Vẽnegre 2
2
Koɛɛg Efɛɛs tẽedbã yĩnga
1Gʋls Efɛɛs wẽnd doogã gũud n yeel-a yaa: Ad bũmb ning a soab sẽn zãad ãds a yopoe ne a rɩtgo, la a kẽnd sãnem fɩtl-dogends a yopoe wã sʋkã sẽn yeta:
2«Mam mii tʋʋm nins y sẽn maanã, la y sẽn tʋmd to-to, la m mii y modgrã. Mam miime tɩ yãmb ka tõe n sak tɩ nin-wẽns zĩnd ne-y ye. Yãmb maka neb nins sẽn yet tɩ b yaa tẽn-tʋmdb n yaool n ka tẽn-tʋmdbã n gese, la yãmb mikame tɩ b yaa zĩrẽ yagdba. 3Yãmb nangda pãnga, yãmb namsa mam yʋʋrã yĩnga, la yãmb ka boog y raood ye. 4La yell ning mam sẽn tar ne yãmba, yaa tɩ yãmb basa y pipi nonglmã. 5Dẽ wã, bɩ y tẽeg zĩig ning yãmb sẽn lʋɩ wã. Tek-y yam n kos sugri, la y leb n tʋm y pipi tʋʋmã. Sã n ka rẽ, mam na n waa yãmb nengẽ, la m na n yiisa yãmb fɩtl-doagendgã a zĩigẽ, sã n ka tɩ yãmb teka yam n kos sugri. 6Baoosgo yãmb tara bõn-sõng a yembre: yaa tɩ yãmb kisa Nikolayit-dãmba#2.6 Nikolayit-dãmba: Yaa Kaoreng buud sull a yembr sẽn dag n zãmsd nebã zãmsg buud sẽn ka zemsd ne tõnd Zu-soab a Zeezi Kiris kaorengã ye. tʋʋmã, tʋʋm nins mam me sẽn kisã.»
7 #
Sɩng 2.9, Vẽn 22.2,
Eze 28.13, 31.8 Bɩ ned ning sẽn tar-a tʋb kelg bũmb ning Sɩɩg-sõng sẽn yet wẽnd-dotã: Mam na n kõo tõaagd fãa noor t'a rɩ vɩɩm tɩɩgã sẽn be Wẽnnaam Paraadi pʋgẽ wã biisi.
Koɛɛg Ismirn tẽedbã yĩnga
8 #
Eza 44.6, 48.12, Vẽn 1.17, 22.13 Gʋls Ismirn wẽnd doogã gũud n yeel-a yaa: Sẽn yaa-a dẽenem la yaoolem soabã, sẽn dag n ki-a n leb n vʋʋgã yetame yaa: 9«Mam bãnga yãmb yel-pakrã ne y naongã, la yãmb yaool n yaa arzegs rãmba, la mam bãnga kãnegr ning neb nins sẽn yet tɩ b yaa Zʋɩf-rãmb n yaool n ka Zʋɩf-rãmba, la b ya Sʋtãanã karen-doogã rãmb sẽn kãnegd yãmbã. 10Da maan-y rabeem ne namsg ning y sẽn na n namsã ye. Gese, Sʋtãanã na n kẽesa yãmb neb kẽer bi-bees roogo, sẽn na n yɩl n mak yãmba, la yãmb na n paama namsg rasem piiga. Kell‑y n maan-y neer hal tɩ ta kũum, la mam na kõ yãmb vɩɩm maanfo.»
11 #
Vẽn 20.14, 21.8 Bɩ ned ning sẽn tar tʋb kelg bũmb nins Sɩɩg-sõng sẽn yet wẽnd-dotã. Kũum a yiib soabã ka na n sɩɩs ned ning sẽn na n paam-a tõogrã ye.
Koɛɛg Pɛrgam tẽedbã yĩnga
12Gʋls Pɛrgam wẽnd doogã gũud n yeel-a yaa: Soab ning sẽn zãad-a zabr sʋʋg sẽn tar noy a yiib sẽn dɩtã yetame yaa: 13«Mam mii yãmb sẽn be zĩig ningã: zĩ-kãng yaa a Sʋtãan geere. Yãmb talla mam yʋʋrã, la yãmb ka bas y tẽeb ne maam baa wakat ning b sẽn kʋ mam kaset tɩrg soab a Ãntipaas yãmb sʋka, zĩig ning a Sʋtãan sẽn be wã. 14#Sõd 22.5,7, 31.16, Tõ 23.5, Sõd 25.1-3La mam tara yell bilf ne yãmba. Yaa tɩ neb n be yãmb sʋkã n tũud a Balaam zãmsgã. Yẽnda ra zãmsa a Balak t'a maan bẽdg n kɩt t'a Israyɛll yagensã rɩ wẽnd-naands maand nemdo, la b maan yoobo, tɩ rẽ lub-ba. 15Yãmb me tara neb kẽer me sẽn sakd Nikolayit-dãmbã#2.15 Nikolayit-dãmba: Tɩ ges‑y bilgrã sẽn be 2.6 pʋgã. zãmsgo. 16Dẽ wã, bɩ y tek yam n kos sugri, sã n ka rẽ, bilf sã n paase, mam na n waa yãmb nengẽ, la m na n zaba ne bãmb ne m noorẽ zabr sʋʋgã.»
17 #
Yik 16.14,15, 16.33,34, Zã 6.48-50,
Eza 62.2, 65.15 Bɩ sẽn tar-a tʋb kelg bũmb nins Sɩɩg-sõng sẽn yet wẽnd-dotã. Mam na n kõo ned ning sẽn na n tõogã man sẽn solge, la kug-pɛɛlga. Kugrã zugu, yʋ-paalg n gʋls be ned baa a yembr sẽn ka mi, sã n ka ned ning sẽn deegd-a kugrã.
Koɛɛg Tɩyatɩɩr Kiris tẽedbã yĩnga
18Gʋls Tɩyatɩɩr wẽnd doogã gũud n yeel-a yaa: Ad Wẽnnaam Bi-riblã, sẽn tar-a nin sẽn wẽnd bug-witim t'a nao wẽnd wa zũudã sẽn yeta: 19«Mam bãnga yãmb tʋʋmã, la y nonglmã, ne y tẽebã, la y tʋʋm‑sõamyã, ne y sũ-marã, la y yaoolem tʋʋmã sẽn yaa wʋsg n yɩɩd y pipi tʋʋmã. 20#1Rĩm 16.31, 2Rĩm 9.22,30La mam tara yell ne yãmba: yaa tɩ yãmb basa pag a Zezabɛll t'a zãmsd nebã. A yetame t'a yaa no-rɛɛsa, n zãmsd nebã la a belgd mam tʋmtʋmdbã tɩ b maand yoobo, la b wãbd wẽnd-naands maand nemdo. 21Mam kõo yẽnda weer t'a tek yam n kos sugr a yoobã yĩnga, la yẽnda ka rat n kos sugr ye. 22Gese, mam na n gãneg-a-la tẽnga, la to-kãseng pʋga, yẽ ne neb nins sẽn maand yoob ne yẽnda wã, sã n ka tɩ b teka yam n bas b tʋʋmã. 23#Yɩɩn 7.10, Zer 17.10, Yɩɩn 62.13Mam na n kɩtame tɩ kũum kʋ a kambã, la wẽnd-dotã fãa na n bãngame tɩ mam yaa soab ning sẽn feesd tagsd la sũyã, la mam na n yaoo yãmb ned kam fãa wa sẽn zems a tʋʋmã.
24La yãmb Tɩyatɩɩr neb a taabã fãa sẽn ka sakd zãms-kãngã, la sẽn ka bãng a Sʋtãan yel-solgdsã wa b sẽn mi n yetã, mam yeta yãmb tɩ m ka na n zɩlg yãmb zɩɩb a to ye. 25Bũmb ning sẽn be bala, yaa tɩ y tall bũmb nins yãmb sẽn tarã kãenkãe hal tɩ mam wa.
26 #
Yɩɩn 2.8,9 Ned ning sẽn na n tõoge,
la ned ning sẽn na n tall-a mam tʋʋmã
hal tɩ wakat ta, mam na n kõo yẽnda noor
t'a soog soolem dãmba.
27Yẽnda na n zãa naam dasaar sẽn yaa kut n soog-ba,
wa b sẽn wãad tãnd lagdo,
wa mam meng sẽn deeg m ba nengẽ wã.
28La mam na n kõo yẽnda yibeoog ãdga.
29Bɩ sẽn tar-a tʋb kelg bũmb nins Sɩɩg-sõng sẽn togsd mam wẽnd-dotã.»
Currently Selected:
Vẽnegre 2: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
