Iza 45
45
Dɛnaa Lawa na á kii Siirusu bɔ á koa
1Dɛnaa Lawa n kɛ pii
kii Siirusu ni,
a ǹ mɛn lɛ bɔ á koa,
á kũ a gɔn ganaa,
á tɔrɔn kaa a pàã giulun,
màn mɛn bɛ́ toɛ a kiin pàã si ǹ la,
kiwin mɛnɛn kiɛnlɛn bɛ́ tiɛ̃ nɛ,
a bɛn bũ a nyɛɛnɛ:
2Ma dinmaa á re tɔ we n nyɛɛnɛ.
N bɛ́ boe la n nə n gòã na
màn mɛn tumaa ganaa,
ma á re bɛn tumaa woɛ̃
ma bɔ n nyɛɛnɛ.
Kiɛnlɛ-an goon mɛnɛn bɛ́ zan lɛa,
ma á re bɛn yiyiɛ.
Goo nɛn mɛnɛn bɛ́ fɔlɔ lɛa,
ma á re bɛn yɔyɔrɛ.
3Naforon mɛnɛn bɛ́ koa-n
wɔlɔ tì li
ka ǹ mɛnɛn bɛ́ durii ni,
ma á re bɛn koe n la.
Ka bɛ nɛ, n tá re doɛ̃ kəni,
mà masɛ din Dɛnaa Lawa nə
n bíi ka n tɔ nɛ,
masɛ n Izirayeli a Lawa lɛa.
4Maa dí-nyali Izirayeli kɛa lɛa,
ka Zakɔba kɛ nɛ má bɔ má koa,
má nsɛ Siirusu bíi ka n tɔ nɛ.
Má gugurubaa kɔ n la,
a da yaa dɔn dinin n ba
ma doɛ̃ wa.
5Dɛnaa Lawa n ka masɛ nɛ,
bɛ̀ á n bɔ masɛ nɛ,
Lawa kɔsɔ banban.
N tɔn ma dɔ̃ wa,
sɛnɛ, man pàã koe n la
n sii zɛnaa.
6Bɛ lɛ nɛ,
a kũ lɛ̀giala ganaa a wo
lɛ̀nyɛɛn yaa,
min tumaa á re doɛ̃,
mà màn kɔn banban á kiɛ̃
masɛ la wa.
Ma din ni Dɛnaa Lawa lɛa,
kɔsɔ banban.
7Man wɔlɔ fúlu koɛ,
ma wɔlɔ tì zɛnaa.
Man là nyantoro zɛnɛɛ,
ma koe dɔ zɛnaa.
Hiĩ, ma din Dɛnaa Lawa n
bɛ tumaa zɛnɛɛ.
8Lon, peperebaa pɛsɛ̃ ka pele
bɛ́ lɔn.
Labaran,
ka toa a gisĩ a baa si
ka la mu bɛ́ lɔn!
Tán, n lɛ bũ, kirisibaa buũ kɔ,
peperebaa gii!
Masɛ Dɛnaa Lawa n má
bɛa màn kɛ tumaa zɛnaa.
9 #
Iza 29.16; Rɔm 9.20 Min mɛn bɛ́ zia diɛ
a zɛnaali ganaa,
bɛa dɛnaa wɔ n ka bɔ̀n nɛ.
Minbuiin nɛ n ka tii donkolon
bɛ́ lɔn ǹ miãn bii.
Gì tá boe la a pɛ gì-bɔle ne
mà a n wàa zɛnɛɛ?
Mà a tàan lɛa siĩn wa?
10Min mɛn bɛ pii a díi ni:
«Wàa mɛn nɛ tɔrɔ n ke n yɛ?»
Hinlaa a n pii a náa nɛ:
«Wàa mɛn nɛ tɔrɔ n ke ń yɛ
ń da kanaa?»
Bɛa dɛnaa wɔ n ka bɔ̀n nɛ.
11Dɛnaa Lawa,
Izirayeli a Lawa sonbore n kɛ pii,
asɛ mɛn na a zaman zɛnaa:
Ka n zoɛ̃ li ka nɔ̀n da ma la
ka biɛ̃ ǹ siin ni?
Ka dí-pɛn kɔ ma la
maa nɛnyaanan wɔ paǹ li?
Hinlaa ma mànan mɛnɛn
zɛnaa ka ma gɔn nɛ
ka ǹ nɔ̀n diɛ bɛ nɛ?
12Á bǐɛ̃ kɔ!
Ma din ni má tán zɛnaa,
ka minbuiin nɛn mɛnɛn bɛ́
giã-n la.
Ma din ni má lon lɛ bɔ.
Ma din ni leeren tumaa mìi la.
13Ma din ni má giĩ lɛ da zii la,
màn mɛn bɛ́ toɛ
a peperebaa zɛnaa.
A bɛ boe la a n gòã na
màn mɛn tumaa ganaa,
ma á re bɛ yii tumaa woɛ̃
ma bɔ a nyɛɛnɛ.
A din nə die wusii a maa
kiwi Zeruzalɛmu dɔ.
Ǹ min mɛnɛn goa ǹ nə́ woo
ǹ ne bɛ̀rɛbaa ǹ bǎã nɛ,
a din nə die toɛ ǹ wusoo ǹ daa.
Ǹ ba re màn kɔn boe wa,
ǹ ba re màn kɔn sarɛɛ wa.
Dɛnaa Lawa Pàãyiidɛnaa na á pɛ.
Dɛnaa Lawa n kun ka Izirayeli a zaman nɛ
14Dɛnaa Lawa n kɛ pii:
Izirayeli,
Ezipti minin dí a là ke,
Etiopii pii-kɔlen naforo ne,
Sebaa min sɔsɔrɔn kɛn nɛ,
bɛn tumaa n die die n li,
ǹ nə n wɔ baa.
Bɛa tɔrɔn lɛn tá re koe n lɛ,
ǹ nə́ yii ni ka fɔlɔ biɛn nɛ.
Ǹ tá re n musin koɛ
tán-a n yɔrɔ-a.
Ǹ tá re pii ka ǹ we ne n yɔrɔ-a:
«Lawa nə n dinsɔɔ̃ li,
lawa kɔsɔn kɛn man màn
kooron lɛa.»
15Izirayeli a Lawa,
ma n Lawa lɛa n durii,
sɛnɛ, ma n minin kirisibiɛ.
16Min mɛnɛn bɛ́ dì nyínin zɛnɛɛ,
sìi laanka sɔ n bɛn wɔ lɛa.
Maǹ woe, ǹ mìi n zuməə ne.
17Sɛnɛ,
Dɛnaa Lawa n Izirayeli
a zaman kirisibiɛ.
A na a kirisibiɛ yǎa duduu.
Sìi á re koe ka lɛ wa
sɔ a re n koe ka-a doo wa.
Haayii, duduu wa.
Dɛnaa Lawa na á lon laanka tán zɛnaa
18Dɛnaa Lawa n kɛ pii asɛ mɛn
nə lon zɛnaa,
Lawa mɛn bɛ́ á tán zɛnaa.
A na á zɛnaa, a ná a kaka kɔ.
A bie á zɛnaa màn gɔ́ɔ̃
kooro-a lɛa wa.
A na á zɛnaa giã ǹ bǎã lɛa.
A n pii: «Ma din ni
Dɛnaa Lawa lɛa.
Kɔsɔ banban.»
19Ma boo durii da wɔlɔ tì li
tán paǹ kɔn ganaa wa.
Ma pɛ Zakɔba tɔrɔn manɛ máa
ǹ ga ma li ǹ dinin mìi gialaa wa.
Boo mɛn bɛ́ pepere,
masɛ Dɛnaa Lawa n bɛ pii,
màn mɛn bɛ́ sonbore lɛa,
man bɛ boo diɛ.
Tɔrɔ tumaa á re Lawa taãn doɛ̃
20Kasɛn mɛnɛn yii goã koo
tɔrɔn bii,
ka n sɔkɔn ka daa,
ka n zɔ̃ ka dɔ.
Min mɛnɛn bɛ́ dì nyín guĩ ǹ gɔn,
gɔn sɛlɛɛ lɛa,
ǹ nə́ ǹ guguru koe,
dìn mɛnɛn bɛ́ ǹ ba boe la
ǹ tá ǹ kirisibiɛ wa,
bɛn man yiriwɛɛnaan lɛa.
21Ka boo da,
ka yii kã siin mɛnɛn nɛ,
ka bɛn nyaa.
Ka boo nyaa kɔn nɛ.
Sii mɛn bɛ́ n zɛnɛɛ sisia,
die na á bɛ dɔ̃ haalɛ bibi
Die na á bɛ boo da haalɛ bibi
Ma din Dɛnaa Lawa bie wa?
Lawa kɔsɔ banban masɛ kio wa.
Lawa mɛn bɛ́ pepere,
a n minin kirisibiɛ,
kɔsɔ banban bɛ̀ á n bɔ ma din ni.
22Ka n bɔyaa ka da masɛ li,
kasɛn mɛnɛn bɛ́ tán lɛ dan ganaa,
ka á re kirisibiɛ.
A giala, ma din ni
Dɛnaa Lawa lɛa,
kɔsɔ banban.
23 #
Rɔm 14.11; Fili 2.10,11 Ma nə n liɛ ka maa
Lawa baa nɛ,
boo mɛn bɛ́ soe ma lɛ-n
sonbore ne,
boo lɛa a ná a ba n bɔyɛɛ wa:
Minbuiin nɛ tumaa n die kiɛ
tán ǹ musin la ma yɔrɔ-a,
ǹ nə n liɛ ǹ pɛ:
24«Peperebaa laanka pàã n yii
Dɛnaa Lawa dinsɔɔ̃ li.»
Min mɛn tumaa yɔ bɔ ma ganaa,
ǹ tá re wusii ǹ da ma li,
sìi nə ǹ ganaa.
25Min mɛn tumaa bɛ́ Izirayeli
tɔrɔ lɛa,
ǹ tumaa á re peperebaa yii
ma din barka nɛ,
ǹ tá re ma tɔ boe.
Currently Selected:
Iza 45: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
