Sõdbo 35

Leevi buudã tẽmse

1 # Zoz 21.1-42 Sẽn-Ka-Saab goma ne a Moyiis Moaab weoogã pʋgẽ, Zʋrdẽ kʋɩlgã noor sẽn tees Zeeriko wã n yeel-a yaa: 2«Yeel Israyɛll nebã tɩ bãmb sẽn na n zab n deeg tẽms ninsã sʋka, bɩ b yãk tẽms n kõ Leevi buudã tɩ b tõe n tɩ zĩndi. La y tog n kõo Leevi nebã pʋ-wees tẽn-bãmb yĩnga. 3Dẽ, Leevi buudã n na n paama tẽms n kẽ, la b paam pʋ-wees b rũmsã yĩnga, ne b laogã, la b rũmsã buud fãa yĩnga. 4La pʋ-wees nins yãmb sẽn na n kõ Leevi buudã nebã, tog n sɩnga tẽngã lalg poore, n tall n tɩ tãag kãntɩɩg tusr zĩigẽ, n gũbg tẽngã. 5Tẽngã yaangã, bɩ y mak kãntɩɩg tus a yi, a goabgã, kãntɩɩg tus a yi, a nin-taoorã kãntɩɩg tus a yi, a rɩtgã me kãntɩɩg tus a yi. Dẽ, tẽngã bee sʋka. Woto n na yɩ bãmb tẽmsã pʋ-weese.»

Weem-tẽmse

6La tẽms nins yãmb sẽn na n kõ Leevi buudã pʋgẽ, bɩ y kõ-b weem-tẽmse a yoobe, tɩ ned sã n kʋ a to ne yĩdgu, bɩ a tõe n zoe n tɩ kẽ be. La y kõ-b tẽms pis-naas la a yiib n paase. 7La tẽms nins fãa yãmb sẽn na n kõ Leevi buudã sõor na n yɩɩ pis-naas la a nii, ne b pʋ-weese. 8Tẽms nins yãmb sẽn na n yãk Israyɛll nebã sẽn so wã pʋg n kõ wã, sẽn tar-b wʋsgã na n kõo wʋsgo, la sẽn tar-b bilfã na n kõo bilfu. Tẽng fãa na n kõo Leevi nebã wa sẽn zems pʋɩɩr ning a sẽn tog n paame.

9 # Tõ 19.2-4, Zoz 20.1-9 Sẽn-Ka-Saab yeela a Moyiis yaa: 10«Yeel Israyɛll nebã yaa: Ade, yãmb sã n wa pɩʋʋg Zʋrdẽ kʋɩlgã n tɩ kẽ Kana tẽngẽ wã, 11bɩ y yãk tẽms sẽn na n yɩ weem-tẽmse#35.11 Weem-tẽnga: Yaa tẽng b sẽn yãke, tɩ ned sã n beege, bɩ a zoe n tɩ kẽ beenẽ n paam n põse. Rat n yeelame tɩ yaa se-yõkr tẽnga., tɩ ned sã n kʋ a to ne yĩdgu, bɩ a zoe n tɩ kẽ be. 12Tẽn-bãmb na n yɩɩ weem-tẽms yãmb yĩnga, tɩ y tõe n zoe n põs ne sẽn dokda a sũurã. Dẽ, b kõ kʋ ned sẽn kʋ-a to t'a nan ka yals nebã taoor tɩ b bʋ a bʋʋd ye. 13Tẽms nins yãmb sẽn na n kõ Leevi buudã sʋka, tẽms a yoob n na n yɩ weem-tẽmse. 14Tẽms a tãab n na n zĩnd Zʋrdẽ kʋɩlgã poore, t'a tãab zĩnd Kana tẽngã pʋga. Tẽn-bãmb na n yɩɩ weem-tẽmse. 15La tẽn-bãmb b yoobã na n yɩɩ weem-tẽms Israyɛll nebã yĩnga, la sãambã, ne neb nins sẽn be-b yãmb sʋk wakat bilf yĩngã. Dẽ, ned sã n kʋ a to ne yĩdgu, a tõe n zoe n tɩ kẽe be.

16Ned sã n tall kut n wẽ a to t'a ki, bɩ b geelg-a wa nin-kʋʋda. La a sɩbgr tog n yɩɩ kũum. 17La sã n yaa kugr la a tall n wẽ a to wã t'a ki, bɩ b geelg-a wa nin-kʋʋda. La a sɩbgr tog n yɩɩ kũum. 18Sã n yaa raoog la a tall n wẽ a to wã t'a ki, bɩ b geelg-a wa nin-kʋʋda. La a sɩbgr tog n yɩɩ kũum. 19La ned ning sẽn tog n dok-a kiidã sũurã, sã n paam nin-kʋʋdã bɩ a kʋ-a. 20Ned sã n kisg a to n tus-a n lubi, wall a rɩk bũmb n lobg-a ne pʋ-toog t'a ki, 21ka rẽ bɩ a wẽ-a-la ne nug-giulg beem yĩng t'a ki, a soabã yaa nin-kʋʋda. La ned ning sẽn tog n dok-a kiidã sũurã, sã n paam nin-kʋʋdã bɩ a kʋ-a.

22La ned sã n tus a to ne yĩdgu, tɩ beem ka be b sʋka, wall a lobg bũmb tɩ yõg-a ne yĩudg t'a ki, 23wall a sã n maan tɩ kugr lʋɩ n yõg ned ne yĩudg t'a ki, tɩ beem dag n ka be b sʋka, la a rag n ka rat-a ne wẽnga, 24ad soay nins Israyɛll nebã sẽn na n tũ n kao bʋʋdã, sẽn kʋ a to ne yĩdgã ne sẽn dat-a n dok kiidã sũurã sʋka. 25Bɩ Israyɛll nebã kogl sẽn kʋ-a a to ne yĩdgã, n sõng-a t'a põs ned ning sẽn dat-a n dok kiidã sũurã. B tog n kɩtame tɩ sẽn kʋ-a a to ne yĩdgã lebg n leb weem-tẽng ning pʋg yẽnda sẽn dag n zoe n tɩ soondã pʋgẽ. La yẽnda tog n paa be hal n tãag maan-kʋʋr kãsem ning b sẽn pʋdg a soab zug kaamã kũum. 26La ned ning sẽn kʋ-a a to ne yĩdgã sã n yi weem-tẽngẽ wã, 27tɩ ned ning sẽn dat-a n dok kiidã sũurã seg-a tẽngã kɩreng n kʋ, b ka na n ning yẽnda taal rẽ yĩng ye. 28Bala, ned ning sẽn kʋ a to ne yĩdgã ka tog n yi weem-tẽngẽ wã, sã n ka tɩ maan-kʋʋr kãsmã n wa n ki ye. Maan-kʋʋr kãsmã kũum poore, ned ning sẽn kʋ a to ne yĩdgã tõe n yaool n lebg n leba a tẽngẽ.

29Woto na n yɩɩ tõod yãmb sẽn tog n tũ zamaan woo zamaane, la yaa zĩig ning fãa yãmb sẽn na n tɩ zĩndẽ. 30#Tõ 17.6, 19.15Ned sã n kʋ a to, b ka tog n kʋ nin-kʋʋdã nin-yɛng kaset yĩng ye.

Rẽndame tɩ b paam neb wʋsg kaseto. 31Yãmb ka tog n deeg yaoodo, n bas nin-kʋʋd sẽn zems kũum t'a vɩɩmd ye. Bala, yẽnda tog n kiime. 32La yãmb ka tog n deeg yaoodo, n bas ned sẽn zoe n tɩ soond weem-tẽngẽ t'a lebg n leb a tẽngẽ, tɩ sã n ka maan-kʋʋr kãsmã n wa n ki ye. 33Yãmb ka tog n dẽgem tẽng ning yãmb sẽn na n tɩ kẽ n zĩndã ye. Bala, zɩɩm rẽgemda tẽnga. La tẽngã ka na n paam yɩlgre, tɩ sã n ka b kʋʋ nin-kʋʋdã n lebs ye. 34Yãmb ka tog n dẽgem tẽng ning yãmb sẽn na n tɩ kẽ wã ye. La y ka tog n dẽgem tẽng ning mam sẽn be a pʋgẽ wã ye. Bala, mam yaa Sẽn-Ka-Saabo, n bee Israyɛll nebã sʋka.»

Currently Selected:

Sõdbo 35: MPBU

Highlight

Copy

Compare