Sõdbo 33
33
Ezɩpt yiibã kẽna, la a sigb zĩisi
1A Moyiisi, ne a Aarõ sẽn yiis Israyɛll nebã Ezɩpt soolmã pʋgẽ wã, kẽn la b sigb zĩis la woto. 2A Moyiis gʋlsa b kẽna, la b sigbã zĩis ball-balle, wa Sẽn-Ka-Saab sẽn dag n yeel yẽnda wã. Bãmb sẽn kẽna la b yalsgã zĩis yɩɩ woto.
3Yʋʋmdã pipi kiuugã rasem piig la a nu wã daare, Pak tigrã yɩ tɩ zaamẽ, Israyɛll nebã yii a Ramsɛɛs tẽngã pʋg ne lohorem, Ezɩpt nebã fãa nifẽ. 4La wakat-kãng tɩ Ezɩpt nebã da mumda b kom-dẽemsã sẽn ki wã. Sẽn-Ka-Saab sɩbga Ezɩpt nebã woto n na n kao b wẽnnaam-dãmbã bʋʋdo.
5Dẽ, Israyɛll nebã yii Ramsɛɛse, la bãmb tɩ siga sukote. 6Bãmb yii Sukot n tɩ sig Etam sẽn be hal weoogã kɩrengã 7La bãmb yii Etam, n wẽnemd n kẽng Pi-Ayɩrot sẽn tees Ball-Sefõ wã, la bãmb tɩ siga Migdoll taoore. 8Bãmb yika Pi-Ayɩrot n pɩʋʋg ko-kãsengã n tees weoogã sẽnẽ, bãmb kẽna dasm a tãab kẽnd Etam weoogã pʋgẽ, la bãmb tɩ siga Maara. 9Bãmb yika Maara n ta Elim, b yãnda ko-bundum zĩis piig la a yiib la koms tɩɩs pis-yopoe, la yaa beenẽ la b sig yã. 10Bãmb sẽn leb n yik Elimã b tɩ pẽnega mogr miuugã n sigi. 11La bãmb leb n yika ko-kãsengã sɛɛgẽ n kẽng tɩ sig Sĩn weoogã pʋga. 12Bãmb yika Sĩn weoogã pʋg n tɩ sig Dofka. 13N yika Dofka n tɩ sig Aluusi. 14N yi Aluus n kẽng Refidim, la be, nebã ka paam koom n na yũ ye. 15Dẽ, bãmb yii Refidim, n tɩ sig Sɩnayi weoogã pʋga.
16La bãmb yii Sɩnayi weoogẽ wã n tɩ sig Kibrot-Hataava. 17Bãmb leb n yii Kibrot-Hataava n tɩ sig Hatserote. 18Bãmb yii Hatserot n tɩ sig Ritma. 19La bãmb yii Ritma n tɩ sig Rimo-Perɛts 20N yi Rimo-Perɛts n tɩ sig Libna. 21N yi Libna n tɩ sig Risa. 22N yi Risa n tɩ sig Kehelata. 23N yi Kehelata n tɩ sig Sefɛɛr tãngã. 24La bãmb yii Sefɛɛr tãngã n kẽng Araada, 25n yi Araada n kẽng Makelote, 26n yi Makelot n kẽng Tahat 27n yi Tahat n kẽng Teera, 28n yi Teera n kẽng Mitka, 29n yi Mitka n kẽng Asemona, 30n yi Asemona n kẽng Moserote.
31Bãmb yii Moserot n kẽng Bene-Yakã 32n yi Bene-Yaakã n kẽng Hoor-Gɩdgaade 33n yi Hoor-Gɩdgaad n kẽng Zotbata. 34La bãmb yii Zotbata n kẽng Abrona, 35n yi Abrona n kẽng Esɩyõ-Gebɛɛre, 36La bãmb yii Esɩyõ-Gebɛɛr n kẽng Kadɛɛs sẽn be Sĩn weoogẽ wã n tɩ sigi. 37N yi Kadɛɛs n tɩ sig Hoor tãngã sẽn be Edom tẽngã kɩrengã sɛɛga.
38-39 #
Sõd 20.22-28, Tõ 10.6, 32.50 Yaa Israyɛll nebã sẽn yi Ezɩpt soolmã pʋgẽ tɩ yʋʋm pis-naasã, kiuug a nu soabã pipi daarã, la Sẽn-Ka-Saab yeela a Aarõ t'a rʋ Hoor tãngã zugu. La yẽnda kii tãngã zug a yʋʋm koabg la pisi la a tãabo.
40 #
Sõd 21.1
La wakat-kãnga, Kana tẽngã naab a ye sẽn be tẽngã nug-rɩtgã, wʋma Israyɛll nebã waoongã. 41Bãmb yika Hoor tãngẽ wã n sig Salmona. 42N yi Salmona n tɩ sig Puno 43La bãmb yii Puno n tɩ sig Obote. 44N yi Obot n tɩ sig Ye-Abarim sẽn be Moaab toadgẽ wã.
45La bãmb yii Ye-Abarim n tɩ sig Dɩbõ-Gaad 46N leb n yi Dɩbõ-Gaad n tɩ sig Almo-Diblatayim. 47La bãmb yii Almo-Diblatayim n tɩ sig Abarim tãmsã sẽn tees Nebo tãngã. 48N yi Abarim tãmsã n tɩ sig Moaab weoogã pʋg Zʋrdẽ kʋɩlgã noor sẽn tees Zeeriko wã. 49Dẽ, bãmb tilga b fu-rotã Zʋrdẽ kʋɩlgã noore. La yaa sẽn sɩng ne Bɛt-Ayesimote, n tɩ tãag Abɛll-Sitim.
Kana tẽngã pʋɩɩb tõodo
50Sẽn-Ka-Saab goma ne a Moyiis a sẽn wa be Moaab weoogã pʋg Zʋrdẽ kʋɩlgã noor sẽn tees Zeeriko wã. La Sẽn-Ka-Saab yeela a Moyiisi 51t'a yeel Israyɛll nebã yaa: «Yãmb sã n wa rʋʋg Zʋrdẽ kʋɩlgã n kẽ Kana tẽngã, 52bɩ y rig tẽngã neb fãa, la y sãam b wẽn-naands nins bãmb sẽn pees ne kuga, wall sẽn kud ne kutã, la y sãam b tẽn-kugã. 53La yãmb na n deega tẽngã n sooga, la y zĩnd a pʋgẽ, bala, maam n kõ yãmb tẽn-kãng tɩ y sooge. 54#Sõd 26.54-56Yãmb na n maana poeer n pʋɩ tẽngã n kõ buud fãa la roog fãa. Buud ningã neb sõor sẽn waooge, yãmb na n kõ-a la tẽn-bedre, la buud ninga neb sõor sẽn ka waooge, yãmb na n kõ-a tẽn-bila. La ned kam fãa na n paa zĩig ning b sẽn poe n kõ-a wa sẽn zems a buudã pʋɩɩrã. 55La yãmb sã n ka rig tẽngã nebã n yiis tẽngã, y sẽn na n bas b rãmba na n namsa yãmba. Bãmb na n yɩɩ wa gõos sẽn na n kõs yãmb nina, la a sɩ y poayã, la bãmb na n zaba ne yãmb tẽng ning yãmb sẽn na n zĩndã pʋgẽ. 56La sã n yɩ woto, mam sẽn da rat n sɩbg-b to-to wã, moasã, lebgda yãmb la m na n sɩbge.»
Currently Selected:
Sõdbo 33: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
