Iza 34
34
Edɔmu a kiri wɔma-a
1Tɔrɔn lɛn,
ka n mɔrɔ ka n too kɔ.
Zaman, ka n too kɔ sɔnbɔraanɛ!
Tán laanka a gɔ́ɔ̃gɔ́ɔ̃ ǹ mànan,
ka n too kɔ!
Kanaa laanka màn mɛn tumaa
bɛ́ boe a nɛ,
ka n too kɔ!
2Dɛnaa Lawa foo n yoo-n
tɔrɔn tumaa li.
A foo n yoo ne ǹ zia kurun
tumaa li.
A n li a ǹ tumaa bɔ̀n baa
ka lenlen.
A n woe ǹ ne bɔlɔ kuru ǹ bǎã nɛ.
3Ǹ geren man tán bǎã yii ni,
ǹ gìĩ n boe bǎã yii ni.
Ǹ mà n baa sii kelen la ka mu
zii bɛ́ lɔn.
4 #
Mat 24.29; Mar 13.25; Luk 21.26; SNS 6.13,14 Leere kurun kɛn man pɔpɔsɛ kiɛ.
Lon nə n muni ka sɛ́wɔ bɛ́ lɔn.
Lon màn tɛ-pɛle dadaran kɛn
man mɛnɛɛ,
ka luu gere bɛ́ boe lon mɛnɛɛ lɔn
hinlaa ka da nɛ mərə bɛ́
niɛ̃ mɛnɛɛ lɔn.
5 #
Iza 63.1-6; Zer 49.7-22; Eze 25.12-14; 35.1-15; Amɔ 1.11-12; Abd 1-14; Mal 1.2-5 Dɛnaa Lawa a gɔya sa á ke
yii lon.
Á ke gisĩ Edɔmu minin la,
a tɔrɔ mɛn lɛ bɔ á koa ziziɛ̃
taman yii.
6Dɛnaa Lawa a gɔya sa n mà lɛa,
a n nyɔɔ lɛa,
sère ten laanka butumun mà lɛa,
sère gɔ̀lɔ̀ dɔ̀ɔ̃ koron nyɔɔ lɛa.
Bosraa kiwi gole kɛ nɛ,
Dɛnaa Lawa *wúlu màn yɔrɔ bɔ:
Basaã gole-n Edɔmu gána wɔ lɛa.
7Zùn tá re mɛnɛɛ kunun ǹ ni,
dii gɔ̀lɔ̀n laanka diin nə
mɛnaa kun.
Mà á re baa sii tán,
siĩ nyɔɔ tán si á n kɔ lɛ.
8A giala Dɛnaa Lawa a dɔlɔ
bɔ pinaa nɛ
Edɔmu minin ganaa.
*Siɔn a zia gii-dale a gɛ̀ dòo bɔ
ǹ lɛ̀ nɛ.
9Edɔmu a tà gòãn kɛn
tá re gudɔrɔn tà biɛ.
A tán kooro kɛ n die n bɔyɛɛ
a kiribi tɛdɛnaa baa.
Gána lɛ n die n biɛ
ka gudɔrɔn bɛ́ lɔn,
tɛ yoo a ganaa,
10 #
SNS 14.11; 19.3 penleen laanka tèlò ne a re
nimi wa.
A n die goɛ̃ ka tɛmaa bɛ́ lɔn
dii lon duduu.
Bɛa gána lɛ n die diə gole biɛ
yǎa duduu.
Min kɔn ba re boe walan doo wa.
11Kɔlɔn laanka bàanan tá re
giɛ̃ a nɛ.
Á re kɔlɔ kuunun laanka
zankoon giã ǹ bǎã biɛ.
Dɛnaa Lawa á re gána lɛ bɔ̀n biɛ.
A n die goɛ̃ ka wɔlɔ kooro á ke
á goã lɔn,
bɛ̀ tán ná a tɔn nə n zɛnaa wa.
12Min golen ba re yii
ǹ kii bɔ ǹ koa wa.
Kiãn tumaa á re papaɛ̃.
13Nyan tewonən tá re piɛ̃
kion sonboren ne.
Buu nyandɛnan laanka
koronkoron tá re n koe
ǹ kiwi tamaa ǹ kungɔnɔn lɛ.
Á re tolokan laanka bɛndan giã
ǹ bǎã biɛ.
14Don nɔ̀ɔnɔn laanka kuruun
tá re n diɛ kɔn lɛ walan.
Don butumun tá re woe
kɔn yiɛ walan.
Màn nyín#34.14 Baabilonii minin man taasɛ mà nɔ̀ɔn baraa mɛn bɛ́ n biĩ tèlò-n a tɔ n Liliti mà bɛ nɛ. mɛn bɛ́ n bibiĩ tèlò-n,
a n die bɛa giã ǹ bǎã biɛ ka
a susu ǹ bǎã nɛ.
15Kɔlɔn tá re kii doe walan,
ǹ gii da, ǹ waa la, ǹ nɛn bɔ.
Zèwon dɔn tá re n lɛ
soekɔn walan.
16Bɛ̀ ka n yii kɔ Dɛnaa Lawa
a sɛ́wɔ kɛ nɛ,
ka á re kɛa boon kɛn yii kiɛ̃ nɛ:
Bɛa tɔɔn kɛn lɛn goon din fɔ̃
daa li wa.
Ǹ tumaa daa sà laanka dan.
A giala Dɛnaa Lawa din na
á bɛa dí-pɛ kɔ ǹ la.
A din yiri na á ǹ sɔkɔn.
17A na á n pã ǹ gogoonmaa
gii ganaa.
Á biɛ saa, á didie a tán gii zɔ́ɔ̃.
Bɛ lɛ n die ǹ wɔ biɛ yǎa duduu.
A n die ǹ giã ǹ bǎã biɛ.
Currently Selected:
Iza 34: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
