Iza 59

Siɛ̃n mɛnɛn bɛ́ min niɛ̃ Lawa ganaa

1Taãn nɛ, Dɛnaa Lawa gɔn

ba kunu

á la yii ni kirisibaa ganaa wa,

a too dɔ bie á tã á la yii ni

boo miɛ ganaa wa!

2Sɛnɛ, kaa sii baraan man ka

niɛ̃ kɔn

ka kaa Dɛnaa Lawa nɛ.

Bɛ̀ n yaa á n bɔ á n bɔ ka li,

a ná a ba li a kaa boo ma wa,

kaa sii baraan lɛn lɛa nɛ.

3Ka gɔnɔn man mà lɛa,

kaa siɛ̃n nə́ ka gòonən tii.

Soɛ boon man ka lɛ-n,

ka lɛwɔn nə́ boo baraa diɛ.

4Min kɔn ba woe kiri wɔ ǹ bǎã

nɛ peperebaa a lɛa wa.

Min kɔn ba kiri kuri

ka sonborebaa-n wa,

ka nə n foo doɛ sii kooron ganaa,

ka n soɛ boe,

Ka nə n taasɛ sii baraa

zɛnaa ganaa,

ka n koe yii nɛ lɛa.

5Kaa zɛnaa ǹ siin man

ka kɔrɔkan gìi bɛ́ lɔn:

Bɛ̀ min sɔ̃, a n giɛ̃.

Bɛ̀ n gìi lɛ a goon yu,

kɔrɔkan nə soe a nɛ.

6Ka bɛ mɔnaa mɛn tiɛ̃,

a boe la a mɔnaa baa wa.

Kaa dí a là a mɔnaa biɛ doɛ̃

ka wɔ ka ganaa wa,

kaa sii zɛnaan man ka

baraabaa nɛ.

Ka gɔnɔn man kakaarɛbaa ǹ

dí dinsɔɔ̃ nyɛɛ.

7 # Rɔm 3.15-17 Ka gòã yii n fuu sii baraa

zɛnaa ganaa.

Ka nə n nanaɛ̃ woe yii tì-an

mà kiɛ.

Ka ǹ sii baraa zɛnaa dinsɔɔ̃ taasɛ.

Ka bɛ boe bǎã mɛn tumaa nɛ,

kakaarɛbaa laanka basaã nɛ.

8Kaa là nyantoro zii doɛ̃ wa.

Ka bɛ́ koe zii mɛn lɛ,

sonborebaa goon din ba la wa.

Ka n kaa ziin kɔkɔrɔ koe.

Bɛ̀ min woo min kɔ ǹ lɛ,

bɛa là nyantoro yii duduu wa.

Lawa a zaman ná a sii baraan dɔ̃

9Bɛ lɛ nɛ, sonborebaa wɔlɔ

á lui-n wɔ ganaa,

peperebaa a doe wɔ li wa.

Wɔ nə n yii diɛ wɔlɔ fúlu la,

sɛnɛ, wɔ n wɔlɔ tì li.

Wɔ nə n yii die lɛ̀ a waa la,

sɛnɛ, wɔ ǹ tɔ we wɔlɔ tì li.

10Wɔ ǹ tɔ we ka yii tere-an bɛ́ lɔn,

wɔ nə n gɔnɔn tatalɛɛ

kigiala gɔ̀nɔn ganaa.

Wɔ ǹ woe wɔ mìi gialaa ka

min mɛn bɛ́ a yii ná a banban.

Penleen, wɔ nə n gòã niniɛ̃ ka

tèlò bɛ́ lɔn.

Wɔ ǹ kakabaa la,

sɛnɛ, wɔ ǹ wɔ kɔnbɔ ka geren ne.

11Wɔ tumaa n lɛ biɛ ka don

màn babaraa bɛ́ lɔn.

Wɔ n gini ka zɛrɛkatoãnən bɛ́ lɔn.

Wɔ nə n yii diɛ sonborebaa la,

sɛnɛ, màn kɔn.

Wɔ nə n yii diɛ kirisibaa la

sɛnɛ, a nə n wɔlɔ lui wɔ ganaa.

12Taãn nɛ, wɔa siɛ̃n nə́ mɔnaa

n yɔrɔ-a.

Wɔa sii baraan man wɔ zɛ̀rɛ biɛ.

Wɔ nə n taasɛ ka wɔa sã ǹ

siin kɛn nɛ biikoo yii li.

Taãn nɛ, wɔ á wɔa siɛ̃n doɛ̃.

13Dɛnaa Lawa, wɔ n bɔlɔ tii.

Wɔ n yiri sã.

Wɔ n wɔlɔ lui n ganaa,

wɔa Lawa.

Mɛnaa minin la boo na á goã

wɔ lɛ-n,

ka gòãn dii boo ne.

Soɛ boon dininsɔɔ̃nɔn man

wɔ foo ne.

14Bɛ lɛ na á toa, sonborebaa nə́

n zɔ̃,

peperebaa nə́ n wɔlɔ lui

wɔ ganaa.

Zaman bǎã nɛ, sonbore nya.

Bɔlɔgoondɛnaabaa á woe

walan wa.

15Taãn nɛ, sonbore nya.

Min mɛn bɛ n nyɛnɛɛ sii baraa nɛ,

maǹ bɛa dɛnaa kokoe.

Dɛnaa Lawa n die sii zɛnɛɛ

Dɛnaa Lawa bɛ tumaa yɛ.

Peperebaa baã kɛ n sii bɔnɛɛ lɛa

a yii li.

16 # Iza 63.5 Á yɛ mà min kɔn banban,

mà min kɔn ba gòã kũ diɛ wa,

bɛ́ tɔwaa baa a ganaa.

Bɛ lɛ nɛ, a din tá re sii zɛnɛɛ.

A peperebaa lɛ na á pàã kɔ la.

17 # Efɛ 6.14-17; Tes1 5.8 A na á peperebaa wɔ

a din ganaa

ziabaa ǹ dɔnkɛ lɛa.

Á kirisibaa ǹ kòlo fu wɔ

a mìi ganaa.

Á gɛ̀ dòo bɔ ǹ dɔnkɛ wɔ

a din ganaa.

Mɔnaa mɛn bɛ́ a ganaa

pipiãbaa ǹ mɔnaa nɛ.

18Minin nə kɔnbɔ ka màn mɛn nɛ,

a n die bɛ sarɛɛ ǹ la.

A foo-yoo kɛ na a zia baa

kɔn wolen wɔ lɛa,

a dɔlɔ na a zɔ́ɔn wɔ lɛa,

mu gánan mɛnɛn da bii,

bɛn nə kɔnbɔ ka màn mɛn nɛ

a n die bɛ sarɛɛ ǹ la.

19A kũ lɛ̀nyɛɛn ganaa

min tumaa á re Dɛnaa Lawa

tɔ guguru koe,

a wo lɛ̀giala yaa,

ǹ tumaa á re

a tɔ a gugurubaa doɛ̃.

Dɛnaa Lawa n die

die ka mu tii bɛ́ lɔn

nyankɔrɔ basa nɛ,

piɛ̃ n noɛ̃ die ne.

20 # Rɔm 11.26 Si sii la wole á re die *Siɔn,

Zakɔba a minin kɛn lɛa,

ǹ nə́ ǹ sii baraan kaa.

Dɛnaa Lawa a da ǹ boo ne.

21Sɛnɛ masɛ a paǹ li, ma bɛ́ lɛ kɔ kɔn la mɛn we ǹ nɛ, á ke, Dɛnaa Lawa na á pɛ: Ma yiri n ka la. Má maa boo wɔ ka lɛ-n. A n ka dinin wɔ lɛa, kaa nɛnyaanan nɛ, ka kaa nɔ̀ɔnɔn nɛ, sisia yǎa duduu. Ma a re ǹ sii ka la duduu wa. Ma din Dɛnaa Lawa n má pɛ.

Currently Selected:

Iza 59: SBPE2011

Highlight

Copy

Compare