A Zeremi wiisgu 1
1
Sɩyõ nebã sũ-sãanga
1Kayto!
Tẽng ning neb wʋsg sẽn dag n be
a pʋgã lebga tẽn-vɩʋʋgo.
A lebga wa pʋg-kõore.
Yẽnda rag n yaa kãseng
buudã fãa sʋka,
yẽnda rag n yaa rĩm-poaka,
n so soolem wʋsgo,
la b kẽes-a-la tʋʋm-wɛgl pʋga.
2Yẽnda yãbda yʋngã tõre,
la a nintãmã sedgda a yegdsã zutu.
Neb nins sẽn dag n nong yẽnda wã,
ned baa a ye ka belsd yẽnda ye.
Yẽnda zo-rãmbã fãa zãmba yẽnda,
b lebga yẽnda bɛɛba.
3B namsa Zʋʋda n yiis-a
n kẽng tẽng a to n tɩ kẽes yembd
sẽn yaa toog pʋga.
Yẽnda zĩnda buud a taab
sʋk n ka yã vʋʋsg ye.
Neb nins sẽn da rigd yẽnda wã
paama yẽnda a sũ-sãangã pʋga.
4Sɩyõ soayã bee sũ-sãang pʋga,
bala, ned ka leb n be b zut n wat tigr ye.
Tẽngã noyã fãa sãamame.
A maan-kʋʋdbã wõosdame.
A pʋg-sadbã sũy sãamame.
A meng tara sũ-toogo.
5Yẽnda bɛɛbã tõog-a lame,
a bɛɛba zĩi ne yam-gãnega.
Bala, Sẽn-Ka-Saab kõo yẽnda sũ-sãanga,
a beegrã sẽn yaa wʋsgã yĩnga,
la bɛyã yiisa yẽnda kom-bãoonegã
n kẽes yembd pʋga.
6Sɩyõ tẽn-neerã ziir sɛɛme.
A nanambsã yaa wa yãgs sẽn ka
yãt yam-maasa,
la b ka tar pãng tɩ zoe n põs
sẽn digd-a bãmbã ye.
7Zeruzalɛm namsgã ne a toogã wakate,
yẽnda tẽega bõn-neeb nins fãa
yẽnda sẽn dag n tar pĩndã yelle.
Bɛyã sẽn lubd a nebã tɩ sõangd kaẽ wã,
bɛɛbã yãnda yẽnda n la a lʋɩɩsã.
8Zeruzalɛm maana yel-wẽn wʋsgo,
rẽ kɩtame t'a lebg bõn-dẽgdo.
Neb nins fãa sẽn da waoogd yẽnda wã
paoogda yẽnda moasã.
Bãmb yãame t'a yaa zaala.
La yẽnda meng wẽeda sir n tarda.
9A rẽgda bee a fuugã zugu,
la yẽnda ka tags yẽnda a sẽn na n
yɩ a soab beoog ye.
Yẽnda lʋɩɩ yaoolg kãseng pʋga.
La ned ka be n na n bels-a ye.
Sẽn-Ka-Saabo, ges-y mam namsgã,
bala, bɛyã tõogame!
10Bɛyã tẽega a nug n deeg
Zeruzalɛm bõn-sõama wã.
Buud a taabã waa n kẽe yẽnda
zĩ-sõngã pʋgẽ.
Yaa buud ning yãmb sẽn yeel
tɩ b ra wa yãmb nebã tiging pʋgẽ wã.
11Yẽnda nebã fãa wõosdame
n baood dɩɩbo.
Bãmb dɩgsa b bõn-neebã
n tek ne rɩɩbo,
tɩ b tõe n paam n fãag b yõyã.
Sẽn-Ka-Saabo, ges-y-yã,
ges-y mam sẽn paamd paoogr to-to.
12Yãmb fãa sẽn tũud ka n loogdẽ wã,
bɩ y tags n gese.
Toog bee sẽn zem toog ning sẽn paam
maamã bɩ?
Sẽn-Ka-Saab namsa maam daar ning
bãmb sũ-puugrã sẽn wɩngã.
13Bãmb zĩnda yĩngr n tʋm bugum
tɩ sig n dɩ mam kõabã,
bãmb tab-b lame.
Bãmb ninga gãmbr mam naoã tẽngre.
Bãmb kɩtame tɩ mam targ n leb poorẽ.
Bãmb kõo maam yam-yoogo,
la mam sũur sãamda daar fãa.
14Bãmb nugã wʋga mam beegrã
mam beegrã kala taaba,
b zẽkdame n yẽt mam koakoayã.
Bãmb kɩtame tɩ mam pãngã sɛ.
Sẽn-Ka-Saab rɩka maam n kõ mam
sẽn ka tõe-b rãmbã.
15Zu-soabã basa gãndaad nins fãa
sẽn dag n be ne maamã.
Bãmb boola tãb-biisã tɩ b wa tigim
n zab ne maam n menes mam kom-bɩɩsã.
Zu-soabã taba Zʋʋda tẽn-neerã
reezẽ rãam wẽkr koglg pʋgẽ.
16Yaa bãmb yĩng la mam yãbd tɩ m
nintãm daagdẽ.
Bala, bɛlsd ning sẽn dag n tõe n
kɩt tɩ mam vɩɩm yɩ noogã zãaga ne maam.
Mam kambã tara sũ-sãanga,
bala, bɛyã tõogame.
17Sɩyõ teesda a nusi,
la ned ka bels-a ye.
Sẽn-Ka-Saab yeelame tɩ neb nins
sẽn gũbg a Zakoob buudã na n yɩɩ
bãmb bɛɛba.
Zeruzalɛm lebga bõn-dẽgd bãmb sʋka.
18Zu-soabã yaa tɩrga,
yaa maam n kɩɩs bãmb noore.
Nebã fãa, m kotame tɩ y kelge,
la y ges mam sũ-sãangã.
Mam pʋg-sadbã ne m da-sãmbã kẽe
yembd pʋga.
19Mam boola m zo-rãmba,
la bãmb zãmba maam.
Mam maan-kʋʋdbã ne m
kãsem-dãmbã kii tẽngã pʋgẽ,
wakat ning b sẽn dag n baood
dɩɩb n na n fãag b yõyã.
20Sẽn-Ka-Saabo, ges-y mam toogã.
Mam pʋga bendgame.
Mam sũurã digda m pʋgẽ.
Bala, mam kɩɩsa wʋsgo.
Zabr sʋʋg kʋʋ mam kambã soay zutu,
la yiyã pʋs me yaa kũum n be be.
21B wʋma mam sẽn wẽed siri,
la ned ka be sẽn belsd maam ye.
Mam bɛɛbã fãa wʋma mam
toogã yell n maand sũ-noogo,
bala, yaa yãmb n maane.
Yãmb kɩtame tɩ daar ning yãmb sẽn
yãkã wa,
bɩ y kɩt tɩ bãmb me yɩ wa maam.
22Bɩ y kɩt tɩ bãmb wẽngã fãa
wa yãmb taoore,
la y maan bãmb wa yãmb sẽn maan
maam m yel-wẽnã fãa yĩngã.
Bala, mam wẽeda sir wʋsgo,
la m sũur sãamame.
Currently Selected:
A Zeremi wiisgu 1: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
