don sisia,
a nə n la boe bɛ ganaa.
A giala buu banban doo wa.
6Don dundunun man golee kele
mìi kooro-an la.
Maǹ piɛ̃ yoe ka tolokan bɛ́ lɔn.
Ǹ nə́ ga buu li ǹ nə́ nɔmaa,
sɛnɛ buu banban wa.
Zaman
7Bɛ̀ wɔa sii baraan tá zɛ̀rɛ diɛ wɔ la,
Dɛnaa Lawa n din tɔ taman yii,
sii zɛnaa.
Sonbore, wɔa sãn nə́ mɔnaa.
Wɔ n zɛ̀rɛdɛnan lɛa n wɔ paǹ li.
8Nsɛ, Izirayeli a foo doa ǹ bǎã,
nsɛ mɛn bɛ́ a kirisibiɛ koe biikoo li,
kanna kəni, a n siɛ lɔn,
n tá n din biɛ
ká tii bɛ́ lɔn gána lɛ nɛ,
ká kiɛ̃ wole bɛ́ lɔn tèlò zii goon
gɔ́ɔ̃ nɛ.
9Ma nə n kɔnbɔ ka giĩ pàãwɛɛnaa nɛ,
ka zia-baali mɛn bɛ́ a boe la
a min kirisibaa wa.
Bɛ n siɛ lɔn kəni?
A da yaa Dɛnaa Lawa,
n tá kun ka wɔ nɛ.
N din tɔ n wɔ la,
n nyan nə n la bɔ wɔ ganaa wa!
Dɛnaa Lawa
10Dɛnaa Lawa bɛ́ boo mɛn diɛ zaman lɛ nɛ, á ke: «Hiĩ, minin kɛn man baa sii paǹ yii li ǹ dinin gɔn wìi á lɛ-a. Bɛ lɛ n kɔɔ̃nɛ ǹ dinin ganaa.» Sɛnɛ, bɛa Dɛnaa Lawa foo sii lɛa wa. Kanna kəni, a yiri á re gisĩ ǹ siɛ̃n nɛ, á re ǹ sii baraa a dɔlɔ boe ǹ ganaa. 11Dɛnaa Lawa pɛ ma nɛ: «N nyan màn kɔn nyankɔ ma la zaman kɛa yii-nyɛɛ taman yii wa! 12Ta ǹ nə́ n lɛ sɔɔ, ma a re n too koe ǹ nyankɔ li wa. Ta ǹ nə́ *wúlu màn tiɛ̃ laanka wúlu màn gìĩ kɔɔ̃n kɔ ma la, ma a re lɛ koe ǹ ganaa wa. Sɛnɛ, man die ǹ bɔ̀n biɛ ka zia nɛ, bòo ne ka piɛ̃ busu ni.»
Zeremii
13Má a lɛ si: «Sɛnɛ, Dɛnaa Lawa, á ke, n boo gii-dalin man pii zaman lɛ nɛ, mà zia hinlaa bòo ba re n koe ǹ lɛ doo wa. Sɛnɛ, mà Lawa n die là nyantoro taãn-taãn koe ǹ la kànaa.»
Dɛnaa Lawa
14Dɛnaa Lawa ma lɛ si á pɛ: – Lawa a boo gii-dalin kɛn bɛ́ boo mɛn diɛ ka ma tɔ nɛ, soɛ nɛ. Ma ǹ dia wa. Ma boo goon din da ǹ nɛ wa. Ǹ sii yɛn lɛn man soɛ lɛa. Ǹ bɛ́ boo mɛn diɛ, boo kooron manɛ. Ǹ dinin taasiɛ boon manɛ. 15Bɛ lɛ nɛ, masɛ Dɛnaa Lawa n kɛ pii Lawa a boo gii-dalin kɛn wɔ paǹ li: «Bɛa minin kɛn lɛn mà ǹsɛn man boo diɛ ka masɛ tɔ nɛ, a da yaa ma ǹ dia wa. Maǹ pii mà zia laanka bòo á re yii gána kɛ-n wa. A da yaa, zia laanka bòo n die ǹ tumaa papaɛ̃ lenlen! 16Ǹ boon kɛn pɛ min mɛnɛn manɛ, zia laanka bòo n die ǹ dɛnan dii. Ǹ dinin ni, ǹ lɔn nɛ, ǹ nɛgiĩn ni, ǹ nɛlɔn nɛ, ǹ gere n die goɛ̃ tán bǎã tumaa nɛ Zeruzalɛmu a zii mìin ni. Min kɔn ba re yii a ǹ bĩ wa. Ǹ baraan mɛnɛn zɛnaa, man die bɛ lɛ diɛ ǹ mìi ni.»
Foo busii
17N bɛ́ re boo mɛn diɛ ǹ nɛ, á ke:
Penleen ka tèlò,
ma yii mu pã á kaa suuu!
Koe gole na á maa zaman yɛ,
busulɛ gole ne.
18Bɛ̀ má soo wurun ni lɔn,
á ke, geren man tán bǎã yii ni.
Bɛ̀ ma wɔ kiwi lɔn,
á ke, ma yii n minin ganaa
nɔmaa-n bòo gɔn.
Lawa a boo gii-dalin laanka
Lawa a wúlu-bɔlen
manə n bibiĩ gána lɛ nɛ,
ǹ ba màn goon a woo ǹ bǎã doɛ̃ wa.
Zaman
19Dɛnaa Lawa,
ń Zudaa daa sonbore?
*Siɔn tìĩ bɔ n nyin ni?
Fuu mɛn bɛ́ a nyɛɛ wa,
a n siɛ lɔn n tá bɛ diɛ wɔ mìi ni?
Wɔ nə n yii diɛ là nyantoro la,
sɛnɛ màn kɔn banban bǐɛ̃ lɛa wa.
Wɔ nə n yii diɛ wɔa busu á nya la,
sɛnɛ, nyɛ́ɛ n die!
20Dɛnaa Lawa,
wɔ á doɛ̃ wáa wɔ́ sii baraa zɛnaa.
Wɔ á wɔ digolon siɛ̃n doɛ̃.
Wɔ́ sii baraa zɛnaa n nɛ.
21N tɔ taman yii,
n giã ǹ bǎã ke piɛ̃ nɛ ka n
gugurubaa kɛ nɛ,
n nyan nə n la bɔ bɛ ganaa wa.
N nyan nə n la bɔ a ganaa wa.
N lɛ kɔ kɔn la mɛn wɔ ka wɔ nɛ,
n yiri kɔ ka bɛ nɛ,
n nyan a sàabaa wa.
22Tɔrɔ kɔsɔn lawa kooron kɛn bii,
màn tá ǹ bii a n boe la a n die ka
la nɛ?
Mu lɛ n boe lon kiɛ a din li?
N din Dɛnaa Lawa,
wɔa Lawa a nya ǹ dí bie wa?
Wɔ foo n doa nɛ n din ganaa.
A giala, n din ni bɛa siin kɛn
lɛn tumaa zɛnɛɛ.
Currently Selected:
Zer 14: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
