Iza 27
27
1 #
Zɔb 41.1; Loe 74.14; 104.26 Bɛa pinaa, Dɛnaa Lawa á re yui *Leviatan gialaa ka a gɔya sa kaka pàãdɛnaa kɛ nɛ, Leviatan lɛ n miɛ̃ baa-sili lɛa. Leviatan piɛ̃maa-n ka taasiɛ baraa nɛ. Dɛnaa Lawa á re bɛa mu li ǹ màn babaraa lɛ dii.
Dɛnaa Lawa a rezɛ̃ da wuru a loe
2Bɛa pinaa, ka loe lɔ
duvɛ̃ kɔɔ̃n *rezɛ̃ da wuru
kɛ wɔ lɛa.
3«Ma din Dɛnaa Lawa n bɛa
rezɛ̃ da wuru lɛ a lɛduə̃li lɛa.
Man mu kiɛ a ganaa paapaa,
ma ń giɛ a walan,
penleen ka tèlò,
màn mɛn bɛ́ toɛ min kɔn
baran baraa zɛnaa-n wa.
4Ma foo a yoo-n li doo wa.
Sɛnɛ, bɛ̀ má nyan dan yɛ a nɛ,
ka koronkoron ne,
ma nə ǹ kuri ma tɛ da ǹ ganaa.
5Bɛ̀ min woo min nə́ n din
sii wɔ masɛ gɔn,
á re là nyantoro yii ma li.
Sonbore, á re là nyantoro yii
ma li.»
Lawa á re Izirayeli a zaman a siɛ̃ toɛ nɛ
6Biikoo á re doe,
Zakɔba a zaman tá re gòon
dii boe.
Izirayeli á re gùrù ten boe,
a buũ kɔ.
Kanaa á re piɛ̃ ka a nɛn nɛ.
7Dɛnaa Lawa na a zaman lɛ dɛ,
ká a bɛ́ á ǹ dɛ wolen kɛn dɛ
lɔn wa.
A ǹ dɛ ǹ nə́ gã
ka a bɛ́ á ǹ dɛ a gã wolen kɛn
dɛ ǹ nə́ gã lɔn wa.
8A na á dɔlɔ bɔ ǹ ganaa,
á ǹ loo, bɛ̀ á kiri we ǹ ganaa.
A lɛ gɔ́ɔ̃ ǹ piɛ̃ nə́ ǹ pɛsɛ̃,
piɛ̃ kɛa daa pinaa boe lɛ̀giala-n#27.8 Bɛa lɛ̀giala ǹ piɛ̃ kɛ n Baabilonii minin sii a kɔnboe lɛa ǹ nə́ daa zaman lɛ goa ǹ nə́ woo ne bɛ̀rɛbaa ǹ bǎã nɛ..
9Zakɔba tɔrɔn siɛ̃ bɛ́ re n toɛ
ǹ nɛ lɔn,
bɛ á ke,
ǹ sii baraan toa manɛ bɛ́ re die
ka sii mɛn nɛ,
bɛ á ke:
*Wúlu bɔ ǹ bǎã a kɔlɔn kɛn,
maǹ die bɛn yɔyɔrɛ mɔnɔmɔnɔ.
Wúlu bɔ ǹ bìbìn kɛn laanka
ǹ da yon gìĩ kɔɔ̃n tã n mànan kɛn,
bɛn kɔn ba re goɛ̃ lon doo wa.
10Kiwi ke tamaa nɛ,
min kɔn ba re goɛ̃ bɛ-n doo wa.
A gɔ́ɔ̃ kooro n die goɛ̃,
ǹ tá re n la boe a ganaa
ka diə gole bɛ́ lɔn.
Diin tá re buu soɛ̃ walan,
ǹ tá re n susui a nɛ,
ǹ tá re a da bisinin luu soɛ̃.
11Bɛ̀ bɛa da bisinin lɛn gùrù laa,
maǹ die ǹ yiɛ,
lɔn nə tɛ da ǹ ganaa.
Tɔrɔ kɛa sii kɔn giala miɛ wa.
Bɛ lɛ na á toa, min mɛn zɛnaa,
ǹ dɛnaa a makara boe
a ganaa wa.
Min mɛn yɛ á da kanaa,
ǹ dɛnaa a bǐɛ̃ koe a ganaa wa.
Wo bɛ̀rɛbaa ǹ bǎã-n wolen wusoo a daa
12Bɛa pinaa,
Dɛnaa Lawa á re *belee duwii,
a saa Efrati tà ganaa,
a wo yǎa Ezipti tà gòã nɛ.
Kasɛn Izirayeli minin,
a n die ka goɛ gogoon ka
belee mìi bɛ́ lɔn.
13Bɛa pinaa,
sère gɔ̀lɔ̀ bɛn gole n die n pii.
Bɛa biikoo li kəni,
min mɛnɛn nə papaã
Asiirii gána nɛ,
ǹ nə n mɛnɛn loo Ezipti gána nɛ,
bɛn tumaa á re die lenlen.
Ǹ tá re die n musin koɛ
tán Dɛnaa Lawa yɔrɔ-a,
Zeruzalɛmu a kele sonbore kɛ la.
Currently Selected:
Iza 27: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
