A Zeremi wiisgu 3
3
1Mam yaa soab ning sẽn paam namsgo,
bãmb sũ-yikr da-saarã pãb a soabã.
2Bãmb taee maam, n tall maam
n kẽng lik pʋgẽ, la ka vẽenemẽ ye.
3Sɩdã, bãmb zẽkda b nug naoor wʋsg
n namsd maam wĩntoog tɛka.
4Bãmb kɩtame tɩ mam yĩngã
ne m gãongã zelge,
la bãmb kaoo mam kõaba.
5Bãmb sẽbga maam n gũbg maam
ne zẽnem-toaaga, la ne namsgo.
6Bãmb zĩndga maam lik pʋgẽ wa neb
nins sẽn ki hal daar zãra.
7Bãmb mee lalg n gũbg maam
tɩ mam ka tõe n yi ye.
Bãmb balga maam ne bãens sẽn yaa zɩsgo.
8La mam sã n zẽk m koɛɛg n kos sõngre,
bãmb yẽta b tʋb mam pʋʋsgã yĩnga.
9Bãmb mee kug n gɩd mam sorã.
Bãmb kɩtame tɩ m tek sore.
10Bãmb yɩɩ wa rigd-n-yĩidg sẽn sor
mam yĩnga,
wa gɩgemd sẽn sor n gũudẽ.
11Bãmb kɩtame tɩ mam bʋdg n bas m sore,
bãmb zendma maam.
Bãmb kɩtame tɩ vɩɩmã sãame.
12Bãmb yãaga b tãpã mam yĩnga,
n tees maam n na n tão ne b peemdã.
13Bãmb kɩtame tɩ b lokã pɛɛm vʋdg
maam n kẽ m sũ-zulmẽ wã.
14Mam nebã fãa laada maam,
bãmb dɩka maam tɩ m lebg bãmb yɩɩlle.
15Bãmb tɩgsa maam ne bõn-toodo.
Bãmb yũnuga maam zẽnem-toaaga.
16Bãmb kaoo mam yẽn ne kug bãoonego.
Bãmb taba maam tompeglem pʋga.
17Yãmb kɩtame tɩ vɩ-bãan zãag ne maam.
Mam yĩma naar yelle.
18Mam yeelame tɩ m ka leb n tar
tẽeb ne beoog neer ye.
Mam ka leb n tẽed tɩ Sẽn-Ka-Saab
na n sõnga maam ye.
19Bɩ y tẽeg mam namsgã ne m yeebgã yelle,
mam zẽnem-toaagã ne m zẽnemã yelle.
20Mam ket n tẽegda b yell wakat fãa.
La mam yam bondga m pʋgẽ.
21Ad bũmb ning mam sẽn tagsd m sũurẽ.
Yaa rẽ n kɩt tɩ mam maand tẽebo.
22Sẽn-Ka-Saab nonglmã ka sɛte,
la bãmb nimbãan-zoeerã ka tar tɛk ye.
23Yibeoog fãa, bãmb leb n lebgda paalse.
Yãmb sɩdã yaa kãsenga.
24Mam yetame: «Sẽn-Ka-Saab yaa mam pʋɩɩre.
Yaa rẽ n kɩt tɩ mam maand tẽeb ne bãmba.»
25Sẽn-Ka-Saab maanda neb nins
sẽn teeg bãmbã la b baood bãmbã neere.
26Ned sã n sĩnd bal n gũud
Sẽn-Ka-Saab fãagre, yaa neere.
27Yaa neer tɩ rao fãa zãms tɩ tʋk a
bi-bɩɩlem wakat yubl-balgre.
28Bɩ a zĩnd a yembr bal n sĩnd sɩddd...
Bala, b ratame tɩ yɩ a woto.
29Bɩ a ning a noor wubsg pʋgẽ
tɩ daar ninga, a na paam sõngre.
30Bɩ yẽnda wẽnemd a yɛgdg n kõ
sẽn wẽed-a yẽnda pɛkã.
Bɩ a sak tɩ paoogr sek-a.
31Bala, Zu-soabã ka basd ned zãng
n ka leb n bao zĩig ye.
32Bãmb sã n kõ ned sũ-sãanga,
bãmb zoeta a soab nimbãaneg
wa sẽn zems bãmb nonglem-kãsengã.
33Bala, bãmb ka namsd ninsaalbã
n kõt b sũ-sãang ne yamleoog ye.
34B sã n tab tẽngã neb nins sẽn be-b
bi-bees roogã fãa ne naoã,
35la b bʋ ned bʋʋd kegr Sẽn-Ka-To nifẽ,
36la b sã n maan ned pãng a bʋʋd
kaood wakate,
Zu-soabã ka ne bõn-kãng sɩda?
37Ãnda n na n yeel tɩ bũmb maan t'a sɩd maane,
tɩ sã n ka Zu-soabã n kõ noore?
38Rẽ yĩnga, tood ne noog fãa ka
yit Sẽn-Ka-To nengẽ la?
39Yaa bõe tɩ nin-vɩɩg yẽgemdẽ?
Bɩ ned kam fãa yẽgem a meng yel-wẽn yĩnga.
40D tags d soayã yelle, la d fees-ba,
n lebg n leb Sẽn-Ka-Saab nengẽ.
41Bɩ tõnd zẽk d sũyã ne d nusã n
tees Wẽnnaam sẽn be yĩngrã n yeele:
42Tõndo, tõnd wegmame n kɩɩs yãmba,
la yãmb ka kõ tõnd sugr ye.
43Yãmb luda y meng ne y sũ-puugrã
pʋgẽ n dig tõndo.
Yãmb kʋʋme, n ka bas ned ba a yembr
tɩ põs ye.
44Yãmb pila sawaodg tɩ ned pʋʋsg
ka tõe n pɩʋʋg n ta yãmb nengẽ ye.
45Yãmb gesa tõnd wa sagdo,
yãmb kɩtame tɩ tõnd lebg paoogr
bũmb buudã fãa sʋka.
46Tõnd bɛɛbã fãa yaagda b noy
n gomd tõnd wẽnga.
47Tõnd pʋɩɩrã lebga yɛɛsgo la boko.
Yaa zɛɛbo, la sãoongo.
48Mam nintãmã raagda wa kʋɩlg
ko-zoetem mam buudã sẽn yaa mam
nin-nongdsã sãoong yĩnga.
49Mam ninã pida ne nintãm wakat fãa
n ka sɛt ye,
la vʋʋsg me ka be ye.
50Hal tɩ Sẽn-Ka-Saab sẽn be saasẽ wã
sulg n yãnde.
51Mam ninã zabdame,
mam tẽngã kom-pugli wã fãa yellã yĩnga.
52Neb nins sẽn dɩt beem ne maam
zaalmã rigda maam wa liuul n ka
basdẽ ye.
53Bãmb sagla maam bok pʋgẽ vɩɩga,
la bãmb loba maam ne kuga.
54Koomã lima mam zugu la mam
yeelame: «Mam kiime.»
55Sẽn-Ka-Saabo, mam sẽn be hal
bokã zĩ-zulumsẽ wã,
mam boola yãmb yʋʋrã.
56Yãmb wʋma mam sẽn yeel yãmb
tɩ y ra yẽd-y y tʋb ne mam sirã
la ne mam kɛlengã ye.
57Daar ning mam sẽn kos yãmbã,
yãmb kolga maam n yeel tɩ m da zoe rabeem ye.
58Zu-soaba, yãmb sõnga maam ne m
bʋʋdã yelle.
Yãmb fãaga mam vɩɩm.
59Sẽn-Ka-Saabo, yãmb yãnda b sẽn maan
maam wẽngã.
Bɩ y kao m bʋʋdã tɩrg n kõ-ma.
60Yãmb yãnda bãmb sẽn dok b sũur
ne maam to-to wã.
Yãmb yãnda bãmb fãa sẽn saagd saagr
ning n dat n maan maam wẽngã.
61Sẽn-Ka-Saabo, yãmb wʋma
bãmb paoogr goamã la bãmb
sẽn yẽsd ne taab n dat n maan
maam bũmb ningã.
62Yãmb wʋma mam bɛɛbã goamã
la bãmb sẽn tagsd daar fãa n dat
n maan maam bũmb ningã.
63Ges-y-yã, bãmb sã n zĩẽ wall b sã n yasẽ,
maam n lebg b yɩɩlle.
64Sẽn-Ka-Saabo, yãmb na n yaoo
bãmb wa sẽn zems b nusã tʋʋmã.
65Yãmb na n diglma bãmb sũyã,
la y kɩt tɩ kãab-wẽng sig bãmb zutu.
66Sẽn-Ka-Saabo, yãmb na n diga
bãmb ne sũ-puugri,
n sãam bãmb tɩ b ra leb n zĩnd yãmb
saasã tẽngr ye.
Currently Selected:
A Zeremi wiisgu 3: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
