Iza 54
54
Dɛnaa Lawa Zeruzalɛmu toa walan wa
1 #
Gal 4.27
Zeruzalɛmu, n nyɛnyɛɛ,
nsɛ mɛn bɛ́ nɛ goã n lon wa!
Nsɛ mɛn bɛ́ n ba nɛ yɛ lɛ doɛ̃ wa,
gɔ̀lɔ̀baa ǹ lɛ-dɛ wɔ,
n foo kɔɔ̃nbaa ǹ lɛ-dɛ wɔ!
Dɛnaa Lawa n pii n ni:
Nsɛ mɛn bɛ́ ǹ nə́ n la bɔ n ganaa,
n tá re nɛ gigiã yii
a la lɔ mɛn din bɛ́ ǹ zuũ ná a tan.
2N zìã lɛ bɔ, n màn da
a golebaa li.
N nyan ga n wɔrɔ ziziɛ̃ ganaa wa.
Màn da n zìã lɛ a biɛn sasabaa li,
n na a kiɛn dere tán ǹ paraa.
3A giala, n tá re n lɛ boe la
paǹ yii li.
N nɛgiĩn tá re n miãkɛnɛn
gánan sii,
ǹ nə n kɔ lɛ.
Ǹ tá re wusii ǹ giã kiwi
gɔ́ɔ̃ kooraan kɛn nɛ.
4N nyan nyɛ́ɛ baa wa.
Sìi á re n kuĩ doo wa.
N yiri nyan nə n lɔlɔkɔn wa.
Ǹ ba re sɔ koe n ganaa doo wa.
Sìi mɛn goã n ganaa
n tenmaa waáraa,
n yiri á re boe ka bɛ nɛ.
N yiri á re boe ka sɔn kɛn nɛ
ǹ nə́ goã kiɛ n la bɛ̀ n bɛ́
giɔɔrɔ lɛa.
5A giala, min mɛn nə n zɛnaa,
a tɔ n Dɛnaa Lawa Pàãyiidɛnaa,
bɛ lɛ nə n zuũ lɛa.
Min mɛn bɛ́ n kanbiɛ,
bɛ n ka Izirayeli a Lawa
sonbore kɛ nɛ,
ǹ bɛ́ ǹ mɛn lɛ bíi mà
«tán tumaa a Lawa.»
6N foo na á goã
ziziɛ̃-n taãn-taãnɛ,
ka lɔ mɛn bɛ́ ǹ nə́ n la bɔ
a ganaa.
Sɛnɛ, Dɛnaa Lawa lɛ dia n la.
Hiĩ, n Lawa n kɛ pii n ni:
Min tá boe la sonbore
a na a tɔntɔraabaa waáraa lɔ loo?
7Má goã má n la bɔ
n ganaa biikoo boɛɛn gɔ́ɔ̃ nɛ,
sɛnɛ, ka foo basiɛ̃ nɛ,
man li ma wusoo ma n saa.
8Ma foo goã á yoo n li parasii ni.
Biikoo boɛɛn gɔ́ɔ̃ nɛ,
ma goã li ma yii mɛ n ganaa wa,
sɛnɛ, man maa foo basiɛ̃baa
nyɛɛ n nɛ
kɔn-narɛɛ gɔ́ɔ̃ nɛ, dan ná
a ba la wa.
Masɛ Dɛnaa Lawa n bɛ pii n ni,
ma din kɛ lɛ nə n si sii la
wole lɛa.
9 #
SGK 9.8-17
Man die sii zɛnɛɛ ka
Nowee a waáraa bɛ́ lɔn.
Má goã má lɛ-kɔ wɔ máa mu
á re tán bii doo wa.
A din goon ne,
man lɛ kɔ we pelo,
máa ma foo á re yui n li doo duduu wa,
máa ma a re parɛɛ n li
doo wa.
10Kelen tá boe la ǹ bìn da,
tentenen tá boe la ǹ nə n zɔ̃.
Sɛnɛ, kɔn-narɛɛ mɛn bɛ́ ma
foo ne n wɔ paǹ li,
bɛa re n bɔyɛɛ duduu wa.
Ma lɛ kɔ kɔn la mɛn wɔ ka n nɛ,
là nyantoro a paǹ li bɛa re
bìn diɛ wa.
Ma din Dɛnaa Lawa n kɛ pii n ni,
maa foo basiɛ̃ gɔ́ɔ̃ nɛ.
Dɛnaa Lawa á re wusii a Zeruzalɛmu dɔ
11 #
SNS 21.18-21
Zeruzalɛmu, nɔmaa wole,
piɛ̃ gole nə n gialaa,
min kɔn ba n foo doɛ wa.
Masɛ Dɛnaa Lawa n die wusii
ma n dɔ ka kɔlɔ nɛ,
ǹ nyaǹ nə koe ne.
Man die n goã daɛ
ka kɔlɔ giɔ̀mɔ kakaan nɛ,
bɔlɔn lɛa.
12N kungɔn lalan nə die goɛ̃
kɔlɔ giɔ̀mɔ kakaa tã lɛa.
N kiɛnlɛn man die goɛ̃
kɔlɔ tɛ-pɛlen lɛa
ǹ nə́ la damalen ne.
Kungɔn mɛn tumaa bɛ́ kiwi
lɛ lɛnpɛnɛ,
a yii n die n doe ka kɔlɔ
giɔ̀mɔ kakaa nɛ.
13 #
Zaã 6.45
Masɛ Dɛnaa Lawa á re
n nɛnyaanan tumaa darɛɛ.
Ǹ tá re goɛ̃ yii-nyɛɛ gole gɔ́ɔ̃ nɛ.
14Peperebaa n die pàã koe n la.
Giã tìãlɛa mɛnaa ma la ganaa,
nyɛ́ɛ ba re n kuĩ doo wa.
N wɔlɔ sɔsɔɔ kɔ nyɛ́ɛ ganaa,
a ba re n mɔrɛ n ganaa doo wa.
15Á ke, bɛ̀ ǹ nə́ yoo n gialaa
ka zia nɛ
ma gòɛ̃ ba bɛ-n wa.
Min mɛn bɛ́ yui n gialaa,
ǹ dɛnaa á re mɛnɛɛ n nyɛɛnɛ.
16Ga, ma din ni ma fuũ zɛnaa,
asɛ mɛn bɛ́ tɛ pii
nyɔɔ fuu belenbelen ganaa,
a n ziabaa ǹ màn tɔrɔ
tumaa zɛnɛɛ.
Min mɛn dɔ bɛ́ boe la
a bɛa ziabaa ǹ mànan kɛn
lɛn ziziɛ̃,
ma din ni má a dɔ zɛnaa.
17Ziabaa ǹ màn mɛn tumaa nə
n zɛnaa n tɔ ganaa,
ǹ kɔn ba re boe la a màn kɔn zɛnaa
n ganaa wa.
Min woo min yoo n ganaa
ka kiri ni,
n tá re a siɛ̃n nyɛɛ nɛ.
Maa dí-nyalin gii bɛ́ ka màn
mɛn nɛ má koa ǹ nɛ,
ma bɛ́ peperebaa mɛn koe ǹ la,
bɛ n ka kɛ nɛ.
Masɛ Dɛnaa Lawa a da ǹ boo ne.
Currently Selected:
Iza 54: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
