BLS 10
10
Baãnaabaa bɛ́ boe la a da siin mɛnɛn nɛ
1Nyuun geren man nyɔɔ gìĩ kɔɔ̃n zɛnaali a nyɔɔ gìĩ ziziɛ̃.
Bɛa yɔrɔ lɛ la,
baãnaabaa boɛɛn dɔ n sii-doɛ̃ laanka min a gugurubaa ziziɛ̃.
2Sii-dɔ̃li yiri n tɔ we doɛ̃ sɔnbɔraanɛ,
sɛnɛ, baãnaa sɛ n sii tumaa giala miɛ ka a làfu ni.
3Ta baãnaa n tɔ we zii la,
yiri wɛɛ̃ na a ganaa,
a n toɛ minin nə dɔ̃ mà asɛ n baãnaa lɛa.
4Bɛ̀ goledɛnaa foo yoo n li,
giã ka n din ni.
A giala,
boo ma foo la tá min kanbiɛ sii baraa dadaran ganaa.
5Nyɛɛnaan-bɔle tá boe la a sã.
Bɛ lɛ nɛ,
má ga sii gigiã ganaa kanaa kɛ nɛ,
ǹ ba siĩn wa.
6Ǹ tɛn nɛ,
min mɛn nə́ ke baãnaa lɛa,
bɛ n boe la a goã dí gole lɛ la,
a da yaa,
sii-dɔ̃lin man dí bɔnboɛɛnɛn nɛ.
7Má bɛ̀rɛn yɛ dii sùi la,
kiin sɛn nə́ tɔ we tán ka ǹ gòã nɛ,
ka bɛ̀rɛn bɛ́ lɔn.
8 #
Loe 7.15; Suu 26.27 Bɛ̀ n tá yala foɛ̃,
ń boe la ǹ mɛnaa a nɛ.
Bɛ̀ n tá kungɔn wurii,
miɛ̃ á boe la a n kũ.
9Bɛ̀ n tá kɔlɔn bɔbɔyɛɛ,
ń boe la n busu da n din-a.
Bɛ̀ n tá gɔn yui,
sii á boe la a n yɛ a gɔ́ɔ̃ nɛ.
10Bɛ̀ fɔlɔ màn lɛ wɔ,
bɛ̀ n na a lɛ dɛ wa,
yǎa n nə n we boe taãn-taãnɛ n tɔn dí nyɛɛ nɛ.
Sonbore, sii-doɛ̃ n sii bǐɛ̃ kɔ ǹ màn lɛa.
11Bɛ̀ miɛ̃ a basã ǹ da-gòã tá n gɔn,
bɛ̀ n da-n wa,
bɛ̀ ń toa á min kũ,
n da gòã lɛ là banban.
Sii-doɛ̃ laanka baãnaabaa boo
12Sii-dɔ̃li lɛ gɔ́ɔ̃ ǹ boo á kiɛ foo la.
Sɛnɛ, baãnaa lɛ na a din bɔ̀n biɛ.
13Baãnaa a boo giala kɔ n baãnaabaa ǹ boo lɛa,
a boo gɔn nyɔmiɛ̃ n gàãnaabaa ǹ boo taãn-taãn lɛa.
14Baãnaa n boo mɔnɛɛ.
Sii mɛn bɛ́ re n zɛnɛɛ,
minbuiin nɛ ba bɛ doɛ̃ wa.
Sii mɛn bɛ́ re n zɛnɛɛ a gɛ̀ kio,
die n die bɛ pii ni?
15Baãnaa a dí n nɔmiɛ̃,
a giala a ba n yɔrɔ dia ǹ bǎã doɛ̃ wa.
Kii laanka pàã boo
16N wɔ n ka bɔ̀n nɛ, nsɛ gána ke,
n kii n nɛginin ten lɛa,
n kii kiodɛnan nə́ siɛ baayɛlɛ ganaa gɔrɔ,
ǹ nə́ màn bii.
17Nsɛ wɔ na á bǐɛ̃ kɔ, nsɛ gána ke,
n kii n min yii guguru-an nɛ lɛa,
n kii kiodɛnan nə́ màn bii á n kɔnpii ka a biikoo ne,
ń giɛ ǹ nə́ pàã yii,
màn mi a lɛa ná a bie wa.
18Yoobaa taman yii,
kala n niɛ̃ a kaa.
Gɔn-na taman yii, kion nə mu boe.
19Maǹ màn bii zɛnɛɛ màn mɛn bɛ́ toɛ,
ǹ nə n nyɛnyɛɛ.
Duvɛ̃ nə foo kɔɔ̃n koe.
Paa n sii tumaa bǐɛ̃ koe.
20N baran lɛn baraa bíi kii li wa,
haalɛ n gɔ́ɔ̃-n dinin.
N waa ǹ kion,
n baran lɛn baraa bíi pàãma li wa,
a giala piɛ̃ tá boe la a n boo lɛ saa a pɛsɛ̃,
n boo mɛn da,
bɛ nə n da wɔlɔ la.
Currently Selected:
BLS 10: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
