Sõdbo 34
34
Kana tẽngã todse
1Sẽn-Ka-Saab yeela a Moyiis 2t'a gom ne Israyɛll nebã n wilg-ba: «Yãmb sã n wa kẽ Kana soolmã pʋgẽ, Ade tẽng ning yãmb sẽn na n soogã todse. 3Nug-rɩgoab sẽnẽ, yãmb soolmã toadg na n sɩnga ne Sĩn weoogã n yegl Edom tẽngã. La yamsem ko-kãsengã sɛtmẽ n tees yaanga. 4La toadgã na n gõdga nug-rɩtgã n yi Akrabim tãngã rʋʋdgã, n tɩ yi Sĩn n baas Kadɛɛs-Barneya rɩtgã, n lɛɛg n yi Atsaar-Adaare, la Asmone. 5La a na n leb n yii Asmone, tɩ toadgã wẽnemd n tɩ sok Ezɩpt ko-soogã, n kẽng n tɩ ta ko-kãsengã. 6Nin-taoorã, yãmb soolmã toadgã na n yɩɩ ko-kãsengã wogellã. 7La rɩtgã, yãmb soolmã toadg na n yɩɩ ko-kãsengã sẽn tees Hoor tãngã. 8La a yi Hoor tãngã, n tũ lebo-Hamate, ne Sedaade. 9La a na n kell n yii Zɩfron, n tɩ baas Atsaar-Enan. Yãmb soolmã toadg rɩtgã na n yɩɩ woto. 10La yaangã, yãmb soolmã toadg na n yii Atsaar-Enan, n tees Sefam. 11La a na yii be n tees Arbela sẽn be Ayin yaangã, la a na n kẽnga taoor n tɩ tãag Kinerɛt kʋɩlgã noor sigdsã sẽn be yaangã, 12n tɩ yek Zʋrdẽ n tall n tɩ tãag yamsem ko-kãsengã. Woto n na n yɩ yãmb tẽngã todse.» 13#Sõd 26.52-56#Zoz 14.1-5Dẽ, a Moyiis togsa Israyɛll nebã bũmb ning b sẽn wilg yẽnda wã. La a yeel-b yaa: «Tẽng ning Sẽn-Ka-Saab sẽn kõ noor tɩ b pʋɩ buud a wɛ a taabã, la Manaase buudã pʋɩ-sʋkã la woto. 14Bala, Rubɛn ne Gaad buudã, la Manaase buudã pʋɩ-sʋk zoe n paama b zĩisi. 15La zĩis nins b sẽn kõ-bã teesa Zeeriko, n be Zʋrdẽ kʋɩlgã yaanga.» 16Sẽn-Ka-Saab yeela a Moyiis yaa: 17«Ade, yaa maan-kʋʋd a Eleyazaare, ne a Nun biig a Zozoe, n na n pʋɩ zĩisã n kõ buud fãa. 18La buud fãa pʋgẽ yãmb na n yãka naab a ye t'a wa sõng bãmba. 19Nebã yʋy la woto: Zʋʋda buudã pʋgẽ, yaa a Yefune biig a Kalɛɛbe. 20Sɩmyõ buudã pʋgẽ, yaa a Amiwuud biig a Semuyɛlle.
21Benzame buudã pʋgẽ, yaa a Kɩslõ biig a Elidaade.
22Dan buudã pʋgẽ, yaa a Yogli biig a Buki.
23A Zozɛf biig a Manaase buudã pʋgẽ, yaa a Efood biig a Haniyɛlle.
24A Zozɛf biig a Efrayiim buudã pʋgẽ, yaa a Sɩftã biig a Kemuwɛlle.
25Zabulõ buudã pʋgẽ, yaa a Parnak biig a Elisafan.
26Isakaar buudã pʋgẽ, yaa a Azan biig a Paltɩyɛlle.
27Asɛɛr buudã pʋgẽ, yaa a Selomi biig a Ayiwuudi.
28Neftali buudã pʋgẽ, yaa a Amiwuud biig a Pedahɛlle.»
29Neb nins Sẽn-Ka-Saab sẽn yãk tɩ b pʋɩ zĩisã n kõ Israyɛll nebã la woto.
Currently Selected:
Sõdbo 34: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
