Iza 44
44
1Kanna kəni, n too kɔ,
maa dí-nyali Zakɔba,
Izirayeli,
nsɛ mɛn bɛ́ má n yii gɔgɔɔ̃.
2Dɛnaa Lawa n kɛ pii n ni,
asɛ mɛn nə n zɛnaa,
á n da n dan gɔ́ɔ̃ nɛ,
asɛ mɛn bɛ́ die n gú ganaa:
Nyɛ́ɛ nyan nə n kũ wa,
Zakɔba a zaman,
nsɛ Yesurumu ke má n yii gɔgɔɔ̃#44.2 Zakɔba tɔ lɛ giala mà minin yiri siɛ̃ wole. Yesurumu sɛ giala mà min pepere..
3Taãn nɛ, mu boro bɛ́
tán mɛn ganaa,
ma á re toɛ mu baa si bɛ la,
tà baa si tán gere la.
Ma á re ma yiri gisĩ n
nɛnyaanan la,
ma barka da n nɔ̀ɔ fulupaa ganaa.
4Ǹ tá re yii, ǹ gole kɔ,
ka wuru gɔ́ɔ̃ nɛ ǹ buu bɛ́ lɔn,
ka da bɛ́ lɔn, mu lɛkoro lɛ-a.
5Goon tá re pii:
"Dɛnaa Lawa wɔ n ka ma nɛ";
kɔsɔ á re n din tɔ koe "Zakɔba";
kɔsɔ á re kiɛ̃ a gɔn ganaa:
"Man Dɛnaa Lawa wɔ lɛa",
á re n din tɔ koe Izirayeli.
Lawa goon toto na a tan
6Dɛnaa Lawa, Izirayeli a kii,
Izirayeli a si sii la wole,
Dɛnaa Lawa Pàãyiidɛnaa n kɛ pii:
Ma din nə sii tumaa a giala-kɔ lɛa,
ma din ni sii tumaa
a giala-nyɔmɔɔ lɛa.
Bɛ̀ á n bɔ ma din ni,
Lawa kɔsɔ banban.
7Die n ka masɛ bɛ́ lɔn?
A kiɛ̃ a boo saa,
siin mɛnɛn bɛ́ re n zɛnɛɛ,
a bɛn nyaa, a ǹ yɔrɔ pɛ!
A saa maa minbuiin nɛ
bibinaa zɛnaa ganaa,
sii mɛn nə n zɛnaa, a bɛ pɛ!
8Kasɛn maa zaman,
nyɛ́ɛ nyan ka kũ wa.
Ka gɔ̀nɔn nyan bìn da wa.
Má a boo da ka nɛ, má pɛ ka nɛ
a biikoo ná a kànaa wa.
Ka ǹ maa siéren lɛa.
Lawa kɔsɔ tan masɛ kio?
Haayii!
Ma din ni kaa gɛ̀fu kaka lɛa.
Ma a kɔsɔ doɛ̃ wa.
Dìn ba màn kɔn lɛa wa
9Min mɛnɛn bɛ́ dì nyínin zɛnɛɛ,
ǹ ba màn kɔn lɛa wa.
Ǹ màn nyín siĩnin kɛn dɔn
là banban.
Bɛa nyínin kɛn lɛn manɛ
ǹ dinin siéren lɛa.
Siéren manɛ,
ǹ yii na a màn kɔn yii wa,
ǹ nə́ ǹ ba sii kɔn doɛ̃ wa.
Maǹ sìi diɛ ǹ ganaa.
10Là ba dì zɛnaa ganaa
ka màn nyín zɛnaa-n wa.
Bɛ a die ka màn kɔn nɛ wa.
11Á ke,
min mɛnɛn bɛ́ n parɛɛ bɛ ganaa,
bɛn wɔ n ka sìi ni.
Ǹ zɛnaa wolen man minbuiin
nɛn lɛa!
Ǹ tumaa nə n sɔkɔn, ǹ daa,
nyɛ́ɛ nə ǹ kuĩ, sìi nə n kɔ ǹ lɛ!
12Fuũ n kán lɛ boe tɛ nàn nɛ.
A n dii ka yele ne ka
a wù bii ǹ pàã nɛ.
Sɛnɛ, bɛ̀ bòo tá a ganaa,
pàã ba a lon doo wa.
Yǎa a mu boɛɛn mii a tɔn pàã yii.
13Da-sɛlɛli n biɛ diɛ gɔn li, a zɔɔ̃,
a dì nyín zɛnaa la ka ton fu ni.
A n gɔn lɛ kuri ka sɛ̀miɛ̃ nɛ,
a n zɔnɛ ka kàka nɛ.
A n giɛ minbuiin nɛ ganaa,
min siĩn-siĩni,
a na a kɔnboe zɛnaa.
Bɛa nyín kɛ lɛ n woe n koɛ kion.
14A na á *sɛdrə da kuru,
á siprɛsi da laanka sɛ́ni da kuru
á bɔ ǹ nɛ daã gòã li.
A na á pɛ̃n da zumu,
la mu n diɛ gole kɔ ganaa.
15Maǹ tɛ koɛ ka bɛa gɔn lɛ nɛ,
ǹ nə n gɔ̀nɔn wɔ̃ a ganaa,
hinlaa ǹ màn-bii zɛnaa nɛ,
hinlaa ǹ dì kooro nyín zɛnaa nɛ
ǹ na a nyankɔ,
hinlaa, ǹ dì nyín zɛnaa nɛ,
ǹ kaa tán a yɔrɔ-a
ǹ na a guguru kɔ.
16A n gɔn lɛ a talɛɛ siɛ,
a tɛ koa nɛ.
A n siĩ tiɛ̃ nɛ a sɔ̃, a bòo nya.
Hinlaa, a nə n gɔ̀nɔn wɛɛ̃
a ganaa,
bɛ̀ á n pii:
«Gɔn kɛa kuĩ dɛ,
a tɛbaa miã banban!»
17Gɔn lɛ a gialakun ke,
a n dì zɛnɛɛ nɛ, màn nyin lɛa.
A kaa tán a yɔrɔ-a
a na a guguru kɔ,
a ná a nyankoe kɛnɛn:
«Ma n maa lawa lɛa,
ma kirisibaa!»
18Bɛa minin kɛn ba màn kɔn doɛ̃ wa.
Ǹ ba sii kɔn giala miɛ wa.
A giala, ǹ yii na á tã màn mɛn
bɛ́ toɛ ǹ baran wɔlɔ yɛ wa,
ǹ yiri na á tã màn mɛn
bɛ́ toɛ ǹ baran boo giala ma wa.
19Min kɔn ba n taasɛ,
a bɔ a din ni,
min kɔn ba yiri yii ka sii-doɛ̃ nɛ
a pɛ:
«Má tɛ koa ka gɔn lɛ a talɛɛ nɛ,
má màn-bii zɛnaa a tɛ nàn la,
má siĩ tã la má sɔ̃.
Ma á re màn nyín bɔbɔnɛɛ zɛnɛɛ
ká a gialakun kɛ-n doo?
Ma a re kiɛ tán gɔn lɛkoro
yɔrɔ-a wa!»
20Màn mɛn bɛ́ ton lɛa,
minin kɛn manə n parɛɛ
bɛ ganaa.
Maǹ sã gɔ́ɔ̃ nɛ,
ǹ ba taasiɛ sonbore we wa.
Ǹ ba re kanbiɛ wa.
Ǹ kɔn ba re pii:
«Màn ke ma gɔn,
Lawa taãn bie wa.»
Dɛnaa Lawa n Izirayeli kirisibiɛ
21«Nsɛ Zakɔba n yiri kɔ ka kɛ nɛ,
nsɛ Izirayeli, a giala ma n
maa dí-nyali lɛa.
Man má n zɛnaa máa n maa
dí nya.
Izirayeli, ma yiri a boe n ne wa.
22Má n sãn kɛn tuturu
ka labara bɛ́ lɔn.
Má n sii baraan kɛn loo
ka furuməə bɛ́ lɔn.
Wusoo n da ma li,
ma nə n si sii la wole lɛa.»
23Nsɛ, lon, loe lɔ ka foo kɔɔ̃n nɛ.
Nsɛ, tán giulun, n lɛn saa lon,
a giala,
Dɛnaa Lawa na á sii zɛnaa.
Kasɛn kelen laanka dan kɛn
nɛ daã nɛ,
ka n lɛ dɛ ka foo kɔɔ̃n nɛ.
A giala,
Dɛnaa Lawa ná
a zaman kirisibaa,
a ná a tɔ golebaa nyaa
Izirayeli gána nɛ.
24Dɛnaa Lawa n kɛ pii n ni,
asɛ mɛn bɛ́ n si sii la wole lɛa,
asɛ mɛn nə n zɛnaa n dan gɔ́ɔ̃ nɛ:
Ma din ni Dɛnaa Lawa lɛa.
Màn mɛn tumaa bɛ́ á tan,
ma din ni má ǹ zɛnaa.
Ma dinsɔɔ̃ n má lon lɛ bɔ,
má kanaa nyɔmaa,
min kɔn goɛ̃ yɛ a-n wa.
25 #
Kor1 1.20
Kanna kəni,
man wɔ-kulin sii nyaan
kɛn sàabiɛ;
min mɛnɛn bɛ́ biɛ̃ ǹ pii,
man boo kooro we bɛn lɛ-n.
Man sii-dɔ̃li lɛ tiɛ̃,
ma ǹ doɛ̃ lɛ bɔyaa
ma baa yiriwɛɛnaabaa lɛa.
26Sɛnɛ,
man toɛ maa dí-nyalin
boon nə yɔrɔ yɛ.
Maa dia dí-a wolen nə boo
mɛn da,
man toɛ bɛ yɔrɔ yɛ.
Man kɛ pii Zeruzalɛmu a paǹ li:
«Ǹ tá re wusii ǹ giã n nɛ doo.»
Man kɛ pii Zudaa kiwin wɔ
paǹ li:
«Ǹ tá re wusii ǹ ka dɔ.»
Hiĩ, ǹ tá re wusii ǹ kaa
kɛbɔlɔn dɔ doo.
27Man pii mu zuzulu ni:
«Piɛ̃ ka daɛ̃.
Ma á re n mu diɛ piɛ̃ ganaa»
28 #
KZS2 36.23; Ɛsid 1.2 Man kɛ pii kii Siirusu a paǹ li:
«Maa zaman-lɛduə̃li ni.»
Sii mɛn tumaa bɛ́ kɔɔ̃n ma ganaa,
a n bɛ zɛnɛɛ.
Á re pii
mà ǹ wusoo ǹ Zeruzalɛmu kiwi dɔ,
ǹ wusoo ǹ Lawa a kion lɛ dɔ.
Currently Selected:
Iza 44: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
