A Zeremi 52

A Nebukatnedzaar yõka a Sedesiyaase

1A Sedesiyaas sẽn wa n na n lebg rĩmã t'a tara yʋʋm pisi la a yembre, la yẽnda rɩɩ naamã Zeruzalɛm yʋʋm piig la a yembre. A ma yʋʋr dag n yaa a Amutalle, n yaa Libna tẽng ned a Zeremi bi-pugla. 2A Sedesiyaas maana sẽn yaa wẽng Sẽn-Ka-Saab nifẽ wa a Yoyakim. 3Sẽn-Ka-Saab sũ-puugrã yĩng n kɩt tɩ yel-kãngã paam Zeruzalɛm ne Zʋʋda nebã, hal tɩ Sẽn-Ka-Saab tol n dig-b n zãag ne b menga. A Sedesiyaas kɩɩsa Babilond dĩmã noore. 4#Eze 24.2A Sedesiyaas sẽn deeg a naamã tɩ yʋʋm-wɛɛlẽ, kiuug piig soabã rasem piig daare, Babilond dĩm a Nebukatnedzaar yika ne a tãb-biisã fãa n zab ne Zeruzalɛm. Bãmb tilga b tãb-sikã n gũbg tẽngã, la b tu bok n gilg-a zĩig zãnga. 5Babilond nebã gũbga Zeruzalɛm tẽngã n tãag a Sedesiyaas sẽn deeg a naamã tɩ yʋʋm piig la a yembrẽ.

6Kiuug a naas soabã rasem a wɛ daare, komã wɩnga tẽngã pʋga, hal tɩ tẽngã nebã ka leb n tar dɩɩb baa bilf n na n dɩ ye. 7#Eze 33.21Dẽ, Babilond dãmbã pooga võor tẽngã lalgẽ. La rĩm a Sedesiyaas ne a tãb-biisã fãa soosa ne yʋngo, n tũ tẽngã noor ning sẽn be lals a yiibã sʋk rĩmã zẽed zĩig sɛɛgẽ wã, n yi n zoe n kẽng Araba tẽn-nabdrã sẽnẽ. La Kalde rãmbã rag n gũbga tẽngã. 8Kalde rãmbã tãb-biisã riga rĩm a Sedesiyaas n tɩ paam-a Zeriko tẽn-nabd-koɛɛngã zĩigẽ, la rĩmã tãb-biisã zoe n sãeegame. 9Dẽ, bãmb yõka rĩmã n tall n kẽng Ribla sẽn be Hamat soolmẽ wã, Babilond dĩmã nengẽ, t'a bʋ a bʋʋdo. 10Babilond dĩmã kɩtame tɩ b kood rĩm a Sedesiyaas kom-dibli wã a Sedesiyaas nifẽ, la a kɩt tɩ b kood Zʋʋda nanambs nins fãa sẽn be Ribla wã. 11#Eze 12.13Dẽ poore, yẽnda kɩtame tɩ b kɩɩd a Sedesiyaas ninã, la b sẽb-a ne zũud bãense. Babilond dĩmã talla yẽnda n tɩ kẽes bi-bees roog Babilond t'a pa be n tãag a kũum.

A Nebuzaradan sãama Zeruzalɛm

12Babilond dĩm a Nebukatnedzaar sẽn deeg a naamã tɩ yʋʋm piig la a wɛɛlẽ, kiuug a nu soabã rasem piig daare, a Nebuzaradan sẽn dag n yaa Babilond dĩmã gũudb naabã waa Zeruzalɛm. 13#1Rĩm 9.8Yẽnda ninga Sẽn-Ka-Saab roogã ne rĩmã zakã, la Zeruzalɛm dotã fãa bugum. Yẽnda ninga ro-bɛdã fãa bugum. 14Kalde tãb-biisã fãa sẽn dag n be ne gũudbã naabã sãama lals nins sẽn karg n gũbg Zeruzalɛmã.

15Gũudbã naab a Nebuzaradan talla tẽngã neb kẽer sẽn yaa naong rãmbã, ne sẽn kell-bã, la neb nins sẽn dag n dɩk b mens n kõ Babilond dĩmã, n paas tʋʋm-mitb nins sẽn kellã, n tɩ kẽes yembdo. 16La yẽnda yãka naong rãmb kẽer n bas tɩ b pa tẽngã pʋgẽ n ko reezẽ tɩɩsã la b ko pʋtã.

17 # 1Rĩm 7.15-47 Kalde rãmbã wãa zũud ra-lugdsã sẽn dag n be Sẽn-Ka-Saab roogã pʋgẽ wã, ne tebendsã la zũud sĩn-bedrã sẽn be beenẽ wã, n wʋk zũudã fãa n tall n kẽng Babilonde. 18Bãmb wʋka tompeglem laasã ne pɛll-dãmbã la sʋʋsã, ne zɩɩm mesb laasã, la wisd yõogr laasã, n paas zũud teed nins fãa b sẽn tar n maand Sẽn-Ka-Saab roogã tʋʋmdã. 19Gũudbã naab leb n wʋka sĩn-bãoonegã ne bugum laasã, la zɩɩm mesb laasã ne tompeglem laasã, la fɩtl dogendsã ne wisd yõogr laasã, la bõn-yũudl wamã, la bũmb nins fãa sẽn maan ne sãnem la wanzuri wã. 20Rĩm a Salmo sẽn dag n maan ra-lugds a yiibã ne sĩn-bedrã, la niig piig la a yiibã sẽn dag n yaa tebendsã Sẽn-Ka-Saab roogã yĩngã fãa rag n yaa teed sẽn maan ne zũudu, la b rag n ka tõe n bãng b zɩslmã tɛk ye. 21Ra-lugds a yiibã rag n zema taaba. B zãntlmã rag n yaa kãntɩɩg piig la a nii, tɩ wĩir woglem sẽn yaa kãntɩɩg piig la a yiib gilg-ba. B pʋsã yaa yogdo, t'a yembr fãa taglem tat nug-bil woglem. 22Zũud pugl n be ra-lugdg fãa zugu, la pugl fãa zãntlem dag n yaa kãntɩɩg a nu. La b rõoga gãmbr ne gernaad biis sẽn maan ne zũud gilli. La b rag n maana ra-lugdg a to wã ne a gernaad-dãmbã me a woto. 23Gernaad biis pis-wɛ la a yoob n dag n be ra-lugdsã kɩremsã, tɩ gernaad-dãmb koabg rag n karg n gũbg gãmbrã.

24Gũudbã naab yõka maan-kʋʋr kãsem a Seraya ne maan-kʋʋr kãsem-pʋgdg a Sofoni, n paas rigno-gũudb a tãabã. 25Tẽngã pʋga, yẽnda yõka tãb-biis naab a yembre, la a yõg rĩmã kug-zĩidbã sʋk neb a yopoe sẽn dag n be tẽngã pʋga, ne tãb-biis naabã seb-gʋlsd ning sẽn dag n get-a tẽngã tãb-biis yãkr yellã, n paas nebã sʋk neb pis-yoob sẽn dag n be tẽngã tẽn-sʋka.

26Gũudbã naab a Nebuzaradan talla bãmb n kẽng Babilond dĩmã nengẽ Ribla. 27La Babilond dĩmã kɩtame tɩ b kʋ bãmb Ribla, Hamat soolmã pʋgẽ. Yɩɩ woto la b tall Zʋʋda nebã n tɩ kẽes yembd n zãag ne b tẽngã.

28Ad neb nins a Nebukatnedzaar sẽn yõg n tall n kẽng yembdã sõore: yʋʋmd a yopoe soabã pʋgẽ, yɩɩ Zʋʋda neb tus a tã la pisi la a tã. 29A Nebukatnedzaar sẽn deeg a naamã tɩ yʋʋm piig la a niinẽ, yẽnda yõga Zeruzalɛm neb kobs nii la pistã la a yiibu n tall n loog yembdo. 30A sẽn deeg a naamã tɩ yʋʋm pisi la a tãablẽ, gũudbã naab a Nebuzaradan yõga Zʋʋda neb 745 n tall n loog yembdo. B sẽn yõg neb ninsã fãa sõor yaa neb.

B yiisa a Yoyakẽ bi-bees roogo

31B sẽn tall Zʋʋda rĩm a Yoyakẽ n tɩ kẽes yembdã tɩ yʋʋm pis-tã la a yopoɛɛlẽ, kiuug piig la a yiib soabã rasem pisi la a nu daare, Babilond dĩm a Evɩll-Merodak sẽn deeg a naamã yʋʋmde, a yiisa Zʋʋda rĩm a Yoyakẽ bi-bees roogo. 32A Evɩll-Merodak goma gom-nood ne a Yoyakẽ, n maan-a neere, n kõ-a naam sẽn yɩɩd rĩm-dãmb nins fãa sẽn dag n be ne yẽnda Babilond tẽngã. 33Woto, Babilond dĩm a Evɩll-Merodak kɩtame t'a Yoyakẽ yees a bi-bees roog futã n toeem futu, la a rag n naagda yẽnda n dɩt daar fãa hal n tãag a yõor tɛka. 34Dẽ, yɩɩ Babilond dĩm a Evɩll-Merodak n ges rĩm a Yoyakẽ yell daar fãa, hal n tãag a Yoyakẽ yõor tɛka.

Currently Selected:

A Zeremi 52: MPBU

Highlight

Copy

Compare