A Zeremi 9
9
Neb sẽn pid ne zĩrẽ yagbo
1Mam nong n paamẽ-la sik
zĩig we-raoogã pʋg wa so-toagdba,
n bas m nebã n looge.
Bala, b fãa yaa yoaadba,
b fãa yaa zãmb dãmba.
2Bãmb rõnega b zɛlmã wa tãpo,
n yagd zĩrẽ.
Bãmb sẽn tar pãng tẽngã pʋgẽ
wã ka sɩd la b maand ye.
Bãmb tʋʋmd yaa wẽng woo wẽng maanego,
la bãmb ka mi maam ye.
Maam a Sẽn-Ka-Saab n yeele.
3Bɩ ned kam fãa gũus a meng ne a to,
la bɩ ned ra leb n tẽ a saam-biis me ye.
Bala, neb maanda zãmb n belgd b saam-biisi,
la zoa kãnegda neb ne taaba.
4Bãmb fãa zãmbda taaba,
sẽn togsd-a sɩd ka be ye.
Bãmb zãmsa b zɛlma wã zĩrẽ yagbo,
bãmb maana wẽng n ka leb n tõe n tek ye.
5Bãmb tʋʋmd yaa zãmbg woo zãmbgo.
Bãmb maanda zãmb n ka rat n leb n bãng maam ye.
Maam a Sẽn-Ka-Saab n yeele.
6Woto yĩnga, Saasẽ-Pãng-Soabã yeelame:
«Mam na n ninga bãmb boaag pʋg n mak-ba.
M nebã maana wẽnga.
Yaa bõe la m na n maan-b moasã?
7Bãmb zɛlma wã yaa wa pe-zẽnem.
Bãmb goamã yaa belgr bala.
Bãmb gomda laafɩ goam ne
b yags n bẽt-ba.»
8Mam na n sɩbga bãmb bõn-kãens yĩnga.
Mam kõn dok m sũur ne buud a woto sɩda?
Maam a Sẽn-Ka-Saab n yeele.
Wiisg wakate
9Mam na n zĩnda tãmsã zut n yãb n wiisi.
Mam na n zĩnda rũmsã wãbneg zĩisẽ
we-raoogẽ wã n wiisi.
Bala, b wãkame,
tɩ ned ka leb n pɩʋʋgd be ye.
B ka leb n wʋmd rũms rãamd beenẽ ye.
Yĩngr bõn-yɩgdɩ wã ne we-rũmsã fãa zoeeme.
10Mam na n kɩtame tɩ Zeruzalɛm lebg kug-rʋre, la we-baas yiri.
Mam na n kɩtame tɩ Zʋʋda tẽmsã lebg zĩ-vɩɩdo,
tɩ ned ka leb n zĩnd beenẽ yɛs ye.
11Ãnda soab n tar yam n tõe wʋm
bõn-kãensã võore?
Bɩ Sẽn-Ka-Saab sẽn kõ ned ning bõn-kãens bilgrã togse.
Bõe yĩng tɩ tẽngã sãame,
n lebg wa we-raoog sẽn dɩ bugum
tɩ ned ka leb n tũud be n loogdẽ?
12La Sẽn-Ka-Saab yeela maam yaa: «Yaa bãmb sẽn bas m tõog ning mam sẽn kõ bãmba, n ka kelg m noorã yĩnga. 13La bãmb loba b nens kɛɛng n maan wa sẽn zems b sũ-keglmã, n waoog Baall-dãmb wa b yaab-rãmbã sẽn dag n zãms bãmbã. 14Woto yĩnga, maam a Saasẽ-Pãng-Soabã sẽn yaa Israyɛll Wẽnnaamã yetame: Mam na n kõo bãmb zẽed sẽn yaa toog liga tɩ b rɩ, la m kõ-b ko-zẽnem tɩ b yũ. 15Mam na n kɩtame tɩ b sãeeg n kẽng bu-zẽms bãmb ne b yaab-rãmbã sẽn ka mi sʋka. La m na n kɩtame tɩ b rig bãmb ne zabr sʋʋga, hal tɩ m menes-b zãnga.»
16Saasẽ-Pãng-Soabã yetame:
Tags-y-yã!
Bool-y pagb sẽn mi yãbrã tɩ b wa.
Kẽng-y n tɩ bool-y sẽn mi-b yãbr
sõamã wã tɩ b wa!
17Bɩ b wa tao-tao n wa wiis tõnd yĩnga.
La bɩ d yãb tɩ d nintãmã yi wa ko-bundum.
18Bala, b wʋmda wiisg sẽn yit Sɩyõ n yetẽ:
«Kayto! Tõnd sãamame! Yãnd tara tõndo!
Bala, tõnd yi n basa tẽngã.
B luba tõnd dotã.
19Pagba, kelg-y Sẽn-Ka-Saab goamã.
Wʋm-y bũmb nins bãmb sẽn yetã!
Zãms-y y kom-pugli yãbre,
la y zãms y pʋg-taabã wiisgu.
20Kũum tũu tõnd dotã võyẽ n kẽ.
A kẽe tõnd do-neebã pʋse.
A kɩtame tɩ kamb menem soay zutu,
la a kɩt tɩ ra-sãmb menem daas pʋse.
21Bɩ foom a Zeremi yeel tɩ maam a Sẽn-Ka-Saab
yeelame tɩ kũum na n dʋra tẽng wa birg sẽn be pʋt pʋsẽ,
la wa b sẽn kẽeb ki n dʋʋg n bas n loog
tɩ ned ka wʋk-a ye!»
Yam meng-meng yaa Wẽnnaam bãngre
22Sẽn-Ka-Saab yetame:
«Bɩ yam soab ra maan sũ-noog
ne a yamã ye.
Bɩ gãndaoog ra maan sũ-noog
ne a gãndaalmã ye.
Bɩ arzɛk soab me ra maan sũ-noog
ne a arzɛkã ye!
23 #
1Kor 1.31, 2Kor 10.17 Ned sã n dat n maan sũ-noogo,
bɩ a maan sũ-noog a sẽn tar yam la a mi maam,
la a miẽ tɩ mam yaa Sẽn-Ka-Saab
sẽn tʋmd ne nonglem la tɩrlem
ne zemsg dũniyã zugã yĩnga.
Bala, yaa bõn-kãens n noom maam.»
Maam a Sẽn-Ka-Saab n yeele.
Keoogr sẽn kẽ-b bãongã yĩnga
24Maam a Sẽn-Ka-Saab yetame: «Wakat n wate, tɩ m na n sɩbg neb nins fãa sẽn kẽ yĩng bãongã: 25Yaa Ezɩpt ne Zʋʋda la Edom ne Amo nebã, la Moaab ne we-raoogã neb nins sẽn kõogd b yɛɛmã. Bala, buud toay-toayã fãa ka kẽ bãong ye, la Israyɛll buudã fãa sũyã ka kẽ bãong ye.»
Currently Selected:
A Zeremi 9: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
