Iza 43
43
1Kanna kəni Zakɔba,
Dɛnaa Lawa n kɛ pii n ni,
asɛ mɛn nə n zɛnaa,
á n da kanaa, Izirayeli:
N nyan nyɛ́ɛ baa wa,
A giala,
n si sii la wole n ka ma din ni.
Má n bíi ka n tɔ nɛ,
Ma n ma din wɔ lɛa.
2Ta ma n mu zuzulu kuri,
ma tá kunun n ni.
Ta ma n tà kuri,
mu á re n kuĩ wa.
Ta ma n tɔ we tɛ bii,
a re n kuĩ wa.
Tɛ buə̃ lɛwɔn ba re miɛ n-a wa.
3A giala,
masɛ Dɛnaa Lawa nə n Lawa lɛa.
Ma din Izirayeli a Lawa
sonbore nə n kirisibaali lɛa.
Má Ezipti kɔ n nyin giɔ̀mɔ lɛa,
má Etiopii laanka Sabaa kɔ
n dòo lɛa.
4Taãn nɛ, n sii n kaka ma gɔn.
Ma n màn sonbore lɛa,
ma tá n narɛ.
Bɛ lɛ nɛ man minin koe n bǎã nɛ,
ma á n nyin lon koe ka tɔrɔn nɛ.
5Nyɛ́ɛ nyan nə n kũ wa,
ma á kunun n ni.
Ma á re boe ka n nɛnyaanan nɛ
lɛ̀giala-n ma da ǹ nɛ,
ma á re boe ǹ ne lɛ̀nyɛɛnɛ
ma ǹ sɔkɔn.
6Má pɛ gɔsɛ a lɛ̀gɔn nɛ:
«Ǹ toa walan!»
Má pɛ gusin a lɛ̀gɔn nɛ:
«N nyan bìn da ǹ ganaa wa!»
Ka maa nɛgiĩn kɛn kũ gána
sɔsɔɔn kɛn nɛ,
ka da ǹ nɛ,
ka maa nɛlɔn kɛn kũ kanaa lɛ
dan ganaa
ka da ǹ nɛ.
7Ma tɔ bɛ́ min mɛnɛn
tumaa ganaa,
ma ǹ mɛnɛn tumaa da,
má nyin kɔ ǹ la,
ma ǹ mɛnɛn zɛnaa,
ka wusoo ka da ǹ nɛ,
ǹ gugurubaa da ma tɔ la.
Lawa kɔsɔ banban Dɛnaa Lawa kio wa
8Ka tɔrɔ yii tere-a kɛ kũ,
ka soo ne.
A yiin tan, sɛnɛ, ǹ ba wɔlɔ yii wa.
A toon tan, sɛnɛ ǹ ba boo miɛ wa.
9Zaman tumaa nə n lɛ sɔkɔn!
Tɔrɔn tumaa nə n lɛ sɔkɔn!
Sii mɛn bɛ́ n zɛnɛɛ,
die n boe la a yɛ ǹ bii,
a bɛ pɛ?
Sii mɛn nə n zɛnaa lɛlɛ á kiɛ̃,
die n boe la a bɛ pɛ wɔ nɛ?
Bɛ̀ ǹ tá li ǹ nyaa mà sonbore
tá ǹ lon,
ǹ da ka ǹ siéren ne!
Sieren lɛn nə pɛ mà «Taãn nɛ!»
10«Maa siéren man ka ka dinin ni.
Kasɛn nɛ,
ka maa dí-nyali kɛ nɛ má bɔ.
Màn mɛn bɛ́ toɛ,
ka golee masɛ li,
ka dɔ̃, ka a giala ma,
mà masɛ din nə Lawa lɛa.
Lawa kɔsɔ goã ma nyɛɛn wa.
Kɔsɔ dɔ a re yii ma kio wa.
Dɛnaa Lawa a da ǹ boo ne.
11Ma din,
ma dinsɔɔ̃ n Dɛnaa Lawa lɛa.
Bɛ̀ á n bɔ masɛ nɛ,
kirisibaali kɔsɔ banban.
12Ma din ni má kirisibaa boo da,
ma din ni má daa nɛ.
Ma din ni má nyaa,
lawa soree bie wa.
Kasɛn man maa siéren lɛa,
masɛ n Lawa lɛa.
Dɛnaa Lawa a da ǹ boo ne.
13Man ma tan Lawa lɛa duduu,
Min kɔn ba boe la a min si
ma gɔn wa.
Bɛ̀ má sii mɛn zɛnaa,
min kɔn ba boe la a bɔyaa wa.»
Baabilonii a boo gii
14Dɛnaa Lawa, kaa si sii la wole,
Izirayeli a Lawa sonbore n kɛ pii:
«Ka dinin taman yii,
man die min diɛ *Baabilonii.
Kiɛnlɛ-a ǹ goon mɛnɛn bɛ́ kiwi
lɛ tamɛɛ,
man die bɛn woɛ̃.
Baabilonii minin li,
foo kɔɔ̃n lɛ-dɛ á re n bɔyɛɛ
a gɛ̀ loe baa.
15Ma din ni Dɛnaa Lawa lɛa,
kaa Lawa sonbore lɛa,
Izirayeli a diɛ wole lɛa,
kaa kii lɛa.»
Zii soree diə gole ne
16Dɛnaa Lawa n kɛ pii
asɛ mɛn bɛ́ á zii bɔ yìsi mu la,
á zii bɔ á mu pàã gole kɛ
wɔsɔ kɔn nɛ.
17Á soo ziabaa ǹ wotoron
laanka sùin ni a nɛ,
ka sɔraasin ni ka ziabaali
zanbian nɛ.
Ǹ nə́ mɛnaa, ǹ yoo duduu wa.
Ǹ nə́ nimi, ka bolon tɛ bɛ́ lɔn.
18Sisia kəni, Dɛnaa Lawa n pii:
Ka nyan nə n yiri kɔ ka lɛlɛ ǹ
siin kɛn nɛ wa.
Sii mɛn bɛ́ á n zɛnaa lɛlɛ,
ka nyan nə n taasɛ ka bɛ-n wa.
19A giala á ke,
man die sii soree zɛnɛɛ,
a n gole koe goon lɛa.
Ka yii tá a ganaa ya?
Sonbore, man die zii boe diə ne,
ma mu da baa si ganaa
bɛa bǎã gere kɛ lɛ nɛ.
20Don siĩn ni,
tolokan nɛ ka bɛndan nɛ,
bɛn tá re gugurubaa diɛ ma tɔ la,
a giala mà ma mu da
baa si ganaa diə gole ne,
ma tàn bɔ tán gere la.
Sonbore,
ma á re mu koe maa tɔrɔ kɛ la,
má a yii gɔgɔɔ̃.
21Ma tɔrɔ mɛn lɛ yii gɔgɔɔ̃
maa wɔ lɛa,
bɛ á re ma tɔ boe.
Dɛnaa Lawa laanka a zaman a kiri wɔ
22Dɛnaa Lawa pɛ:
Zakɔba, n lɛ dia ma la wa.
Izirayeli, ma nə n nɔmaa
ka ma nɛ.
23A da yaa n bie n goã
tɔɔ bisin koe masɛ la
*wúlu màn tiɛ̃ lɛa wa.
N masɛ guguru kɔ
ka wúlu mànan nɛ wa.
Ma n baa bɛ̀rɛ lɛa má gɔn màn
liɛ n la wa.
Ma n nɔmaa má màn gìĩ kɔɔ̃n
sii n la wa.
24Masɛ a lɛa bie, ń wɔrɔ ziziɛ̃
ń da yon gìĩ kɔɔ̃n pii wa.
N ma kã ka n wúlu màn
siĩ nyɔɔn-an kɛn nɛ wa.
Sɛnɛ, n sãn taman yii,
ń ma baa bɛ̀rɛ lɛa.
Ń ma nɔmaa ka n sii baraan nɛ.
25Ma bɛ́ màn mɛn lɛa,
bɛ lɛ taman yii,
ma dinsɔɔ̃ nə n sii baraan
toɛ n nɛ,
ma a re n yiri koɛ ǹ nɛ doo wa.
26N bɛ́ zɛ̀rɛ koɛ ma ganaa ka
sii mɛn nɛ,
ma yiri gisĩ bɛ nɛ.
Wɔ n ta kiri wɔ ǹ bǎã-n kun,
siin mɛnɛn bɛ́ sonbore koe n la,
kɔ ǹ lɛ n nə ǹ pɛ.
27N digolo bibinaa
sii baraa zɛnaa,
n boo gii-dalin nə́ n gòãn dii
ma ganaa.
28Bɛ lɛ nɛ,
má bǎã sonbore kɛa kiãn nɔɔ
má ǹ kaa,
má Zakɔba tɔrɔ lɛ wɔ
a ziziɛ̃ wolen gɔn,
má Izirayeli toa a sɔ kaa
ma la wolen gɔn.
Currently Selected:
Iza 43: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
