Iza 26
26
Foo doa Dɛnaa Lawa ganaa ǹ loe
1Bɛa pinaa, Zudaa gána nɛ,
zaman tá re loe loe, ǹ pɛ:
Wɔa kiwi lɛ doemaa nɛ.
Dɛnaa Lawa ná a lɛnpɛnɛ
ka kungɔn nɛ,
a ná a lɛnpɛnɛ ka kungɔn
tamaa wole ne,
màn mɛn bɛ́ toɛ, a wɔ tamaa.
2Ka kiɛnlɛn bũ!
Tɔrɔ mɛn bɛ́ Lawa bɔlɔ sii,
a n bɔlɔgoondɛnaa lɛa
ka toa bɛ wɔ!
3Min mɛn bɛ́ n foo doɛ
Dɛnaa Lawa ganaa
bɛa dɛnaa n yii nyɛɛ taãn yii,
a giala a foo n doa nɛ a din ganaa.
4Ka n foo doa Dɛnaa Lawa
ganaa yǎa duduu.
A giala, a din nə gɛ̀fu kaka lɛa,
a na a tan duduu.
5Min mɛnɛn bɛ́ giã-n kele mìin ni
a n bɛn boe ǹ kiɛ.
Kiwi mɛn bɛ́ tamaa nɛ,
a n bɛ ziziɛ̃.
An noɛ̃ á zũ tán furu-n,
a zũ gusuũ li.
6Ǹ tá re tɔrɛ la,
doobaan tá re tɔ we la,
din boɛɛn kɔ wolen tá re yɔyɔrɛ
ǹ gòãn giulun.
Dɛnaa Lawa nyankoe
7Dɛnaa Lawa,
min mɛn bɛ́ n bɔlɔ sii,
bɛa dɛnaa a zii n pepere.
Ń zii pepere yɔrɔ bɔ a wɔ lɛa.
8Sonbore, Dɛnaa Lawa,
n bɛ́ ń zii mɛn nyaa wɔ nɛ,
wɔ n koe lɛ,
wɔ foo n doa nɛ n din ganaa.
Sii mɛn bɛ kɔɔ̃n wɔ ganaa,
wɔ n tɔ bɔ, wɔ n taasɛ
ka n din ni.
9Tèlò-n,
man giɛ n li ka ma foo tumaa nɛ.
Hiĩ, man giɛ n li ka ma
parsii taãn nɛ.
Bɛ̀ n tá dɔlɔ boe tán ganaa
biikoo mɛn li,
kanaa minin manə
n darɛɛ peperebaa ganaa.
10Sɛnɛ, bɛ̀ makara nə́ n bɔ
min baraa ganaa,
a ba n darɛɛ peperebaa zɛnaa
a wa.
Peperebaa bɛ́ gána mɛn nɛ,
a n sii baraa zɛnɛɛ walan dɔn.
A yii ba Dɛnaa Lawa a golebaa
kɛ ganaa wa.
11 #
Ebr 10.27
Dɛnaa Lawa,
n gɔn-munii n lon,
ǹ yii ba a ganaa wa.
Sɛnɛ, ǹ tá re n miãgoã-bɔ kɛ yii
n zaman kɛa paǹ li,
sìi á re ǹ kuĩ.
N tɛ mɛn yɔrɔ bɔ n zɔ́ɔn wɔ lɛa,
bɛ á re ǹ kuĩ.
12Dɛnaa Lawa,
n din nə là nyantoro koe wɔ la.
Wɔ sii mɛn tumaa lɛ bɔ,
n din nə ǹ tumaa lɛ piɛ̃.
13Dɛnaa Lawa, wɔa Lawa,
mìinaa kɔsɔn nə́ goã wɔ mìi la.
Sɛnɛ, wɔ nə n dinsɔɔ̃ guguru koe.
14Bɛa mìinaan lɛn nə́ gã,
ǹ ba re yui doo wa.
Maǹ nyínin lɛa sisia,
ǹ ba yui doo wa.
N nə́ ǹ bɔ̀n baa,
yiri a goɛ̃ ǹ nɛ doo wa.
15Dɛnaa Lawa,
ń wɔa zaman gigiã kɔ,
n nə́ n gugurubaa nyaa.
Ń wɔa zaman gigiã kɔ,
n màn da gána lɛ gèlè tumaa li.
16Dɛnaa Lawa,
koe biikoo li,
manə n bɔyɛɛ die n din li.
Bɛ̀ ń dɔlɔ bɔ ǹ ganaa,
manə n nyankoe ka lɛn basiɛ̃ nɛ.
17Dɛnaa Lawa,
wɔ n wɔ́ goã n yɔrɔ-a
ka lɔ nɔɔrɔ-kɔle bɛ́ lɔn,
n duwii, n lɛ dii la paparɛɛ gɔn.
18Wɔ dɔn nə́ nɛ yɛ, wɔ́ nɔmaa,
sɛnɛ, wɔ n wɔ́ piɛ̃ dinsɔɔ̃ yɛ.
Wɔ kirisibaa kɔ tán la wa,
wɔ wɔ tɔrɔn yɛ wɔ́ ǹ kaa
kanaa wa.
Dɛnaa Lawa n sii zɛnɛɛ
19Maa zaman,
n geren yii á re kiɛ
ǹ mɛnɛn bɛ́ yala-n,
bɛn yii á re kiɛ.
Ka yoo ka n bɔ geren li
ka foo kɔɔ̃nbaa ǹ lɛ dɛ
kasɛn mɛnɛn bɛ́ gusuũ li!
Dɛnaa Lawa á re tɛ fúlu diɛ
ka pele wɔ bɛ́ lɔn.
Bɛ lɛ pàã ganaa,
tán a geren yii á re kiɛ.
20Maa zaman, wo piɛ,
n nə n kiɛnlɛn tã n kio.
N duru boɛɛnɛ,
n toa Dɛnaa Lawa a foo-yoo kɛ kiɛ̃.
21A giala, á ke,
Dɛnaa Lawa soo kion.
A n die dɔlɔ boe
minbuiin nɛn ganaa,
ǹ sãn taman yii.
Mà mɛn kaa, tán tá re toɛ bɛ yɛ.
Ǹ min mɛnɛn dɛ,
a re bɛn duri doo wa.
Currently Selected:
Iza 26: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
