Iza 30
30
Ezipti gána bie dɔmalɛ ǹ bǎã taãn lɛa wa
1Dɛnaa Lawa a da ǹ boo á ke:
Nɛnyaan piã wolen lɛn,
kaa wɔ n ka koe ne.
Ka ǹ siin lɛ boe,
ǹ nə́ ǹ ba boe masɛ li wa.
Ka ǹ lɛ kɔ we,
masɛ bɛ́ ma ba ǹ mɛn li wa.
Ka ǹ sii baraan kiɛ kɔn la.
2Ká zii saa ka n woe Ezipti,
sɛnɛ, ka nɔ̀n da ma la wa.
Ka ǹ zoɛ̃ li mà Eziptin
kii *Faarahɔn ka tamaa.
Ka ǹ giɛ mìi susu ǹ bǎã li
a gána nɛ!
3Sɛnɛ, Faarahɔn a tamaa kɛ
á re foo ziziɛ̃ biɛ ka ganaa.
Ka bɛ́ giɛ mìi susu ǹ bǎã
mɛn li Ezipti gána nɛ,
bɛ á re yii puusəbaa biɛ ka ganaa.
4Kaa kiãn nə́ dɔ Soan gɔrɔ.
Kaa dia dí-a wolen nə́ dɔ
Anɛsi gɔrɔ.
5Sɛnɛ, sìi á re n koe ka lɛ.
Ezipti minin ba re boe la
ǹ dɔmalɛ kɔn wɔ ka-n wa.
Ǹ ba re bǐɛ̃ kɔn zɛnɛɛ ka-n wa,
ka a re là goon yii ǹ ganaa wa.
Maǹ die sìi dinsɔɔ̃ diɛ ka ganaa,
ǹ ka yii puusə kɔ.
6Negɛvu gána a boo gii:
Koe gána nɛ,
a foo ziziɛ̃ n gɔ̀nɔn bìn diɛ.
Yàra san nɛ ka yàra daanan nɛ,
kɔrɔkanan nɛ ka tɔɔ babaraa
piɛ̃ wolen giã ǹ bǎã nɛ.
Kaa dia dí-a wolen manə
ǹ naforon goɛ dudunun la,
ǹ nə́ ǹ gɔn mànan kiɛ
nyɔɔmaan dɔ́ɔ̃ nɛ.
Bǐɛ̃baa ǹ mànan manɛ ǹ tá woe koe Ezipti minin la,
a da yaa ǹ ba re boe sii kɔn
dɔ la ǹ zɛnaa ǹ nɛ wa.
7Taãn nɛ,
Ezipti a dɔmalɛ n piɛ̃ lɛa,
a màn kɔn lɛa wa.
Bɛ lɛ nɛ ma á pii gána kɛ nɛ:
«Ma n Rahabu lɛa,
don màn babaraa piɛ̃-wole ke,
sɛnɛ n ba bìn diɛ wa.»
Gɔn waa man, biɛ̃ ǹ wɔ paǹ li
8Dɛnaa Lawa pɛ Izayii ni:
«Kanna, boon kɛn kiɛ̃ goo la.
Ǹ kiɛ̃ sɛ́wɔ dɔ nɛ
Zeruzalɛmu minin yɔrɔ-a.
Á re goɛ̃ siérebaa ǹ màn lɛa yǎa duduu.»
9Tɔrɔ piã wolen manɛ,
maǹ soɛ-bɔlen lɛa.
Minin manɛ ǹ nə́ n piɛ̃
ka Dɛnaa Lawa a daraa ǹ
boo a too kɔ ma-a nɛ.
10Maǹ pii sii-nyaalin manɛ:
«Ka nyan sii-nyaa yɛ doo wa.»
Maǹ pii Lawa a boo
gii-dalin manɛ:
«Ka nyan Lawa a boo gii da
wɔ-n doo wa.
Boo mɛn bɛ́ sonbore lɛa,
ka nyan bɛ pɛ wɔ-n doo wa.
Boo mɛn bɛ́ kɔɔ̃n wɔ too ne,
haalɛ ta a n soɛ lɛa,
ka bɛ pɛ wɔ nɛ.»
11Ka n wɔlɔ lui zii sonbore ganaa,
ka n bɔ zii sonbore la.
Ka nyan Izirayeli a Lawa
sonbore kɛ boo da wɔ-n doo wa.
12Bɛ lɛ nɛ,
Izirayeli a Lawa sonbore á pii:
«Ká n piã ka maa boon ne.
Min mɛnɛn bɛ́ ka yiri siɛ̃,
ǹ nə́ soɛ boe ka nɛ,
ka nə n foo doɛ bɛn ganaa.
13Sisia kəni,
bɛa sã kɛn die n biɛ ka ganaa
ka kungɔn bɛ ke á yu lɔn.
Kungɔn lɛ n kolo boe,
a bɔ a kaa bǎã goon ne.
14Kungɔn lɛ n die yɔyɔrɛ,
a lɛkara mɔnaa ka gì-bɔle a
tàan bɛ́ lɔn.
Á yɔyɔrɛ á la yii ni,
lɛkara golon ba yii a bii
min boo la a tɛ bɔ nɛ,
hinlaa a mu si-n tù lɛ-a wa.»
Foo doa Dɛnaa Lawa ganaa
15Dɛnaa Lawa,
Izirayeli a Lawa sonbore n kɛ pii:
Bɛ̀ ka n bɔyaa ka daa masɛ li,
ka giã kiĩn ni, ka á re
kirisibaa yii.
Bɛ̀ ka n foo doa masɛ ganaa,
ka giã kiĩn ni,
bɛ lɛ n die pàã koe ka la.
Sɛnɛ, ka lɛ kɔ bɛ ganaa wa.
16Ka ǹ pii: «Haayii,
wɔ n die baa sii ka sùin ni.»
Sonbore, ka á re baa sii.
Ka n pii dɔn:
«Wɔa sùin lɛn tá boe baa la.»
Taãn nɛ.
Min mɛnɛn bɛ́ ka kialan lui,
bɛn dɔn yii á re fuu koe
ǹ la ka nɛ.
17Zɔ́ɔ goon dinsɔɔ̃ n die
nyɛ́ɛ diɛ ka ganaa,
a kaa min duu goon gɔ̀nɔn da
bìn diɛ ganaa.
Zɔ́ɔ sooro n die
nyɛ́ɛ diɛ ka ganaa,
ka tumaa baa si.
A giala nyɔmɔɔ li,
kaa min mɛnɛn bɛ́ re goɛ̃,
bɛn man die n biɛ ka sii giala
pɛ ǹ màn bɛ́ lɔn kele mìi ni,
ka zanzan bɛ́ lɔn tenten la.
Lawa á re a zaman a sã toɛ nɛ
18A da yaa,
Dɛnaa Lawa á re yui,
a na a bǐɛ̃ nyaa ka nɛ,
á re a foo basiɛ̃baa nyɛɛ ka nɛ.
Sonbore,
Dɛnaa Lawa n Lawa pepere lɛa.
Min mɛnɛn foo bɛ́ doa nɛ a ganaa,
bɛn foo á re kɔɔ̃n koe.
19Nsɛ *Siɔn a zaman,
nsɛ mɛn bɛ́ giã-n Zeruzalɛmu,
n ba re wuu pii doo wa.
Bɛ̀ n nə n lɛ dɛ Dɛnaa Lawa ganaa
á re a bǐɛ̃baa nyɛɛ n nɛ.
Bɛ̀ á n lɛ ma lɔn gɔrɔ,
á re n lɛ sii.
20Dɛnaa á re nɔmaa ka foo
ziziɛ̃ koe n la
n mu laanka n màn-bii lɛa.
Sɛnɛ min mɛn bɛ́ n darɛɛ,
a re n duri n la doo wa,
n tá re yii ka n yii ni.
21N tá re boon kɛn miɛ n kio:
«N bɛ́ n kɔnbɔ n zii mɛn saa,
n wo n gusin hinlaa n gɔsɛ, á ke.»
22N dìn kɛn n wɔrɔ kaa ǹ la
n dì kooron kɛn n sana kaa ǹ la,
n tá re giɛ bɛn ganaa
*gɔ̀ dama-a ǹ mànan lɛa.
N tá re ǹ zuĩ ka màn gɔgɔrɛn bɛ́ lɔn,
n pɛ ǹ nɛ:
«Ka n tá ka n bɔ kànaa!»
23Ka bɛ-n kəni,
Dɛnaa Lawa á re la kiɛ màn
nàn kɛ la, n da.
N bɛ́ re màn-bii mɛn boe tán nɛ,
á re goɛ̃ mɔnaa nɛ, a n kɔɔ̃n dɔn.
Bɛa pinaa kɛ nɛ,
n tɔɔn tá re woe buu soɛ̃
tɔɔn buu sɔ̃ ǹ bǎã gole kɛ nɛ.
24N diin laanka
n dundunun mɛnɛn bɛ́ tán kɔsɛ,
ǹ tá re buu sonbore soɛ̃,
ǹ buu mɛn lɛ nyoã tán ka
pɛli laanka fursi ni.
25Bɔ̀n gole pinaa ke,
bɛ̀ kiwi tamaa ǹ kungɔnɔn
kɛn nə́ kaa,
mu á re baa sii kele
sɔsɔrɔn tumaa la
ka tenten dadaran nɛ.
26Ǹ kɔn pinaa,
Dɛnaa Lawa na a zaman lɛ
a bayɛrɛn pii.
Bɛ̀ a ná a busulɛn nya,
mui á re tɛ pii ka wasa bɛ́ lɔn,
wasa á re a lɛawaa sɔbaa fúlu
kiɛ pinin goon.
Dɛnaa Lawa á re zia biɛ Asiirii minin ganaa
27Dɛnaa Lawa á ke,
a n boe tìãlɛa die.
A foo-yoo n tɛ lɛa ka kurukuru.
Foo-yoo nə n daa a lɛ la.
A da ǹ boo n ka tɛ bɛ́ lɔn màn kuĩ.
28A lɛ gɔ́ɔ̃ ǹ piɛ̃-n ka mu tii bɛ́ lɔn,
á pã á toɛ̃ á dii yǎa bɔlɔ ganaa.
A n die bìn diɛ tɔrɔn ganaa,
a ǹ ziziɛ̃,
a karfɔ wɔ ǹ lɛ-n, a ǹ baã
a wo ǹ ne
bǎã mɛn bɛ́ ǹ ba li ǹ wo a-n wa.
29Kasɛn Zeruzalɛmu minin,
ka á re loe loe ka zɔ́n pinaa
tèlò wɔ bɛ́ lɔn.
Ka foo á re kɔɔ̃n koe
ka min mɛnɛn bɛ́ tɔ we pìi wuu li
woe Dɛnaa Lawa a kele la,
woe Lawa, Izirayeli a gɛ̀fu li.
30Dɛnaa Lawa lɛn tá re boe
ka paraa gole ne.
Á re n pàã nyɛɛ,
ka a foo-yoo ne ka kurukuru,
á re nyɛɛ tɛ bii la gole li kiɛ
ka la gii ni.
31Bɛ̀ Asiirii Dɛnaa Lawa lɛ ma,
bɛ̀ a bàlà wuu bɔ a ganaa,
a gɔ̀nɔn tá re bìn diɛ nyɛ́ɛ gunun,
32Dɛnaa Lawa bɛ́ re ǹ dii
ka bàbàla mɛn nɛ
maà laanka tùtun wuu n die
koɛ kɔn la ka bàlà wuu gogoonmaa nɛ.
Dɛnaa Lawa n die n gɔn
pepere Asiirii li,
a zia baa a ganaa.
33Tɛ kɔn yɔrɔ boemaa nɛ
haalɛ bibi,
a n Asiiriin kii wɔ lɛa.
Yala zuzulu pəmə goon gɔ́ɔ̃ nɛ,
maǹ nə́ gɔn da kɔn la buurii ni
tɛ lɛ wɔ lɛa.
Dɛnaa Lawa lɛ gɔ́ɔ̃ ǹ piɛ̃ ke
ka kiribi tɛdɛnaa bɛ́ lɔn,
bɛ n die tɛ lɛ diɛ.
Currently Selected:
Iza 30: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
