Iza 29
29
Boo, Zeruzalɛmu wɔ lɛa
1Dɛnaa Lawa pɛ:
Ebe, Zeruzalɛmu, Zeruzalɛmu,
maa *wúlu bɔ ǹ bǎã bɛ́ kiwi
mɛn lɛ nɛ
kii Davida daa giã a nɛ.
N tá boe la n nə n zɔ́nɔn
kɛn tumaa zɛnaa lɛ̀ woo lɛ̀.
2Sɛnɛ, man die
n ziziɛ̃ Zeruzalɛmu.
N tá re gungunun sii,
n yii mu pã a kaa,
sɛnɛ ma n die goɛ̃ masɛ wɔ lɛa.
3Ma á re maa giã ǹ bǎã doe
ma n lɛnpɛnɛ nɛ.
Ma á re yui n gialaa ka ziabaa
ǹ sanabolon ne.
Ma á re yui n gialaa ka ziabaa
ǹ mànan nɛ.
4N tá re mɛnɛɛ,
n lɛn nə die goɛ̃ ka a n
boe nyankɔrɔ zuzulu ni.
Gusuũ a re toɛ n lɛn ma wa.
A n ka a n boe tán giulun,
ka nyín-biili lɛn bɛ́ lɔn,
boo diɛ gusuũ li.
5N zɔ́ɔ damatan kɛn tá re n biɛ
ka gusuũ bɛ́ lɔn.
Zaman mɛn bɛ n yɔyɔrɛ,
bɛn tá re n biɛ ka làpaa bɛ́ lɔn,
piɛ̃ n goɛ.
Sɛnɛ, bǎã goon ne,
6Dɛnaa Lawa Pàãyiidɛnaa á re
sii zɛnɛɛ n wɔ a paǹ li,
ka la a ginii ni, tán a bìn diɛ nɛ,
ka bìn diɛ gole ne piɛ̃
gole giulun,
la giulun ka la a tɛ-pɛ nɛ.
7Zeruzalɛmu,
gána damata mɛn bɛ́ zia
biɛ n ganaa,
min mɛnɛn tumaa bɛ́ kungɔn
doe n ganaa
ǹ nə́ n gɛwɛɛ paǹ yii li,
bɛn tumaa á re papaɛ̃ ka narɛɛ
bɛ́ lɔn,
ka sii-yɛ bɛ́ lɔn tèlò-n.
8Min mɛn bɛ́ bòo na a ganaa,
bɛa dɛnaa nə n narɛ ka a n màn bii.
Sɛnɛ bɛ̀ a yii kaa,
a gɔ́ɔ̃ kooromaa nɛ.
Mu boro bɛ́ min mɛn ganaa,
bɛa dɛnaa nə n narɛ ka a n mu mii.
Sɛnɛ bɛ̀ a yii kaa, a n nɔmaa nɛ,
a bɔlɔ gɔ́ɔ̃ n laa nɛ.
A n die n biɛ miɛ̃ gána
damatan kɛn nɛ
zia diɛ *Siɔn a kele ganaa.
Zaman ba boo kɔn giala miɛ wa
9Ka n kaãbaa, tɔwaa ka kũ!
Ka yii tere-an baa, ka goã miɛ̃!
Ka yɔdɛnan baa,
ka n ka duvɛ̃ mi dɔn wa!
Ka tatalaa,
ka n ka yɔ kakaarɛ mi wa!
10 #
Rɔm 11.8
A giala, Dɛnaa Lawa ka yiri tã,
á kaa Lawa a boo gii-dalin
sàabaa sii-yɛn ganaa,
á màn kɔ kaa gɔn-nɔɔlin yɔrɔ lɛ.
11Bɛa boon kɛn man nə́ goã ka sɛ́wɔ gɔ́ɔ̃ nɛ ǹ boo bɛ́ lɔn, ǹ ná a lɛ tã, ǹ nə́ tɔrɔ. Ǹ nə́ kɔ sɛ́wɔ-dɔ̃li la, ǹ nə́ pɛ nɛ: «Bǐɛ̃ kɔ n si n pɛ!» Sɛnɛ á ǹ lɛ si: «Ma a boe la wa. Sɛ́wɔ lɛ lɛ tiɛ̃maa nɛ.» 12Hinlaa ǹ nə́ kɔ sɛ́wɔ doɛ̃baã wole la ǹ nə́ pɛ nɛ: «Bǐɛ̃ kɔ n kɛ si n pɛ!» Sɛnɛ, á ǹ lɛ si: «Ma a sɛ́wɔ pii doɛ̃ wa.»
Dɛnaa Lawa a kaãbaa ǹ siin
13 #
Mat 15.8-9; Mar 7.6-7 Dɛnaa n kɛ pii:
«Tɔrɔ kɛ n mɔrɛ-n
ma ganaa ka a lɛ gɔ́ɔ̃ ǹ boo dinsɔɔ̃ nɛ.
Maǹ ma guguru koe ka ǹ lɛ nɛ,
sɛnɛ, ǹ foo wɔlɔ á lui-n ma ganaa.
Ǹ bɛ́ gugurubaa mɛn koe ma la,
a n minbuiin nɛn daraan
boon dininsɔɔ̃nɔn lɛa.
14 #
Kor1 1.19
Bɛ lɛ nɛ, á ke,
man die kaãbaa ǹ siin zɛnɛɛ,
ma maa zaman tɔwaa nɛ.
Ta ǹ tá sii-dɔ̃lin lɛa,
ǹ ba re màn kɔn giala miɛ
ǹ nɛ wa.
Ta ǹ tá yiridɛnan lɛa,
ǹ doɛ̃ wolen ba re boe la ǹ sii
kɔn giala pɛ wa.»
15Min mɛnɛn bɛ́ sii zɛnɛɛ ka durii ni,
ǹ nə́ ǹ taasiɛn duri
Dɛnaa Lawa la,
ǹ nə́ ǹ siin yɔrɔ boe tèlò basa li,
bɔ̀n nə bɛn wɔ lɛa.
Maǹ pii:
«Die yii n wɔa sii zɛnaan ganaa,
die n wɔ doɛ̃?»
16 #
Iza 45.9; Rɔm 9.20 A da yaa ka nə n dinin yiri siɛ̃.
Min tá boe la n dɔn-bɔle zɔɔ̃
kɔn ka gì ni?
Màn zɛnaa lɛ á boe la
a pɛ a zɛnaali ni:
«Nsɛ bie n ma zɛnaa wa?»
Dɔn lɛ á boe la a pɛ gì-bɔle lɛ nɛ:
«N ba dí nyɛɛ doɛ̃ wa?»
Dɛnaa Lawa a sii bɔyaa
17Kànaa ka boɛɛnɛ,
Liban daã lɛ á re n bɔyɛɛ,
a da nɛ-kɔle wuru baa,
dù gɔrɔ lɛ dɔ á re n bɔyɛɛ a daã baa.
18Bɛa pinaa boo mɛn bɛ́
kiɛ̃-n sɛ́wɔ kɛ nɛ,
too tere-an tá re bɛ miɛ.
Yii tere-an tá re soe tèlò-n
wɔlɔ tì li,
ǹ yii n wɔlɔ yii foaã nɛ.
19Min mɛnɛn foo bɛ́ ziziɛ̃ nɛ,
bɛn tá re foo kɔɔ̃nbaa
gole yii Dɛnaa Lawa li.
Ǹ mɛnɛn tumaa bɛ́
doobaa taãn-taãnan lɛa,
bɛn tá re n nyɛnyɛɛ Izirayeli
a Lawa sonbore kɛ taman yii.
20Bɛ n die pàã-zɛnaalin pàã a
nya giala biɛ.
Din-koalin tá re papaɛ̃.
Min mɛnɛn bɛ́ zoɛ̃ li mà
ǹ sii baraa zɛnaa ǹ miãn nɛ,
21ǹ nə́ soɛ diɛ ǹ miãn la,
ǹ nə́ kan koe kiri-kuruli ni,
ǹ nə́ toɛ ǹ nə́ yii tì-a kuĩ,
bɛn wɔ n die goɛ̃ ka gɛ̀ nɛ.
22Bɛ lɛ nɛ,
Dɛnaa Lawa mɛn
Abrahamu kirisibaa,
bɛa boo á ke á diɛ Zakɔba
tɔrɔn manɛ:
«Kanna,
Zakɔba tɔrɔn foo a re ziziɛ̃
doo wa,
sìi ba re ǹ kuĩ doo wa.»
23A giala,
ma bɛ́ re sii mɛn zɛnɛɛ ǹ bii,
ǹ dinin laanka ǹ nɛnyaanan
tá re bɛ yii.
Ka bɛ-n kəni, ǹ tá re ma tɔ boe.
Ǹ tá re doɛ̃ mà Zakɔba a Lawa kɛ á sonbore,
ǹ tá re nyɛ́ɛ biɛ Izirayeli a
Lawa kɛ yii ni.
24Yiriwɛɛnaan tá re yiri yii,
boo bisin dalin tá re n too
koe doroo li.
Currently Selected:
Iza 29: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
