Iza 33
33
Zɔ́ɔn wɔ n ka bɔ̀n nɛ
1Nsɛ mɛn bɛ́ basaã koe,
n wɔ n ka bɔ̀n nɛ,
nsɛ mɛn bɛ́ basaã tɔn nə n yɛ wa,
nsɛ mɛn bɛ́ minin yiri siɛ̃ ǹ nə́
ǹ tɔn nə nsɛ yiri sã wa!
Bɛ̀ n basaã kɔ n nya
ǹ mɛn waáraa,
ǹ tá re basaã koe n ne.
Bɛ̀ n minin yiri sã n nya
biikoo mɛn li,
ǹ tá re n dɔ yiri siɛ̃.
2Dɛnaa Lawa,
makara bɔ wɔ ganaa!
Wɔ foo n doa nɛ n din ganaa.
Baraabaraa baayɛlɛ,
goã wɔ pàã lɛa,
n wɔ kirisibaa koe pinaa.
3Bɛ̀ tɔrɔn nə́ n lɛ ma,
maǹ baa sii.
Bɛ̀ n yoo n golee lon,
maǹ pɛsɛ̃ paǹ yii li.
4Maǹ ka gɔn màn goɛ ka bisin
bɛ́ màn goɛ lɔn,
Maǹ tele ka ganaa ka bisin
kuru bɛ́ lɔn.
5Dɛnaa Lawa a golebaa
miã banban.
A giala, a n màn tumaa mìi la.
Á *Siɔn pã ka a peperebaa
laanka a sonborebaa nɛ.
6A n die goɛ̃ ǹ yii-nyɛɛ lɛa
yǎa duduu.
A din ni minin kirisibiɛ,
a n yiridɛnaa lɛa,
a n sii tumaa doɛ̃.
Nyɛ́ɛ baa Dɛnaa Lawa yii-n
nə
naforo lɛa.
Dɛnaa Lawa a sii zɛnaa
7Zeruzalɛmu minin nə́ ke n lɛ
dii ziin la.
Là nyantoro boo-dalin man
wusii die ka wuu-n kɔsɛkɔsɛ.
8Ziin la ǹ kooromaa nɛ.
Min kɔn ba kiɛ̃ ǹ la wa.
Lɛ kɔ kɔn la sàabaa,
ǹ nə́ siéren kaa,
ǹ ba min kɔn guguru koe wa.
9Gána lɛ n gɛ̀ koa gɔ́ɔ̃ nɛ.
A n bǎã gere lɛa.
Sìi nə n kɔ Liban a kelen kɛn lɛ.
Ǹ tumaa n laa nɛ.
Saarɔn a wuru bǎãn kɛn man
ka diə gole bɛ́ lɔn.
Da ba Basan laanka Karmɛli kelen kɛn la wa.
10Dɛnaa Lawa pɛ:
«Kanna, man die sii zɛnɛɛ.
Kanna, man die yui,
ma maa golebaa nyaa.
11Ka bɛ siin mɛnɛn yɔrɔ boe,
bɛn man ka buu gere bɛ́ lɔn.
Ta ǹ nə́ yɔrɔ bɔ,
maǹ ka làpaa bɛ́ lɔn.
Ka dinin foo-yoo n die
ka bɔ̀n biɛ ka tɛ bɛ́ lɔn.
12Tɛ á re tɔrɔ gialakunun kɛn kuĩ,
ka laso bɛ́ lɔn.
Ǹ tá re ǹ zuĩ tɛ-n ka nyan da
gùrù bɛ́ lɔn.
13Wɔlɔ sɔsɔɔdɛnan lɛn,
ma sii mɛn zɛnaa,
ka n too kɔ bɛ li.
Wɔlɔ kunudɛnan lɛn,
ka maa boo sii la dɔ̃.»
14Siɔn kiwi,
nyɛ́ɛ n zɛ̀rɛdɛnan ganaa.
Min baraan gɔ̀nɔn nə bìn diɛ.
Maǹ nɔ̀n diɛ:
«Wɔ bii, die n boe la
a n mɔrɔ tɛ baraa kɛ ganaa,
hinlaa a diri tɛ girigiri kɛ la,
a ná a nimi duduu wa?»
15Min mɛn bɛ́ sii sonbore zɛnɛɛ,
a n peperebaa boo diɛ,
bɛa dɛnaa a lɛ koe kakaarɛbaa
ǹ màn ganaa wa,
a nə n dɔ̀ɔ̃ we lɛ pii wolen manɛ,
bɛ̀ ǹ tá gɛ̀ dɛ boo diɛ,
a nə n too tiɛ̃.
A nə n yii tiɛ̃ màn mɛn bɛ́ toɛ,
a yii nyan sii baraa yɛ wa.
16Bɛa dɛnaa lɛ n die goɛ̃ yii-nyɛɛ la kelen mìi ni.
A duru ǹ bǎã n die goɛ̃
ka para yala nɛ.
Á re màn-bii yii,
mu á re nyaabiɛ a ganaa wa.
Zeruzalɛmu á re foo doa ǹ bǎã biɛ
17N tá re kii lɛ a siĩnbaa
tumaa yii,
n gána lɛ a golebaa tumaa yɛ.
18Siin mɛnɛn nə goã nyɛ́ɛ diɛ
n ganaa,
n tá re n taasɛ ka bɛn nɛ,
n nɔ̀n da n din la:
«Min mɛnɛn nə goã
nyin giɔ̀mɔ sii,
bɛ̀ ǹ nimi,
maǹ maa?
Min mɛnɛn nə goã giɛ wɔ
tamaa ǹ kungɔnɔn kɛn walan,
bɛn maǹ maa?»
19N yii a re miɛ tɔrɔ din
gole-kɔle kɛ ganaa doo wa,
ke bɔlɔ gɔgɔrɛ pii, min kɔn ná
a miɛ wa.
20Siɔn, ga wɔa zɔ́n zɛnaa ǹ
kiwi kɛ ganaa!
n tá re Zeruzalɛmu yii,
a n die goɛ̃ foo doa ǹ bǎã lɛa
n wɔ lɛa,
ka zìã á ke lɔn, bǎã goon ne.
Ǹ ba re a dere ǹ kiɛn kɛn
woɛ̃ doo wa,
ǹ ba re a biɛn fore wa.
21Dɛnaa Lawa n die a siĩnbaa
nyɛɛ wɔ-n walan lɛn,
bɛa bǎã lɛ n die kɔ̀ dadaran,
laanka mu zii dadaran bǎã biɛ.
Ziabaa ǹ mu la ǹ goo ba re
boe walan wa,
mu la ǹ goo dadaran ba re
kiɛ̃ a-n wa.
22Dɛnaa Lawa n wɔ nyɛɛnaan-bɔle lɛa.
A din nə wɔa kiri-kuruli lɛa.
Dɛnaa Lawa n wɔa kii lɛa.
A din nə wɔ kirisibiɛ.
23Zɔ́ɔn biɛn kɛn paraamaa bie wa.
Mu la ǹ goo a bàbàla gole ke
a bii ni,
ǹ ba boe la ǹ bɛ kũ ǹ golee-n wa.
Bɛ lɛ taman yii,
naforo gigiã á re n gii.
Bɔlɔkan dinin tá re die
a kokoo ǹ bǎã nɛ.
24Zeruzalɛmu kiwi,
min kɔn ba re pii
mà asɛ a lon wa.
Zaman mɛn bɛ́ giã-n walan,
ǹ tá re a sii baraan toɛ nɛ.
Currently Selected:
Iza 33: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
