Iza 58
58
Lɛ sɔɔ sonbore
1Dɛnaa Lawa pɛ:
Paraa ka lɛn gole ne,
n nyan nə n lɛ tã wa.
Toa n lɛn nə bɔ ka bɛn wɔ bɛ́ lɔn!
Maa zaman lɛ a sii baraan pɛ
ǹ nɛ,
n Zakɔba tɔrɔn siɛ̃n pɛ ǹ nɛ.
2Lɛawaa tumaa li,
maǹ nɔ̀n diɛ maa taasiɛn nɛ.
Maǹ giɛ li ǹ ma foo siin dɔ̃.
Maǹ nə́ kɔnbɔ ka tɔrɔ mɛn nə́ ke,
koe peperebaa lɛ,
ǹ nə́ ǹ ba ǹ Lawa a dí-pɛn tii wa.
Maǹ kiri pepere li.
Maǹ li ma goã mɔrɛɛ nɛ ǹ ganaa.
3Sɛnɛ, maǹ pii:
Wɔ n siɛ lɔn wɔ n lɛ sɔɔ
n yii ná a ba a ganaa wa.
Wɔ n siɛ lɔn wɔ n dinin gisĩ
n nə́ n ba n yiri koɛ li wa.
Má ǹ lɛ si kɛnɛn kəni:
Sɛnɛ, ta ka n lɛ sɔɔ ǹ mɛn pinaa,
ka n ka dinin gɔn tɔ dí nyɛɛ,
ka n kaa dí-nyalin kuĩ baraa!
4Hiĩ, bɛ̀ ka n lɛ sɔɔ, ka n zia diɛ.
Ka n kɔn dii ka gɔn munii ni.
Bɛ̀ ka á n lɛ soɛ ka bɛa yɔrɔ kɛ nɛ,
kaa nyankɔ á doe ma li lon wa.
5Ma bɛ́ lɛ soɛ mɛn narɛɛ,
bɛ kɔnbɔ ka kɛ nɛ?
Kasɛn din gisĩ ǹ gɔn nə ka
kɛ-n ma yɔrɔ-a?
Ka n mìi kuməə ka bùruu bɛ́ lɔn,
ká gɛ̀ koa ǹ mɔnaa wɔ,
ka n dinin tuturu tán tii li,
ka n bɛ lɛ bíi "lɛ soɛ"?
Bɛ n lɛawaa lɛa kɔɔ̃n
Dɛnaa Lawa ganaa?
6Lɛ sɔɔ mɛn bɛ́ kɔɔ̃n ma ganaa,
á ke:
Ǹ mɛnaa min mɛnɛn la,
ka bɛn si ka ǹ kaa.
Zǔu mɛn bɛ ǹ wìi li,
ka bɛ bɔ ka bɔ ǹ ganaa.
Ǹ bɛ́ min mɛnɛn nɔmɛɛ,
ka bɛn si ka ǹ kaa.
Sii mɛn tumaa bɛ́ ǹ biɛ bɛ̀rɛn lɛa,
ka bɛ yii sàabaa.
7 #
Mat 25.34
Ka kaa màn-bii gii kɔn
ka bòonaa nɛ,
ka kiɛnlɛ bũ doobaan manɛ,
ǹ mɛnɛn kion bɛ́ a banban
ka mɔnaa wɔ mɔnaa
wɛɛnaa ganaa,
ka nyan nə n dɔ̀ɔ̃ wɔ ka dɔɔ̃n
nɛ wa.
8Ka bɛ nɛ, n wɔlɔ fúlu n die yui tán
ka baayɛlɛ a wɔlɔ fúlu bɛ́ lɔn.
N baayɛrɛ lɛ á re nyɛɛ fufuu.
N peperebaa á re n nyɛɛnaan boe,
Dɛnaa Lawa a gugurubaa kɔ
n kio lɛ.
9Bɛ̀ n lɛ dia,
Dɛnaa Lawa á re n lɛ sii.
Bɛ̀ n dɔmalɛ nyankɔ, á re pii n ni:
«Ma á die.»
Màn mɛn bɛ́ nɔmaa diɛ
n zaman mìi ni,
sii zɛnaan mɛnɛn bɛ́ nyɛ́ɛ diɛ,
ka boo baraan nɛ,
bɛ̀ ń boo la n bɛn sàabaa,
10bɛ̀ n tá n màn-bii gii kɔn
ka bòonaan nɛ,
bɛ̀ n ga nɔmaa-wɔlen walan,
ka bɛ-n kəni, n tɛ fúlu á re
boe tèlò-n,
nsɛ a wɔlɔ tì n die goɛ̃ ka
penleen bɛ́ lɔn.
11Dɛnaa Lawa n die
n nyɛɛnaan boe biikoo yii li.
Haalɛ diə bii, á re màn-bii koe
n la,
a pàã kɔ n la.
N nə n die goɛ̃ ka dù gɔrɔ
mɛn bɛ́,
ǹ nə́ mu kiɛ a ganaa parsiini,
ka mu yala mɛn bɛ́ a mu n
baa sii duduu.
12Kɛbɔlɔ zizin kɛn,
n zaman lɛ tá re bɛn doe.
N tá re kion doe kɛ gòã zizin
kɛn la
ǹ nə́ n la bɔ ǹ ganaa haalɛ bibi.
Ǹ tá re n bíi:
«Tɔrɔ mɛn bɛ́ kɛ kolon tiɛ̃,
a n wusii kiwi a ziin zɛnɛɛ.»
Susu ǹ pii koa ǹ gɔn
13Bɛ̀ n nə n piã n dí nya
*susu ǹ pii pinaa wa,
ma lɛawaa mɛn bɔ má koa
maa wɔ lɛa,
bɛ n dí nya li wa,
bɛ̀ ń susu ǹ pii lɛ bíi
"là nyantoro",
bɛ̀ ń Dɛnaa Lawa
a lɛawaa sonbore lɛ bíi
"guguru kɔ ǹ lɛawaa"
bɛ̀ n ná a guguru kɔ,
ń dí kɔn nya li wa,
bɛ̀ n pii kɔ li,
n nə́ n din foo sii zɛnaa wa,
bɛ̀ n liere kooro kɔ wa,
14ka bɛ-n kəni,
n tá re yii-nyɛɛ yii
Dɛnaa Lawa barka nɛ.
Ma á re toɛ n dii gána lɛ a
kelen mìi ni.
Ma á re toɛ n là yɛ n digolo
Zakɔba a tán kɛ ganaa má kɔ la.
Hiĩ, Dɛnaa Lawa na á pɛ miɛ̃.
Currently Selected:
Iza 58: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
